KZS2 6 - LAWA A BOO SONBORE

¹ Salomɔn tɔn pɛ: «Dɛnaa Lawa, ma nə́ n pɛ mà nsɛ n lɛ koe n giã wɔlɔ tì li.

² Sɛnɛ, masɛ kion sonbore dɔ ma kɔ n la bǎã nɛ, maa n giã-n duduu.»

Salomɔn boo mɛn da Lawa a kion lɛ a kɔ Lawa la paǹ li

³ Izirayeli zaman lɛ tumaa golee lon. Kii Salomɔn nə n bɔyaa á n yɔrɔ dia ǹ la, á barka da ǹ ganaa.

⁴ Á tɔ́n pɛ ǹ nɛ: – Ma á barka diɛ Dɛnaa Lawa, Izirayeli a Lawa nɛ. Hiĩ, a sii mɛn a lɛ kɔ ma di Davida la, a din na á bɛ lɛ pã. A na á goã á pɛ-n kɛnɛn:

⁵ «Ma maa zaman Izirayeli minin lɛn waa má soo ǹ ne Ezipti gána nɛ ǹ mɛn pinaa, a kũ bɛa pinaa kɛ lɛ ganaa, ma kiwi kɔn bɔ Izirayeli tɔrɔn bii, ma maa kion dɔ walan ń giɛ ma tɔ á goɛ̃ la wa. Ma min kɔn dɔ bɔ máa a maa zaman Izirayeli a kii baa wa.

⁶ Sɛnɛ man má Zeruzalɛmu bɔ máa ma tɔ goã la. Má Davida bɔ máa a maa zaman Izirayeli a nyɛɛnaandɛnaa baa.»

⁷ A na á goã ma di Davida yiri ni a Lawa a kion dɔ Dɛnaa Lawa Izirayeli a Lawa wɔ lɛa.

⁸ Sɛnɛ Dɛnaa Lawa na á pɛ ma di Davida-n kɛnɛn: «Ma n giɛ li mà n Lawa a kion dɔ masɛ wɔ lɛa, á yiri sonbore lɛa parasiini.

⁹ Sɛnɛ nsɛ bie re bɛa kion lɛ doe wa. Ń gɔ́ɔ̃gɔ́ɔ̃ ǹ nɛ n die kion lɛ doe ma tɔ la.»

¹⁰ Dɛnaa Lawa boo mɛn da, a ná a lɛ pã. Má ma di Davida a bǎã saa kiibaa lɛ la ka Dɛnaa Lawa goã á da lɔn. Má kion kɛ dɔ Izirayeli a Lawa, Dɛnaa Lawa lɛ tɔ la.

¹¹ Kanna goo mɛn lɛ á ke lɛ kɔ kɔn la ǹ boo kɛ ná a nɛ, Dɛnaa nə n lɛ kɔ Izirayeli tɔrɔn la ka ǹ mɛn lɛ nɛ, má bɛ da kion lɛ nɛ.

Salomɔn nə Dɛnaa Lawa, Izirayeli a Lawa nyankoe

¹² Salomɔn golee lon Dɛnaa Lawa a *wúlu bɔ ǹ bǎã nyɛɛnɛ, Izirayeli a zaman tumaa yɔrɔ-a, á n nyàan goa lon, a n Lawa nyankoe.

¹³ Kii lɛ zan banbaran dɔ sumu lɛ bii. A gùrù sii tumaa kɔnpɛ. A gogoonmaa a sasabaa n mɛtərə paa ka talɛɛ, a mìi la a wo lon nə mɛtərə goon ka talɛɛ. Salomɔn dii a lalan; a n musin koa tán Izirayeli zaman tumaa yɔrɔ-a, á n nyàan dia lon á Lawa nyankɔ kɛnɛn:

¹⁴ – Dɛnaa Lawa, Izirayeli a Lawa, lon laanka tán la, lawa kɔn banban ka nsɛ bɛ́ lɔn wa. Lɛ kɔ kɔn la laanka kɔn-narɛɛ mɛn bɛ́ n laanka n zaman lɛ bii, ń bɛ tamaa. N dí-nyalin mɛnɛn bɛ́ tɔ we n yɔrɔ-a ka ǹ foo din tumaa nɛ, n nə n bǐɛ̃ koe bɛn ganaa.

