Lawa a wúlu-bɔlen 14 - LAWA A BOO SONBORE

Gɔ̀ bɔ gɔ̀nɔn ki busu babaraa dɛnaa ganaa

¹ Dɛnaa Lawa boo da ka Muizu ni á pɛ nɛ:

² Gɔ̀nɔn ki busu babaraa dɛnaa a *gɔ̀ bɔma-a pinaa, landa mɛn doamaa bɛ́ nɛ a n zɛnaa, bɛ n ka kɛ nɛ. Bɛ̀ ǹ ta woe ne Lawa a wúlu-bɔle li,

³ a soo a n bɔ Izirayeli minin giã ǹ bǎã kɛ nɛ, a ga a ganaa. Bɛ̀ wúlu-bɔle lɛ yɛ, mà bɛa dɛnaa a gɔ̀nɔn ki busu babaraa lɛ nya á n bɔ a ganaa,

⁴ a gɔ̀ bɔma-a taman yii, wúlu-bɔle lɛ pɛ, mà ǹ da ka mànan kɛn nɛ: bàan yiikoonaa màn paa, ǹ mɛnɛn bɛ́ yoreene, *sɛdrə da kɛa gɔn nɛ, sère ka tã zenzen ne, ka *izopi da gùrù ni.

⁵ Màn mɛn bɛ́ ǹ nə́ zɛnaa ka gì ni, mu yoreen ná a nɛ, wúlu-bɔle lɛ pɛ, mà ǹ bàan lɛ a goon bɔlɔ kuru bɛ lalan.

⁶ Bɛ kio, ǹ bàan yiikoonaa lɛ kũ, a sɛdrə da gɔn lɛ saa, ka gɛ̀sɛ tã zenzen lɛ laanka izopi gùrù lɛ nɛ. A bàan mɛn bɔlɔ kuru mu yoreen lɛ lalan, a bɛa mànan lɛ sã bɛ mà li, kun ka bàan yiikoonaa lɛ nɛ.

⁷ Min mɛn lɛ á ke gɔ̀nɔn ki busu babaraa lɛ a gɔ̀ boe a din ganaa, a bàan mà lɛ pɛsɛ̃ bɛa dɛnaa ganaa gunyin sɔbaa, a tɔn pɛ mà á yoreene. Bɛ kio, a n gɔn bɔ bàan yiikoonaa lɛ sɛ ganaa, bɛ piɛ̃ a wo don.

⁸ Min mɛn lɛ bɛ́ gɔ̀ boe a din ganaa, bɛ na a mɔnaan pii kəni, a n ka tumaa kɔɔ̃, a n zoo mu li, a tɔn *yoreen kɔ. Bɛ kio, a wo giã ǹ bǎã lɛ nɛ. Sɛnɛ, a n giɛ̃ kanaa, a ba we a mɔnaa kion wa, yǎa lɛawaa sɔbaa.

⁹ A lɛawaa sɔbaabaa ǹ wɔ pinaa, a n ka tumaa kɔɔ̃: a mìi ka nɛ, a lɛtoro ka nɛ, a yii ka nɛ. A n ka tumaa kɔɔ̃. Bɛ kio, a na a mɔnaan pii, a n zoo, a die yoreen koe.

¹⁰ A lɛawaa kiwisibaa ǹ wɔ pinaa, a sère nɛ gɔ̀lɔ̀n paa kũ, wɔ̀lɔ̀ ná a ba ǹ ganaa wa, ka lɛ̀ goon sère nɛ luun ni, wɔ̀lɔ̀ ná a ba a ganaa wa. A *wùsu sonbore kilo manangɔrɔ yaa ka nyɔɔ nɛ, Lawa gɔ ǹ wɔ lɛa, a bɛ dɔ saa ka nyɔɔ litiri talɛɛ nɛ.

