KZS2 29 - LAWA A BOO SONBORE

Ezekiasi n Zudaa n kii lɛa

¹ Ezekiasi á kii biɛ bɛ̀ a lɛ̀ fuəwensooro ne, á kii baa Zeruzalɛmu lɛ̀ fuəwenmanangɔrɔ. Ǹ dan tɔ n Aabii, Zakarii a nɛlɔ nɛ.

² Sii mɛn bɛ́ siĩn Dɛnaa Lawa yii li, Ezekiasi na á bɛ zɛnaa ka te, ká ǹ digolo Davida wɔ bɛ́ lɔn.

³ A kiibaa lɛ bibinaa a mui bibinaa li, á wusoo á Dɛnaa Lawa a kion kɛa kiɛnlɛn bũ, á ǹ zɛnaa.

⁴ Á Lawa a wúlu-bɔlen bii á daa ǹ nɛ ka *Levii tɔrɔn nɛ, á ǹ sɔkɔn lɛ̀giala gɔn la bǎã kɛ nɛ,

⁵ á pɛ ǹ nɛ: «Giĩn kɛn Levii tɔrɔn lɛa, ka n too kɔ ma lon! Ka n dinin *yoreen kɔ kanna, ka Dɛnaa Lawa, ka digolon Lawa a kion kɛ yoreen kɔ. Màn gɔgɔrɛn mɛnɛn bɛ́ bǎã sonbore kɛ nɛ, ka ǹ yii goa.

⁶ Wɔ digolon nə́ goã bɔlɔgoondɛnan lɛa Dɛnaa Lawa wɔa Lawa yii li wa. Ǹ sii mɛn zɛnaa á baraa á la yii ni. Ǹ nə́ n la bɔ a ganaa. Dɛnaa Lawa bɛ́ giã-n bǎã mɛn nɛ, ǹ nə́ n yɔrɔ bɔyaa ǹ nə́ bɔ la, ǹ nə́ n dɔ̀ɔ̃ dia la.

⁷ Ǹ nə́ Lawa a kion kiɛnlɛn dinin tã, ǹ ná a bolonən nimi, ǹ ná a lɛ da, ǹ ba da yon gìĩ kɔɔ̃n laanka wúlu bɔ ǹ mànan koe Izirayeli a Lawa a kion kɛ-n wa.

⁸ Bɛ lɛn nɛ Dɛnaa foo yoo Zeruzalɛmu kiwi li ka Zudaa gána tumaa nɛ. Á ǹ baa nyɛ́ɛ da ǹ sii a kɔnboe lɛa, foo saa ǹ màn lɛa, foo ziziɛ̃ ǹ màn lɛa ká yii bɛ́ a ganaa lɔn pelo.

⁹ Bɛ lɛ a lɛa nɛ wɔ din nə gã zia la, wɔa nɛgiĩn ni, wɔa nɛlɔn nɛ ka wɔa lɔn nɛ, ǹ nə́ ǹ baa kòso nɛn lɛa.

¹⁰ Kanna kəni, man die lɛ kɔ kɔn la we ka Dɛnaa Lawa, Izirayeli a Lawa nɛ, màn mɛn bɛ́ toɛ a foo-yoo baraa kɛ nə n lɛ goa wɔ nɛ.

¹¹ Kasɛn, maa nɛgiĩn lɛn, ka nyan nə baa sii wɔ ma gɔn lɛbaã wolen lɛa wa. Hiĩ Dɛnaa Lawa na á ka bɔ, mà ka boo la ka gole asɛ yɔrɔ-a, ka yɔrɔ n boe ne, ka da yon gìĩ kɔɔ̃n tã asɛ tɔ bɔ ǹ wɔ lɛa.»

¹² Bɛ lɛ nɛ Levii tɔrɔn mɛnɛn nə n zɔ̃ ǹ nə́ dɔ, ǹ tɔn nə́ ke: Keyati a tanlɛ nɛ: Amasayi a nɛgiĩ Mahati ni, ka Azaria a nɛgiĩ Zowɛli ni. Merarii a tanlɛ nɛ: Abdii a nɛgiĩ Kiisi ni ka Yehaleleli a nɛgiĩ Azaria nɛ. Gɛrsɔn a tanlɛ nɛ: Zimaa a nɛgiĩ Zoa nɛ ka Zoa a nɛgiĩ Edɛn nɛ.

¹³ Elisafan a tanlɛ nɛ: Simuri lanka Yeyieli ni. Asaafu a tanlɛ nɛ: Zakarii ni ka Matania nɛ.

¹⁴ Eman a tanlɛ nɛ: Yeyiieli ni ka Simeyii ni. Yedutunu a tanlɛ nɛ: Semayia nɛ ka Uziili ni.

¹⁵ Ǹ nə́ ǹ tanlɛ minin sɔkɔn, ǹ tumaa nə́ n din yoreen kɔ. Ka kii boo da lɔn, a kɔnpɛ ka Dɛnaa Lawa a da ǹ boon ne, ǹ nə́ woo Lawa a kion, ǹ ná a yoreen kɔ.

