KZS2 23 - LAWA A BOO SONBORE

Zoasi koa kii lɛa

¹ Lɛ̀ sɔbaabaa ǹ wɔ li, Lawa a wúlu-bɔle Zozadaa golee goon la. Ǹ nə́ lɛ kɔ kɔn la ka sɔraasin nyɛɛnaandɛnan kɛn nɛ sɔraasi paabiɛ mìi la, Yerohamu a nɛgiĩ Azaria nɛ, Zoanan a nɛgiĩ Isimayeli ni, Obɛdi a nɛgiĩ Azaria nɛ, Adayaa a nɛgiĩ Maseya nɛ, ka Zikiri a nɛgiĩ Elisafaati ni.

² Bɛa sɔraasi nyɛɛnaandɛnan kɛn lɛn nə́ woo Zudaa gána din tumaa nɛ. Ǹ nə́ *Levii tɔrɔn sɔkɔn Zudaa kiwin tumaa nɛ ka Izirayeli a kɛdɛnan nɛ. Ǹ nə́ n bɔyaa kunun ǹ ni ǹ nə́ daa Zeruzalɛmu.

³ Bɛa minin kɛn lɛn tumaa n soe-n kɔn Lawa a kion, ǹ nə́ lɛ kɔ wɔ kii wɔ paǹ li. Zozadaa pɛ ǹ nɛ: «Kii a nɛgiĩ Zoasi lɛ á ke! A din doamaa nɛ a kii baa ka Dɛnaa Lawa bɛ́ á lɛ kɔ mɛn wɔ Davida tɔrɔn wɔ paǹ li lɔn.

⁴ Ka bɛ́ re sii mɛn zɛnɛɛ, á ke: Bɛ̀ Lawa a wúlu-bɔlen laanka Levii tɔrɔn nə́ ǹ dí giala kɔ *susu ǹ pii pinaa, talɛɛ sɔɔ goon tá re Lawa a kion lɛ a kiɛnlɛn lɛduĩ.

⁵ Talɛɛ sɔɔ paabaa ǹ wɔ kɛ á re kiikion kɛ lɛduĩ. A sɔɔbaa ǹ wɔ á re kion lɛ a gòã daa ǹ kiɛnlɛ lɛduĩ. Zaman tumaa á re goɛ̃ Lawa a kion lɛ a sumu-n.

⁶ Min kɔn doamaa bie a wɔ Lawa a kion lɛ-n wa yǎa Lawa a wúlu-bɔlen laanka Levii tɔrɔn mɛnɛn bɛ́ dí lɛ la. Bɛn tá boe la ǹ wɔ a giala maǹ nə́ ǹ dinin kɔ Lawa la. Zaman tumaa doamaa nɛ a golee Dɛnaa Lawa a sii zɛnaa ǹ gɔn kɛ li.

⁷ Levii tɔrɔn dɔn tá re kii lɛnpɛnɛ, ziabaa ǹ mànan nə́ ǹ gɔn. A bɛ́ re woe bǎã mɛn tumaa nɛ, ǹ tá re woe kun ni. Bɛ̀ min tá giɛ li a wɔ kion lɛ nɛ, ǹ bɛa dɛnaa dɛ a gã.»

⁸ Lawa a wúlu-bɔle Zozadaa boo mɛn da Levii tɔrɔn lɛn laanka Zudaa minin tumaa nɛ, ǹ nə́ zɛnaa miɛ̃. Kiã gogoonmaa ná a minin sɔkɔn, ǹ mɛnɛn bɛ́ ǹ dí giala koe susu ǹ pii pinaa ka ǹ mɛnɛn bɛ́ ǹ wɔ nyɔmiɛ̃ bɛa pinaa kɛ lɛ nɛ, a giala, Zozadaa susu ǹ pii kɔ kuru sɔɔ lɛ kɔn din la wa.

⁹ Davida a sɛmiɛ̃n laanka goóron dadaran ka a bɔnboɛɛnɛn kɛn koa-n Lawa a kion, á bɛn goa á ǹ kɔ sɔraasi paabiɛ nyɛɛnaandɛnan la.

¹⁰ Á minin lɛn tumaa koa kion lɛ laanka *wúlu bɔ ǹ bǎã lɛ yɔrɔ-a, buurii talɛɛ baa nɛ, a saa kion lɛ a gusin a lɛ̀gɔn la a wàã ganaa a wo a gɔsɛ a lɛ̀gɔn la a wàã yaa. Didie tumaa laanka a ziabaa ǹ màn na a gɔn, ǹ yɔrɔ n boe ne kii lɛnpɛnɛ taman yii.

