KZS2 34 - LAWA A BOO SONBORE

Zoziasi n Zudaan kii lɛa

¹ Zoziasi kiibaa yɛ bɛ̀ a lɛ̀ kiwisi ni, á kii baa Zeruzalɛmu lɛ̀ pɔsɔɔwengoon.

² Sii mɛn bɛ́ pepere Dɛnaa Lawa yii li, Zoziasi bɛ zɛnaa. Á ǹ digolo Davida a tɔ wɔ ǹ gɔn saa ka te. A kanaa á woo a gusin wa, a kanaa á woo a gɔsɛ dɔn wa.

³ Zoziasi a kiibaa a lɛ̀ kiwisibaa ǹ wɔ li, bɛ̀ á n tɔn nɛ ten lɛa. Á ga li mà a ǹ digolo Davida a Lawa foo sii dɔ̃. A kiibaa lɛ̀ fulupaabaa ǹ wɔ li, á bɔ á mɛ Zeruzalɛmu *yoreen kɔ la, ka Zudaa gána nɛ. Á wúlu bɔ ǹ bǎãn ziziɛ̃, dì gɔnɔn nɛ, dì nyínin tumaa nɛ, fɔlɔ màn yoe lɛa ka gɔn nɛ.

⁴ Zoziasi nə́ ǹ kaa dì *Baali a wúlu bɔ ǹ bǎãn wurii ganaa kɔnlɛ ka da yon gìĩ kɔɔ̃n tã ǹ bǎãn nɛ ǹ lalan, a din yii ni. Á wúlu bɔ ǹ bǎãn ziziɛ̃, dì gɔnɔn nɛ, dì nyínin tumaa nɛ, fɔlɔ màn yoe lɛa ka gɔn nɛ. Ǹ nə́ ǹ tumaa yɔyɔrɛ mɔnɔmɔnɔ. Min mɛnɛn nə wúlu bɔ dì nyínin ganaa, ǹ nə́ pɛsɛ̃ bɛn yalan la.

⁵ Ǹ nə́ dì wúlu-bɔlen wen tã ǹ dinin *wúlu bɔ ǹ bǎã nɛ. Zeruzalɛmu ka Zudaa gána yoreen kɔ lɔn, bɛ n ka kɛ nɛ.

⁶ Bɛ kio á tɔn woo Manaasee kiwin ni, Efrayimu wɔn nɛ, Simiɔn wɔn nɛ, ka Nɛfutalii dɔ din wɔn nɛ, kɔnlɛ ka gánan mɛnɛn bɛ́ ǹ miãkɛnɛn lɛa.

⁷ Walan, á wúlu bɔ ǹ bǎãn nyɛnaa á ǹ kaa. Á wúlu bɔ ǹ gɔnɔn yiyiɛ ka dì nyínin ni, á ǹ yɔyɔrɛ, á da yon gìĩ kɔɔ̃n tã ǹ bǎãn ziziɛ̃ Izirayeli gána tumaa nɛ, á tɔn woo Zeruzalɛmu.

Lawa a wúlu-bɔlen kiã n dí-pɛn sɛ́wɔ yii

⁸ Zoziasi a kiibaa lɛ̀ fulukiwisibaa ǹ wɔ li, bɛ̀ á tɔn gána yoreen koe ka Lawa a kion lɛ nɛ. Ǹ kɔn pinaa, á pɛ Asaliya a nɛgiĩ Safan nɛ, Zeruzalɛmu a gánadɛnaa Maseya nɛ kɔnlɛ ka Zoakazi a nɛgiĩ Zoa nɛ, kii a sɛ́wɔn-tamaali lɛa, mà ǹ wo Dɛnaa Lawa, asɛ a Lawa a kion zɛnaa.

⁹ Bɛa minin lɛn nə́ woo Lawa a wúlu-bɔlen kiã Ilkia li. Ǹ da ka wɔrɔ mɛn nɛ Lawa a kion lɛ nɛ, ǹ nə́ bɛ kɔ Ilkia la. *Levii tɔrɔn kɛn kiɛnlɛ-lɛduə̃lin lɛa, bɛn man nə́ goã ǹ nə́ bɛa wɔrɔ lɛ si Manaasee ka Efrayimu tɔrɔn la kɔnlɛ ka Izirayeli tɔrɔn kɔsɔn kɛn nɛ, Zudaa minin ni, ka Bɛnzamɛn laanka Zeruzalɛmu wɔn nɛ.

¹⁰ Wɔrɔ lɛ tɔn nə n kɔ Lawa a kion lɛ a dí-nyalin kiãn la, ǹsɛn mɛnɛn bɛ́ kion lɛ doe mà a kaka kɔ, ǹ nə́ zɛnɛɛ dɔn.

