Lawa a wúlu-bɔlen 13 - LAWA A BOO SONBORE

Landan mɛnɛn nə n koa wɔ̀lɔ̀ siin wɔ paǹ li Gɔ̀nɔn ki busu babaraan

¹ Dɛnaa Lawa boo da Muizu laanka Aarɔn nɛ á pɛ ǹ nɛ:

² Bɛ̀ min gɔ̀nɔn paǹ kɔn na á yoo, bɛ̀ á kokore, hinlaa ta a na á n kurəə á fulu, bɛ̀ á gɔ̀nɔn ki busu babaraa kɛ baa ǹ dɛnaa ganaa, ka wo ka ǹ dɛnaa nɛ Lawa a wúlu-bɔle Aarɔn li, hinlaa a tɔrɔ wúlu-bɔlen kɛn goon li.

³ Lawa a wúlu-bɔle lɛ ga a gɔ̀nɔn lɛ a busu ǹ bǎã ganaa. Busu lɛ bɛa paǹ mɛn ganaa, bɛ̀ bɛa ka nə́ n bɔyaa á n baa fu, bɛ̀ a bǎã wɔ̀lɔ̀ da a gɔ̀nɔn ganaa, gɔ̀nɔn ki busu babaraa nɛ. Bɛ̀ wúlu-bɔle lɛ ga a ganaa á nya lɔn gɔrɔ, a pɛ mà gɔ̀dɛnaa nɛ.

⁴ Bɛ̀ a gɔ̀nɔn paǹ kɔn na á n kurəə á fulu á n tɛ pii, bɛ̀ a wɔ̀lɔ̀ da a gɔ̀nɔn ganaa wa, bɛ̀ a ka dɔ nə n bɔyaa á n baa fu wa, wúlu-bɔle busulə lɛ da a gɔrɔn lɛawaa sɔbaa gɔ́ɔ̃ nɛ.

⁵ A lɛawaa sɔbaabaa ǹ wɔ pinaa, wúlu-bɔle lɛ ga a ganaa. Bɛ̀ á yɛ busu lɛ goã a bǎã nɛ, màn ná a mɛ li wa, wúlu-bɔle lɛ wusoo a da a gɔrɔn doo lɛawaa sɔbaa kɔsɔ gɔ́ɔ̃ nɛ.

⁶ Lɛawaa sɔbaabaa ǹ wɔ pinaa, wúlu-bɔle lɛ wusoo a ga a ganaa doo. A gɔ̀nɔn paǹ mɛn bɛ́ busi, bɛ̀ bɛ́ tii, bɛ̀ màn mɛ a busii li wa, wúlu-bɔle lɛ pɛ mà bɛa dɛnaa á yoreene: gɔ̀nɔn kokoree kooro ne. Ǹ dɛnaa na a mɔnaan dininsɔɔ̃nɔn pii, á die *yoreen koe.

⁷ Sɛnɛ, bɛ̀ wúlu-bɔle lɛ ga a ganaa, á pɛ mà á yoreene, bɛ kio, màn wusoo á mɛ a gɔ̀nɔn kokoree lɛ li, ǹ dɛnaa wusoo a n bɔyaa a wo wúlu-bɔle lɛ li doo a ga a ganaa.

⁸ Wúlu-bɔle lɛ ga a ganaa. Bɛ̀ á woo yǎa màn mɛ a gɔ̀nɔn kokoree lɛ li, haya! A pɛ ma gɔ̀dɛnaa nɛ: Gɔ̀nɔn ki busu babaraa nɛ.

⁹ Bɛ̀ gɔ̀nɔn ki busu babaraa tá min ganaa, ǹ wo ka ǹ dɛnaa nɛ Lawa a wúlu-bɔle li.

¹⁰ Wúlu-bɔle lɛ ga a ganaa. Bɛ̀ gɔ̀nɔn yoo fu tá a paǹ mɛn ganaa, bɛ̀ á ná a gɔ̀nɔn ka dɔ bɔyaa á baa fu, bɛ̀ a gɔ̀nɔn siĩ dɔ nə́ n suĩ á soo kanaa,

¹¹ gɔ̀nɔn ki busu babaraa na á pàã yɛ a gɔ̀nɔn nɛ. Wúlu-bɔle lɛ pɛ mà gɔ̀dɛnaa nɛ. Mìi ba la a pɛ mà a n diɛ a gɔrɔn bɔrɔ á n giɛ a ganaa wa. A giala, a gɔ̀dɛnaabaa lɛ nə n doɛ̃ foaãnɛ.

