Lawa a wúlu-bɔlen 16 - LAWA A BOO SONBORE

Sii baraa sawaa ǹ lɛawaa gole

¹ Aarɔn a nɛgiĩ min paa mɛn wo kɔn yɛ ka Dɛnaa Lawa nɛ ǹ kion kɛ yɔrɔ-a ka tɛ soree ne, bɛn nə́ gã. Bɛn lɛn gɛ̀ kio, Dɛnaa Lawa boo da ka Muizu ni

² á pɛ nɛ: a pɛ ǹ dɔɔ̃ngiĩ Aarɔn nɛ: Bǎã sonbore sonbore ke, kion bii kuru kɔn-a ǹ mɔnaa lɛ nyɛɛnɛ, Lawa a *lɛ kɔ kɔn la ǹ goo laanka a lɛpii kɛ yɔrɔ-a, a nyan toa a wɔ walan biikoo tumaa li wa, màn mɛn bɛ́ toɛ, a baran gã wa. A giala, ma á re goɛ̃ bɛ̀ man din nyaa goo lɛpii lɛ lalan tɛmaa bara bii.

³ Bɛ̀ Aarɔn tá woe kɔn yɛ ka Lawa nɛ ǹ kion kɛ nɛ, yǎa dii gɔ̀lɔ̀ goɛ̃ a gɔn, á n die bɛ biɛ sii baraa sawaa ǹ *wúlu màn lɛa, ka sère gɔ̀lɔ̀ nɛ, á n die bɛ biɛ wúlu màn tiɛ̃ lɛa.

⁴ Dɔnkɛ mɛn bɛ́ ǹ nə́ zɛnaa ka mɔnaa guguru sonbore ne, Lawa a dí nya ǹ wɔ lɛa, a bɛ wɔ, a mɔnaa guguru sonbore bɛ̀rɛ̀ wɔ, a n binbin yii ka a maabɛlɛ nɛ, a na a mɔnaa gɔn yii a mìi ganaa. Lawa a dí nya ǹ mɔnaan manɛ. Bɛ lɛ taman yii, a n zoo, a tɔn nə ǹ wɔ.

⁵ A pɛ Izirayeli zaman lɛ nɛ, ǹ butumu màn paa kɔ la, a die a bɛn baa sii baraa sawaa ǹ wúlu màn lɛa, ka sère gɔ̀lɔ̀ goon ne, a die a bɛ baa wúlu màn tiɛ̃ lɛa.

⁶ Aarɔn dii gɔ̀lɔ̀ lɛ dɛ a din a sii baraa sawaa ǹ wúlu màn lɛa, a sii baraa sawaa ǹ wúlu bɔ nɛ, a din laanka a kion minin lɛa.

⁷ A butumu màn paa lɛ dɔ kũ, a da ǹ koa Dɛnaa Lawa yɔrɔ-a, kɔn yɛ ǹ kion kɛa kiɛnlɛ-a.

⁸ Aarɔn nə n pã butumu màn paa lɛ ganaa, á goon bɔ Dɛnaa Lawa wɔ lɛa, a goon bɔ Azazeli wɔ lɛa.

⁹ Pã lɛ mɛnaa butumu lɛ a mɛn la Dɛnaa Lawa wɔ lɛa, Aarɔn da bɛ nɛ, a baa sii baraa sawaa ǹ wúlu màn lɛa.

¹⁰ Sɛnɛ, butumu lɛ a mɛn bɛ́ pã lɛ mɛnaa la Azazeli wɔ lɛa, ǹ bɛ kũ a yii n koo, ǹ da koa Dɛnaa Lawa yɔrɔ-a, ǹ tɔn loo ǹ dia Azazeli la don, sii baraa sawaa ǹ wúlu màn lɛa.

¹¹ Aarɔn dii gɔ̀lɔ̀ lɛ dɛ a din a sii baraa sawaa ǹ wúlu màn lɛa, a sii baraa sawaa ǹ wúlu bɔ nɛ, a din laanka a kion minin lɛa. Bɛ̀ á bɛa dii gɔ̀lɔ̀ lɛ dɛ a din a sii baraa a lɛa ǹ mɛn waáraa,

¹² a tɛ nàn bɔ *wúlu bɔ ǹ bǎã kɛ nɛ, lɛ kɔ kɔn la ǹ goo lɛ yɔrɔ-a, da yon gìĩ kɔɔ̃n tã ǹ fɔlɔ tàãn kɛ piɛ̃, ka da yon gìĩ kɔɔ̃n wùsu ni, a gɔn paa piɛ̃, a da ǹ nɛ kion bii kuru kɔn-a ǹ mɔnaa kɛ nyɛɛnɛ.

