KZS2 35 - LAWA A BOO SONBORE

Zoziasi n kiɛ̃mala ǹ zɔ́n zɛnɛɛ

¹ Zoziasi n *kiɛ̃mala ǹ zɔ́n zɛnɛɛ Zeruzalɛmu, á Dɛnaa Lawa tɔ boe ne. Lɛ̀ a mui bibinaa a lɛawaa fulusii, ǹ nə́ zɔ́n lɛ a tɔɔn bɔlɔ kuru.

² Zoziasi wusoo á Lawa a wúlu-bɔlen kaa ǹ bǎã nɛ, á ǹ foo taã maǹ boo la ǹ dí nya Lawa a kion lɛ nɛ.

³ Bɛ kio, á tɔn boo da *Levii tɔrɔn nɛ, ǹ mɛnɛn bɛ́ ǹ nə́ n dinin kɔ Dɛnaa Lawa la, zaman lɛ a daraa nə́ ǹ dí lɛa. Á pɛ ǹ nɛ: «Ka *lɛ kɔ kɔn la ǹ goo sonbore ke da Lawa guguru kɔ ǹ kion kɛ nɛ, Izirayelin kii Davida a nɛgiĩ Salomɔn dɔ. Ka a re guĩ ka kɔrɔn doo wa. Kanna kəni, ka dí nya Dɛnaa Lawa, kaa Lawa nɛ ka a din a zaman Izirayeli minin ni.

⁴ Ka n yɔrɔ bɔ tanlɛ yii li, ka dí nya kuru lɛ yii li ka Izirayelin kii Davida goã á kiɛ̃ lɔn, ka a nɛgiĩ Salomɔn dɔ goã á kiɛ̃ lɔn.

⁵ Levii tɔrɔn kuru lɛ a gogoonmaa n golee-n bǎã sonbore kɛ nɛ, ǹ boo la ǹ dí nya Izirayeli min gialakunun kɛn manɛ, a kɔnpɛ ka ǹ tanlɛ bii kuriin kɛn nɛ.

⁶ Ka *wúlu màn dɛ kiɛ̃mala ǹ zɔ́n wɔ lɛa. Ka n dinin *yoreen kɔ, ka ka dɔɔ̃n Izirayeli minin wúlu màn yɔrɔ bɔ, ka kɔ Dɛnaa Lawa a landan kɛn lɛ, Muizu nə́ ǹ kɔ ka la lɛlɛ.»

⁷ Zoziasi sère ten ka bòe ten duu pɔsɔɔ (30 000) kũ a tɔɔn bii kiɛ̃mala ǹ zɔ́n wɔ lɛa, kɔnlɛ ka dii duu sɔɔ (3 000) nɛ zaman lɛ wɔ lɛa, ka min mɛnɛn tumaa goã ǹ tan,

⁸ a dí nya kun wolen dɔn nə bɔ ǹ foo-a ǹ nə́ tɔɔn kɔ zaman lɛ wɔ lɛa ka Lawa a wúlu-bɔlen laanka Levii tɔrɔn nɛ. Ilkia laanka Zakarii ka Yeyieli n Lawa a kion mìi la. Ǹ nə́ sère nɛ ten ka bòe duu paa ka biɛsɔrɔ (2 600) kɔ kiɛ̃mala ǹ zɔ́n wɔ lɛa wúlu-bɔlen wɔ lɛa, kɔnlɛ ka dii biɛsɔɔ (300) nɛ.

⁹ Kananiya ka ǹ dɔɔ̃nɔn Semayia laanka Netaneyeli ni, Akabia nɛ, Yeyieli ka Zozabaadi ni kɛn Levii tɔrɔn kiãn lɛa, ǹ nə́ sère ten ka bòe duu sooro (5 000) ka dii biɛsooro (500) kɔ Levii tɔrɔn la kiɛ̃mala ǹ zɔ́n wɔ lɛa.

¹⁰ Sii lɛ nə n zɛnaa ka yɔrɔ mɛn nɛ, á ke: Lawa a wúlu-bɔlen man golee ne ǹ bǎã nɛ, Levii tɔrɔn man kuru lɛ yii li, ka kii a da ǹ boo nyaa lɔn.

¹¹ Ǹ nə́ mɛ sère tenən lɛn laanka bòen lɛn bɔlɔ kurii la, ǹ na a mà koe Lawa a wúlu-bɔlen la, bɛn nə́ pɛsɛ̃ wúlubɔ ǹ bǎãn la. Levii tɔrɔn lɛn man tɔɔn lɛn ki boe.

¹² Ǹ nə́ wúlu màn lɛ piɛ̃ lɛ kaa a gɔrɔn màn mɛn bɛ́ toɛ ǹ kɔ zaman lɛ a sumu lɛ totoron la mà ǹ kɔ Dɛnaa Lawa la, ka a bɛ́ kiɛ̃-n Muizu a sɛ́wɔ-n lɔn. Maǹ nə́ zɛnaa miɛ̃ tɔɔ dadaran dɔn manɛ.

¹³ Ka landa bɛ́ nyɛɛ lɔn, maǹ nə́ kiɛ̃mala ǹ zɔ́n wúlu màn lɛ tã tɛla. Bɛa biikoo li, maǹ wúlu màn gialakunun kɛn kɔrɛɛ fɔlɔ donkolonən ne, dɔnɔn nɛ ka màn kɔsɔn nɛ. Bɛ kio, ǹ tɔn wo kɔ Izirayeli minin tumaa la fufuu.