¹⁵ Má di Davida lɛ, n dí-nyali lɛa, n lɛ-kɔn mɛnɛn wɔ bɛ nɛ, n nə́ ǹ lɛ pã. N goã ń màn mɛn pɛ ka n lɛ nɛ, ń bɛ lɛ pã ka n pàã nɛ ka yii bɛ́ a ganaa lɔn pelo.

¹⁶ Sisia kəni, Izirayeli a Lawa, Dɛnaa Lawa, ma di Davida lɛ, n dí-nyali lɛa, n goã ń boo mɛn da bɛ nɛ, a lɛ pã, ka n bɛ́ ń pɛ lɔn mà bɛ̀ a nɛnyaanan lɛn tɔ wɔ ǹ gɔn pepere kɔ nsɛ yɔrɔ-a ka a din tɔ wɔ lɔn n yɔrɔ-a á kɔnpɛ ka n dí-pɛn kɛn nɛ, mà a din a min ba re nyaabiɛ duduu Izirayeli a kiibaa lɛ la wa.

¹⁷ Kanna kəni Dɛnaa Lawa, Izirayeli a Lawa, man gòã-kũ diɛ n ganaa, n lɛ-kɔ mɛn wɔ n dí-nyali Davida nɛ, toa bɛ yɔrɔ yɛ.

¹⁸ Lawa á die boe la sonbore a tán baa a giã ǹ bǎã lɛa? Lon lɛ din laanka a golebaa nɛ, bɛ ba a giã ǹ bǎã boe wa, n tɔn kion kɛ pɛ má dɔ!

¹⁹ Sɛnɛ Dɛnaa Lawa, maa Lawa, n bɔyaa n nə n yɔrɔ dia masɛ la, n too kɔ maa nyankɔ laanka maa gòã-kũ ganaa. N dí-nyali lɛ bɛ́ n lɛ mɛn dii, ma nə n nyankoe, n too kɔ bɛ ganaa.

²⁰ N yii die a goã kɛa kion kɛ lɛ la penleen laanka tèlò ne, bǎã mɛn lɛ á ke ń bɔ n nə́ n tɔ da la. Kanna kəni, n too kɔ maa nyankɔ li kion kɛ nɛ.

²¹ N too kɔ, bɛ̀ n dí-nyali laanka n din a zaman Izirayeli minin lɛn nə́ n yɔrɔ dia kion lɛ la, wɔ́ n nyankɔ, n toa n giã ǹ bǎã-n lon n nə n too kɔ wɔsɛn lon, n wɔ zɛ̀rɛn toa wɔ nɛ.

²² Bɛ̀ ka min na á wɔ ǹ miã lon, yǎa ǹ laa a ganaa mà a n liɛ kion kɛ nɛ, wúlu bɔ ǹ bǎã kɛ yɔrɔ-a,

²³ n toa lon, n nə n too kɔ-a, n nə n dí-nyalin lɛn waa kɔn. Min mɛn zɛ̀rɛ bɛ́ nɛ, n dɔlɔ da bɛa dɛnaa lɛ mìi ni a zɛ̀rɛ lɛ a saraa lɛa. Zɛ̀rɛ bɛ́ a ba min mɛn ganaa wa, n sonbore pɛ n da bɛ lon, min tumaa dɔ̃ mà sonbore tá a lon.