¹³ A da yon gìĩ kɔɔ̃n lɛ kaa tɛ nàn lɛ la walan, lɛ kɔ kɔn la ǹ goo lɛ yɔrɔ-a. A tɛmaa á die yui, a n kɔ lɛ kɔ kɔn la ǹ goo lɛ laanka a lɛpii lɛ. Bɛ lɛ n die toɛ, a ná a re giɛ̃ wa.

¹⁴ Aarɔn nə n gòon goon sã dii gɔ̀lɔ̀ lɛ a mà li, á pɛsɛ̃ lɛ kɔ kɔn la ǹ goo lɛ a lɛpii ganaa, a lɛ̀giala gɔn la. Bɛ kio, á n gòon sã li, bɛ̀ a pɛsɛ̃ lɛ kɔ kɔn la ǹ goo lɛ yɔrɔ-a, yǎa gunyin sɔbaa.

¹⁵ Bɛa kiɛ̃ kio, butumu mɛn bɛ́ zaman lɛ a sii baraa sawaa ǹ wúlu màn lɛa, á bɛ bɔlɔ kuru, a wo ka a mà nɛ kion bii kuru kɔn-a ǹ mɔnaa lɛ nyɛɛnɛ. A sii mɛn zɛnaa ka dii gɔ̀lɔ̀ lɛ a mà nɛ, a bɛ lɛ miã zɛnaa ka butumu lɛ dɔ a mà nɛ. A pɛsɛ̃ goo lɛ lɛpii ganaa, a pɛsɛ̃ goo lɛ yɔrɔ-a.

¹⁶ A *gɔ̀ bɔma-a ǹ landa zɛnaa bǎã sonbore sonbore kɛ a lɛa, a Izirayeli minin Lawa bɔlɔ tii siin kɛn gɔ̀ bɔ a bɔ ǹ ganaa. Bɛ giala, mà ǹ siin baraan lɛn tumaa. Kɔn yɛ ka Lawa nɛ ǹ kion mɛn bɛ́ bɛa gɔ̀dɛnan kɛn lɛn bii, ǹ na a din sii goon lɛ zɛnaa bɛ dɔ a lɛa.

¹⁷ Bɛ̀ Aarɔn tá we kɔn yɛ ǹ kion kɛ nɛ ǹ mɛn waáraa, a n woe sii baraa sawaa ǹ wúlu boe bǎã sonbore sonbore kɛ nɛ, min kɔn doamaa bie a goã walan wa, yǎa Aarɔn soe. A sii baraa sawaa ǹ wúlu bɔ a din a lɛa, a kion minin lɛa, Izirayeli zaman tumaa a lɛa.

¹⁸ Wúlu bɔ ǹ bǎã mɛn lɛ á ke kɔn yɛ ka Dɛnaa Lawa nɛ ǹ kion lɛ yɔrɔ-a, a wusoo a da walan, a gɔ̀ bɔma-a ǹ landa zɛnaa bɛ dɔ a lɛa. A dii gɔ̀lɔ̀ lɛ laanka butumu lɛ mà saa, a kaa wúlu bɔ ǹ bǎã kɛ a bìbìn ganaa, a gùrùn ganaa.

¹⁹ Bɛ kio, a n gòon sã mà lɛ li, a pɛsɛ̃ wúlu bɔ ǹ bǎã lɛ ganaa gunyin sɔbaa. Bɛ̀ á zɛnaa miɛ̃, á die Izirayeli minin gɔ̀dɛnaabaa ǹ siin kɛn pii a ǹ bɔ ǹ ganaa, a ǹ *yoreen kɔ.

²⁰ Bǎã sonbore sonbore kɛ nɛ, kɔn yɛ ǹ kion lɛ a paǹ gialakun ni, ka wúlu bɔ ǹ bǎã kɛ nɛ, bɛ̀ Aarɔn gɔ̀ bɔma-a ǹ landa zɛnaa bɛn lɛa á nya, a pɛ ǹ nɛ, mà ǹ da ka butumu yiikoonaa lɛ nɛ.

²¹ Aarɔn nə n gɔnɔn paanan kaa butumu yiikoonaa lɛ mìi ni, a Izirayeli minin lɛn sii baraan tumaa pɛ a lalan, ǹ sã ǹ siin tumaa laanka ǹ Lawa bɔlɔ tii ǹ siin tumaa nɛ, á bɛn kaa butumu lɛ mìi ni. Bɛ kio, ǹ min bɔ a tɔ-a, bɛ loo a wo koa don.