¹¹ Wɔrɔ nə́ n kɔ kion lɛ a zũli wolen la dɔn, a dɔlin ni ka a dí kɔsɔ nyalin ni. Bɛn nə́ kɔlɔ sɛlɛ pii, gɔn nɛ kion lɛ a mɛnɛn lɛa. A giala Zudaan kiin nə toa ǹ nə́ ziziɛ̃.

¹² Bɛa dí-nyalin lɛn man nə́ goã dí nyɛɛ ka ǹ parsiini. Maǹ dí nyɛɛ Levii tɔrɔ Yaati laanka Odavia giulun, kɛn Merarii a tanlɛ minin lɛa, ka Zakarii laanka Musulaamu ni Keyati a tanlɛ minin lɛa. Maǹ ga dí ganaa wolen lɛa. Bɛa Levii tɔrɔn lɛn man bɛ̀-dɛle sonboren lɛa.

¹³ Maǹ guĩ-gùlin mìi la, ka gɔn dí-nyalin tumaa nɛ. Levii tɔrɔ kɔsɔn kɛn man sɛ́wɔ-kiɛ̃nli lɛa, zaman-lɛduə̃lin lɛa, ǹ nə́ kiɛnlɛn dɔn lɛduĩ.

¹⁴ Ǹ bɛ́ ǹ nə́ woo ga wɔrɔ li goo kɛ nɛ Lawa kion ǹ mɛn waáraa, Lawa a wúlu-bɔle Ilkia Dɛnaa Lawa a dí-pɛn sɛ́wɔ kɛ yɛ, Muizu goã á ǹ mɛn lɛ kɔ ǹ la lɛlɛ.

¹⁵ Ilkia tɔ́n pɛ sɛ́wɔ-kiɛ̃li Safan nɛ: «Má dí-pɛn sɛ́wɔ yɛ Lawa a kion.» Ilkia tɔn sɛ́wɔ lɛ kɔ la.

¹⁶ Safan sɛ́wɔ lɛ kɔ kii la, á tɔn a daaǹn mìi pɛ-n kɛnɛn: «Ń dín mɛnɛn kɔ n dí-nyalin lɛn la, ǹ tá a tumaa nyɛɛ.

¹⁷ Lawa a wúlu-bɔlen lɛn nə́ Lawa a kion a goo wɔrɔ lɛ binyəə. Ǹ nə́ wɔrɔ lɛ kɔ dí-nyalin nyɛɛnaandɛnaa la ka dí-nyalin ni.»

¹⁸ Sɛ́wɔ-kiɛ̃li Safan wusoo á kɛ ti a ganaa: «Lawa a wúlu-bɔlen kiã Ilkia na á sɛ́wɔ kɛ kɔ ma la.» Safan sɛ́wɔ lɛ pɛ kii yii ni.

Zoziasi nə ǹ diɛ woe nɔ̀n diɛ Huldaa la

¹⁹ Kii bɛ́ á dí-pɛn sɛ́wɔ lɛ a boon ma lɔn, a ná a mɔnaa ǹ tɔtoɛ̃, a giala, a foo ziziɛ̃.

²⁰ Á tɔ́n pɛ Ilkia nɛ, ka Safan a nɛgiĩ Ayikaamu ni, ka Mikaya a nɛgiĩ Akibɔɔrɔ nɛ, ka sɛ́wɔ-kiɛ̃li Safan nɛ, ka kii a dí-nyali Asayia nɛ:

²¹ «Ka wo nɔ̀n da Dɛnaa Lawa la maa lɛa, kɔnlɛ ka Izirayeli laanka Zudaa a zaman gialakun kɛ nɛ. Ka nɔ̀n da ka sɛ́wɔ kɛa boon ne wɔ́ yɛ sisia. Taãn nɛ, wɔ digolon nə kɔ a boon lɛ wa. Boo mɛn bɛ́ kiɛ̃ nɛ sɛ́wɔ kɛ nɛ, ǹ kɔ bɛ lɛ wa. Bɛ lɛ nɛ, Dɛnaa Lawa foo doamaa nɛ a n yui wɔ li taãn-taãnɛ.»

²² Ilkia laanka kii a dia dí-a wolen lɛn nə́ woo Lawa a boo gii-dali lɔ Huldaa li, ke giã nɛ Zeruzalɛmu dala dii kɛ nɛ. Huldaa lɛ n Saalumu a lɔ lɛa. Saalumu n Tikva a nɛ lɛa, Araasi a nɔ̀ɔn lɛa, a n dí nya ǹ mɔnaan mìi la. Huldaa na á goã Zeruzalɛmu dala dii kɛ nɛ. Kii a dia dí-a wolen lɛn nə́ ǹ boo nyaa Lawa a boo gii-dali lɔ lɛ nɛ.

