Lawa a wúlu-bɔlen 10 - LAWA A BOO SONBORE

Gɛ̀-koa

¹ Nadaabu laanka Abiu n Aarɔn a nɛgiĩn lɛa. Ǹ kɔn pinaa, didie ná a da yon gìĩ kɔɔ̃n tã ǹ fɔlɔ tàãn saa, á tɛ nàn kaa a nɛ, á da yon gìĩ kɔɔ̃n da la. Bɛa zɛnaa kɛnɛn ke, tɛ soree ne, ǹ nə́ daa-n Dɛnaa Lawa yɔrɔ-a. A da yaa, Dɛnaa Lawa pɛ ǹ nɛ mà ǹ zɛnaa miɛ̃ wa.

² A din bǎã-n gɔrɔ, tɛ bɔ Dɛnaa Lawa li, á ǹ kũ ǹ yii n koo. Ǹ nə́ gã Dɛnaa Lawa yɔrɔ-a walan.

³ Muizu tɔ́n pɛ Aarɔn nɛ: kɛ lɛ a lɛa nɛ, Dɛnaa Lawa tɔ́n boo da á pɛ kɛnɛn: Min mɛnɛn bɛ́ n mɔrɛ ma ganaa, man li, bɛn nə maa Lawabaa kɛ dɔ̃, man li máa ǹ ma guguru kɔ zaman kɛ tumaa yɔrɔ-a. Aarɔn nə n lɛ da boo-n wa.

⁴ Muizu tɔ́n lɛ dia Aarɔn lɛ dɔɔ̃ngiĩ Uziili a nɛgiĩn kɛn la, Misayeli laanka Elisafan nɛ, á pɛ ǹ nɛ: Ka n zɔ̃ ka daa. Ka ka dɔɔ̃nɔn lɛn geren goa, ka ǹ bɔ Lawa a bǎã sonbore kɛ yɔrɔ-a, ka wo ǹ ne giã ǹ bǎã kɛ kio.

⁵ Ǹ nə́ n zɔ̃ ǹ nə́ dɔ, ǹ nə́ ǹ goa, ka ǹ wúlu-bɔlebaa ǹ mɔnaan nɛ ǹ ganaa, ǹ nə́ woo ǹ ne giã ǹ bǎã lɛ kio, ka Muizu bɛ́ á goã á pɛ lɔn.

⁶ Muizu tɔ́n pɛ a nɛgiĩ min paa kɔsɔn kɛn manɛ, Eleyazaara laanka Itamaara nɛ: Ka baran n mìi ka toa lɔloɛ-n kɔn wa, ka baran kaa mɔnaan tɔtoɛ̃, ka pɛ mà ka n kaa foo ziziɛ̃ nyɛɛ wa. Bɛ̀ ka bɛ zɛnaa, ka á re giɛ̃. Ka á re toɛ dɔn, Lawa foo yoo zaman lɛ tumaa li. Dɛnaa Lawa min mɛnɛn lɛn dɛ ka tɛ nɛ, ka toa ka dɔɔ̃n Izirayeli minin gialakunun tumaa bɛn gɛ̀ wuu pɛ.

⁷ Sɛnɛ, kasɛn kɛn, ka doamaa bie ka soo ka n bɔ kɔn yɛ ǹ kion kɛ-n wa. Bɛ̀ ka bɛ zɛnaa, ka á re giɛ̃. A giala, bɔ a koa ǹ nyɔɔ kɛ na á n kaa ka mìi ni, ǹ nə́ ka bɔ ǹ nə́ ka koa Dɛnaa Lawa a dí-nyalin lɛa. Ǹ nə́ zɛnaa á kɔnpɛ ka Muizu a boo lɛ nɛ.

Yɔ-mii

⁸ Dɛnaa Lawa tɔ́n boo da ka Aarɔn nɛ á pɛ nɛ:

⁹ N din laanka n nɛgiĩn lɛn nɛ, bɛ̀ ka tá re we kɔn yɛ ǹ kion kɛ nɛ, ka nyan toa ka duvɛ̃ wɔ ka lɛ-n wa, ka nyan toa yɔ kakaarɛ kɔn wɔ ka lɛ-n wa. Bɛ̀ ka zɛnaa miɛ̃, ka a re giɛ̃ wa. Bɛ n landa lɛa, ka mìi ni miɛ̃ duduu, ka tɔrɔn tumaa wɔ lɛa, a ná a ba n bɔyɛɛ wa.

¹⁰ A giala, màn mɛn bɛ́ Lawa wɔ lɛa, màn mɛn bɛ́ a ba a wɔ lɛa wa, ka doamaa nɛ ka boo la ka bɛa bɔkɔnlɛ wɔ, ka boo la ka màn gɔgɔrɛ dɔ laanka màn *yoreen a bɔkɔnlɛ wɔ.