¹⁶ Lawa a wúlu-bɔlen nə́ wɔ Dɛnaa Lawa a kion lɛ nɛ ǹ ná a gɔ́ɔ̃ yoreen kɔ. Ǹ wo màn mɛn tumaa yaa màn gɔgɔrɛ lɛa a nɛ, ǹ nə́ ǹ goa, ǹ nə́ soo ǹ ne Lawa a kion kɛa sumu-n. Levii tɔrɔn lɛn nə ǹ goa ǹ nə́ soo ǹ ni kiwi lɛ nɛ, ǹ nə́ woo ǹ kaa Sedrɔn a nyankɔrɔ lɛ kɛ nɛ.

¹⁷ Maǹ nə́ Lawa a kion lɛ a yoreen kɔ giala kɔ mui a lɛawaa bibinaa pinaa. Mui lɛ a lɛawaa kiwisibaa ǹ wɔ pinaa, ǹ nə́ dɔ a dàã nɛ. Ǹ nə́ wusoo doo ǹ nə́ lɛawaa kiwisi zɛnaa doo ǹ nə́ Dɛnaa Lawa a kion lɛ yoreen koe. Mui bibinaa lɛ a lɛawaa fulusɔrɔbaa ǹ wɔ pinaa na á n baa ǹ nya lɛa.

¹⁸ Levii tɔrɔn lɛn nə́ woo kii Ezekiasi li, ǹ nə́ pɛ nɛ. «Dɛnaa Lawa a kion lɛ tumaa yoreen kɔ, *wúlu bɔ ǹ bǎã laanka a mànan nɛ, ǹ bɛ́ buurun koe tabala mɛn la Lawa wɔ lɛa, ka a dí nya ǹ mànan tumaa nɛ.

¹⁹ Ahaazi a kiibaa waáraa, a bɔlɔgoonbaãdɛnaabaa lɛ na á toa á dí nya ǹ màn sonbore gigiãn lɛn zaãbaa. Kanna kəni, wɔ ǹ zɛnaa, wɔ ǹ yoreen kɔ. Ǹ tá tán Dɛnaa Lawa a wúlu bɔ ǹ bǎã yɔrɔ-a.»

Ezekiasi Dɛnaa Lawa guguru kɔ daa giala la

²⁰ Bɛa lɛawaa baayɛlɛ yiisoone, kii Ezekiasi kiwi lɛ a kiãn sɔkɔn, á woo Lawa a kion kunun ǹ ni.

²¹ Ǹ nə́ daa ka dii gɔ̀lɔ̀ sɔbaa nɛ, sère gɔ̀lɔ̀ sɔbaa nɛ, sère ten sɔbaa nɛ ka butumu sɔbaa nɛ, ǹ nə́ kɔ Lawa la, sii baraa sawaa ǹ wúlu mànan lɛa, bɛa wúlu mànan kɛn manə n koe kii kion wɔ lɛa, Lawa a kion kɛ wɔ nɛ, ka Zudaa zaman nɛ. Kii lɛ pɛ Aarɔn tɔrɔn manɛ, Lawa a wúlu-bɔlen lɛa mà ǹ mànan lɛn dɛ Dɛnaa Lawa a wúlu bɔ ǹ bǎã kɛ nɛ.

²² Ǹ nə́ diin lɛn bɔlɔ kuru. Lawa a wúlu-bɔlen ná a mà si ǹ nə́ kaa wúlu bɔ ǹ bǎã lɛ la. Bɛ kio ǹ nə́ sère gɔ̀lɔ̀ ka sère tenən kɛn bɔlɔ kuru ǹ nə́ ǹ mà kaa wúlu bɔ ǹ bǎã lɛ la.

²³ Butumun kɛn sii baraan sawaa ǹ wúlu mànan lɛa, ǹ nə́ daa ka bɛn nɛ kii lɛ yɔrɔ-a, kɔnlɛ ka zaman lɛ a minin ni, bɛn nə́ n gɔn da tɔɔn lɛn la.

²⁴ Lawa a wúlu-bɔlen nə́ tɔn nə ǹ bɔlɔ kuru, ǹ nə́ ǹ mà kaa wúlu bɔ ǹ bǎã lɛ la, màn mɛn bɛ́ toɛ Izirayeli tumaa a sii baraan nə n toa nɛ. Bɛ lɛ nɛ kii lɛ pɛ mà ǹ *wúlu màn tiɛ̃ laanka sii baraa sawaa ǹ wúlu bɔ zaman lɛ tumaa wɔ lɛa.

