KZS2 25 - LAWA A BOO SONBORE

Amasiya n Zudaan kii lɛa

¹ Amasiya kiibaa yɛ bɛ̀ a lɛ̀ fuəwensooro ne. Á kii baa Zeruzalɛmu lɛ̀ fuəwenmanangɔrɔ. Ǹ dan nə boe Zeruzalɛmu, a tɔ n Yoadan.

² Sii mɛn bɛ́ siĩn Dɛnaa Lawa yii li, Amasiya bɛ zɛnaa sɛnɛ, a nə n foo tumaa kɔ Dɛnaa Lawa la wa.

³ Amasiya a kiibaa gòã bɛ́ á wɔ tán á nya, dí-nyalin mɛnɛn nə ǹ di, kii Zoasi dɛ, á bɛn dɛ.

⁴ Sɛnɛ, a ǹ nɛgiĩn dɛ wa. Màn mɛn bɛ́ kiɛ̃ nɛ dí-pɛn sɛ́wɔ kɛ nɛ, Muizu a sɛ́wɔ ke, á kɔ bɛ lɛ. Taãnɛ, bɛa sɛ́wɔ lɛ gɔ́ɔ̃ nɛ, Dɛnaa Lawa dí-pɛ kɛ kɔ: «Nɛnyaanan nə sii baraa mɛn zɛnaa, ǹ baran ǹ díin dɛ bɛa lɛa wa. Díin nə sii baraa mɛn zɛnaa, ǹ baran ǹ nɛnyaanan dɛ bɛa lɛa wa. Didie n giɛ̃ a din a sii baraan taman yii.»

⁵ Amasiya ná agána minin sɔkɔn, Zudaa tɔrɔn laanka Bɛnzamɛn tɔrɔn nɛ. Á tɔ́n sɔraasi nyɛɛnaandɛnan bɔ á ǹ koa, sɔraasi duu goon mìilandɛnan lɛa ka sɔraasi paabiɛ mìilandɛnan nɛ. Á ǹ kaa minin nimii ganaa, a kũ lɛ̀ fuə ganaa a wo lon. Maǹ nə́ sɔraasi foo taãnaa duu biɛsɔɔ (300 000) yɛ, ǹ nə́ boe la ǹ zia baa doɛ̃ ka sɛmiɛ̃ nɛ ka goóro ne.

⁶ Ka wɔrɔ tɔnɔ sɔɔ nɛ, á sɔraasi kaka duu paabiɛ (100 000) bɔ Izirayeli gána nɛ.

⁷ Sɛnɛ, Lawa a min goon daa pɛ nɛ: «Kii ganaa, Izirayeli a sɔraasin doamaa bie ǹ wo kun ka n nɛ wa. A giala, Dɛnaa Lawa ba kun ka Izirayeli minin kɛn nɛ wa, Efrayimu a tanlɛ minin kɛn.

⁸ Bɛ̀ ǹ nə́ woo kunun n ni, ta ǹ tá kaka zia la, Dɛnaa Lawa á re n daɛ n zɔ́ɔn nyɛɛnɛ. A giala, a dinsɔɔ̃ n gɔ̀lɔ̀baa koe hinlaa, ǹ boo ka la.»

⁹ Amasiya nɔ̀n da Lawa a min lɛ la: «Ma wɔrɔ mɛn yii kɔ Izirayeli sɔraasin la, bɛa là n die goɛ̃ ka wáa nɛ?» Lawa a min lɛ ná a lɛ si. Dɛnaa Lawa á boe la a na a miã gigiã kɔ n la.

¹⁰ Yǎa Amasiya sɔraasin lɛn kaa mà ǹ wo piɛ, ǹ mɛnɛn lɛn nə bɔ Efrayimu. Ǹ nə́ wusoo ǹ nə́ woo, sɛnɛ, ǹ foo goã yoo ne parsiini Zudaa minin li.

¹¹ Amasiya bɛ́ á wusoo á pàã yɛ, á mɛ a sɔraasin nyɛɛnɛ, ǹ nə́ woo zia baa yìsi nyankɔrɔ lɛ kɛ nɛ. Walan, á Seyiri a sɔraasi duu fù dɛ.

¹² Zudaa sɔraasin lɛn nə́ sɔraasi duu fù (10 000) kɔsɔ kũ kòso nɛn lɛa. Ǹ nə́ woo ǹ ne gɛ̀fu sasa mìi ni ǹ nə́ ǹ nyanaa ǹ nə́ ǹ kaa. Ǹ tumaa daa n yɔyɔrɛ tán.

¹³ Amasiya Izirayeli sɔraasin mɛnɛn kaa maǹ wo piɛ, mà ǹ nyan da zia lɛ baa wa, bɛn nə́ n daa wɔlɔ la Zudaa kiwin ni, Samarii laanka ka Bɛti-Ɔrɔn bii ni. Ǹ nə́ min duu sɔɔ (3 000) dɛ, ǹ nə́ gɔn màn gigiã goa ǹ nə́ woo ne.

¹⁴ Amasiya bɛ́ á boo Edɔmu minin la, á n bɔyaa á daa ka Seyiri minin dìn nyínin ni. Á ǹ baa a lawan lɛa, a nə́ ǹ guguru koe, á n màn gìĩ kɔɔ̃n tiɛ̃ ǹ wɔ lɛa.