¹¹ Dɛnaa Lawa landa boon mɛnɛn tumaa pɛ Muizu ni, mà a ǹ pɛ ka nɛ, ka doamaa nɛ, ka boo la dɔn, ka Izirayeli minin daraa bɛn lɛn tumaa ganaa.

Wúlu bɔ ǹ siĩ

¹² Bɛ kio, Muizu pɛ Aarɔn nɛ, a din laanka a nɛgiĩn mɛnɛn nə goã ǹ yii n koo, Eleyazaara laanka Itamaara nɛ: Ka Lawa gɔ ǹ wùsu lɛ saa, Dɛnaa Lawa wɔ gii mɛn doamaa bɛ́ a n tã, ka bɛ bɔ a nɛ, ka tɔn gialakun kɛ da buuru lɛa, yɔ bù ná a ba li wa, ka sɔ̃ *wúlu bɔ ǹ bǎã lɛ genli. A giala, Lawa dinsɔɔ̃ a màn nɛ.

¹³ A ba boe la a n sɔ̃ bǎã kɔsɔ-n wa, yǎa bǎã mɛn bɛ́ á n bɔ á n koa Lawa wɔ lɛa. Kaa wɔ gii n ka bɛ nɛ, Dɛnaa Lawa gɔ ǹ mànan lɛn bii. Dɛnaa Lawa dí mɛn pɛ masɛ nɛ, a din nə ka bɛ nɛ.

¹⁴ Tɔɔn lɛn tìãbii kɛ laanka a nyàa ke Izirayeli minin lɛn nə́ daa nɛ, barka da Lawa nɛ ǹ *wúlu màn lɛa, ka bɛn kɔ Lawa la ǹ sii zɛnaa. Bɛ̀ ka nya, Aarɔn din laanka a nɛgiĩn ni, ka a nɛlɔn dɔn nɛ, ka wo bɛn sɔ̃ bǎã kɛ nɛ, á n bɔ á n koa Lawa wɔ lɛa. A giala, ka doamaa nɛ, maǹ nə́ ǹ kɔ n laanka n nɛnyaanan la.

¹⁵ Tɔɔ lɛ nyàa kɛ laanka a tìãbii ke, ǹ nə́ kɔ Lawa la, a kɔlen lɛn nə da bɛn laanka a nyɔɔ kɛ nɛ ǹ nə́ tiɛ̃, ǹ nə ǹ kɔ ǹ sii zɛnaa Dɛnaa Lawa yɔrɔ-a. Bɛ kio, bɛa mànan lɛn man doe n din laanka n nɛgiĩn ganaa. Ka Dɛnaa Lawa pɛ lɔn, Bɛ lɛ n die goɛ̃ kaa wɔ gii lɛa yǎa duduu.

¹⁶ Ǹ butumu mɛn kɔ sii baraa sawaa ǹ wúlu màn lɛa, Muizu nɔ̀n da ka bɛ dɔ a sii ni. A bɛ́ re màn mɛn miɛ̃, mà ǹ ná a siĩ tã. Aarɔn a nɛgiĩn mɛnɛn lɛn nə goã ǹ yii n koo, Eleyazaara laanka Itamaara nɛ, a foo yoo bɛn li. Á tɔ́n pɛ ǹ nɛ:

¹⁷ Butumu kɛ lɛ bɛ́ na á n kɔ Lawa wɔ lɛa, wàa na á baa ka a siĩ sɔ̃ Lawa a bǎã sonbore kɛ-n wa? A giala, Lawa wɔ nɛ. Dɛnaa Lawa din na á kɔ ka la, mà ka zaman lɛ a sii baraa sawaa ǹ wúlu bɔ nɛ, Dɛnaa Lawa yɔrɔ-a, ka ǹ sii baraa saa ka bɔ ǹ mìi ni.

¹⁸ Ka bɛ́ ka bie ka wɔ ka tɔɔ lɛ mà nɛ kion sonbore kɛ gɔ́ɔ̃-n wa, ka bǎã mɛn bɔ ka koa Lawa wɔ lɛa, bɛ̀ ka doamaa nɛ ka na a siĩ sɔ̃ walan, ka ma bɛ́ má goã má pɛ lɔn.

¹⁹ Aarɔn tɔ́n pɛ Muizu ni: Ga! Ǹ bɛ́ ǹ nə́ daa ǹ sii baraa sawaa ǹ wúlu màn laanka ǹ wúlu màn tiɛ̃ kɔ Lawa la ǹ mɛn pinaa, sii mɛn masɛ yɛ, n din tá a siére-a. Bɛ̀ man má wusoo doo má sii baraa sawaa ǹ wúlu màn kɛ a siĩ sɔ̃ pelo, bɛ̀ á die kɔɔ̃n koe Dɛnaa Lawa ganaa?

²⁰ Muizu boo mɛn ma, bɛ́ kɔɔ̃n kɔ a ganaa.