¹² Sɛnɛ, bɛ̀ bɛa gɔ̀nɔn ki busu babaraa lɛ ná a giala kɔ á n soe a gɔ̀nɔn ganaa, ka a daa a busulə lɛ gɔ̀nɔn tumaa si a n kɔ lɛ, a saa a mìi ganaa a wo a gòãn yaa, Lawa a wúlu-bɔle lɛ din bɛ́ boe la a tá a paǹ mɛn yii,

¹³ a ga a ganaa. Gɔ̀nɔn ki busu babaraa lɛ bɛ́ n busulə lɛ paǹ tumaa ganaa, wúlu-bɔle lɛ pɛ mà busulə lɛ á yoreene. A gɔ̀nɔn tumaa bɛ́ á n bɔyaa á fu kɔ, a n yoreene.

¹⁴ Sɛnɛ, bɛ̀ a ná a gɔ̀nɔn siĩ yɛ á n suĩ a paǹ mɛn ganaa ǹ mɛn pinaa, ǹ dɛnaa nə n bɔyɛɛ a gɔ̀dɛnaa baa.

¹⁵ Wúlu-bɔle lɛ ga bɛa siĩ suĩ lɛ ganaa, a pɛ mà ǹ dɛnaa n gɔ̀dɛnaa lɛa. Gɔ̀nɔn siĩ a suĩ lɛ n màn gɔgɔrɛ lɛa. Gɔ̀nɔn ki busu babaraa lɛ n diɛ.

¹⁶ Bɛ̀ gɔ̀nɔn siĩ a suĩ lɛ nə́ n bɔyaa á n baa fu, mà ǹ dɛnaa wo dɔ wúlu-bɔle li doo.

¹⁷ Wúlu-bɔle lɛ ga a ganaa. A paǹ mɛn bɛ́ busi, bɛ lɛ bɛ́ á n bɔyaa á n baa fu, wúlu-bɔle lɛ pɛ mà *gɔ̀ busu bie wa, mà ǹ dɛnaa á yoreene.

¹⁸ Bɛ̀ boree bɔ min gɔ̀nɔn ganaa, boree lɛ daa á nya,

¹⁹ sɛnɛ, bɛ̀ a bǎã yoo fu, hinlaa ta a n tɛ pii tã kəwuu ni, ǹ dɛnaa wo Lawa a wúlu-bɔle li a ga a ganaa.

²⁰ Wúlu-bɔle lɛ ga a busu lɛ ganaa. Bɛ̀ á wɔ̀lɔ̀ da a gɔ̀nɔn ganaa, á ná a ka bɔyaa á baa fu, wúlu-bɔle lɛ pɛ ma gɔ̀dɛnaa nɛ. Gɔ̀nɔn ki busu babaraa nɛ, giɛ mà á soe a boree bǎã lɛ nɛ.

²¹ Sɛnɛ, bɛ̀ wúlu-bɔle lɛ ga a ganaa, bɛ̀ a ka fu kɔn yɛ a ganaa wa, bɛ̀ a nyankɔrɔ bɔ a gɔ̀nɔn nɛ wa, bɛ̀ a bǎã dɔ́ tii, wúlu-bɔle lɛ nə n dɛnaa da a gɔrɔn, a ga a ganaa lɛawaa sɔbaa gɔ́ɔ̃ nɛ.

²² Bɛ̀ màn mɛ busu lɛ li a gɔ̀nɔn nɛ sonbore, wúlu-bɔle lɛ pɛ mà gɔ̀dɛnaa nɛ. Gɔ̀nɔn ki busu babaraa nɛ.

²³ Sɛnɛ, a gɔ̀nɔn paǹ mɛn lɛ bɛ́ tɛ pii, bɛ̀ á goã a bǎã nɛ, màn ná a mɛ li wa, boree bǎã dinsɔɔ̃ nɛ. Wúlu-bɔle lɛ pɛ mà ǹ dɛnaa á yoreene.

