KZS2 28 - LAWA A BOO SONBORE

Ahaazi n Zudaan kii lɛa

¹ Ahaazi bɛ́ kii biɛ, bɛ̀ a lɛ̀ fuə ne. Á kii baa Zeruzalɛmu lɛ̀ fulusɔrɔ. Sii mɛn bɛ́ a siĩn Dɛnaa Lawa yii li wa, a na á bɛ lɛ zɛnaa, ǹ digolo Davida a siin kɛn làfu lɛa.

² Á Izirayeli a kiin gia ǹ gɔn saa, á fɔlɔ yo dinin, á mànan nyínin zɛnaa nɛ, *Baalin guguru kɔ ǹ wɔn lɛa.

³ A n màn gìĩ kɔɔ̃n koe Inɔn a nyankɔrɔ basa kɛ nɛ, a na a nɛnyaanan tiɛ̃ *wúlu màn lɛa ka tɔrɔn kɛn wɔ bɛ́ lɔn, sii bɔbɔnɛɛn zɛnɛɛ, Dɛnaa Lawa nə́ ǹ loo á ǹ bǎã kɔ Izirayeli minin la.

⁴ Á goã wúlu boe bɛ̀ a màn gìĩ kɔɔ̃n tã, wúlu bɔ ǹ bǎãn la, tentenen la nɛ, dan mɛnɛn tumaa luu bɛ́ buruu ka bɛn giulun ni.

⁵ Bɛ lɛ-n kəni, Dɛnaa Lawa, a Lawa wɔ Siiriin kii gɔn. Siirii minin nə́ boo ǹ la, ǹ nə́ ǹ min gigiã baa kòso nɛn lɛa ǹ nə́ woo ǹ ne Damaasi. Izirayelin kii dɔ nə́ n gɔn da Ahaazi la. Á bɔ̀n da a ganaa taãn-taãnɛ.

⁶ Lɛawaa goon gɔ́ɔ̃ nɛ, Remalia a nɛgiĩ Pekaa Zudaa sɔraasi duu paabiɛ ka fuə (120 000) dɛ, ǹ tumaa n sɔraasi foo kaka-a lɛa. Bɛ na á yɔrɔ yɛ miɛ̃, a giala maǹ nə́ n la bɔ Dɛnaa Lawa, ǹ digolon Lawa ganaa.

⁷ Efrayimu tɔrɔn zia-baali goon ne, Zikri, bɛ na á Zudaan kii a nɛgiĩ Maseya dɛ, kii kion a kiã Azirikamu ni, ka Ɛlkaana nɛ, asɛ mɛn bɛ́ mɔrɛɛ nɛ kii ganaa á la min tumaa nɛ.

⁸ Izirayeli minin nə́ kòso nɛ duu biɛpaa (200 000) kũ Zudaa minin bii, ǹ dɔɔ̃nɔn lɛa: Lɔn nɛ, nɛnyaanan nɛ, nɛgiĩn ni ka nɛlɔn nɛ. Ǹ nə́ ǹ gɔn màn gigiã dɔ goa, ǹ nə́ woo ne Samarii.

⁹ Bɛa kiwi lɛ nɛ, Dɛnaa Lawa a boo gii-dali goon tan a tɔ n Odɛdi. Á woo n da Izirayeli a sɔraasin lɛn lɛ, bɛ̀ ǹ bɛ́ die Samarii. Á pɛ sɔraasin lɛn manɛ: «Dɛnaa Lawa, ka digolon Lawa foo na á goã yoo-n Zudaa minin li, bɛ lɛ nɛ á ǹ wɔ ka gɔn. Sɛnɛ, ka ǹ dɛ ka kakaarɛbaa nɛ á la yii ni, yǎa á dɔ lon.

¹⁰ Ka bɛ nɛ, ka n pii mà giĩn kɛn ka lɔn kɛn nɛ, boe Zeruzalɛmu, mà ka n die ǹ biɛ bɛ̀rɛn lɛa! Sɛnɛ, kasɛn man zɛ̀rɛdɛnan lɛa Dɛnaa Lawa yɔrɔ-a.

¹¹ Ka n too kɔ ma lon kəni, kòso nɛn kɛn ka ǹ kũ, ka dɔɔ̃nɔn ka ka miãnɛn lɛa, ka ǹ kaa ǹ wo piɛ. A giala, Dɛnaa Lawa foo n yoo-n ka li taãn-taãnɛ.»

¹² Bɛ lɛ nɛ, Efrayimu a kiãn tɛnɛn nə́ n gòãn dii bɔ zia la wolen lɛn ganaa. Bɛn man ka Zoanan a nɛgiĩ Azaria nɛ, Mesilemɔti a nɛgiĩ Berekia nɛ, Salumu a nɛgiĩ Yizikia nɛ ka Adlayii a nɛgiĩ Amasaa nɛ.

¹³ Ǹ nə́ pɛ ǹ nɛ: «Ka baran da ka kòso nɛn kɛn nɛ kànaa wa. Ka n die wɔ biɛ zɛ̀rɛ gole dɛnan lɛa Dɛnaa Lawa yɔrɔ-a. Ka ǹ li mà ka màn da wɔa sii baraan laanka wɔa sãn li? A da yaa dɔn, wɔ zɛ̀rɛ nɛ, Dɛnaa Lawa foo n yoo wɔ li parasii ni wɔsɛn Izirayeli minin.»