²² Bɛa dɛnaa butumu lɛ loo a dia don, butumu lɛ wo ka ǹ sii baraan lɛn tumaa nɛ a mìi ni.

²³ Aarɔn wɔ ka mɔnaa guguru sonboren mɛnɛn nɛ bǎã sonbore sonbore lɛ nɛ, a ǹ sɔlɔ, a ǹ kaa tán walan.

²⁴ Ǹ bǎã mɛn bɔ ǹ nə́ koa Lawa wɔ lɛa, a n zoo walan, a tɔn na a mɔnaan lɛn goa a ǹ wɔ. Bɛ kio, a soo kəni, a na a din laanka zaman lɛ a wúlu màn tiɛ̃ dɛ, a sii baraa sawaa ǹ wúlu bɔ a din laanka zaman lɛ a lɛa.

²⁵ Sii baraa sawaa ǹ wúlu mànan kɛn, a bɛn nyɔɔ tã lenlen, wúlu bɔ ǹ bǎã kɛ lalan.

²⁶ Min mɛn butumu lɛ loo á woo kɔ Azazeli la, bɛ doamaa nɛ a na a mɔnaan pii, a n zoo, a tɔn wɔ Izirayeli minin giã ǹ bǎã kɛ nɛ.

²⁷ Ǹ dii gɔ̀lɔ̀ laanka sère gɔ̀lɔ̀ mɛn bɔ sii baraa sawaa ǹ wúlu màn lɛa, ǹ nə́ woo ka ǹ mà nɛ bǎã sonbore sonbore kɛ nɛ, ǹ nə́ sii baraa sawaa ǹ wúlu bɔ nɛ, ǹ wo ka bɛn nɛ Izirayeli minin giã ǹ bǎã kɛ kio, ǹ na a tumaa tã lenlen: ǹ ki ni, ǹ siĩ ni, ǹ nànan nɛ.

²⁸ Min mɛn bɛ́ re ǹ tiɛ̃, bɛa dɛnaa doamaa nɛ a na a mɔnaan pii, a n zoo, a tɔn wɔ Izirayeli minin giã ǹ bǎã kɛ nɛ.

²⁹ Kɛ n landa lɛa, ka mìi-n miɛ̃ duduu, a ná a ba n bɔyɛɛ wa: mui sɔbaabaa ǹ wɔ a lɛawaa fùbaa ǹ wɔ pinaa, ka n lɛ sɔɔ, min baran dí kɔn dɔ nya bɛa pinaa wa. Ta gána lɛ a min ni, ta gùli ni giã nɛ ka bii.

³⁰ A giala, bɛa pinaa kɛ lɛ nɛ, ǹ tá sii baraa sawaa ǹ wúlu boe kaa lɛa, ǹ tá gɔ̀ boe ka ganaa, màn mɛn bɛ́ toɛ ka goã yoreene Dɛnaa Lawa yɔrɔ-a, sii baraa kɔn ná a ba ka ganaa wa.

³¹ Ka bɛa lɛawaa kɛ lɛ koa *susu ǹ pii lɛa, bɛ̀ ka n susu li, ka n lɛ sɔɔ. Bɛ n landa lɛa yǎa duduu.

³² Ǹ nyɔɔ kaa min mɛn mìi ni, ǹ nə́ bɔ ǹ nə́ koa Lawa a wúlu-bɔle lɛa, ǹ nə́ dí wɔ a gɔn, mà a nya ǹ dí bǎã nɛ, bɛ n sii baraa sawaa ǹ wúlu lɛ boe. Lawa a dí nya ǹ dɔnkɛn kɛn, ǹ nə́ ǹ zɛnaa ka mɔnaa guguru sonbore ne, a doamaa nɛ a bɛn wɔ.

³³ Bǎã sonbore sonbore ke, a bɛa gɔ̀ bɔma-a ǹ landa zɛnaa, kɔn yɛ ǹ kion lɛ a paǹ gialakun wɔ nɛ, ka wúlu bɔ ǹ bǎã kɛ wɔ nɛ. A zɛnaa Lawa a wúlu-bɔlen laanka Izirayeli zaman tumaa wɔ lɛa.

³⁴ Kɛ n landa lɛa, sii baraa sawaa ǹ wúlu bɔ wɔ paǹ li. Bɛa landa kɛ lɛ nə ǹ mìi ni miɛ̃ duduu, a ná a ba n bɔyɛɛ wa. A nə n zɛnɛɛ gunyin goon lɛ̀ woo lɛ̀, Izirayeli minin lɛn sii baraa tumaa taman yii. Dɛnaa Lawa boo mɛn pɛ Muizu ni, ǹ nə́ bɛ lɛ zɛnaa.