¹⁵ Bɛ lɛ nɛ, Dɛnaa Lawa foo yoo Amasiya li, á tɔn na a boo gii-dali dia, á pɛ nɛ: «Ma nə́ n bɔyaa ń nə́ n yɔrɔ da Edɔmu minin dìn la, ǹ mɛnɛn lɛn dinin bɛ́ ǹ boo la ǹ nə́ ǹ zaman kirisibaa n ganaa wa. Bɛ mìi kəni?»

¹⁶ Amasiya boo kuru a lɛ-n á pɛ: «Má n bɔ má n koa kii a yiri kɔmala wole lɛa? Bɛ̀ n ba giɛ mándɛ li wa, n nyan wo nyɛɛn wa.» Lawa a boo gii-dali lɛ nə n laa-a wa, sɛnɛ, á pɛ: «Ma á doɛ̃ maa Lawa golee n bɔ̀nbaa li, a giala n bɛa sii lɛ zɛnaa. Bɛ lɛ n ke n ba n too koe maa doroon li wa.»

Izirayelin kii Zoasi boo Amasiya la

¹⁷ Zudaan kii Amasiya nɔ̀n da ka min kɔsɔn taasiɛ nɛ. Á tɔn minin dia Izirayelin kii Zoasi li, ke Zoakazi a nɛgiĩ lɛa, Zewu a nɔ̀ɔn lɛa, mà ǹ pɛ nɛ: «Daa wɔ golee kɔn yɔrɔ-a wɔ zia baa.»

¹⁸ Izirayelin kii Zoasi boo binyəə kɛ dia Zudaan kii Amasiya la: «Lɛlɛ, nyan tewon goon na á goã Liban gána nɛ. Á nɔ̀n da *sɛdrə da goon la Liban gána nɛ mà a na a nɛlɔ kɔ asɛ kɔ a nɛgiĩ la. Sɛnɛ, Liban gána a don màn goon bɔ tewon lɛ la, á yɔyɔrɛ.

¹⁹ N bɛ́ mà nsɛ boo Edɔmu minin la, bɛ lɛ a lɛa nɛ n tá n din gole koe? A bɛ́ miɛ̃, giã piɛ. Wáa na á baa zia mɛn bɛ́ n ba re n boe a nɛ wa, n tá bɛ giala koe. N din laanka Zudaa a sɔraasin tumaa nɛ, ǹ tá re boe ka la.»

²⁰ Sɛnɛ, Amasiya nə n too kɔ a lon wa. A giala Lawa n li mà a Amasiya laanka a sɔraasin wɔ ǹ zɔ́ɔn gɔn, ǹ bɔyaa Edɔmu minin dìn guguru kɔ kɛ a lɛa.

²¹ Bɛ lɛ nɛ, Izirayelin kii Zoasi woo zia lɛ baa. A sɔraasin laanka Zudaan kii Amasiya wɔn nə́ zia baa Bɛti-Semɛti Zudaa gána nɛ.

²² Izirayelin sɔraasin lɛn nə́ boo Zudaa sɔraasin lɛn la. Zudaa sɔraasin lɛn tumaa baa si ǹ nə́ woo piɛ.

²³ Bɛti-Semɛti lɛ nɛ, Izirayelin kii Zoasi Zudaan kii Amasiya kũ, ke Zoasi a nɛgiĩ lɛa Zoakazi a nɔ̀ɔn lɛa, á baa kòso nɛ lɛa. Á n toa walan á woo ne Zeruzalɛmu. Ǹ nə́ kiwi lɛ a kungɔn ziziɛ̃, a sasabaa dɔ mɛtərə biɛpaa, Efrayimu a kiɛnlɛ bii ni ka gùrù-a kiɛnlɛ kɛ nɛ.

²⁴ Á sana tumaa goa, wɔrɔ tumaa nɛ, ka màn giɔ̀mɔ kakaan kɛn tumaa nɛ Lawa a kion Obɛdi-Edɔmu nə́ ǹ lɛduĩ, ka kii kion kɛ dɔ wɔn nɛ. Á minin dɔn goa á woo ǹ ne Samarii.

Amasiya a pàã nya

²⁵ Izirayelin kii Zoasi ke Zoakazi a nɛgiĩ lɛa, bɛa gɛ̀ kio, Zudaan kii Amasiya yii goã koo lɛ̀ fulusooro bɛ kio.

²⁶ Amasiya a siin kɔsɔn kɛn, a kũ a bibinaa ganaa a wo a giala nyɔmiɛ̃ yaa, bɛn tá kiɛ̃ nɛ Zudaa laanka Izirayelin kiin sɛ́wɔ nɛ.

²⁷ A kũ Amasiya a kanaa Dɛnaa Lawa kio kɛ waáraa ganaa, minin tɛnɛn nə́ boo wɔ kɔn a ganaa Zeruzalɛmu. Á baa si á woo Lakiisi, sɛnɛ, minin ná a basa bɔ ǹ nə́ woo dɛ bɛa kiwi lɛ nɛ.

²⁸ Bɛ kio, ǹ nə́ daa a gere ne Zeruzalɛmu Zudaa gána nɛ, ziabaa ǹ wotoro la, sùi gigiã n baɛ̃. Ǹ nə́ bĩ walan Zudaa kiwi ka ǹ digolon ne.