KZS2 9 - LAWA A BOO SONBORE

Sabaa gána a kii lɔ n die n yii koe Salomɔn ganaa

¹ Sabaan kii lɔ ma mà Salomɔn tɔ soo. Bɛ lɛ nɛ, á tɔ́n daa ga a giala-a ka boo giməən ne. A na á daa Zeruzalɛmu ka zaman gole ne a kio. Nyɔɔmaan nə́ goã kun ni, nyɔɔ gìĩ kɔɔ̃n nə́ ǹ dɔ̀ɔ̃ nɛ, ka sana didi laanka kɔlɔ giɔ̀mɔ kakaa nɛ. A bɛ́ á dɔ Salomɔn li, màn mɛn din tumaa goã a gɔ́ɔ̃ nɛ, á bɛ yii pɛ nɛ.

² Salomɔn ná a nɔ̀n-diɛn lɛn tumaa a binyəən kɔ la. Nɔ̀n-diɛ lɛ kɔn kaka kɔ kii lɛ ganaa, á fɔ̃ a lɛ sii li wa.

³ Sabaa ǹ kii lɔ Salomɔn a yiri woorobaa ǹ boon kɛn ma. A kii kion mɛn dɔ a din wɔ lɛa, á bɛ yɛ,

⁴ Salomɔn goã màn mɛn bii a tabala la, a dí-nyalin nə goã wɛɛ maa, a kion dí-nyalin nə goã dí nyɛɛ lɔn, ǹ goã mɔnaan mɛnɛn we ǹ ganaa, min mɛnɛn nə goã Salomɔn a màn-bii koe la, ǹ goã mɔnaan mɛnɛn we, Salomɔn goã wúlu mànan mɛnɛn tiɛ̃ Dɛnaa Lawa a kion kɛ nɛ, kii lɔ lɛ bɛ́ á bɛn yɛ, á n kaãbaa ǹ ganaa parsiini.

⁵ Á tɔ́n pɛ kii Salomɔn lɛ nɛ: «Ma goã n toɛ maa gána nɛ, má n màn mɛn miɛ n da ǹ boon laanka n sii-doɛ̃ lɛ wɔ paǹ li, taãn nɛ.

⁶ Sɛnɛ ma goã bɛa boon lɛn sii taãn lɛa wa, yǎa maa daa ke má tɔ́n yɛ sɔ̀ɔ̃nɛ. Á ke, ǹ nə n sii-doɛ̃ lɛ a talɛɛ din pɛ ma-n wa. Ma màn mɛn ma n wɔ paǹ li, n tɔ golebaa lɛ la bɛ tumaa nɛ.

⁷ N minin wɔ na á bǐɛ̃ kɔ, n dí-nyalin dɔn wɔ na á bǐɛ̃ kɔ, ǹsɛn mɛnɛn bɛ́ boe la ǹ giã n yɔrɔ-a biikoo yii li, ǹ nə n too kɔ n sii-dɔ̃ ǹ boo ganaa!

⁸ Barka tá n Lawa, Dɛnaa Lawa lɛ ganaa, kɛ lɛ á bǐɛ̃ kɔ n ganaa, á n baa kii lɛa mà n dí nya a din ni. A giala Izirayeli sii n kɔɔ̃nɛ n Lawa lɛ ganaa. A n li mà a goã yǎa duduu, bɛ lɛ nɛ á n koa kii lɛa mà n minin sii yɔrɔ bɔ, n sii pepere nyaa ǹ nɛ.»

⁹ Á bǐɛ̃ baa kii Salomɔn lɛ la ka sana tɔnɔ sɔɔ ka talɛɛ nɛ, ka nyɔɔ gìĩ kɔɔ̃n gigiã laanka kɔlɔ giɔ̀mɔ kaka-an nɛ. Sabaa gána a kii lɔ lɛ nyɔɔ gìĩ kɔɔ̃n gigiã mɛn kɔ Salomɔn la, min kɔn bin bɛ miã yɛ duduu doo wa.

¹⁰ Kii Uramu a dí-nyalin laanka Salomɔn a dí-nyalin mɛnɛn lɛn nə wo Ofiiri, ǹ nə́ daa ka Sana nɛ, gɔn giɔ̀mɔ kakaa nɛ ka kɔlɔ giɔ̀mɔ kaka-a nɛ.

¹¹ Salomɔn bɛa gɔn giɔ̀mɔ kakaa lɛ naa tán Dɛnaa Lawa a kion lɛ gɔ́ɔ̃ nɛ, ka a din a kii kion kɛ dɔ nɛ. Á sàn kɔ ǹ mànan dɔn zɛnaa, tùtun ni, ka kɔnkoɛɛ̃nɛn nɛ loe-lɔlin wɔ lɛa. Min kɔn bin na a kɔnboe yɛ Zudaa gána-n wa.

¹² Salomɔn dɔ wɔ paǹ li, Sabaan kii lɔ lɛ bɛ́ giɛ màn mɛn li, ka a bɛ́ nɔ̀n diɛ màn mɛn nɛ, á bɛ tumaa kɔ la. Bɛ́ mɔnaa á la a din da ka mangɔ ǹ mànan mɛnɛn nɛ. Bɛ kio, kii lɔ lɛ laanka a dí-nyalin lɛn nə woo ǹ gána nɛ.

