KZS2 32 - LAWA A BOO SONBORE

Senankeribu n yui Zudaa gána gialaa

¹ Ezekiasi a bɔlɔgoondɛnaabaa nyaa Dɛnaa Lawa-n kio, Asiiriin kii Senankeribu wɔ Zudaa gána nɛ á yoo ka zia-n kiwi tamaɛn kɛn ganaa, a giala a n zoɛ̃ li a ǹ si.

² Ezekiasi dɔ̃ mà Senankeribu n zoɛ̃ li a da zia baa Zeruzalɛmu ganaa.

³ Á pɛ a kiãn laanka a lɛduə̃lin manɛ, mà mu yala mɛn tumaa bɛ́ a ba kiwi lɛ gɔ́ɔ̃-n wa, mà ǹ nə ǹ tã. Ǹ nə́ daa n dɔ lɛ.

⁴ Zaman gigiã nə́ n sɔkɔn, ǹ nə́ mu yalan lɛn tumaa tã, sanparɛ ǹ mɛn a mu á ke baa sii yala nɛ tán giulun. A giala maǹ nə́ goã pii mà ǹ baran toa Asiirii minin kɛn nə da mu gigiã yaa wa.

⁵ Kiwi lɛ a kungɔnɔn paǹan mɛnɛn nə ziziɛ̃, Ezekiasi yoo ka foo tãbaa nɛ á wusii doe. Á gɔnda ǹ bǎãn dɔ, á kungɔn kɔsɔ dɔ kio, á bǎã kɛ zɛnaa a tɔ n Miloo "Davida a kiwi" lɛ nɛ. Á ziabaa ǹ màn gigiã zɛnaa kɔnlɛ ka goóron ne.

⁶ Á sɔraasi nyɛɛnaandɛnan bɔ, ǹ mɛnɛn bɛ́ re goɛ̃ Zeruzalɛmu minin mìi la. Á ǹ sɔkɔn kiwi lɛ a soo ǹ kiɛnlɛ-a bǎã kɛ nɛ, á ǹ foo taã ka boon kɛn nɛ:

⁷ «Ka toa ka goã kaka ka foo n tã. Ka baran nyɛ́ɛ baa wa. Ka nyan toa nyɛ́ɛ ka kũ Asiiriin kii yɔrɔ-a kɔnlɛ ka zia-baali damata kɛ-n kun ni wa. Taãnɛ, pàã gole goon tá kun ka wɔ nɛ, bɛ ná a ba kunun ǹ ni wa.

⁸ A wɔ lɛ-n minbuiin nɛ pàã lɛa kun ni, sɛnɛ Dɛnaa Lawa, wɔa Lawa n kun ka wɔsɛn nɛ, a n die n doe wɔ lɛ, a zia baa kun ka wɔ nɛ.» Bɛa boon kɛn Zudaan kii Ezekiasi da, á zaman lɛ tumaa foo taã.

Senankeribu na a da ǹ boo diɛ Zeruzalɛmu minin la

⁹ Bɛ kio, Asiiriin kii Senankeribu laanka a sɔraasin nə́ yoo Laki kiwi gialaa. Ǹ nə́ n toa walan ǹ nə́ nyɛɛnaandɛnan kɔnɔn dia Ezekiasi la, ka Zudaa minin mɛnɛn bɛ́ Zeruzalɛmu. Sɔraasin nyɛɛnaandɛnan lɛn nə́ pɛ ǹ nɛ:

¹⁰ – Asiiriin kii Senankeribu a boo n ka kɛ nɛ: «Ka nə n foo doɛ wàa ganaa ka n giɛ̃ Zeruzalɛmu zia gɔ́ɔ̃ nɛ?

¹¹ Ezekiasi n pii ka nɛ, mà Dɛnaa Lawa kaa Lawa á re ka kirisibiɛ ma ganaa. A n ka siɛ̃, á n die toɛ ka tumaa gã bòo laanka mu boro gɔn.

¹² Taãnɛ, a din kii Ezekiasi lɛ na á dìn laanka ǹ *wúlu bɔ ǹ bǎã papaã. A din na á boo kɛ da Zeruzalɛmu minin manɛ: Ka n die Dɛnaa Lawa guguru koe wúlu bɔ ǹ bǎã goon toto yɔrɔ-a, ka n die *wúlu màn gìĩ koe bɛa bǎã goon kɛ lɛ dinsɔɔ̃ nɛ.