²⁴ Bɛ̀ tɛ min kũ a bǎã ná a ganaa, bɛ̀ bɛa bǎã lɛ nə́ n kurəə, á n tɛ pii tã kəwuu ni, hinlaa á n fu,

²⁵ wúlu-bɔle ga a busu lɛ a bǎã ganaa. A gɔ̀nɔn lɛ a paǹ mɛn bɛ́ tɛ pii, bɛ̀ bɛa ka nə́ n bɔyaa á n baa fu, bɛ̀ á wɔ̀lɔ̀ dɔ da a gɔ̀nɔn ganaa, gɔ̀nɔn ki busu babaraa nɛ, soe tɛ a kuĩ bǎã lɛ nɛ. Wúlu-bɔle lɛ pɛ mà gɔ̀dɛnaa nɛ. Gɔ̀nɔn ki busu babaraa nɛ.

²⁶ Sɛnɛ, bɛ̀ wúlu-bɔle lɛ ga a ganaa, bɛ̀ ka fu ba tɛ a kuĩ bǎã lɛ-n wa, bɛ̀ a nyankɔrɔ bɔ a gɔ̀nɔn nɛ wa, bɛ̀ a bǎã dɔ́ tii, wúu-bɔle lɛ nə ǹ dɛnaa da a gɔrɔn lɛawaa sɔbaa gɔ́ɔ̃ nɛ, a ga a ganaa.

²⁷ A lɛawaa sɔbaabaa ǹ wɔ pinaa, wúlu-bɔle lɛ wusoo a ga a ganaa. Bɛ̀ á yɛ sonbore màn mɛ busu lɛ li a gɔ̀nɔn nɛ, a pɛ mà gɔ̀dɛnaa nɛ. Gɔ̀nɔn ki busu babaraa nɛ.

²⁸ Sɛnɛ, a paǹ mɛn lɛ bɛ́ tɛ pii, bɛ̀ á goã a bǎã nɛ màn ná a mɛ li wa, bɛ̀ á tii, tɛ a kuĩ lɛ a gɔ̀nɔn yoo kooro ne. Wúlu-bɔle lɛ pɛ mà ǹ dɛnaa á yoreene. A giala, tɛ lɛ nɛ.

²⁹ Bɛ̀ giĩ hinlaa lɔ nɛ, busu kɔn tɔrɔ ná a mìi hinlaa a lɛ toro ganaa,

³⁰ Lawa a wúlu-bɔle lɛ die a ga a busu lɛ ganaa. Bɛ̀ á n baa ka a n die wɔ̀lɔ̀ diɛ a gɔ̀nɔn ganaa, bɛ̀ ka tã kəwuu na a nɛ garagara, Lawa a wúlu-bɔle lɛ pɛ mà gɔ̀dɛnaa nɛ. Kɔ̀n-gɛ̀ nɛ, mìi laanka lɛtoro dɔ a busu babaraa n ka bɛ nɛ.

³¹ Sɛnɛ, bɛ̀ wúlu-bɔle lɛ ga a kɔ̀n-gɛ̀ lɛ ganaa, bɛ̀ a baa ka a n wɔ̀lɔ̀ diɛ a gɔ̀nɔn ganaa wa, ta ka ti ba kɔ̀n-gɛ̀ lɛ a bǎã-n wa, wúlu-bɔle lɛ kɔ̀n-gɛ̀ dɛnaa lɛ da a gɔrɔn bɔrɔ, a ga a ganaa lɛawaa sɔbaa gɔ́ɔ̃ nɛ.

³² A lɛawaa sɔbaabaa ǹ wɔ pinaa, Lawa a wúlu-bɔle wusoo a ga a busu lɛ ganaa. Bɛ̀ màn mɛ a kɔ̀n-gɛ̀ lɛ li wa, bɛ̀ ka tã kəwuu dɔ ba a bǎã-n wa, bɛ̀ kɔ̀n-gɛ̀ lɛ dɔ baa ka a n die wɔ̀lɔ̀ diɛ a gɔ̀nɔn ganaa wa,

³³ ǹ dɛnaa nə n mìi kɔɔ̃. Sɛnɛ, a nyan kɔ̀n-gɛ̀ bǎã lɛ kɔɔ̃ wa. Bɛ kio, wúlu-bɔle lɛ kɔ̀n-gɛ̀ dɛnaa lɛ da a gɔrɔn doo, a ga a ganaa lɛawaa sɔbaa gɔ́ɔ̃ nɛ.

³⁴ A lɛawaa sɔbaabaa ǹ wɔ pinaa, wúlu-bɔle lɛ wusoo a ga a kɔ̀n-gɛ̀ lɛ ganaa. Bɛ̀ màn mɛ li wa, bɛ̀ a baa ka a n die wɔ̀lɔ̀ dɔ diɛ a gɔ̀nɔn ganaa wa, wúlu-bɔle lɛ pɛ mà á yoreene. Bɛ̀ a ná a mɔnaan pii lɔn gɔrɔ, ǹ dɛnaa na á yoreen kɔ.