¹¹ Lawa a wúlu-bɔle mɛn bɛ́ gɔ̀ bɔma-a ǹ landa lɛ zɛnɛɛ, bɛ gɔ̀ bɔ a din ganaa wole lɛ laanka a mànan lɛn koa Dɛnaa Lawa yɔrɔ-a, kɔn yɛ ǹ kion kɛa kiɛnlɛ-a.

¹² Wúlu-bɔle lɛ sère nɛ lɛ goon kũ, a nyaa zɛ̀rɛ si ǹ *wúlu màn lɛa, kun ka nyɔɔ litiri talɛɛ lɛ nɛ. A na a kɔ Lawa la ǹ sii zɛnaa Dɛnaa Lawa yɔrɔ-a,

¹³ a tɔn na a bɔlɔ kuru Lawa a bǎã kɛ nɛ, ǹ nə ǹ mɛn lɛ koa sii baraa sawaa ǹ wúlu màn laanka wúlu màn tã ǹ bǎã lɛa. Zɛ̀rɛ si Lawa la ǹ wúlu màn laanka sii baraa sawaa ǹ wúlu màn kɛ a sii n goon: A siĩ n doe Lawa a wúlu-bɔle ganaa. A giala, Lawa wɔ nɛ.

¹⁴ Wúlu-bɔle zɛ̀rɛ si Lawa la ǹ wúlu màn lɛ saa, a ǹ kɔn lɔ gɔ̀ bɔ din ganaa wole lɛ gusin a too lɛwɔn ganaa, a gusin a gɔn a gòon mìi gole ne, ka a gusin a gòã a gòon mìi gole ne.

¹⁵ Wúlu-bɔle lɛ nyɔɔ litiri talɛɛ lɛ saa, aǹ kɔn dɔɔ a gɔsɛ a gɔn nɛ.

¹⁶ À n gusin a gòon mìi gole a koamala sã bɛa nyɔɔ lɛ li walan, gunyin sɔbaa, a pɛsɛ̃ kɔn yɛ ka Lawa nɛ ǹ kion kɛ yɔrɔ-a.

¹⁷ Nyɔɔ lɛ a mɛn bɛ́ goɛ̃ a gɔn, a bɛ kɔn lɔ gɔ̀ bɔ din ganaa wole lɛ a gusin a too lɛwɔn ganaa, a ǹ kɔn lɔ a gusin a gɔn a gòon mìi gole ganaa, ka a gusin a gòã a gòon mìi gole ne, zɛ̀rɛ si Lawa la ǹ wúlu màn lɛ a mà lalan.

¹⁸ Nyɔɔ lɛ a mɛn bɛ́ goɛ̃ a gɔn, a bɛ kaa gɔ̀ bɔ din ganaa wole lɛ mìi ni. Wúlu-bɔle lɛ doamaa nɛ a gɔ̀ bɔmaa ǹ wúlu lɛ bɔ a lɛa Dɛnaa Lawa yɔrɔ-a.

¹⁹ A sii baraa sawaa ǹ wúlu bɔ. Min mɛn bɛ́ gɔ̀ boe a din ganaa, a gɔ̀ bɔma-a ǹ landa zɛnaa bɛa lɛa, bɛ kio, a tɔn wúlu màn tiɛ̃ kɛa tɔɔ dɛ.

²⁰ Wúlu-bɔle lɛ wo ka wúlu màn tiɛ̃ laanka Lawa gɔ ǹ màn kɛ nɛ, *wúlu bɔ ǹ bǎã nɛ. A gɔ̀ bɔ min ganaa ǹ landa zɛnaa bɛa dɛnaa lɛ a lɛa ka bɛa yɔrɔ lɛ nɛ, á die yoreen koe.