¹³ Ma laanka ma digolon nə sii mɛn zɛnaa tɔrɔ kɔsɔn nɛ, ka a bɛ doɛ̃ wa? Ǹ lawan nə́ ma kurəə ǹ gána a kuĩ ganaa?

¹⁴ Ma digolon nə gánan mɛnɛn tumaa ziziɛ̃, lawa kɔn yɛ ǹ lawan bii, a ná a zaman si ma pàã la wa. Ka dɔn kəni, kaa Lawa lɛ á boe la a bɛ zɛnaa?

¹⁵ Á bǐɛ̃ kɔ, kanna kəni, ka nyan toa Ezekiasi ka sã a soɛ bɔ ka nɛ ka bɛa yɔrɔ kɛ-n wa. Ka baran n foo doa a ganaa wa. Hayii! Lawa kɔn tɔn yɛ, gána kɔn-a lawa lɛa, á boo la a ná a zaman kirisibaa ma digolon pàã ganaa ka masɛ wɔ-n ma. A bɛ́ miɛ̃, ka dɔn lawan lɛn ba re boe la ǹ ka kirisibaa wa!»

Senankeribu n sɔ koe Dɛnaa Lawa ganaa

¹⁶ Asiiriin kii a dia dí-a wolen lɛn man tɔn nə n tiɛ̃ la boo diɛ Dɛnaa Lawa ganaa kɔnlɛ ka a dí-nyali Ezekiasi ni.

¹⁷ Asiiriin kii lɛ sɛ́wɔ dɔ kiɛ̃, á sɔ kiɛ Dɛnaa Lawa, Izirayeli a Lawa la. A bɛ́ màn mɛn pii, á ke: «Tán la, gána kɔn a lawan nə tɔn boo la ǹ nə́ ǹ zaman kirisibaa maa pàã ganaa wa. Ezekiasi a Lawa dɔ a re boe la a na a zaman kirisibaa ma pàã ganaa wa.»

¹⁸ Senankeribu a dia dí-a wolen lɛn manə n lɛ dii ka *Ebrəə bɔlɔ nɛ Zeruzalɛmu minin kɛn ganaa giã nɛ kungɔnɔn la. Maǹ zoɛ̃ maǹ nyɛ́ɛ da ǹ ganaa, ǹ nə́ ǹ foo ziziɛ̃ ń giɛ ǹ tá boe kiwi lɛ la ǹ kũ.

¹⁹ Maǹ Zeruzalɛmu a Lawa boo diɛ ka ǹ bɛ́ tɔrɔ kɔsɔn lawan boon diɛ lɔn. A da yaa bɛa lawan kɛn lɛn, man màn nyínin lɛa minbuiin nɛ gɔn nə́ ǹ zɛnaa.

Dɛnaa Lawa n Zeruzalɛmu kirisibiɛ

²⁰ Kii Ezekiasi laanka Amɔsi a nɛgiĩ, Lawa a boo gii-dali Ezayii bɔ ǹ nə́ mɛ Lawa nyankɔ la, ǹ nə́ n lɛ dii lon ganaa.

²¹ Dɛnaa Lawa tɔn lona dia dí-a wole goon dia Siirii minin giã ǹ bǎã lɛ nɛ. Á sɔraasi kakan tumaa dɛ, sɔraasin nyɛɛnaandɛnan nɛ ka gána nyɛɛnaandɛnan nɛ. Sìi nə́ n kɔ Asiiriin kii lɛ, á n bɔyaa á woo a gána nɛ. Ǹ kɔn pinaa á wɔ a dì kion, a nɛgiĩn nə́ dɛ walan.

²² Dɛnaa Lawa Ezekiasi kirisibaa lɔn kɔnlɛ ka Zeruzalɛmu minin ni, Asiiriin kii Senankeribu a pàã ganaa ka ǹ zɔ́ɔ kɔsɔn pàã nɛ, bɛ n ka kɛ nɛ. Á yii-nyɛɛ kɔ ǹ la ǹ gèlè tumaa la.

