Biblia Todo Logo
Bìoball air-loidhne

- Sanasan -

Lawa a wúlu-bɔlen 18 - LAWA A BOO SONBORE


Lɔ laanka Giĩ a giã-kun mɛn bɛ́ a siĩn wa

1 Dɛnaa Lawa boo da ka Muizu ni á pɛ nɛ:

2 Boo da ka Izirayeli minin lɛn nɛ, n pɛ ǹ nɛ kɛnɛn: masɛ din Dɛnaa Lawa n kaa Lawa lɛa.

3 Ka giã Ezipti gána mɛn nɛ lɛlɛ, ka nyan toa ka bɛa minin kɛn giã ǹ gɔn saa wa. Ma bɛ́ re woe ka nɛ Kanaan gána mɛn dɔ nɛ, ka nyan toa ka bɛa minin kɛn giã ǹ gɔn saa wa. Landa boon kɛn, ka nyan toa ka kɔ bɛn lɛ wa.

4 Maa sii yɔrɔ bɔ ǹ boon kɛn bɛ́ màn mɛn pii, ka bɛ zɛnaa, ka masɛ a landa boon kɛn dɔn si, ka kɔ ǹ lɛ. Ma din Dɛnaa Lawa n kaa Lawa lɛa.

5 Ka maa landa boon laanka maa sii yɔrɔ bɔ ǹ boon kɛn si. Bɛn lɛn bɛ́ màn mɛn pii, bɛ̀ min mɛn bɛ zɛnaa, ǹ dɛnaa n yiikoonaabaa yii. Masɛ din nə Dɛnaa Lawa lɛa.

6 Min kɔn baran n mɔrɔ ǹ dɔɔ̃n lɔ ganaa, a giã kun ni wa. Ma din nə Dɛnaa Lawa lɛa.

7 Min kɔn baran giã kun ka a yɛ ǹ dan nɛ wa. Bɛ̀ min mɛn bɛ zɛnaa, ǹ dɛnaa na á sìi da ǹ di ganaa. A bɛ́ nə ǹ dan lɛa, a doamaa bie a giã kun ni wa.

8 Min kɔn baran toa a giã kun ka ǹ di a lɔ kɔsɔ-n wa. Bɛ̀ min mɛn bɛ zɛnaa, ǹ dɛnaa na á sìi da ǹ di ganaa.

9 Min kɔn baran toa a giã kun ka ǹ miãnɛn nɛ wa. Ta ǹ di a yii ni hinlaa ta min kɔsɔ a yii ni, ta a na á too kion hinlaa ta a na á too kanaa.

10 Min kɔn baran toa a giã kun ka a nɔ̀ɔn nɛ wa. Ta a nɛgiĩ a nɛlɔ nɛ, hinlaa ta a nɛlɔ wɔ nɛ. Bɛ̀ min mɛn bɛ zɛnaa, ǹ dɛnaa na á sìi da a din ganaa.

11 Min kɔn baran toa a giã kun ka ǹ di a lɔ kɔsɔ a nɛlɔ-n wa. Ǹ dinɛ bɛ́ nɛ, ǹ miãnɛn nɛ.

12 Min kɔn baran toa a giã kun ka ǹ dɛlan nɛ wa. A giala, a laanka ǹ di lɛ n dinɛn lɛa.

13 Min kɔn baran toa a giã kun ka a náa ǹ dan nɛ-n wa. A giala, a laanka ǹ dan lɛ n dannɛn lɛa.

14 Min kɔn baran toa a giã kun ka ǹ di ǹ dɔɔ̃n a lɔ-n wa. A giala, ǹ dan nɛ. Bɛ̀ min mɛn bɛ zɛnaa, ǹ dɛnaa na á sìi da ǹ di ǹ dɔɔ̃n lɛ ganaa.

15 Min kɔn baran toa a giã kun ka ǹ manaa-n wa. A giala, a nɛgiĩ a lɔ nɛ. N nyan toa n giã kun ni wa.

16 Min kɔn baran toa a giã kun ka ǹ dɔɔ̃n a lɔ-n wa. Bɛ̀ min mɛn bɛ zɛnaa miɛ̃, ǹ dɛnaa lɛ na á sìi da ǹ dɔɔ̃n lɛ dinmaa ganaa.

17 Min kɔn baran toa a giã kun ka lɔ nɛ, a giã kun ka lɔ lɛ a nɛlɔ dɔ-n wa. A baran a nɛgiĩ a nɛlɔ, hinlaa a nɛlɔ a nɛlɔ saa lɔ lɛa, a giã kun ni wa. A giala, lɔ gole lɛ din tɔrɔn manɛ. Bɛ̀ min mɛn bɛ zɛnaa, kɔrɔbaa nɛ.