²⁴ Bɛ̀ n zaman, Izirayeli tɔrɔn lɛn zɔ́ɔn nə́ boo ǹ la, n din bɔlɔ tii taman yii, bɛ̀ ǹ nə́ wusoo ka ǹ kio ne, ǹ nə́ daa n ganaa, ǹ nə́ n tɔ guguru kɔ, ǹ nə́ n nyankɔ, ǹ nə́ gòã-kũ da n ganaa kion kɛ nɛ,

²⁵ n toa lon n nə ǹ lɛ si, n nə n zaman Izirayeli tɔrɔn lɛn sii baraan toa ǹ nɛ. N goã ń tán mɛn kɔ ǹ la ka ǹ digolon ne, wusoo n da ǹ nɛ walan.

²⁶ Ta lon lɛ na á n tã, la ná a ba kiɛ wa, n zaman lɛ a bɔlɔ-tii taman yii, bɛ̀ ǹ nə́ n yɔrɔ dia bɛa kion bǎã kɛ lɛ la, ǹ nə́ n tɔ guguru kɔ, ǹ nə́ ǹ gɔ́ɔ̃ dɔn bii ka ǹ sii baraan nɛ, n din a nɔmaa da ǹ mìi-n taman yii,

²⁷ n toa lon, n nə ǹ lɛ si, n nə n dí-nyalin laanka n zaman Izirayeli minin sii baraan toa ǹ nɛ. Ǹ doamaa bɛ́ nɛ ǹ kɔ zii sonbore mɛn lɛ, ǹ kaa bɛ la. La kaa gána lɛ nɛ, gána mɛn lɛ bɛ́ ń kɔ n zaman lɛ la kíɛ̃ lɛa.

²⁸ Ta bòo n gána lɛ nɛ, ta piɛ̃ busu ni, ta già nɛ, ta doloka nɛ, ta bisinin manɛ, ta kondoon ne, ta gána lɛ a zɔ́ɔn man ná a kiwi tamaa wolen kũ, ta bɔ̀n sii mɛn nɛ, ta busu mɛn nɛ,

²⁹ ta n zaman Izirayeli minin kɛn goon mɛn a nyankɔ lɛ din nə lɔn, bɛ̀ ǹ gogoonmaa ná a din a fuu laanka a koe dɔ̃, yǎa ǹ nə n gɔnɔn lɛ bɔ ǹ nə́ ǹ dia kion kɛ lɛ la,

³⁰ n too kɔ ǹ lon n giã ǹ bǎã lɛ-n lon. Ǹ zɛ̀rɛn toa ǹ nɛ, n nə ǹ saraa a kɔnpɛ ka ǹ zɛnaa ǹ sii tumaa nɛ. A giala, n din nə ǹ taasiɛ doɛ̃. Sonbore, n dinsɔɔ̃ n minbuiin nɛ tumaa a taasiɛ doɛ̃.

³¹ A zɛnaa miɛ̃ màn mɛn bɛ́ toɛ, Izirayeli minin lɛn nə nyɛ́ɛ baa n nɛ ǹ tɔ wɔ gɔ́ɔ̃ nɛ, n yɔrɔ-a biikoo yii li, a ǹ toa tán kɛ la, n din kɔ wɔsɛn digolon la.

³² Ta tii mɛn nə boe gána sɔsɔɔ nɛ, ǹ dɛnaa ná a ba n zaman Izirayeli minin kɛn goon lɛa wa, a giala tɔrɔ kɔsɔn tá re n tɔ gole kɛ miɛ, ka n sii dadaran kɛn nɛ ń zɛnaa n zaman lɛ nɛ, bɛ̀ bɛa tii lɛ daa n nyankɔ kion kɛ nɛ,

³³ a bɛ́ re màn mɛn tumaa nyankoe n la, n too kɔ a lon n giã ǹ bǎã lɛ nɛ, n bɛ kɔ la. Màn mɛn bɛ́ toɛ kanaa a tɔrɔn tumaa dɔ̃, ǹ nə n guguru kɔ, ka n zaman Izirayeli minin bɛ́ zɛnɛɛ lɔn. Ka bɛ dɔ nɛ, ǹ dɔ̃ mà kion ke masɛ dɔ, mà n din tɔ n la.

