KZS2 14 - LAWA A BOO SONBORE

Azaa n Zudaan kii lɛa

¹ Azaa sii sonbore zɛnaa, sii mɛn nə ke pepere Dɛnaa Lawa yɔrɔ-a.

² Wúlu bɔ ǹ bǎãn mɛnɛn nə ke lawa soreen wɔ lɛa ka *wúlu bɔ ǹ bǎã kɔsɔn kɛn nɛ, á bɛn ziziɛ̃. Á tìĩ kɛn yɔyɔrɛ, á dì gɔnɔn kɛn kukuru.

³ Á pɛ Zudaa minin manɛ maǹ ga Dɛnaa Lawa li, ǹ digolon Lawa, ǹ kɔ a dí-pɛn lɛ, ka a landan nɛ.

⁴ Azaa wúlu bɔ ǹ bǎãn laanka màn gìĩ kɔɔ̃n tã ǹ bǎãn kɛn tumaa ziziɛ̃ Zudaa kiwin tumaa nɛ. A bɛ́ kii lɛa biikoo mɛn li, gána lɛ goã yii-nyɛɛ la.

⁵ Bɛa lɛ̀n kɛn lɛn gɔ́ɔ̃ nɛ, zia yɛ wa. A giala, Dɛnaa Lawa din na á là nyantoro kɔ la. Gána lɛ bɛ́ yii nyɛɛ la, Azaa kiwin dɔ tamaa nɛ sonbɔraanɛ.

⁶ Á pɛ Zudaa minin manɛ: «Wɔ́ ga Dɛnaa Lawa, wɔa Lawa li. Wɔ́ ga li, á yii-nyɛɛ kɔ wɔ la paǹ din tumaa li. Gána lɛ n wɔa wɔ lɛa. Ka daa wɔ kiwin kɛn dɔ, wɔ kungɔnɔn pɛnɛ ǹ ganaa, ka gɔnda ǹ bǎãn nɛ ǹ ganaa, kiɛnlɛn nɛ, ǹ nə́ n soɛ.» Ǹ nə́ boo la ǹ nə́ bɛa kiwin lɛn tumaa dɔ tamɛɛ-n sɔnbɔraanɛ.

⁷ Azaa a sɔraasin man giĩ duu biɛsɔɔ (300 000), Zudaa tɔrɔn lɛa, ǹ nə́ goóro dadaraan guĩ, ka sɛmiɛ̃n nɛ. Sɔraasi duu biɛpaa ka pɔkiwisi (280 000) dɔ tan Bɛnzamɛn tɔrɔn lɛa. Bɛn man goóron bɔnboɛɛnɛn guĩ ǹ nə́ sa zuĩ doɛ̃ dɔn. Ǹ tumaa n sɔraasi foo kakaa lɛa.

⁸ Etiopii min Zera ke daa ziabaa ǹ ganaa ka sɔraasi pùru goon (1 000 000) ne, ka ziabaa ǹ wotoro biɛsɔɔ (300) nɛ. Á daa yǎa Maresaa.

⁹ Azaa laanka a sɔraasin nə́ sa gɔn bɔ Sefata nyankɔrɔ lɛ kɛ nɛ, kunu Maresaa ganaa.

¹⁰ Azaa lɛ dia Dɛnaa Lawa, a Lawa la, á gu da nɛ, á pɛ: «Dɛnaa Lawa, n dinsɔɔ̃ n boe la n wɔ pàãdɛnaa laanka pàãwɛ̃naa bii. Da n dɔ wɔ lɛ Dɛnaa Lawa, wɔa Lawa! Wɔ foo n doa nɛ n din ganaa. Wɔ n woe sɔraasi damata kɛ gialaa ka n din tɔ nɛ. Dɛnaa Lawa n din ni wɔa Lawa lɛa. N nyan lɛ kɔ minbuiin nɛ gɔ̀lɔ̀baa yɛ n la wa!»

¹¹ Ká Dɛnaa Lawa barka nɛ, Azaa laanka Zudaa minin nə́ gɔ̀lɔ̀baa yɛ Etiopii minin la, ǹ nə́ ǹ kaa baa la.

¹² Azaa laanka a zaman nə́ ǹ kio loo yǎa Gerarɛ. Etiopii minin lɛn kaa wole la yii ni, min goon din goã lon a yii n koo wa. A giala, Dɛnaa Lawa laanka a sɔraasin nə́ ǹ yɔyɔrɛ. Zudaa minin lɛn nə́ gɔn màn gigiã goa, ǹ nə́ woo ne ziabaa ǹ màn lɛa.

¹³ Kiwi mɛn tumaa bɛ́ kunu Gerarɛ ganaa, ǹ nə́ bɛ tumaa kũ, a giala, Dɛnaa Lawa nyɛ́ɛ kaa ǹ tumaa ganaa. Zudaa minin nə́ bɛa kiwin lɛn tumaa kokoo, a giala gɔn màn gigiã tá ǹ nɛ.

¹⁴ Ǹ nə́ yoo tɔɔ-lɛduə̃lin zìãn gialaa, ǹ nə́ tɔɔ bisinin laanka nyɔɔmaa gigiã loo ǹ nə́ woo ǹ ne. Bɛ kio, ǹ nə́ tɔ́ nə n bɔyaa ǹ nə́ woo Zeruzalɛmu.