KZS2 17 - LAWA A BOO SONBORE

Zudaan kii Zozafati n bɔlɔgoondɛnaa lɛa Dɛnaa Lawa li

¹ Azaa a nɛgiĩ Zozafati kii baa a díi a bǎã nɛ. Á n we yii parsiini zia baa kɔn ka Izirayeli n taman yii.

² Zudaa kiwi mɛn tumaa bɛ́ tamaa nɛ parsiini, á sɔraasi kurun kaa bɛn nɛ. Á sɔraasin giã ǹ bǎãn koa Zudaa gána nɛ ka Efrayimu kiwin kɛn dɔn nɛ ǹ di Azaa nə́ ǹ kũ.

³ Dɛnaa Lawa na á goã kun ka Zozafati ni, a giala, asɛ a giã ǹ gɔn na á goã ka ǹ digolo Davida a yoo tán waáraa wɔ bɛ́ lɔn. A ga dì baalin li wa.

⁴ A n giɛ ǹ digolon Lawa li á n koe a dí-pɛn lɛ. Izirayeli minin kɛn nə goã sii mɛn zɛnɛɛ, asɛ ba koe bɛ lɛ wa.

⁵ Dɛnaa Lawa ná a kiibaa gòã wɔ tán. Zudaa minin tumaa n gá woe Zozafati ni. Á pàãma baa parsiini, á tɔ gugurubaa dɔ yɛ.

⁶ Á Dɛnaa Lawa a dín nya ka a foo din tumaa nɛ, yǎa á dì wúlu bɔ ǹ bǎãn laanka tíĩn tumaa sàabaa á ǹ bɔ Zudaa gána nɛ.

⁷ Zozafati a kiibaa lɛ̀ sɔɔbaa ǹ wɔ li, a ná a kiãn dia woe minin darɛɛ Zudaa kiwin ni. Bɛa kiãn lɛn tɔn nə́ ke: Bɛn-Hayili ni, Odavia nɛ, Zakarii ni, Nataneyeli ni ka Mikaya nɛ.

⁸ Levii min manangɔrɔ goã kunun ǹ ni: Semayia nɛ, Netalia nɛ, Zebadia nɛ, Azayeli ni, Semiramɔti ni, Zonatan nɛ, Adoniya nɛ, Tobia nɛ ka Tɔbu-Adoniya nɛ. Lawa a wúlu-bɔle paa dɔ goã kunun ǹ ni: Elisama nɛ ka Yoraamu ni.

⁹ Dɛnaa Lawa a dí-pɛn sɛ́wɔ nə́ ǹ gɔn ǹ nə́ woo ne. Ǹ nə́ bɔ Zudaa kiwin tumaa nɛ, ǹ nə́ Zaman lɛ darɛɛ.

Zozafati pàã yɛ taãn-taãnɛ

¹⁰ Gána mɛn tumaa bɛ́ Zudaa lɛnpɛnɛ, Dɛnaa Lawa nyɛ́ɛ kaa ǹ nɛ, ǹ kɔn yii wɔ á zia baa Zozafati ganaa wa.

¹¹ Haalɛ Filisiti minin dinin man die gɔn màn koe Zozafati la, ǹ nə́ wusuru dɔ sarɛɛ ka wɔrɔ nɛ. Larabun dɔn man die ka tɔɔ bisin ni: Sère gɔ̀lɔ̀ duu sɔbaa ka biɛsɔbaa (7 700), ka butumu duu sɔbaa ka biɛsɔbaa nɛ.

¹² Màn nə miɛ Zozafati a pàã li woe. Á kiwin dɔ Zudaa gána nɛ tamaa nɛ sɔnbɔraa nɛ, á màn-bii koa ǹ bǎãn dɔn dɔ.

¹³ A màn-bii koa ǹ bǎãn nə́ mɔnaa Zudaa kiwin ni, ka sɔraasi foo kaka-an nɛ Zeruzalɛmu.

¹⁴ Maǹ nə́ sɔraasin lɛn nimi tanlɛ yii li: Zudaa tɔrɔn bii, sɔraasi duu goon (1 000) nyɛɛnaandɛnan tan. Nyɛɛnaandɛnaa Adnaa n sɔraasi foo kaka-a duu biɛsɔɔ (300 000) mìi la.

¹⁵ Nyɛɛnaandɛnaa Zoanan n mɔrɛ nɛ a ganaa, bɛ na á goã sɔraasi duu biɛpaa ka pɔkiwisi (280 000) mìi la.

¹⁶ Zikiri a nɛgiĩ Amasiya dɔ tan mɔrɛ nɛ a ganaa, ǹ mɛn lɛ nə n din kɔ Dɛnaa Lawa a dí nyɛɛ a lɛa. A n sɔraasi duu biɛpaa (200 000) mìi la ǹ foo n kaka.

¹⁷ Bɛnzamɛn tɔrɔn bii, Eliada nɛ, sɔraasi foo kaka-a lɛa. A n giĩ duubiɛpaa mìi la, sa nə́ ǹ gɔn ka goóron nə.

¹⁸ Nyɛɛnaandɛnaa Zozabaadi n mɔrɛɛ nɛ a ganaa. Asɛ n giĩ duu biɛfuə ka pɔkiwisi (180 000) mìi la, ǹ tumaa yɔrɔ n boe ne zia baa a lɛa.

¹⁹ Sɔraasin mɛnɛn bɛ́ dí nyɛɛ kii lɛ nɛ, bɛn lɛn man ka kɛn nɛ. Kɔsɔn dɔn tan Zozafati nə́ ǹ kaa gána lɛ a kiwin mɛnɛn bɛ́ tamaa nɛ sɔnbɔraanɛ Zudaa gána tumaa nɛ.