¹⁴ Bɛ kio, Levii tɔrɔn lɛn nə tɔn Lawa a wúlu bɔlen wɔ kɔrɛ kɔnlɛ ka ǹ dininmaan wɔ nɛ. Taãn nɛ, Lawa a wúlu-bɔlen mɛnɛn bɛ́ Aarɔn a kion minin lɛa, bɛn man wúlu màn lɛ piɛ̃ koe ka siĩ nyɔɔnaa nɛ, a wo wasa a mɛ yaa. Bɛ lɛ nɛ, Levii tɔrɔn lɛn nə́ màn-bii zɛnaa ǹ dininmaan wɔ lɛa ka Lawa a wúlu-bɔlen kɛn nɛ Aarɔn a kion minin lɛa.

¹⁵ LOE-lɔlin kɛn Asaafu a kion minin lɛa, bɛn man giã nɛ ǹ bǎã nɛ, ka Davida laanka Asaafu laanka Eman ka Yedutunu bɛ́ ǹ nə́ pɛ lɔn. Yedutunu n kii a sii-yɛle lɛa. Kiɛnlɛ-lɛduə̃lin dɔn man giã nɛ ǹ bǎã nɛ. Ǹ ba n boe ǹ dí nya ǹ bǎã-n wa a giala, Levii tɔrɔ kɔsɔn tá màn-bii zɛnɛɛ ǹ wɔ lɛa.

¹⁶ Bɛa pinaa kɛ lɛ nɛ, sii kɛ tumaa na á n zɛnaa, kiɛ̃mala ǹ zɔ́n taman yii, ǹ nə́ wúlu mànan kɔ Dɛnaa Lawa la *wúlu bɔ ǹ bǎã nɛ á kɔnpɛ kii Zoziasi a boo ne.

¹⁷ Izirayeli minin mɛnɛn nə goã ǹ tan kiɛ̃mala ǹ zɔ́n lɛ a waáraa, ǹ nə́ yɔ bùbaã buuru zɔ́n zɛnaa lɛawaa sɔbaa.

¹⁸ A kũ Lawa a dia dí-a wole Samayeli ganaa, ǹ tɔn kiɛ̃mala ǹ zɔ́n zɛnaa ka yɔrɔ kɛ nɛ Izirayeli gána-n wa. Izirayelin kii kɔn tɔn kiɛ̃mala ǹ zɔ́n zɛnaa ka kɛ bɛ́ lɔn wa. Zoziasi na á zɛnaa kun ka Lawa a wúlu-bɔlen ne, Levii tɔrɔn nɛ, Zeruzalɛmu minin ni, Zudaa gána minin ni ka Izirayeli gána minin mɛnɛn bɛ́ ǹ tan.

¹⁹ Maǹ nə́ bɛa kiɛ̃mala ǹ zɔ́n kɛ zɛnaa Zoziasi a kiibaa lɛ̀ fulukiwisibaa ǹ wɔ li.

Zoziasi a yiikoonaabaa giala nyɔmiɛ̃

²⁰ Ǹ kɔn pinaa, Zoziasi a Lawa a kion lɛ zɛnaa kio, Eziptin kii Neko woo Karkemisi kiwi gialaa Efrati tà lɛa. Zoziasi zii saa, á woe a gialaa.

²¹ Neko minin dia maǹ wo boo kɛ pɛ nɛ: «Zudaan kii, n gɔ́ɔ̃ n wáa ganaa? Ma bie die zia biɛ nsɛ ganaa wa, zɔ́ɔ kɔsɔ nɛ. Lawa mà ma wo fufuu. Lawa n kun ka manɛ. N baran gòãn dii a ganaa wa, bɛ bie wa, a n die n dii n gã.»

²² Sɛnɛ, Zoziasi yiri nə n bɔyaa wa. Bɛ lɛ nɛ, a n too kɔ Nekoo a boo lɛ-a wa, a da yaa dɔn, boo lɛ n boe Lawa dinmaa li. A ná a kiibaa ǹ mɔnaan sɔlɔ màn mɛn bɛ́ toɛ a nyan dɔ̃ wa, á tɔn woo Megidoo a nyankɔrɔ lɛ kɛ nɛ zia la.

²³ Sɔraasin nə́ kiɛ zũ kii Zoziasi li. Á pɛ a dí-nyalin manɛ: «Ka ma saa ka wo ma nɛ, kiɛ ma kũ baraa.»

²⁴ A dí-nyalin nə́ gisĩ ǹ nə́ bɔ a ziabaa ǹ wotoro ne, ǹ nə́ da a ziabaa ǹ wotoro paabaa ǹ wɔ kɛ nɛ, ǹ nə́ woo ne Zeruzalɛmu. A na á gã bɛa kiwi lɛ nɛ, ǹ nə́ bĩ ǹ digolon yala-n. Zeruzalɛmu min din tumaa ka Zudaa wɔn nɛ, ǹ nə́ Zoziasi a gɛ̀ koa.

²⁵ Lawa a boo gii-dali Zeremii gɛ̀ loe kiɛ̃ Zoziasi wɔ lɛa. A kũ bɛa waáraa kɛ ganaa a da kaa pelo lɛ, giĩ loe-lɔli laanka lɔ loe-lɔli tumaa n Zoziasi boo diɛ, bɛ̀ ǹ tá gɛ̀ loe loe. Bɛ na á landa baa Izirayeli gána nɛ. Ǹ boon tá gɛ̀ loen sɛ́wɔ nɛ.

^26-27 Zoziasi a nya ǹ dí gialakunun kɛn, a kũ a bibinaan ganaa a wo a giala nyɔmiɛ̃ yaa, ǹ tá kiɛ̃ nɛ Izirayeli laanka Zudaan kiin sɛ́wɔ nɛ. Zoziasi goã bɔlɔgoondɛnaa lɛa lɔn, a kɔnpɛ ka Dɛnaa Lawa a dí-pɛn sɛ́wɔ kɛa boon ne, sɛ́wɔ lɛ n bɛ nyɛɛ.