²⁵ Kii lɛ tɔn Levii tɔrɔn kũ á ǹ koa Lawa a kion lɛ a sumu-n kɔnlɛ ka ǹ sàn kɔ n mànan nɛ: Dindin ni, tùtun ni ka kɔnkoɛɛ̃nɛn nɛ. Davida laanka Lawa a boo gii-dali Natan ka kii a sii-yɛle Gadi kɔ zii mɛn lɛ, a dɔ bɛ saa. A n Dɛnaa Lawa a dí-pɛ lɛa á kɔ a boo gii-dalin la.

²⁶ Levii tɔrɔn lɛn nə́ kaa tán ka sàn kɔ ǹ mànan kɛn nɛ Davida nə́ ǹ kaa a zɛnaa ganaa. Lawa a wúlu-bɔlen nə́ kaa tán ka bɛnɛn nɛ.

²⁷ Ezekiasi zii kɔ mà ǹ wúlu lɛ bɔ wúlu bɔ ǹ bǎã lɛ nɛ. Sii lɛ bɛ́ re n giala koe ǹ mɛn waáraa loe-lɔlin nə́ yiɛ loe la ǹ tá Dɛnaa Lawa tɔ boe ne, maǹ na a da zii koe ka bɛnɛn nɛ ka Izirayelin kii Davida a sàn kɔ ǹ mànan kɛn nɛ.

²⁸ Zaman lɛ tumaa na a musin la yǎa wúlu bɔ lɛ nya, bɛ̀ sàn-kɔlen tá loe loe ǹ nə́ bɛn pii.

²⁹ Wúlu bɔ lɛ tumaa bɛ́ a nya, kii lɛ nɛ ka min mɛn tumaa bɛ́ kun ni, ǹ tumaa nə́ n kuməə ǹ nə́ kaa ǹ musin la.

³⁰ Kii Ezekiasi lɛ laanka kiãn nə́ tɔ́n pɛ Levii tɔrɔn lɛn manɛ, mà ǹ loe lɔ doo ǹ Dɛnaa Lawa tɔ bɔ nɛ, Davida laanka sii-yɛle Asaafu goã ǹ nə́ loen mɛnɛn lɔ. Levii tɔrɔn lɛn man loe lɛ loe ka foo kɔɔ̃n nɛ, ǹ nə́ n kuməə ǹ nə́ kaa ǹ musin la.

³¹ Ezekiasi wusoo á boo saa á pɛ zaman lɛ nɛ: «Kanna kəni, kasɛn mɛnɛn gɔn bɛ́ piɛ̃-n ka wúlu màn nɛ Dɛnaa Lawa wɔ lɛa, ka wo Lawa a kion, ka wúlu màn tiɛ̃n nɛ, ka Lawa gɔ ǹ mànan nɛ ka Lawa tɔ bɔ nɛ.» Minin man die ka tɔɔn nɛ bɛa wúlun kɛn lɛn lɛa ka Lawa gɔ ǹ mànan nɛ. Min mɛnɛn gɔn bɛ́ siɛ, bɛn man wúlu màn tiɛ̃ koe.

³² Ǹ màn mɛn tumaa kɔ Dɛnaa Lawa la, a kaa kun na á goã: dii gɔ̀lɔ̀ pɔsɔbaa, sère gɔ̀lɔ̀ paabiɛ, sère ten biɛpaa (200) wúlu màn tiɛ̃ lɛa,

³³ dii biɛsɔrɔ (600) kaa li ka sère duu sɔɔ (3 000) nɛ wúlu kɔsɔn wɔn lɛa.

³⁴ Lawa a wúlu-bɔlen mɛnɛn bɛ́ ǹ tan, ǹ ba mɔnaa nɛ duduu wa, ǹ tɔɔ mɛn tumaa dɛ wúlu màn tiɛ̃ lɛa, ǹ ba boe la ǹ tá a ki boe wa. Ǹ dɔɔ̃nɔn Levii tɔrɔn nə́ n dɔ ǹ lɛ ǹ nə́ dí lɛ gɔn nyɔmɔɔ, bɛ̀ ǹ baa n yii diɛ Lawa a wúlu-bɔle kɔsɔn din yoreen kɔ la. Taãn nɛ, Levii tɔrɔn lɛn nə́ golee din yoreen kɔ li á la Lawa a wúlu-bɔlen manɛ.

³⁵ Ka bɛ dɔ nɛ, wúlu màn tiɛ̃ gigiã goã a tan ka zɔɔ da Lawa nɛ ǹ wúlu màn nyɔɔnaa nɛ ka duvɛ̃ kɛ nɛ n tii wúlu màn tiɛ̃n kɛn ganaa. Wúlu bɔ lɛ wusoo á n da a giala la lɔn Dɛnaa Lawa a kion lɛ nɛ, bɛ n ka kɛ nɛ.

³⁶ Ezekiasi ni ka Izirayeli tɔrɔn lɛn tumaa foo kɔɔ̃n kɔ á la yii ni, Lawa a zɛnaa ǹ sii taman yii zaman lɛ nɛ, a giala ǹ tumaa nə́ n zɛnaa fufuu.