²¹ Bɛ̀ màn ba ǹ dɛnaa gɔn, á n boe la á n doe bɛa mànan kɛn lɛn tumaa ganaa wa, a sère nɛ gɔ̀lɔ̀n goon kũ. Ǹ bɛa sère nɛ lɛ a kɔ Lawa la ǹ sii zɛnaa, ǹ baa zɛ̀rɛ si Lawa la ǹ wúlu màn lɛa, màn mɛn bɛ́ toɛ ǹ gɔ̀ bɔma-a ǹ landa zɛnaa bɛa dɛnaa lɛ a lɛa. A wùsu sonbore kilo sɔɔ dinsɔɔ̃ yia ka nyɔɔ nɛ, Lawa gɔ ǹ wɔ lɛa, a bɛ dɔ saa, ka nyɔɔ litiri talɛɛ nɛ.

²² A wuruun paa hinlaa zɛ̀rɛkantoa màn paa kũ, ǹ mɛn a wɔrɔ bɛ́ boe la á yii a gɔn. A goon baa sii baraa sawaa ǹ wúlu màn lɛa, a goon baa wúlu màn tiɛ̃ lɛa.

²³ A lɛawaa kiwisibaa ǹ wɔ pinaa, a da bɛa mànan lɛn kɔ Lawa a wúlu-bɔle la, kɔn yɛ ǹ kion kɛ a kiɛnlɛ-a, Dɛnaa Lawa yɔrɔ-a, a din a gɔ̀ bɔma-a ǹ mànan lɛa.

²⁴ Wúlu-bɔle lɛ zɛ̀rɛ si Lawa la ǹ sère nɛ lɛ kũ, a nyɔɔ litiri talɛɛ lɛ dɔ saa. A ǹ kɔ Lawa la ǹ sii zɛnaa Dɛnaa Lawa yɔrɔ-a.

²⁵ A zɛ̀rɛ si Lawa la ǹ sère nɛ lɛ bɔlɔ kuru, a na a mà si, a ǹ kɔn lɔ gɔ̀ bɔ din ganaa wole lɛ a gusin a too lɛwɔn ganaa, a ǹ kɔn lɔ a gusin a gɔn a gòon mìi gole ganaa, ka a gusin a gòã a gòon mìi gole ne.

²⁶ Wúlu-bɔle lɛ nyɔɔ boɛɛn dɔɔ a gɔsɛ a gɔn nɛ.

²⁷ A n gusin a gòon mìi gole a koamala sã bɛa nyɔɔ lɛ li walan, gunyin sɔbaa, bɛ̀ a pɛsɛ̃ kɔn yɛ ka Dɛnaa Lawa nɛ ǹ kion kɛ yɔrɔ-a.

²⁸ Wúlu-bɔle lɛ zɛ̀rɛ si Lawa la ǹ wúlu màn lɛ a mà lɔ gɔ̀ bɔ din ganaa wole lɛ paǹan mɛnɛn ganaa, nyɔɔ mɛn lɛ bɛ́ a gɔn, a bɛ dɔ lɔ bɛa bǎãn lɛn ganaa: a gusin a too lɛwɔn nɛ, a gusin a gɔn a gòon mìi gole ne, ka a gusin a gòã a gòon mìi gole ne.

²⁹ Nyɔɔ lɛ a mɛn bɛ́ goɛ̃ a gɔn, a bɛ kaa gɔ̀ bɔ din ganaa wole lɛ mìi ni, a gɔ̀ bɔma-a ǹ wúlu bɔ a lɛa, kɔn yɛ ka Dɛnaa Lawa nɛ ǹ kion kɛ yɔrɔ-a.

³⁰ Bɛ̀ ǹ dɛnaa lɛ dɔ bàanan lɛn mɛnɛn ganaa, wuruunun manɛ hinlaa zɛrɛkantoanan manɛ,

³¹ wúlu-bɔle lɛ goon baa sii baraa sawaa ǹ wúlu màn lɛa, a goon kɛ baa wúlu màn tiɛ̃ lɛa, kun ka Lawa gɔ ǹ màn lɛ nɛ. Wúlu-bɔle lɛ gɔ̀ bɔma-a ǹ landa zɛnaa, gɔ̀ bɔ din ganaa wole lɛ a lɛa, kɔn yɛ ka Dɛnaa Lawa nɛ ǹ kion kɛ yɔrɔ-a.

