KZS2 2 - LAWA A BOO SONBORE

¹ Salomɔn giĩ duu pɔsɔbaa (70 000) goa guĩ-gũlin lɛa, duupɔkiwisi (80 000) kɔlɔbɔlen lɛa kele la, ka min duu sɔɔ ka biɛsɔrɔ (3 600) nɛ ǹ mìi la, giɛ dí lɛ ganaa.

² Salomɔn lɛ dia wɔ Tiirin kii Uramu la, á pɛ: «Ń *sɛdrə gɔn kɔ ma dí Davida la mà a na a kii kion dɔ nɛ. A zɛnaa masɛ dɔ n miɛ̃.

³ Taãn nɛ, man zoɛ̃ li máa ma kion dɔ, Dɛnaa Lawa, maa Lawa tɔ bɔ ǹ wɔ lɛa. Izirayeli minin man die bɛa kion kɛ lɛ koe a din la. Ǹ tá re *wúlu màn gìĩ kɔɔ̃n tiɛ̃ a wɔ lɛa walan, ǹ buuru sonbore kɔ la biikoo tumaa li, ǹ wúlu màn tiɛ̃ kɔ la walan babaraa, baayɛlɛ ka wɔsamiɛ̃nɛ, *susu ǹ pii pinaa nɛ ka mui dii a bɔ pinaa nɛ ka Dɛnaa Lawa, wɔa Lawa a zɔ́n pinaan nɛ. Landan manɛ, Izirayeli minin doamaa nɛ ǹ kɔ lɛ yǎa duduu.

⁴ Lawa a kion ke ma á re doe, á kɔnbɔ a goã gole, a giala wɔa Lawa lɛ á gole á la lawan kɔsɔn tumaa nɛ.

⁵ Ka boo taãnɛ, pàã ba min kɔn lon a kion dɔ a kɔ la wa. Taãn nɛ, lon laanka a golebaa nɛ, a boe la a guĩ wa. Masɛ n die lɛa ma tɔn kion dɔ a wɔ lɛa? Man giɛ máa ma bǎã dinsɔ̃ɔ dɔ, ǹ bɛ́ re wúlu mànan koe la ǹ mɛn nɛ.

⁶ Kanna, giĩ mɛn bɛ́ sana, wɔrɔ, zan ka fɔlɔ dí yɔrɔ doɛ̃ parasiini, a n boe la dɔn a mɔnaa wɔ, tã, tã bonbon, tã korebore hinlaa bɔlɔn lɛa, a doamaa nɛ á boe da sɛlɛ dɔ la, bɛ dia ma la. Á re dí nyɛɛ kun maa gɔn dí-nyalin kɛn nɛ, ma di Davida nə ǹ mɛnɛn bɔ ǹ nə́ giã-n Zeruzalɛmu hinlaa bǎã kɔsɔn nɛ Zudaa gána nɛ.

⁷ Sɛdrə da gɔn dia ma la, siprɛsi da laanka gɔn giɔ̀mɔ kaka nɛ, ǹ mɛn bɛ boe Liban a kelen la. Ma foo a doa-n taãnɛ máa n dí-nyalin lɛn tá Liban da kurii yɔrɔ doɛ̃. Maa dí-nyalin tá re dí nyɛɛ kunun ǹ ni.

⁸ Ǹ tá re gɔn gigiã kuri. Ma bɛ́ re Lawa a kion mɛn doe, á re goɛ̃ gole, a n siĩn dɔn.

⁹ Ma din wɔ paǹ li, n dí-nyalin mɛnɛn bɛ re dan lɛn kuri ǹ kaa, ma á re *belee tɔnɔ duu sɔrɔ (6 000), *ɔrzi tɔnɔ duu sɔrɔ, duvɛ̃ litiri duu biɛkiwisi (800 000) ka nyɔɔ litiri duu biɛkiwisi koe ǹ la.»

¹⁰ Tiirin kii Uramu Salomɔn lɛ si ka sɛ́wɔ nɛ á pɛ: «Dɛnaa Lawa na a zaman narɛ. Bɛ lɛ nɛ á n koa kii lɛa a mìi la.»

¹¹ Uramu pɛ doo: «Ma á zɔɔ diɛ Dɛnaa Lawa, Izirayeli a Lawa nɛ, asɛ mɛn lon laanka tán zɛnaa. Á nɛgiĩ kɔ Davida la, piɛ̃ nɛ ka sii-doɛ̃ nɛ, doɛ̃ nɛ ka yiri kɔɔ̃nbaa nɛ, a n boe la á Lawa a kion doe Dɛnaa Lawa wɔ lɛa ka kii kion ne, a dinmaa wɔ lɛa.

¹² Kanna kəni man die giĩ goon diɛ n la, dí yɔrɔ doɛ̃ parasiini, Uramu-Abii, a yiri tan parasiini.

¹³ A díi n Tiiri min lɛa, sɛnɛ a náa n Dan tɔrɔ lɛa. Á sana dí nyɛɛ doɛ̃, wɔrɔ nɛ, zan nɛ, fɔlɔ nɛ, kɔlɔ nɛ ka gɔn nɛ, á mɔnaa dɔ we doɛ̃ a goã tã, tã bonbon hinlaa korebore, tuntun mɔnaa nɛ ka mɔnaa bɔlɔn nɛ. Á da sɛlɛ doɛ̃. Ka bɛ́ re nɔ̀n diɛ la ka nyaǹ màn woo nyaǹ màn tɔrɔ mɛn nɛ, a tá a tumaa zɛnɛɛ doɛ̃. N díi, kii Davida gɔn dí-nyalin mɛnɛn bɔ, dí doɛ̃ parsiini kɔnlɛ ka n din wɔn nɛ, á re dí nyɛɛ kun ka bɛn nɛ.

¹⁴ Kanna kəni kii, n lɛ kɔ mà n tá re belee, ɔrzi, nyɔɔ ka duvɛ̃ mɛn koe, bɛ dia.

¹⁵ N laadoo bɛ́ gɔn mɛn tumaa ganaa wɔsɛn tá re kuri Liban a kele la n wɔ lɛa. Wɔ á re n yii kun, wɔ ǹ kaa yìsi mu la, wɔ dia n la yǎa Zafa. Walan ń tá re ǹ kiɛ a guĩ ganaa yǎa Zeruzalɛmu.»

¹⁶ Salomɔn n di Davida goã á tiin mɛnɛn nimi giã nɛ Izirayeli gána nɛ, Salomɔn bɛn goa. Maǹ min duupaabiɛsoorowensɔɔ ka biɛsɔrɔ (253 600).

¹⁷ Salomɔn giĩ duupɔsɔbaa bɔ ǹ bii guĩ gũ a lɛa, duupɔkiwisi kɔlɔ bɔ kele la a lɛa ka min duusɔɔ ka biɛsɔrɔ bɛn nə ǹ mìi la zaman lɛ kiɛ dí ganaa.