KZS2 5 - LAWA A BOO SONBORE

¹ Salomɔn goã á dí mɛn yii nya Lawa a kion lɛ ganaa, bɛ yii mìi tã sɔnbɔraanɛ. Ǹ di Davida goã á mànan mɛnɛn kɔ Lawa la, á bɛn goa á daa ǹ kaa Dɛnaa Lawa a kion mànan li. A mànan mɛnɛn lɛn goa á daa ǹ nɛ, sana tan, wɔrɔ tan ka dí nya ǹ mànan nɛ.

Lɛ kɔ kɔn la ǹ goo á da Lawa a kion

² Bɛ kio, Salomɔn tɔn Izirayeli zaman a min golen sɔkɔn a din li Zeruzalɛmu, Izirayeli tɔrɔ tumaa a nyɛɛnaandɛnan nɛ ka sumu tumaa a nyɛɛnaandɛnan nɛ, maǹ Dɛnaa Lawa a *lɛ kɔ kɔn la ǹ goo lɛ saa "Davida a kiwi" kɛ nɛ ǹ nə́ bíi *Siɔn.

³ Bɛ lɛ nɛ Izirayeli minin lɛn tumaa nə́ n sɔkɔn kii Salomɔn li, lɛ̀ a mui sɔbaabaa ǹ wɔ a zɔ́n taman yii.

⁴ Izirayeli min golen lɛn tumaa bɛ́ ǹ nə́ dɔ ǹ mɛn waáraa, *Levii tɔrɔn lɛn man nə́ goo sonbore lɛ saa.

⁵ Levii tɔrɔ, Lawa a wúlu-bɔlen kɛn nə́ lɛ kɔ kɔn la ǹ goo kɛ saa, kun ka kɔn yɛ ka Lawa nɛ ǹ mɔnaa kion kɛ dɔ nɛ, Lawa a màn yoreenən kɛn ná a gɔ́ɔ̃ nɛ.

⁶ Izirayeli a zaman mɛn tumaa goã á n sɔkɔn Salomɔn li, bɛn nə́ goã ǹ tan kun ni goo lɛ yɔrɔ-a, ǹ nə́ wúlu bɔ ka tɔɔ bisinin laanka tɔɔ dadaran nɛ. Min nə goã boe la a tá tɔɔn lɛn nimii doɛ̃ a n lɛ dɔ̃ wa, ǹ mɔnaabaa gɔn.

⁷ Lawa a wúlu-bɔlen nə́ wɔ ka lɛ kɔ kɔn la ǹ goo lɛ nɛ Lawa a kion, ǹ nə́ da a bǎã nɛ, bǎã sonbore sonbore kɛ nɛ. Maǹ nə́ da lon màn yiikoonaa nyínin lɛn nyàan giulun.

⁸ Lon màn yiikoonaan lɛn nyàan lɛ na á goã boe ne, goo koa ǹ bǎã lɛ mìi la, ń giɛ ǹ tá n koe goo lɛ laanka a saa ǹ bàlàn lɛ.

⁹ A saa ǹ bàlàn lɛn man nə́ goã sɔsɔrɔ a tɔ-a. Kion lɛ a gɔ́ɔ̃ gole mɛn bɛ́ n na n tɔ n dɔ bǎã sonbore sonbore kɛ nɛ, min nə́ goã boe la a n toa bɛ gɔ́ɔ̃ nɛ a ǹ lɛwɔn yɛ. Sɛnɛ a ba boe la a n toa kanaa a ǹ yɛ wa. Bɛa bàlàn lɛn tan a da kaa pelo lɛ.

¹⁰ Màn kɔn nə goã goo lɛ gɔ́ɔ̃-n wa, bɛ̀ á n bɔ kɔlɔ-sɛlɛɛ paa kɛ lɛ nɛ Muizu goã á ǹ kaa a nɛ Orɛbu, bɛ̀ Dɛnaa Lawa bɛ́ á lɛ-kɔ wɔ Izirayeli minin lɛn la ǹ soo Ezipti gána-n waáraa.

¹¹ Wúlu-bɔlen nə́ soo bǎã sonbore sonbore lɛ nɛ. Wúlu-bɔle mɛn tumaa bɛ́ a tan ǹ nə́ goã ǹ nə́ n dinin *yoreen kɔ, bɔnbii-a ná a yɛ a nɛ tanlɛ paǹ li wa.

¹² Levii tɔrɔn kɛn sàn-kɔlen lɛa, Azaafu ni, Eman nɛ, Yedutunu ni ka ǹ nɛnyaanan nɛ, ka ǹ tanlɛ min gialakunun ni, bɛn man nə́ mɔnaa guguru sonbore wɔ. Ǹ nə́ gole wúlu bɔ ǹ bǎã lɛ a lɛ̀giala gɔn la, ka dindin ni tùtùn ni ka kɔnkoɛɛ̃nɛn nɛ. Ǹ genli, wúlu-bɔle paabiɛ ka fuə (120) n bii-a bɛn pii.

¹³ Bɛn-pɛlen laanka loe-lɔlen lɛn nə́ kaa kunun ǹ ni, loe goon loe Dɛnaa Lawa tɔ boe ne, ǹ ná a guguru koe. LOE-lɔlin lɛn nə́ loe lɔ, ǹ nə́ bɛ̀ dɛ ǹ mànan dɛ, ǹ nə́ Dɛnaa Lawa tɔ bɔ ka ǹ loen ne: «Dɛnaa Lawa á siĩni, a minin narɛɛ a nyɛɛ duduu wa.» Bɛa biikoo li tɛmaa bara daa Dɛnaa Lawa a kion lɛ pã.

¹⁴ Bɛa tɛmaa bara lɛ taman yii, wúlu-bɔlen lɛn ba boe la ǹ tá ǹ dí nyɛɛ wa, a giala Dɛnaa Lawa na á kion lɛ pã ka a din a gugurubaa nɛ.