³² Landa mɛn bɛ́ a tan, gɔ̀nɔn ki busu babaraa dɛnaa wɔ paǹ li, ǹ mɛn bɛ́ a boe la á doe màn ganaa, a din a gɔ̀ bɔma-a wɔ lɛa wa, a din lɛ n ka bɛ nɛ.

Kion a sulii

³³ Dɛnaa Lawa boo da ka Muizu laanka Aarɔn nɛ á pɛ ǹ nɛ:

³⁴ Bɛ̀ ka wɔ Kanaan gána lɛ nɛ, masɛ bɛ́ gána mɛn lɛ koe ka la kaa wɔ lɛa, bɛa gána kɛ lɛ die kaa wɔ biɛ, bɛ̀ masɛ sulii bǎã da kion mɛn nɛ,

³⁵ bɛa kion lɛ a dɛnaa wo a boo da Lawa a wúlu-bɔle ne, a pɛ nɛ: «Má màn kɔn yɛ maa kion, a n ka sulii bǎã nɛ.»

³⁶ Bɛ̀ á miɛ̃, wúlu-bɔle lɛ pɛ mà ǹ soo ka kion lɛ a mànan nɛ, asɛ tɔn wɔ a nɛ, ń giɛ màn mɛn tumaa goã kion lɛ nɛ, ǹ kɔn baran gɔgɔrɛ kɔ wa. Bɛ kio, wúlu-bɔle lɛ wɔ a ga kion lɛ ganaa.

³⁷ A ga sulii bǎã lɛ ganaa. Sulii bǎã mɛn bɛ́ kion lɛ gɔ̀nɔn ganaa, Bɛ̀ a yii n ka a n buu buruu lɛa, hinlaa ka a n tã, bɛ̀ á baa ka a n die wɔ̀lɔ̀ diɛ kion lɛ gɔ̀nɔn ganaa,

³⁸ wúlu-bɔle lɛ soo a n bɔ kion lɛ nɛ, a da a kiɛnlɛ-a. A kion lɛ a kiɛnlɛ sɔɔ yǎa lɛawaa sɔbaa.

³⁹ A lɛawaa sɔbaabaa ǹ wɔ pinaa, wúlu-bɔle lɛ nə n bɔyaa a da ga a ganaa. Bɛ̀ màn mɛ sulii bǎã lɛ li kion lɛ gɔ̀nɔn ganaa,

⁴⁰ sulii bǎã lɛ bɛ́ kion lɛ a kɔlɔn mɛnɛn ganaa, wúlu-bɔle lɛ pɛ ǹ nɛ, mà ǹ bɛn waa, ǹ wo ǹ zũ kiwi lɛ kio, màn gɔgɔrɛ kaa ǹ bǎã nɛ.

⁴¹ Wúlu-bɔle lɛ pɛ ǹ nɛ, mà ǹ kion lɛ gɔ̀nɔn tumaa gasaã, ǹ wo a tii kaa màn gɔgɔrɛ kaa ǹ bǎã nɛ, kiwi lɛ kio,

⁴² mà ǹ kɔlɔ kɔsɔn goa, ǹ nə ǹ kaa kɛn lɛn bǎã nɛ, ǹ tii kɔsɔ goa, ǹ kion lɛ gɔ̀nɔn tɔrɔ nɛ.

⁴³ Bɛ̀ sulii bǎã lɛ wusoo á ná a giala kɔ á n soe kion lɛ gɔ̀nɔn ganaa kɔlɔn lɛn waa kio, a gɔ̀nɔn lɛ a gasaã laanka a wusoo a tɔrɛɛ kio,

⁴⁴ wúlu-bɔle lɛ wusoo a wo ga a ganaa doo. Bɛ̀ màn mɛ sulii bǎã lɛ li kion lɛ gɔ̀nɔn ganaa, gɔ̀ babaraa n kion lɛ ganaa, min ná a boe la á boe wa. Kion lɛ n gɔgɔrɛ,

⁴⁵ Ǹ yu. A kɔlɔn nɛ, a gɔnɔn nɛ, a tɔrɔ ǹ tii ni, ǹ bɛn goa ǹ wo ǹ kaa màn gɔgɔrɛ kaa ǹ bǎã nɛ, kiwi lɛ kio.

