KZS2 3 - LAWA A BOO SONBORE

Salomɔn nə Dɛnaa Lawa a kion doe

¹ Kii Salomɔn Lawa a kion lɛ a doe giala kɔ Zeruzalɛmu, Moriya kele la. Dɛnaa Lawa na á n din nyaa ǹ dí Davida nɛ walan, Ornan a *belee duwəə ǹ bǎã nɛ, ke Zebuzu tɔrɔ lɛa.

² Salomɔn ná a dín lɛn giala kɔ a kiibaa a lɛ̀ siibaa ǹ wɔ a mui paabaa ǹ wɔ nɛ.

³ Salomɔn Lawa a kion lɛ gòã daa lɔn bɛ á ke: Màn zɔɔ̃ ǹ yɔrɔ zizi wɔ gɔn la, a sasabaa mɛtərə pɔsɔɔ, a pəməbaa mɛtərə fù.

⁴ Dàã mɛn bɛ́ n tá niɛ̃ n tɔn dɔ kion lɛ a gɔ́ɔ̃ gole lɛ nɛ, a pəməbaa n mɛtərə fù ka Lawa a kion lɛ wɔ bɛ́ lɔn, a wo lon, mɛtərə fù, sana yoreen na á n kaa a gɔ́ɔ̃ din tumaa a kigiala gɔ̀nɔn la.

⁵ Kion gɔ́ɔ̃ gole kɛ a kigiala gɔ̀nɔn na, Salomɔn siprɛsi goo koɛ̃ naa a ganaa, á sana yoren kaa la. Á sèwo gɔn nyínin bɔ bɛa goo koɛ̃n lɛn ganaa ka zɔrɔka bisin nyínin ni.

⁶ Á bɛa kion lɛ gɔ́ɔ̃ nyaǹ dɔ kɔ ka kɔlɔ giɔ̀mɔ kakaa nɛ. Ǹ dí lɛ nya ka sana mɛn nɛ a n boe Parvayimu.

⁷ Á sana kaa kion lɛ tumaa ganaa, a mɛnɛn nɛ, a kiɛnlɛ nɛ, a kiɛnlɛ mìin ni ka a kigiala gɔ̀nɔn nɛ. Á lon màn yiikoonaa nyínin zɛnaa a kigiala gɔ̀nɔn ganaa.

⁸ Salomɔn bǎã sonbore sonbore kɛ dɔ dɔ: A sasabaa ǹ mɛtərə fù ka Lawa a kion lɛa pəməbaa bɛ́ lɔn, a pəməbaa n mɛtərə fù. A na á sana yoreen tɔnɔ fuə kaa a gɔ̀ɔ̃ ganaa.

⁹ Sana kiɛn kɛn gugurubaa n garamu biɛsooro (500), kion gɔ́ɔ̃n mɛnɛn bɛ́ lon bɛn dɔn gɔ́ɔ̃ tumaa n sana lɛa.

¹⁰ Bɛ kio, á ǹ kaa lon màn yiikoonaa nyín paa zɛnaa ganaa. Ǹ nə́ sana kaa la, ǹ nə́ woo ǹ koa bǎã sonbore sonbore kɛ nɛ.

^11-13 Bɛa lon màn yiikoonaan lɛn man gole-n lon kɔn li, ǹ yɔrɔ n dia nɛ wɔ ǹ kiɛnlɛ la. A gogoonmaa nyàa n paa nyoã nɛ, nyàa lɛ a gogoomaa n doe mɛtərə paa ka talɛɛ. Nyàa lɛ a goon nə n turii kion gɔ́ɔ̃ lɛ a kigiala gɔ̀nɔn-a, a paabaa ǹ wɔ kɛ nə n turii lon màn yiikoonaa kɔsɔ kɛ wɔ ganaa. Nyàa màn sii lɛ tumaa lɛ boe a sasabaa n goɛ̃ mɛtərə fù.

¹⁴ Salomɔn nə́ ǹ kaa mɔnaa kɔn tiɛ̃ ganaa, tuntun mɔnaa lɛa, ǹ nə́ wɔ korebore lɛa, tã nyɛ̃ɛn nɛ, ka tã birəə ne, ǹ nə́ lon mànan yiikoonaan nyínin fɔ̃ a ganaa.

Zan bìbìn ka Lawa a kion wúlu bɔ ǹ bǎã

¹⁵ Salomɔn nə́ ǹ kaa bìbì màn paa zɛnaa ganaa ka zan nɛ Lawa a kion lɛ yɔrɔ-a, ǹ wo lon mɛtərə fulusɔbaa. Bìbì lɛ a gogoonmaa mìi muniimaa nɛ, bɛ dɔn doe mɛtərə paa ka talɛɛ.

¹⁶ Salomɔn nə́ ǹ kaa zɔrɔka bisin sɛlɛ ganaa ka Lawa a kion kɛ wɔ bɛ́ lɔn á ǹ kaa bìbìn lɛn mìi ni. Á tɔn da nɛ nyín paabiɛ zɛnaa ǹ nə́ lɔɔ zɔrɔka bisin lɛ ganaa.

¹⁷ Salomɔn tɔn bìbìn lɛn kaa lon, Lawa a kion lɛ yɔrɔ-a. Goon nə gusin, goon kɛ dɔ n gɔsɛ. Ǹ mɛn bɛ́ gusin, ǹ nə́ bɛ bíi mà Yaakini bɛ giala mà: «Lawa n pàã koe.» Ǹ mɛn bɛ́ gɔsɛ, ǹ nə́ bɛ bíi mà Boazi bɛ giala mà: «pàã n Lawa nɛ.»