Salomɔn a pàã laanka a gɔn màn

¹³ Lɛ̀ goon gɔ́ɔ̃ nɛ, Salomɔn nə sana tɔnɔ fuə yii,

¹⁴ zii tɔ-wɔlen laanka pii-kɔlen bɛ die màn mɛn koe la, bɛ ná a ba a-n wa. Gána lɛ a sii yɔrɔ-bɔlen laanka Larabun gána kiin man die sana laanka wɔrɔgɛlɛ koe Salomɔn la.

¹⁵ Kii Salomɔn goóro biɛpaa (200) zɛnaa sana n la, ǹ gogoonmaa n kɔnpii sana kilo sɔrɔ nɛ.

¹⁶ Á wusoo doo á goóro babaniɛ biɛsɔɔ (300) zɛnaa sana n la, ǹ gogonmaa n kɔnpii sana kilo sɔɔ nɛ. Á zii kɔ maǹ nə ǹ kaa kion mɛn bɛ́ ǹ nə́ bii mà: "Liban a daã".

¹⁷ Kii lɛ dankan gole zɛnaa a ná a nyaǹ kɔ ka don a díi sɔ nɛ, ǹ nə́ sana yoreen kaa la.

¹⁸ Kòrò sɔrɔ na á goã bɛa dankan lɛ a dii ǹ bǎã ganaa. Gòã kaa ǹ bǎã n doa nɛ a ganaa sana lɛam kii a gòãn kaa ǹ bǎã lɛa. Gùrùn man nə́ goã dankan lɛ paǹ yii ganaa. Yàra nyín paa na á goã gùrùn lɛn genli.

¹⁹ Yàra fùlupaa na á goã dii ǹ bǎã lɛ a kòròn lɛn ganaa ǹ paran paanan li. Ǹ bin bɛ miã zɛnaa gána kɔn nɛ wa.

²⁰ Kii Salomɔn a màn mi ǹ mànan tumaa na á goã sana lɛa. Mànan mɛnɛn tumaa goã "Liban daã kion" kɛ nɛ, ǹ yii na á goã sana yoreen yoreen lɛa. Salomɔn a wasa nɛ, wɔrɔ goã màn kɔn lɛa ǹ gɔn wa.

²¹ Bǎã sɔsɔɔ mu la ǹ goon dɔn nə́ goã Salomɔn lon, ǹ nə́ ǹ diɛ baa-a kun ka Uramu wɔn nɛ. Lɛ̀ sɔsɔɔ gɔ́ɔ̃ nɛ, manə n bɔyɛɛ ka bǎã sɔsɔɔ mu baa ǹ goon lɛn nɛ, sana nə́ ǹ nɛ, ka wɔrɔ nɛ, ka don a díi sɔ nɛ, ka káran laanka kokolo tɔrɔn kɔnɔn nɛ.

²² Salomɔn a pàãmabaa la kanaa a kiin tumaa wɔ nɛ, a sii-doɛ̃ dɔ́ la ǹ wɔ nɛ.

²³ Ka boo taãn nɛ, Lawa yiri woorobaa gole da a foo ne. Bɛ lɛ nɛ, kiin tá boe bǎã din tumaa nɛ, die n too koe a lon.

²⁴ Lɛ̀ woo lɛ̀ maǹ die gá woe ne ka mànan nɛ, wɔrɔ lɛa hinlaa sana lɛa, mɔnaan nɛ, ziabaa ǹ mànan nɛ, màn giĩ kɔɔ̃n nɛ, sùin ni ka dundunun ni.

²⁵ Salomɔn a kionən tan sùi duu sii (4 000) ka ziabaa ǹ wotoro duu sii n boe la a wɔ a nɛ. Sùi da baa-a wole duu fulupaa (12 000) na a lon. Ǹ tɛnɛn man a din li Zeruzalɛmu, a ná a gialakunun kɛn dia kiwin ni, ǹ mɛnɛn yɔrɔ bɛ boe-n ziabaa ǹ wotoron lɛn koa taman yii.

²⁶ Salomɔn din ni kiin tumaa mìi la, a kũ Efrati tà ganaa a wo Filisiti gána yaa, a kiɛ̃ a wo yǎa Ezipti gèlè ganaa.

²⁷ Kii lɛ toa wɔrɔ mɔnaa Zeruzalɛmu ka kɔlɔ bɛ́ lɔn, á toa *sɛdrə dan dɔn nə́ mɔnaa ka *Sefelaa a nyankɔrɔ lɛ kɛ a sikomɔɔrɔ dan bɛ́ lɔn.

²⁸ Salomɔn a sùin lɛn man boe Ezipti ka gána gigiã kɔsɔn nɛ.

Salomɔn a gɛ̀

²⁹ Salomɔn a sii zɛnaa kɔsɔn kɛn, a kũ a bibinaa ganaa a wo a giala-nyɔmiɛ̃ yaa, bɛn tá kiɛ̃ nɛ Lawa a boo gii-dali Natan a sɛ́wɔ nɛ, Lawa a boo gii-dali Ayia, Siiloo min kɛa boon ne, ka Lawa a boo gii-dali Yedoo a sii-nyaan nɛ. Bɛa sɛ́wɔ nyɔɔbaa kɛ lɛ n Nebaati a nɛgiĩ Zeroboamu boo diɛ.

³⁰ Salomɔn na á goã Izirayeli zaman tumaa a kii lɛa Zeruzalɛmu yǎa lɛ̀ pusi.

³¹ A bɛ́ á gã á woo ǹ digolon li, maǹ nə́ bĩ ǹ di "Davida a kiwi". A nɛgiĩ Roboamu na á kii baa a bǎã nɛ.