⁴⁶ Kion lɛ a kiɛnlɛn bɛ́ re n tiɛ̃ lɛawaan mɛnɛn tumaa gɔ́ɔ̃ nɛ, bɛ̀ min wɔ a nɛ bɛa biikoo kɛ li, ǹ dɛnaa n goɛ̃ gɔgɔrɛ yǎa wasa woe miɛ̃.

⁴⁷ Bɛ̀ min mɛn waa bɛa kion lɛ nɛ hinlaa a na á màn bii a nɛ, yǎa ǹ dɛnaa na a mɔnaan pii.

⁴⁸ Sɛnɛ, bɛ̀ wúlu-bɔle lɛ ga kion lɛ ganaa, bɛ̀ màn mɛ sulii bǎã lɛ li kion lɛ a wusoo a tɔrɛɛ kio wa, wúlu-bɔle lɛ pɛ mà kion lɛ á yoreene. A giala, sulii bǎã lɛ nya á n bɔ a ganaa.

⁴⁹ Bɛ̀ ǹ tá gɔ̀ boe kion lɛ ganaa, wúlu-bɔle lɛ bàan màn paa kũ, a sɛdrə da kɛa gɔn kɔn saa, sère ka tã zenzen nɛ, ka izopi da gùrù ni.

⁵⁰ Màn mɛn bɛ́ ǹ nə́ zɛnaa ka gì ni, mu yoreen ná a nɛ, wúlu-bɔle lɛ bàan lɛ a goon bɔlɔ kuru bɛ lalan.

⁵¹ Bɛ kio, a sɛdrə da lɛ laanka izopi da lɛ a gɔn saa, sère ka tã zenzen lɛ nɛ, ka bàan yiikoonaa lɛ nɛ. Ǹ bàan mɛn bɔlɔ kuru mu yoreen lɛ lalan, a bɛa mànan lɛn sã bɛ mà li, a pɛsɛ̃ kion lɛ ganaa gunyin sɔbaa.

⁵² A n die kion lɛ a gɔ̀ boe miɛ̃ a bɔ a ganaa, ka bàan mà lɛ nɛ, ka mu yoreen kɛ nɛ, ka bàan yiikoonaa lɛ nɛ, sɛdrə da kɛ a gɔn nɛ, ka izopi gùrù laanka sère ka tã zenzen lɛ nɛ.

⁵³ A n gɔn bɔ bàan yiikoonaa lɛ sɛ ganaa, bɛ piɛ̃ a wo don, a n bɔ kiwi gɔ́ɔ̃ nɛ. A gɔ̀ bɔma-a ǹ landa zɛnaa kion lɛ ganaa ka bɛa yɔrɔ lɛ nɛ, á die yoreen koe.

⁵⁴ Landa mɛn bɛ́ a tan, a din nə ka bɛ nɛ, gɔ̀nɔn busu tɔrɔ tumaa laanka kɔ̀n-gɛ̀ wɔ paǹ li,

⁵⁵ ta mɔnaa na á sulu hinlaa kion ne,

⁵⁶ ta gɔ̀nɔn yoo ne, a kokoree ne, ka gɔ̀nɔn paǹ mɛn dɔ bɛ́ á n kurəə á fulu.

⁵⁷ Bɛ̀ gɔ̀ tá min ganaa hinlaa màn ganaa, hinlaa bɛ̀ ǹ tá yoreene, bɛa landa lɛ n toɛ min bɛ dɔ̃. A din landa lɛ na a tan, gɔ̀nɔn ki busu babaraa wɔ paǹ li.