²³ Min gigiã daa ka Lawa gɔ ǹ màn nɛ Zeruzalɛmu a Dɛnaa Lawa wɔ lɛa, ka gá wɔ ǹ mànan nɛ Zudaan kii Ezekiasi wɔ lɛa. A kũ bɛa waáraa ganaa tɔrɔ tumaa na a yii guguru koe.

Ezekiasi a kiibaa a nya

²⁴ Bɛa waáraa, busu kaka goon Ezekiasi kũ ka a gã. Á Dɛnaa Lawa nyankɔ, Dɛnaa Lawa ná a lɛ si, á kaãbaa sii zɛnaa nɛ.

²⁵ Sɛnɛ bǐɛ̃ mɛn nə n zɛnaa Ezekiasi ni, a bɛ dɔ̃ wa. Ka bɛ dɔ nɛ, á n piɛ̃ gole kɔ, yǎa Dɛnaa Lawa foo yoo li kɔnlɛ ka Zeruzalɛmu ni, ka Zudaa gána tumaa nɛ.

²⁶ A laanka a din gole kɔ lɛ tumaa nɛ, Ezekiasi laanka Zeruzalɛmu minin nə́ n dinin boɛɛn kɔ Dɛnaa Lawa yɔrɔ-a. Bɛ lɛ nɛ, Dɛnaa Lawa toa a foo-yoo lɛ nə yɔrɔ dia ǹ la Ezekiasi a yiikoonaabaa gɔ́ɔ̃-n wa.

²⁷ Ezekiasi gɔn màn gigiã yɛ, ǹ ná a yii guguru dɔ koe parsiini. Á kionən dɔ sana koa ǹ wɔn lɛa, wɔrɔ nɛ, ka kɔlɔ giɔ̀mɔ kaka-a nɛ, nyɔɔ gìĩ kɔɔ̃n nɛ, goóron ne ka mànan mɛnɛn kɔsɔn bɛ́ ǹ nə́ giɔ̀mɔ boe.

²⁸ Á kion dadaran dɔn dɔ *belee kaa ǹ wɔn lɛa, duvɛ̃ nɛ, nyɔɔ nɛ, á diin ka seren kaa ǹ bǎã dɔ, á zìãn dɔ tɔɔn wɔ lɛa.

²⁹ Á kiwin dinin do. A tɔɔ dadaran ka a bisinin tá mɔnaa nɛ. Taãnɛ Lawa gɔn màn damata kɔ la.

³⁰ Ezekiasi din dɔ na á Giɔn mu pìã kɛ lɛ tã a na a mu dia tán giulun lɛ̀ nyɛɛn gɔn la "Davida a kiwi". Ezekiasi sii mɛn tumaa lɛ bɔ, a yii bǐɛ̃ kɔ.

³¹ Sɛnɛ, ka bɛ yii ni, Baabiloniin kiãn bɛ́ ǹ nə́ minin dia mà ǹ da nɔ̀n da ka kaãbaa ǹ sii gole kɛ nɛ, á n zɛnaa gána lɛ nɛ ǹ boo la ǹ na a woo n bǎã yɛ, bɛa nɔ̀n-diɛ lɛ gɔ́ɔ̃ nɛ Lawa Ezekiasi toa walan. A na á n da a gɔ́ɔ̃ li, sii mɛn tumaa bɛ́ a foo ne, a boo la a bɛ dɔ̃.

³² Ezekiasi a sii zɛnaa kɔsɔn kɛn ka a bɔlɔgoondɛnaabaa siin kɛn nɛ Dɛnaa Lawa nɛ, bɛn ta kiɛ̃ nɛ "Amɔsi a nɛgiĩ Lawa a boo gii-dali Ezayii a sii-nyaan nɛ" ka Zudaa laanka Izirayeli a kiin sɛ́wɔ kɛ nɛ.

³³ Ezekiasi bɛ́ á gã á woo ǹ digolon li, maǹ nə́ bĩ Davida a nɛn yala mìi la bǎã kɛ nɛ. Zeruzalɛmu minin laanka Zudaa minin tumaa zín kɔ la bɛa pinaa kɛ lɛ nɛ. A nɛgiĩ Manaasee na á kii baa a bǎã nɛ.