²³ Huldaa tɔ́n pɛ ǹ nɛ mà Dɛnaa Lawa, Izirayeli a Lawa boo mɛn pɛ, mà á ke: – Min mɛn ka dia, ka wo pɛ bɛa dɛnaa-n kɛnɛn

²⁴ mà Dɛnaa Lawa a da ǹ boo á ke: «Á ke, man die koe boe Zeruzalɛmu ganaa ka a minin ni. Lɛn baraa bíi mɛn tumaa bɛ́ kiɛ̃ nɛ sɛ́wɔ kɛ nɛ, á pɛ Zudaan kii yii ni, man die toɛ a tumaa yɔrɔ yɛ.

²⁵ Zeruzalɛmu minin nə́ n la bɔ ma ganaa. Ǹ nə́ da yon gìĩ kɔɔ̃n kɔ dìn la. Ǹ zɛnaa ǹ sii tumaa ma foo yoo. Bɛ lɛ nɛ, bɛa foo yoo baraa kɛ á kiɛ Zeruzalɛmu la, a ná a ba n lɛ kuĩ wa.

²⁶ Zudaan kii mɛn ka dia die nɔ̀n diɛ ma la ka Dɛnaa Lawa, Izirayeli Lawa a da ǹ boo ne, ka pɛ nɛ: N sɛ́wɔ lɛ a boon mɛnɛn ma, Dɛnaa Lawa, Izirayeli a Lawa a da ǹ boo á ke, bɛa paǹ li.

²⁷ N bɛ́ n boon kɛn ma má ǹ da Zeruzalɛmu ganaa ka a minin ni, á dí nya n foo ne, n nə́ n din gisĩ ma yɔrɔ-a. N nə́ n mɔnaan tɔtoɛ̃, n wuu pɛ ma yɔrɔ-a. Haya, masɛ dɔ nə́ n lɛ ma. Ma din Dɛnaa Lawa a da ǹ boo ne.

²⁸ Ma á re toɛ n wo n digolon li, n wo yala-n ka là nyantoro ne. Ka bɛ dɔ nɛ, koe mɛn tumaa bɛ́ ma á re diɛ Zeruzalɛmu laanka a minin mìi ni, n ba re bɛ yii wa.» Dia dí-a wolen lɛn nə́ woo boo binyəə lɛ pɛ kii Zoziasi ni.

Zoziasi n lɛ kɔ kɔn la dii we ka Dɛnaa Lawa nɛ

²⁹ A din bǎãn gɔrɔ, kii lɛ Zeruzalɛmu laanka Zudaa a min golen tumaa sɔkɔn a din li.

³⁰ Ǹ nə́ woo Lawa a kion kun ka Zeruzalɛmu minin tumaa nɛ, Lawa wúlu-bɔlen ne, Levii tɔrɔn nɛ, zaman tumaa nɛ, doobaan laanka pàãman nɛ. Lɛ kɔ kɔn la ǹ sɛ́wɔ mɛn lɛ nə n yɛ Lawa a kion, kii lɛ tɔn bɛa boon tumaa pɛ ǹ yɔrɔ-a.

³¹ Kii lɛ golee lon a golee ǹ bǎã nɛ, á lɛ-kɔ dii wɔ Dɛnaa Lawa yɔrɔ-a, mà asɛ á die koe lɛ, asɛ na a gɔn waa ǹ boon tamaa, a na a da ǹ boon laanka a landa boon tamaa, ka a foo din tumaa nɛ, ka a pàã din tumaa nɛ, a kɔnpɛ ka lɛ kɔ kɔn la ǹ boon kɛn nɛ, kiɛ̃ nɛ sɛ́wɔ lɛ nɛ.

³² Min mɛnɛn tumaa bɛ́ Zeruzalɛmu ka Bɛnzamɛn minin ni, kii lɛ nə́ ǹ nyankɔ man bɛa lɛ-kɔ kɛ lɛ wɔ. Bɛ lɛ nɛ, Zeruzalɛmu minin nə́ zɛnaa miɛ̃, ǹ nə́ ǹ Lawa, ǹ digolon Lawa a lɛ kɔ kɔn la lɛ guguru kɔ.

³³ Sii babaraa mɛn yii goã n zɛnɛɛ Izirayeli gána nɛ, Zoziasi bɛ tumaa sàabaa. Á kiwin tumaa a minin kaa Dɛnaa Lawa, ǹ Lawa guguru kɔ ganaa. Bɛ lɛ nɛ, a yiikoonaabaa gɔ́ɔ̃ nɛ, Izirayeli minin nə kanaa ǹ nə́ n bɔ Dɛnaa Lawa, ǹ digolon Lawa li wa.