KZS2 20 - LAWA A BOO SONBORE

Zozafati a Lawa nyankɔ

¹ Bɛ kio, Moabu minin laanka Amɔn tɔrɔn ka Mehuniti minin nə́ daa zia baa Zozafati ganaa.

² Ǹ nə́ daa pɛ Zozafati ni: «Sɔraasi gigiã á die n gialaa. Maǹ boe Yìsi mu gole kɛ a paǹ goon li, Edɔmu gána nɛ. Maǹ Hasasɔn-Tamaara kanna, bɛ giala mà Ɛn-Gedii.»

³ Nyɛ́ɛ Zozafati kũ, á n bɔyaa á ga Dɛnaa Lawa li. Á pɛ Zudaa min tumaa nɛ mà ǹ nə n lɛ sɔɔ.

⁴ Zudaa minin lɛn nə́ bɔ gána lɛ a kiwi din tumaa nɛ, ǹ nə́ n sɔkɔn, ǹ nə́ ga Dɛnaa Lawa a dɔmalɛ li.

⁵ Zozafati golee lon Zeruzalɛmu minin lɛn bii ka Zudaa minin kɔsɔn nɛ, a yɔrɔ n dia-n Lawa a kion a sumu dii kɛ la.

⁶ Á pɛ: – Dɛnaa Lawa, wɔ digolon Lawa, n din ni lon, n nə́ tán a gána tumaa mìi la. Kakabaa ka pàã nə n wɔ lɛa. Min kɔn ba boe la a n gòãn dii n ganaa wa.

⁷ N dinmaa n wɔa Lawa lɛa. N din nə́ n gána kɛa minin loo bɛ̀ n zaman Izirayeli á ke die, n bɛa gána lɛ kɔ n giaára Abrahamu a kion minin la duduu wɔ lɛa.

⁸ Ǹ nə́ giã walan, ǹ nə́ Lawa a kion dɔ n wɔ lɛa ǹ nə́ pɛ:

⁹ «Kɔntan, ǹ kɔn pinaa, koe á re boe wɔ-a, zia dɔlɔ lɛa, piɛ̃ busu lɛa, hinlaa bòo lɛa. Bɛ gɔ́ɔ̃ nɛ, wɔ á re die golee Lawa a kion kɛ yɔrɔ-a kəni, n din yɔrɔ-a, a giala mà n tá bɛa bǎã kɛ lɛ nɛ. Wɔ á re n bíi wɔa gu ganaa wɔa koe lɛ gɔ́ɔ̃ nɛ. N tá re n too koe wɔ lon kəni, n wɔ kirisibaa!»

¹⁰ Kanna kəni, ga! Amɔn tɔrɔn nə́ ke, Moabu minin ni, ka Seyiri a kele yii minin ni, ǹ tá die wɔ gialaa ka zia nɛ. Wɔ digolon bɛ́ ǹ nə́ soo Ezipti gána nɛ, n lɛ kɔ ǹ la mà ǹ bɛa tɔrɔn kɛn lɛn gána wɔsɔ wa. Wɔ digolon lɛn nə́ tɔn zii kɔsɔ saa, ǹ bɔ̀n da ǹ ganaa wa.

¹¹ Sɛnɛ, pelo ǹ bɛ́ re wɔ sarɛɛ ka yɔrɔ mɛn nɛ, bɛ á ke: Maǹ wɔ lui wɔ boe tán kɛ la ń kɔ wɔ la.

¹² Wɔa Lawa, n din ba re bɛa kiri kuri wɔa lɛa wa? Wɔ pàã á kiɛɛrɛ sɔraasi kuru damata kɛ ganaa die wɔ gialaa ka zia nɛ. Wɔ bɛ́ re n biɛ lɔn, wɔ a doɛ̃ wa. Bɛ lɛ nɛ, wɔ yii n doa nɛ n din la.

¹³ Zudaa zaman tumaa ka ǹ kion minin ni, ǹ lɔn nɛ, ka ǹ nɛnyaanan nɛ, ǹ nə́ golee lon Dɛnaa Lawa yɔrɔ-a.

Dɛnaa Lawa gɔ̀lɔ̀baa kɔ Zudaa minin la

¹⁴ Zaman lɛ bii kəni, Dɛnaa Lawa Yiri gisĩ Yahaziyɛli la. Levii tɔrɔ nɛ, Zakarii a nɛgiĩ lɛa, Benaazaa a nɔ̀ɔn lɛa. Benaazaa dinmaa n Yeyieli a nɛgiĩ lɛa, Matania a nɔ̀ɔn lɛa. Maǹ Azaafu a tanlɛ minin lɛa.

