KZS2 4 - LAWA A BOO SONBORE

¹ Salomɔn nə *wúlu bɔ ǹ bǎã zɛnaa zan lɛa. A gùrù sii lɛ a gogoonmaa n mɛtərə fù, a wo lon nə mɛtərə sooro.

Lawa a kion a doo gole ka a tanan, zan tã lɛa

² Á doo gole zɛnaa buurii ni ka zan tã nɛ, ǹ nə́ bíi "yìsi mu". A gɔ́ɔ̃ a pəməbaa n mɛtərə sooro. A wo lon ne mɛtərə paa ka talɛɛ, a binbin a lɛnpɛnɛ n doe mɛtərə fulusooro.

³ Doo lɛ a kanaa a lɛkoro ke dia-n die tán, ǹ nə́ dii nyínin zɛnaa a ganaa zii paa la. Zii lɛ a gogoonmaa a dii nyín ne kɔnpii dii nyín fù ni, mɛtərə talɛɛ la. Bɛa nyaǹ kɛ na á n kaa a ganaa doo lɛ a zɛnaa biikoo li, ǹ tumaa nə́ n baa goon.

⁴ Doo lɛ giala n koa nɛ dii fulupaa la. A sɔɔ yɔrɔ n dia nɛ gɔsɛ a lɛ̀gɔn la, sɔɔ yɔrɔ n dia nɛ lɛ̀nyɛɛn la, sɔɔ yɔrɔ n dia nɛ gusin a lɛ̀gɔn la. Diin lɛn tumaa giala n dia nɛ kɔn la.

⁵ Doo lɛ gɔ̀nɔn a pəməbaa na á goã ka gɔn tìsì a pəməbaa bɛ́ lɔn. A lɛ kiri na á goã golongolon ka da buũ wɔ bɛ́ lɔn, lɔɔlɔɔ ka kaaran bɛ́ lɔn. Litiri duu paabiɛ ka fuə (120 000) n we a nɛ.

⁶ Á tɔn wusoo á doo kaaraa fù zɛnaa zan lɛa. Á sooro kaa gusin, á sooro dɔ kaa gɔsɛ, zoo ǹ bǎã lɛa. Ǹ bɛ́ re màn mɛn biɛ *wúlu màn tiɛ̃ lɛa, maǹ bɛn pii walan. Lawa a wúlu-bɔlen lɛn manə n zoe ka bɛa doo kaaraa kɛ lɛ a mu ni.

Lawa a kion lɛ a mànan mɛnɛn bɛ́ fɔlɔ mànan lɛa

⁷ Salomɔn bolon da ǹ bǎã fù zɛnaa sana lɛa ka ǹ bɛ́ ǹ nə́ nyaa-n lɔn, á ǹ kaa Lawa a kion kɛ nɛ, sooro n gusin, sooro n gɔsɛ.

⁸ Á tabala fù zɛnaa, á ǹ dɔn kaa Lawa a kion lɛ nɛ, sooro n gusin, sooro n gɔsɛ. Á mà si ǹ kaaran paabiɛ zɛnaa ka sana yoreen na.

⁹ Á sumu dɔ Lawa a wúlu-bɔlen wɔ lɛa, á kɔsɔ dɔ dɔ, bɛ n gole á la a bibinaa lɛ nɛ, zan tã n kaa nɛ a kiɛnlɛn la.

¹⁰ Doo gole buurii lɛ, ǹ nə́ bíi "yìsi mu", bɛ na á n koa Lawa a kion lɛ a gusin a lɛ̀gɔn la, kunu a gùrù mɛn bɛ́ dia nɛ a gusin a lɛ̀giala gɔn la.

¹¹ Bɛ kio, Uramu ton kaa ǹ mànan zɛnaa, lasanan nɛ, ka a mà pɛsɛn tàanan nɛ. Kii Salomɔn nɔ̀n da la mà a mànan mɛnɛn zɛnaa Lawa a kion lɛ wɔ lɛa Uramu bɛn zɛnaa á nya:

^12-16 Bìbì paa kɛ nɛ, mànan mɛnɛn bɛ́ bìbìn lɛn mìi-n lon nyaǹ lɛa, bɛn màn pooreen kɛn manɛ, ka màn la kekerekaãn kɛn nɛ, màn pooreen lɛn kɔmalɛ ǹ wɔn lɛa. Grenadie da nɛ nyín biɛsii (400) kɛ nɛ, ǹ nə́ nyaǹ mànan kɛn lɛ dɛ nɛ, bìbìn lɛn mìi ni. Wotoro fù kɛ nɛ, tan fù kɛ nɛ ǹ nə́ diɛ wotoron lɛn la, doo kaaraa kɛ nɛ, dii gɔ̀lɔ̀ fulupaa kɛ nɛ, doo kaaraa lɛ giala n diɛ nɛ ǹ la. Tàanan kɛn manɛ, ka lasanan kɛn laanka mà pɛsɛ̃ ǹ mànan kɛn nɛ. Bɛa mànan kɛn lɛn tumaa Uramu-Abii nə́ ǹ zɛnaa á ǹ kɔ kii Salomɔn la, Dɛnaa Lawa a kion lɛ wɔn lɛa, ǹ tumaa n zan lɛa zɔnɛɛ nɛ.

¹⁷ Zurdɛ̃ tà lɛ, a bǎã nɛ, Sukɔti kiwi laanka Saretan kiwi bii ni, kii lɛ nə́ ǹ kaa bɛa mànan kɛn lɛn tumaa boe ganaa gì dɔnɔn nɛ.

¹⁸ Salomɔn bɛa mànan lɛn zɛnaa, sɛnɛ ǹ gigiãbaa taman yii, ǹ zan lɛ a gugurubaa zɔɔ̃ wa. Bìbì màn paa nɛ ǹ mìi n munii ni lon wɔlɔ-a, zɔɔ màn paa nɛ, koe-n bɛa mìin kɛn lɛn lɛ lon walan.

^19-22 Mànan mɛnɛn tumaa doamaa bɛ́ nɛ ǹ nə ǹ kaa Lawa a kion lɛ nɛ, Salomɔn bɛn dɔn zɛnaa: Màn gìĩ kɔɔ̃n tã ǹ bǎã kɛ nɛ sana lɛa, tabalan kɛn manɛ ǹ tá Lawa gɔ ǹ buuru diɛ la. Bólon da ǹ bǎãn kɛn nɛ, sana yoreen yoreen lɛa, maǹ nə́ ǹ kaa bǎã sonbore sonbore lɛ nyɛɛnɛ. Nyaǹan kɛn manɛ, ka da buũ bɛ́ lɔn sana lɛa, bólonən kɛn manɛ sana lɛa, bólon tɛ zɛnaa ǹ banbaalan kɛn manɛ sana lɛa, sana yoreen yoreen lɛa. Gɔyan kɛn manɛ, sana gɔyan kɛn nɛ, mà pɛsɛ̃ ǹ mànan kɛn manɛ, kaaran kɛn manɛ, da yon gìĩ kɔɔ̃n tã ǹ mànan kɛn nɛ. Lawa a kion a kiɛnlɛn kɛn manɛ, kiɛnlɛn mɛnɛn bɛ́ woe niɛ̃ bǎã sonbore sonbore lɛ gɔ́ɔ̃ nɛ, ka kiɛnlɛn lɛn mɛnɛn dɔn bɛ́ die kion gɔ́ɔ̃ gole lɛ-a, ǹ bɛ́ tàanan mɛnɛn la, bɛn man sana lɛa.