³⁴ Ta ma nə́ n zaman lɛ yɔrɔ dia zii mɛn li, ǹ nə́ woo zia da ǹ zɔ́ɔn ganaa, bɛ̀ ǹ nə́ n yɔrɔ dia n kiwi yii gɔgɔɔ̃ wole kɛ la, ka kion kɛ nɛ má dɔ n tɔ la,

³⁵ n die n nə n toa lon n nə n too kɔ ǹ nyankɔ laanka ǹ gòã-kũ ganaa, n nə n dɔ ǹ lɛ!

³⁶ Ta maǹ nə́ sã n ganaa, a giala mà min kɔn banban mà bɛ ná a ba siɛ̃ wa, ta n foo na á yoo ǹ li, ń nə ǹ wɔ ǹ zɔ́ɔn gɔn, bɛn nə́ boo ǹ la ǹ nə́ ǹ baa bɛ̀rɛn lɛa, ǹ nə́ woo ǹ ne ǹ gána nɛ, ta gána lɛ á sɔsɔɔ hinlaa ta a sɔsɔɔ wa,

³⁷ bɛ̀ ǹ nə́ n toa bɛa gána kɛ lɛ nɛ, ǹ bɛ̀rɛbaa gɔ́ɔ̃ nɛ, ǹ nə́ n taasɛ, ǹ nə́ n gɔ́ɔ̃ dɔn bii, ǹ nə́ gòã-kũ da n ganaa ǹ nə́ pɛ: «Wɔ́ sii baraa zɛnaa, wɔ́ baraabaa zɛnaa, wɔ n zɛ̀rɛdɛnan lɛa,»

³⁸ ǹ wo ǹ ne bɛ̀rɛbaa nɛ gána mɛn nɛ, bɛ̀ ǹ nə́ n toa walan, ǹ nə́ wusoo ǹ nə́ daa n ganaa ka ǹ foo din tumaa laanka ǹ telenboeen din tumaa nɛ, ǹ gána mɛn lɛ bɛ́ ń kɔ ǹ digolon la, kiwi mɛn dɔ bɛ́, ń na a yii gɔgɔɔ̃, kion mɛn bɛ́ masɛ dɔ n tɔ la, bɛ̀ ǹ nə́ n nyankɔ, ǹ yɔrɔ n dia-n bɛ la,

³⁹ n toa lon n giã ǹ bǎã lɛ nɛ, n nə n too kɔ ǹ nyankɔ laanka ǹ gòã-kũ li, n nə n dɔ ǹ lɛ. N zaman mɛn lɛ á ke, á sã á wɔ n lon, bɛn sã toa ǹ nɛ.

⁴⁰ Kanna, Maa Lawa, n yii bũ, bǐɛ̃ kɔ n nə n too kɔ nyankɔn li bǎã kɛ nɛ sɔnbɔraanɛ.

⁴¹ Kanna kəni Dɛnaa Lawa, yoo n da n susu ǹ bǎã nɛ, yoo ka n lɛ kɔ kɔn la ǹ goo kɛ nɛ goo kɛ lɛ n din pàã nyɛɛ! N kirisibaa kɛ nə n kɔ n wúlu-bɔlen kɛn lɛ ka mɔnaa bɛ́ lɔn! N din a min sonboren kɛn, bɛn die ǹ nə n nyɛnyɛɛ ka foo kɔɔ̃n gole ne!

⁴² Dɛnaa Lawa, n din kii mɛn bɔ ń koa, n baran n yɔrɔ bɔ bɛ la wa. N bǐɛ̃ mɛn zɛnaa n dí-nyali Davida nɛ, n yiri gisĩ bɛ nɛ!