¹⁵ Yahaziyɛli pɛ: – Kasɛn Zeruzalɛmu minin ka Zudaa min kɔsɔn kɛn, sanparɛ nsɛ kii Zozafati, ka n too kɔ sɔnbɔraa nɛ, Dɛnaa Lawa bɛ́ màn mɛn pii ka nɛ, bɛ á ke: «Nyɛ́ɛ nyan ka kũ wa. Ka nyan toa nyɛ́ɛ ka kũ sɔraasi kuru damata kɛ nyɛɛnɛ wa. Zia lɛ bie kasɛn wɔ lɛa wa, sɛnɛ a n masɛ Lawa wɔ lɛa.

¹⁶ Bǐɛ̃, ka soo ka wo kaa zɔ́ɔn lɛn gialaa. Ǹ tá re zii kɛ siɛ a tɔ n "da buu tenten". Ka á re ǹ yii nyankɔrɔ lɛ kɛ dan ganaa, Yeruweli a diə gole kɛ yɔrɔ-a.

¹⁷ Ka laadoo á re goɛ̃ ǹ ziabaa ganaa wa. Ka giã walan, ka golee, ka ga masɛ Dɛnaa Lawa bɛ́ re ka kirisibiɛ lɔn. Zeruzalɛmu laanka Zudaa minin lɛn, ka nyan nyɛ́ɛ baa wa, ka nyan toa nyɛ́ɛ ka kũ wa! Biɛ̃, ka wo n da ǹ lɛ, masɛ Dɛnaa Lawa á re goɛ̃ kun ká ka nɛ!»

¹⁸ Zozafati kaa a musin la á n nyanlɛ doa tán. Zeruzalɛmu laanka Zudaa min gialakunun kɛn nɛ, ǹ dɔn nə́ kaa ǹ musin la ǹ nə́ Dɛnaa Lawa guguru kɔ.

¹⁹ *Levii tɔrɔn bii Keyati laanka Koree a tanlɛ minin kɛn nə́ yoo ǹ tá loe loe ka lɛn gole ne ǹ nə́ Dɛnaa Lawa, Izirayeli a Lawa tɔ boe ne.

²⁰ Bɛa lɛawaa baayɛlɛ yiisoo, zaman tumaa zii saa ǹ nə́ woe Tekoa diə gole ne. Ǹ woo waáraa, Zozafati nə́ n doa ǹ nyɛɛnɛ á pɛ ǹ nɛ: «Zeruzalɛmu laanka Zudaa minin lɛn, ka n too kɔ ma lon! Ka n foo tumaa doa Dɛnaa Lawa, kaa Lawa ganaa, ka á re pàã yii. Ka n foo tumaa doa a boo gii-dalin kɛn ganaa, gɔ̀lɔ̀baa n die goɛ̃ kaa wɔ lɛa!»

²¹ Bɛ kio, Zozafati laanka zaman lɛ kɔn ma, ǹ nə́ loe-lɔlin koa Dɛnaa Lawa wɔn lɛa. Ǹ dí n ka Lawa tɔ bɔ nɛ, a sonborebaa tumaa gɔ́ɔ̃ nɛ. «Ka loe lɔ ka Dɛnaa Lawa tɔ laakalaa nɛ, a minin narɛɛ lɛ n yǎa duduu!»

²² LOE-lɔlin lɛn bɛ́ a gialaa gɔ̀lɔ̀baa ǹ loe loe ka foo kɔɔ̃nbaa nɛ ǹ mɛn waáraa, Amɔn minin laanka Moabu minin ka Seyiri kele yii minin mɛnɛn nə da zia baa Zudaa minin ganaa, Dɛnaa Lawa nə́ ǹ lɔlɔkɔn, ǹ dininmaan nə́ kɔn dɛ.

²³ Amɔn minin laanka Moabu minin nə́ yiɛ Seyiri kele yii minin gialaa, ǹ nə́ ǹ dɛ yǎa á woo ǹ giala nyɔmiɛ̃ yaa. Bɛ kio, ǹ dinin nə́ n bɔyaa kɔn li ǹ tá kɔn dii.

²⁴ Bǎã mɛn bɛ́ n tá n toɛ a nɛ n diə gole lɛ yɛ, Zudaa minin lɛn nə dɔ walan ǹ nə́ n yɔrɔ dia ǹ zɔ́ɔ lɛn la. Sɛnɛ, ǹ yii n bccccgeren dininsɔɔ̃nɔn a tán. Min kɔn din yii goã koo wa!