³⁵ Bɛ̀ wúlu-bɔle lɛ pɛ mà ǹ dɛnaa á yoreene, bɛ kio, màn wusoo á mɛ a kɔ̀n-gɛ̀ lɛ li,

³⁶ wúlu-bɔle lɛ wusoo a ga a ganaa. Màn bɛ́ na á mɛ kɔ̀n-gɛ̀ lɛ li, wúlu-bɔle lɛ din baran pɛ mà a n giɛ doo, bɛ̀ ka tã kəwuu tá kɔ̀n-gɛ̀ lɛ a bǎã-n wa: ǹ dɛnaa n gɔgɔrɛ.

³⁷ Sɛnɛ, bɛ̀ wúlu-bɔle lɛ din yɛ mà màn mɛ kɔ̀n-gɛ̀ lɛ li wa, a bǎã ka ti pã, kɔ̀n-gɛ̀ lɛ na á nya, ǹ dɛnaa á yoreene.

³⁸ Bɛ̀ lɔ hinlaa giĩ gɔ̀nɔn paǹan tɛnɛn nə́ n kurəə ǹ nə́ tɛ pii fufu,

³⁹ Lawa a wúlu-bɔle die a ga a ganaa. Bǎãn mɛnɛn lɛn nə bɔ ǹ gɔ̀nɔn ganaa, bɛ̀ ǹ tá fufu kəwuu ni, busu ni, màn nə́ mɛ li, sɛnɛ, a bie baraa wa. Ǹ dɛnaa á yoreene.

⁴⁰ Bɛ̀ min mìi ka kaa, a mìi gɔ́ɔ̃ n kooro, bɛa dɛnaa á yoreene.

⁴¹ Bɛ̀ ǹ dɛnaa baã ka na á kaa, màn kɔn ná a ba a baãbii wa, ǹ dɛnaa á yoreene.

⁴² Sɛnɛ, bɛ̀ bǎã bɔ tã kəwuu ni bɛa dɛnaa lɛ baãbii, hinlaa a nyanlɛ-a, gɔ̀nɔn ki busu babaraa na a giala koe, á n soe a baãbii hinlaa a nyanlɛ-a.

⁴³ Wúlu-bɔle die a ga a ganaa. A paǹ mɛn lɛ bɛ́ busi, bɛ̀ a bǎã yoo tã kəwuu ni, a baãbii hinlaa a nyanlɛ ganaa, bɛ̀ á n baa ka gɔ̀nɔn ki busu babaraa nɛ,

⁴⁴ ǹ dɛnaa n gɔ̀nɔn ki busu babaraa dɛnaa lɛa, gɔ̀dɛnaa nɛ. Wúlu-bɔle lɛ pɛ mà gɔ̀dɛnaa nɛ, busu lɛ na á kũ a mìi ganaa.

⁴⁵ Gɔ̀nɔn ki busu babaraa lɛ bɛ́ min mɛn ganaa, ǹ dɛnaa doamaa nɛ, a na a mɔnaan tɔtoɛ̃ ka gɛ̀ na á gã la, a n mìi ka toa lɔloɛn kɔn, a pii kɔ a lɛ lɛ, a n lɛ dɛ a pɛ: Man gɔ̀dɛnaa lɛa! Man gɔ̀dɛnaa lɛa!

⁴⁶ Bɛ̀ bɛa busu lɛ tá min mɛn ganaa sɛn, ǹ dɛnaa n goɛ̃ gɔ̀dɛnaa lɛa miɛ̃, yǎa busu lɛ nyɛɛ. Ǹ dɛnaa doamaa nɛ a giã a gɔrɔn, giã ǹ bǎã kɛ kio.

Mɔnaa a sulii

⁴⁷ Bɛ̀ mɔnaa sulu, sère ka mɔnaa nɛ hinlaa boosa mɔnaa nɛ,

⁴⁸ ta mɔnaa wùsu ni, boosa dɔnkɛ nɛ hinlaa sère ka wɔ nɛ, ta ki ni, hinlaa ta màn woo màn nɛ, ǹ nə́ zɛnaa ka ki ni,

⁴⁹ bɛ̀ a sulii bǎã lɛ yii nə́ n baa ka buu buruu bɛ́ lɔn, hinlaa ka a n die tã koe, gɔ̀ babaraa nɛ. Ǹ doamaa nɛ ǹ wo bɛ nyaa Lawa a wúlu-bɔle ne a ga a ganaa.