¹⁴ Kiãn yɔrɔ-a, ka zaman lɛ tumaa nɛ, sɔraasin lɛn nə́ n gɔn bɔ kòso nɛn lɛn ganaa, ka ǹ gɔn màn mɛn yii goã zia la.

¹⁵ Ǹ nə́ minin bɔ, mà ǹ ga kòso nɛn lɛn walan. Ǹ bɔ ka gɔn mànan mɛnɛn nɛ ziabaa ǹ bǎã nɛ, ǹ nə́ mɔnaan laanka kɔsɔnɔn bɔ bɛn li ǹ nə́ ǹ kɔ kòso nɛn mɛnɛn bɛ́ mɔnaa laanka kɔsɔn nə́ ǹ ba ǹ lon wa. Ǹ nə́ màn-bii kɔ ǹ la ǹ nə́ bii ka mu ni ǹ nə́ mi. Ǹ nə́ dagòã da busulən ganaa. Min mɛn tumaa bɛ́ a boe tɔ la wa, ǹ nə́ bɛn kaa dundunun la, ǹ nə́ woo ǹ ne Zerikoo, sèwo da kiwi, ǹ dɔɔ̃nɔn li. Ǹ nə́ tɔ́n nə n bɔyaa ǹ nə́ daa Samarii.

Ahaazi n giɛ Asiirii minin dɔmalɛ li

¹⁶ Bɛa biikoo li, kii Ahaazi minin dia mà ǹ wo ga Asiiriin kiia dɔmalɛ li.

¹⁷ Edɔmu minin man nə́ daa zia baa Zudaa gána ganaa doo, ǹ nə́ minin goa kòso nɛn lɛa, ǹ nə́ woo ǹ ne.

¹⁸ Ka bɛ dɔ nɛ, Filisiti minin nə́ wɔ *Sefelaa a nyankɔrɔ lɛ kiwin ni, ka Negɛvu wɔn nɛ. Ǹ nə́ Bɛti-Semɛsi kiwin kũ, Ayalɔn nɛ, Gederɔti ni, Sokoo ne ka a lɛkoro-a kiwin ni, Timinaa nɛ ka a lɛkoro-a kiwin ni, Gimuzoo ne ka a lɛkoro-a kiwin ni. Ǹ nə́ giã walan.

¹⁹ Sonbore, Dɛnaa Lawa Zudaa gána yii puusə kɔ Izirayelin kii Ahaazi a lɛa. Ahaazi zaman lɛ zulu á da sii baraa zɛnaa ganaa, á n baa bɔlɔgoonbaãdɛnaa lɛa Dɛnaa Lawa nɛ.

²⁰ Asiiriin kii Teglati-Falasaara daa Ahaazi zia baa, a da n dɔ lɛ wa.

²¹ Gɔn mànan mɛnɛn bɛ́ Lawa a kion kɛ nɛ, kii kion kɛ nɛ ka kiãn kion kɛ nɛ, Ahaazi bɛn goa á ǹ kɔ Asiiriin kii la, sɛnɛ, a là goon din yɛ-a wa.

²² Bɛa koe kɛ lɛ din tumaa gɔ́ɔ̃ nɛ, kii Ahaazi n tɔn bɔlɔgoonbaãdɛnaa lɛa Dɛnaa Lawa yɔrɔ-a.

²³ A n wúlu mànan koe Damaasi minin dìn kɛn la, ǹ mɛnɛn lɛn dinin bɛ ǹ nə́ boo ǹ la. A n pii: «Siiriin kiin dìn bɛ́ n doe ǹ lɛ lɔn, ma dɔ n die wúlu màn koe ǹ la ń giɛ ǹ tá n doe ma dɔ lɛ.» Sɛnɛ bɛa dìn lɛn man bɔ̀n diɛ a din ganaa kɔnlɛ ka Izirayeli tumaa nɛ.

²⁴ Mànan mɛnɛn bɛ Lawa wɔn lɛa, Lawa a kion lɛ nɛ, Ahaazi nə́ ǹ tumaa sɔkɔn á ǹ ziziɛ̃ lenlen. Á Lawa a kion lɛ a kiɛnlɛn tã. Bɛ kio á wúlu bɔ ǹ bǎãn dɔ ziin bɔ kɔn-a ǹ bǎã din tumaa nɛ, a din wɔ lɛa Zeruzalɛmu.

²⁵ Á wúlu bɔ ǹ bǎãn dɔ Zudaa ganaa lɛ a kiwi gogoonmaa tumaa nɛ. Walan a n da yon gìĩ kɔɔ̃n tiɛ̃ lawa kɔsɔn wɔ lɛa. Ka bɛa yɔrɔ kɛ nɛ, a na á Dɛnaa Lawa, n digolon Lawa foo yoo.

²⁶ Ahaazi a sii zɛnaa kɔsɔn kɛn tumaa, a kũ a bibinaan ganaa a wo a giala nyɔmɔɔn yaa, ǹ tá kiɛ̃ nɛ Zudaa laanka Izirayelin kiin sɛ́wɔ nɛ. A sii mɛn tumaa zɛnaa, bɛa sɛ́wɔ lɛ n bɛ nyɛɛ.

²⁷ A bɛ́ á gã á woo n digolon li ǹ nə́ bĩ Zeruzalɛmu kiwi, sɛnɛ ǹ bie ǹ nə́ bĩ Izirayeli kiin yala-n wa. A nɛgiĩ Ezekiasi na á kii baa a bǎã nɛ.