²⁵ Bɛ lɛ nɛ, zɔ́ɔn lɛn nə mànan mɛnɛn toa walan, Zozafati laanka a zaman daa bɛn kokoo. Ǹ nə́ gɔn mànan yɛ, mɔnaan nɛ, màn giɔ̀mɔ kaka-a nɛ, gɔn màn lɛ mɔnaa á la yii ni, ǹ nə́ goa yǎa lɛawaa sɔɔ, yǎa ǹ boo a tumaa la ǹ nə́ goa wa.

²⁶ A lɛawaa siibaa ǹ wɔ pinaa, ǹ nə́ n sɔkɔn Beraka nyankɔrɔ lɛ kɛ nɛ, ǹ nə́ barka da Dɛnaa Lawa nɛ. Bɛ lɛ nɛ, a da kaa pelo lɛ, bɛa nyankɔrɔ lɛ tɔ n "Beraka" bɛ giala mà barka.

²⁷ Bɛ kio, Zeruzalɛmu minin ni ka Zudaa minin gialakunun ni, kun ka Zozafati ni ǹ nyɛɛnɛ, ǹ nə́ zii saa ǹ nə́ woo Zeruzalɛmu ka foo kɔɔ̃n nɛ. A giala, Dɛnaa Lawa na á ǹ kirisibaa ǹ zɔ́ɔn ganaa á foo kɔɔ̃n kɔ gole kɔ ǹ la.

²⁸ Ǹ nə́ daa kaa kiwi, tùtun wuu li, kɔnkoɛɛ̃nɛn wuu ni, ka bɛnən nɛ, yǎa Lawa a kion.

²⁹ Tɔrɔn mɛnɛn bɛ́ gána kɔsɔn nɛ, bɛn bɛ́ ǹ nə́ ma mà Dɛnaa Lawa zia baa Izirayeli a zɔ́ɔn ganaa, nyɛ́ɛ nə́ ǹ kũ parasiini.

³⁰ Bɛ lɛ na á toa Zozafati a gána goã yii-nyɛɛ la. A Lawa na á la nyantoro kɔ ǹ la paǹ tumaa li.

Zozafati a kiibaa nyɔmɔɔ ǹ gɔn

³¹ Zozafati na á Zudaan kii baa bɛ̀ a lɛ̀ pɔsɔɔwensooro ne. Á kii baa Zeruzalɛmu lɛ̀ fuəwensooro. Ǹ dan tɔ n Azubaa, Siili a nɛlɔ nɛ.

³² Zozafati kɔ ǹ di Azaa a zii lɛ. A n na, á n bɔ a ganaa duduu wa. Sii mɛn bɛ́ siĩn Dɛnaa Lawa yii li, a na á bɛ zɛnaa.

³³ Sɛnɛ, dì wúlu bɔ ǹ bǎãn kɛn nə papaã wa. Zaman lɛ nə n foo tumaa doa ǹ digolon Lawa ganaa wa.

³⁴ Zozafati a sii zɛnaa kɔsɔn kɛn, a saa a bibinaa ganaa a wo a giala nyɔmiɛ̃ yaa, bɛn tá kiɛ̃ nɛ Anaanii a nɛgiĩ Zewu a siin sɛ́wɔ nɛ. Bɛa sɛ́wɔ kiɛ̃n kɛn lɛn tá Izirayelin kiin sɛ́wɔ nɛ.

³⁵ Ka bɛ n doo, Zudaan kii Zozafati nə́ n kaa kun ka Izirayelin kii Ahaazia nɛ, a giã ǹ gɔn nə́ bɔbɔnɛɛ.

³⁶ Ǹ nə́ n kaa kun ǹ nə́ mu la ǹ goo zɛnaa, bǎã sɔsɔɔ zii tɔ wɔ ǹ wɔn lɛa. Maǹ nə́ ǹ zɛnaa Esiɔn-Gebɛɛrɛ.

³⁷ Sɛnɛ, Dodava a nɛgiĩ Eliezɛrɛ ke boe Maresaa, bɛ́ Lawa a boo gii da Zozafati ni á pɛ: «Man nə́ n din kaa kun ka Ahaazia nɛ, bɛ lɛ taman yii, n màn mɛn yii zɛnaa Dɛnaa Lawa n die bɛ tumaa ziziɛ̃.» Bɛ lɛ nɛ, mu la ǹ goon lɛn nə́ gisĩ Yìsi mu gole giala-n, ǹ boo la ǹ nə́ woo bǎã sɔsɔɔ-n wa.