⁵⁰ Wúlu-bɔle lɛ ga gɔ̀ bǎã lɛ ganaa. Bɛ̀ kio, a bɛa màn lɛ da kion, a kiɛnlɛ sɔɔ lɛ, yǎa lɛawaa sɔbaa.

⁵¹ A lɛawaa sɔbaabaa ǹ wɔ pinaa, a wusoo a ga sulii bǎã lɛ ganaa doo. Bɛ̀ màn mɛ sulii bǎã lɛ li màn lɛ ganaa, gɔ̀ babaraa nɛ, min ná a boe la á boe wa. Bɛa màn lɛ n gɔgɔrɛ taãn-taãnɛ.

⁵² Bɛ̀ mɔnaa lɛ nɛ, bɛ̀ mɔnaa wùsu ni, ta sère ka dɔnkɛ hinlaa ta boosa wɔ lɛ nɛ, hinlaa ta màn woo màn nɛ, ǹ nə́ zɛnaa ka ki ni, bɛa sulii bǎã kɛ lɛ ná a ganaa, wúlu-bɔle lɛ bɛ tã. Min bɛ́ a bie boe la á bɛa gɔ̀ babaraa lɛ boe wa, màn lɛ doamaa nɛ a n tã.

⁵³ Sɛnɛ, mɔnaa lɛ nɛ, mɔnaa wùsu lɛ nɛ, dɔnkɛ lɛ nɛ, ka ki màn lɛ nɛ, bɛ̀ wúlu-bɔle lɛ ga ǹ ganaa, á woo yǎa màn ná a mɛ sulii bǎã lɛ li wa,

⁵⁴ a pɛ ǹ nɛ, ǹ bɛa màn gɔgɔrɛ lɛ pii. Bɛ kio, a kiɛnlɛ sɔɔ bɛa màn lɛ lɛ doo, lɛawaa sɔbaa gɔ́ɔ̃ nɛ, a ga a ganaa.

⁵⁵ Sulii bǎã lɛ a pii kio, wúlu-bɔle lɛ wusoo a ga a ganaa. Bɛ̀ a sulii bǎã lɛ yii nàn nə n bɔyaa wa, haalɛ tà màn dɔ din mɛ li wa, a bɛ́ màn mɛn ganaa, mà màn gɔgɔrɛ nɛ. Ǹ doamaa nɛ ǹ tã. A giala mɔnaa nɛ, sulii lɛ sɔ̃ a làfu ganaa hinlaa a yɔrɔ ganaa.

⁵⁶ Sɛnɛ, mɔnaa lɛ a pii kio, wúlu-bɔle wusoo a ga a ganaa. Bɛ̀ sulii lɛ a bǎã nə́ n bɔyaa á tii, bɛ̀ a n mɔnaa ganaa, hinlaa ki ganaa, mɔnaa wùsu ganaa hinlaa dɔnkɛ ganaa, a kuru a bɔ a ganaa.

⁵⁷ Sɛnɛ, bɛ̀ sulii lɛ wusoo á yɛ mɔnaa lɛ ganaa bɛ kio, ta mɔnaa wùsu ni hinlaa dɔnkɛ lɛ nɛ, ta ki màn mɛn nɛ, gɔ̀ babaraa nɛ, màn ná a gialaa miɛ̃ li. Ǹ bɛa màn gɔgɔrɛ lɛ tã.

⁵⁸ Bɛ̀ mɔnaa lɛ nɛ, ta mɔnaa wùsu hinlaa dɔnkɛ nɛ, hinlaa ta ki màn mɛn nɛ, bɛ̀ á pii, sulii lɛ nə́ n bɔ a ganaa, a wusoo a pii doo, a tɔn yoreen kɔ.

⁵⁹ Sère ka mɔnaa hinlaa boosa mɔnaa wɔ paǹ li, mɔnaa wùsu hinlaa dɔnkɛ wɔ paǹ li, ki màn tumaa wɔ paǹ li, landa mɛn bɛ́ a tan, a din nə ka bɛ nɛ. Bɛa landa lɛ n toɛ, ǹ pɛ mà màn kɛ á yoreene, hinlaa mà á gɔgɔrɛ.