KZS2 19 - LAWA A BOO SONBORE

Kii Zozafati n kiri-kurulin koɛ Zudaa

¹ Zudaan kii Zozafati nə́ n bɔyaa á woo piɛ Zeruzalɛmu kakabaa la.

² Lawa a boo gii-dali, Anaanii a nɛgiĩ Zewu daa n da lɛ á pɛ nɛ: «Ma nə́ n woo n dɔ min baraa lɛ. Bɛ na á saa lɔn? Min mɛnɛn bɛ́ Dɛnaa Lawa nə́ ǹ tii, bɛn man kɔɔ̃nɛ nsɛ ganaa? Bɛ lɛ taman yii, Dɛnaa Lawa foo yoo n li.

³ Sɛnɛ, a da yaa dɔn n sii sonbore zɛnaa. A giala, ń dì gɔnɔn kɛn tumaa papaã gána lɛ nɛ, ń ga Lawa li ka n foo tumaa nɛ.»

⁴ Zozafati giã Zeruzalɛmu. Á zii tɔ wɔ giala kɔ, màn mɛn bɛ́ toɛ a kɔn yɛ ka a zaman nɛ, a kũ Bɛɛr-Sebaa ganaa gusin a lɛ̀gɔn la, a wo Efrayimu a kele yii kɛ yaa gɔsɛ a lɛ̀gɔn la, a n pii zaman nɛ maǹ wusoo ǹ da Dɛnaa Lawa, ǹ digolon Lawa li.

⁵ Á kiri-kurulin bɔ á n koa Zudaa gána a kiwi tamaa wole din tumaa nɛ.

⁶ Á pɛ ǹ nɛ: «Ka yiri bɔ kaa zɛnaa ǹ siin li. A giala, ka bie re kiri we ka minbuiin nɛ tɔ-n ma, sɛnɛ, ka Dɛnaa Lawa tɔ nɛ. Á re goɛ̃ kun ka nɛ kiri kurii waáraa.

⁷ Ka nyɛ́ɛ baa Dɛnaa Lawa-n parsiini, ka sii tumaa zɛnaa ka fubaa nɛ, a giala Dɛnaa Lawa a lɛ koe mɛnaa ma la ganaa wa. A ba li ka bɔnbii-a wɔ minin bii wa. A lɛ koe lɛ pii ǹ màn ganaa wa.»

⁸ Zeruzalɛmu dɔ nɛ, Zozafati *Levii tɔrɔn bɔ á ǹ koa, Lawa a wúlu-bɔlen ne, Izirayeli a kɛdɛnan nɛ, ǹ boo la ǹ kiri kuru Dɛnaa Lawa tɔ nɛ, ǹ siin yɔrɔ bɔ. Maǹ giã-n Zeruzalɛmu.

⁹ A dí-pɛ mɛn pɛ ǹ nɛ, bɛ á ke: «Ka n die sii zɛnɛɛ ka nyɛ́ɛ baa Dɛnaa Lawa yii-n ni, peperebaa nɛ ka foo goon toto ne.

¹⁰ Bɛ̀ ka Izirayeli minin man nə́ bɔ ǹ giã ǹ kiwin ni, ǹ nə́ daa sii yɔrɔ bɔ ka li, bɛa sii lɛn boe la a n woe gɛ̀ dɛ paǹ li, dí-pɛn nɛ, gɔn waa ǹ boon ne hinlaa landa boon. Biikoo tumaa li, ka ǹ doroo, ka zii nyaa ǹ nɛ. Ka bɛ nɛ, ǹ ba re siɛ̃ ǹ wɔ Dɛnaa Lawa lon, a foo yoo ka li hinlaa ka dɔɔ̃nɔn lɛn li wa. Bɛ̀ ka zɛnaa miɛ̃, zɛ̀rɛ re ka kuĩ wa.

¹¹ Sii mɛn tumaa bɛ́ Dɛnaa Lawa a paǹ li, Lawa a wúlu-bɔle gole Amariya kɛ á re goɛ̃ ka mìi la. Sii mɛn tumaa bɛ́ woe kii a paǹ li, Isimayeli a nɛgiĩ Zebedia ke Zudaa tɔrɔn goledɛnaa lɛa, bɛ á re kaa mìilandɛnaa biɛ. Levii tɔrɔn tá re goɛ̃ ka li, sɛ́wɔ-kiɛ̃lin lɛa. Ka n foo taã, ka dí nya. Dɛnaa Lawa die a n dɔ sii bǐɛ̃-zɛnaalin lɛ!»