18 Min kɔn baran toa a ǹ goãnlɔ saa lɔ lɛa, a giã kun ni, a lɔ lɛ dɔ yii n tɔn koo wa. Bɛ̀ min mɛn bɛ zɛnaa, a n die ǹ kiɛ miã goã-bɔ ganaa.

19 Bɛ̀ lɔ a mui tá a ganaa, a n gɔ̀dɛnaa lɛa. Min kɔn baran toa a n mɔrɔ a ganaa bɛa biikoo li, a pɛ mà a n giɛ̃ kun ni wa.

20 Min kɔn baran toa a giã kun ka ǹ miã a lɔ nɛ, a *gɔ̀ da a din ganaa wa.

21 Min kɔn baran toa a na a nɛ kɔ, ǹ wúlu bɔ nɛ dì Molɛki kɛ ganaa wa. Min kɔn baran toa a Lawa tɔ ziziɛ̃ wa. Masɛ din ni Dɛnaa Lawa lɛa.

22 Min kɔn baran toa a giã kun ka giĩ ni, ka ǹ bɛ́ giɛ̃ kun ka lɔ-n lɔn wa. Bɛ̀ min mɛn bɛ zɛnaa, sii bɔbɔnɛɛ nɛ.

23 Min kɔn baran toa a giã kun ka tɔɔ nɛ, a gɔ̀ da a din ganaa wa. Lɔ kɔn dɔ baran n din kɔ tɔɔ la, a ga li wa. Bɛ̀ min mɛn bɛ zɛnaa, sii gɛsɛ nɛ.

24 Ka baran bɛa sii kɛ lɛ kɔn zɛnaa, ka gɔ̀ da ka dinin ganaa wa. A giala, ma bɛ́ tɔrɔn mɛnɛn lɛn lui ǹ boe ka nyɛɛnɛ, bɛa siin kɛn lɛn man nə́ ǹ gɔgɔrɛ kɔ.

25 Gána lɛ din gɔgɔrɛ kɔ. Má a sii baraa a dɔlɔ bɔ a ganaa. Bɛ lɛ n ke, gána lɛ nə́ n bɔ a minin li.

26 Kasɛn Izirayeli minin lɛn, ka min mɛnɛn bɛ́ gùlin lɛa giã nɛ ka bii, ka maa landa boon laanka maa sii yɔrɔ bɔ ǹ boon kɛn tamaa. Ka nyan toa ka bɛa sii bɔbɔnɛɛ kɛ lɛ kɔn zɛnaa wa.

27 Min mɛnɛn nə goã giã-n gána lɛ nɛ, bɛ̀ ka bɛ́ ka tɔn daa wa, bɛn man nə́ bɛa sii bɔbɔnɛɛ kɛ lɛ tumaa zɛnaa. Bɛ lɛ dɔ na á gána lɛ gɔgɔrɛ kɔ.

28 Min mɛnɛn nə goã gána lɛ-n lɛlɛ, bɛn man nə́ gána lɛ gɔgɔrɛ kɔ, bɛ lɛ nɛ, gána lɛ nə́ n bɔ ǹ li. Sɛnɛ, bɛ̀ kasɛn nə gána lɛ gɔgɔrɛ kɔ wa, gána lɛ a die n boe ǹ li ka á ke á n bɔ bɛn li lɔn wa.

29 Sɛnɛ, bɛ̀ min mɛn bɛa sii bɔbɔnɛɛ kɛ lɛ mɛn goon zɛnaa, ka ǹ dɛnaa loo, ka bɔ Izirayeli tɔrɔn bii.

30 Ma pɛ ka nɛ máa ka boon mɛnɛn tamaa, ka n doa ka bɛn lɛn tamaa, màn mɛn bɛ́ toɛ, ǹ goã landa bɔbɔnɛɛn mɛnɛn zɛnɛɛ gána lɛ nɛ, bɛ̀ ka bɛ́ ka tɔn daa wa, ka nyan toa ka bɛn zɛnaa wa. Ka baran gɔ̀ da ka dinin ganaa ka bɛ miã siin kɛn nɛ wa. Masɛ din Dɛnaa Lawa n kaa Lawa lɛa.

San Catholic Edition Bible © Bible Society of Burkina Faso, 2013.

Bible Society of Burkina Faso
Lean sinn:



Sanasan