¹¹ Bɛ kio, ǹ nə́ soo ka Zoasi ni, ǹ nə́ kii bafalo wɔ a mìi-a, ǹ nə́ lɛ kɔ kɔn la ǹ sɛ́wɔ wɔ a gɔn. Ǹ nə́ koa kii lɛa Zozadaa laanka a nɛgiĩn nə́ nyɔɔ lɔ a mìi ni. Bǎã goon ne, min tumaa kaa lɛ-dɛ nɛ: «Lawa nyin sasa kɔ kii la.»

Ataalii a gɛ̀

¹² Ataalii bɛ́ á zaman lɛ a bìn diɛ ma, ǹ nə́ baa sii, ǹ nə́ n lɛ dii ka foo kɔɔ̃n nɛ kii lɛ ganaa, á daa n dɔ kun ka zaman lɛ nɛ Dɛnaa Lawa a kion.

¹³ A sii mɛn yɛ á ke: Kii lɛ n golee-n lon banbaran la Lawa a kion lɛ a kiɛnlɛ-a. Sɔraasin nyɛɛnaandɛnan laanka bɛn-pɛlen nə́ mɔrɛɛ nɛ a ganaa. Zaman tumaa foo n kɔɔ̃nɛ, bɛ̀-dɛlen man bɛnən pii, loe-lɔlin màn sàn kɔ ǹ mànan dii, ǹ nə́ tɔ bɔ ǹ loe nyɛɛnaan boe. Ataalii ná a mɔnaan tɔtoɛ̃ a nə́ n lɛ dii: «Ǹ nə́ ma sã, ǹ nə́ ma sã.»

¹⁴ Zozadaa ba li mà ǹ Ataalii dɛ Lawa a kion lɛ-n wa. Bɛ lɛ nɛ, sɔraasi paabiɛ nyɛɛnaandɛnan mɛnɛn bɛ́ sɔraasin mìi la, á tɔ́n pɛ bɛn manɛ: «Ka kun ka soo ne ka bɔ zaman bii. Bɛ̀ min mɛn tá zoɛ̃ li mà a kɔ lɛ, ka ǹ dɛnaa dɛ.»

¹⁵ Ǹ nə́ kun ǹ nə́ tele kii kion kɛ ganaa, ǹ bɛ́ ǹ nə́ dɔ sùin kiɛnlɛ-a, ǹ nə́ dɛ walan.

Zozadaa siin mɛnɛn bɔyaa

¹⁶ Zozadaa tɔn lɛ-kɔ da zaman lɛ bii n ni, kii lɛ nɛ, ka a dinmaa nɛ. Bɛa lɛ-kɔ lɛ gɔ́ɔ̃ nɛ, ǹ tumaa n die Dɛnaa Lawa a zaman biɛ.

¹⁷ Bɛ lɛ nɛ, zaman lɛ tumaa tɔn kaa *Baali a kionən kɛn nɛ, ǹ nə́ ǹ wuru. Ǹ ná a wúlu bɔ ǹ bǎãn kɛn yɔyɔrɛ ka dì kɔsɔn nyínin kɛn nɛ. Wúlu bɔ ǹ bǎã kɛ yɔrɔ-a, ǹ nə́ Baali a wúlu-bɔle Matan dɛ.

¹⁸ Bɛ kio, Lawa a wúlu-bɔlen mɛnɛn bɛ́ Levii tɔrɔn lɛa Lawa a kion lɛ lɛduĩ, Zozadaa bɛn kaa Lawa a kion lɛ a dí lɛ la. Davida na á ǹ tatala kuru lɛ yii li maǹ boo la ǹ *wúlu màn lɛpiɛ̃ kɔ Lawa a kion ka á ke kiɛ̃-n Muizu a laanda sɛ́wɔ lɔn. Á pɛ ǹ nɛ mà n bɛa dí lɛ nya ka foo kɔɔ̃nbaa ǹ loen ne a kɔn pɛ ka Davida a gɔn waa-man nɛ.

¹⁹ Zozadaa kiɛnlɛ-lɛduə̃lin bɔ á n koa Lawa a kion lɛ a kiɛnlɛn lɛa. Ka bɛ nɛ, min gɔgɔrɛ a boe la a wɔ ka yɔrɔ kɔn nɛ wa.

²⁰ Zozadaa tɔ́n wusoo doo, sɔraasi paabiɛ nyɛɛnaandɛnan nɛ, kiwi nyɛɛnaandɛnan nɛ, zaman nyɛɛnaandɛnan nɛ, ka gána lɛ a min tumaa nɛ, á n tumaa sɔkɔn. Á bɔ ka lon a kiɛnlɛ kɛ nɛ á kii Zoasi da zii Lawa a kion yǎa kii kion. Ǹ nə́ kũ ǹ nə́ koa kii dankan la.

²¹ Min tumaa foo n kɔɔ̃nɛ, kiwi lɛ nyɛɛ kiĩn ni. Maǹ nə́ Ataalii dɛ ka gɔya sa nɛ.