KZS2 12 - LAWA A BOO SONBORE

Eziptin kii Sisaaki n yui Zudaa gána gialaa

¹ Roboamu a kiibaa gòã bɛ́ á wɔ tán, màn mɛ a pàã li, a kɔ Dɛnaa Lawa a dí-pɛ kɛ lɛ doo wa. Izirayeli zaman tumaa dɔ nə n saa li.

² Roboamu a kiibaa lɛ soorobaa ǹ wɔ li, Eziptin kii Sisaaki yoo Zeruzalɛmu gialaa ka zia nɛ, a giala, Izirayeli minin lɛn nə bɔlɔgoondɛnan baa Dɛnaa Lawa-n wa.

³ Sisaaki soo Ezipti ka ziabaa ǹ wotoro duu goon ka biɛpaa (1 200) nɛ, sùi da baa-a wole duu pɔsɔrɔ (60 000) nɛ ka sɔraasi damata nɛ, Libii minin ni, Sukii minin ni ka Etiopii minin ni.

⁴ Zudaa gána kiwin mɛnɛn bɛ́ tamaa nɛ, á bɛn tumaa kũ á dɔ yǎa Zeruzalɛmu.

⁵ Bɛ lɛ nɛ, Lawa a boo gii-dali Semayia woo Roboamu laanka Zudaa a kiãn li, ǹ mɛnɛn nə n sɔkɔn Zeruzalɛmu, a giala Sisaaki wɔlɔ kunu kɔ. Semayia tɔ́n Dɛnaa Lawa a boo kɛ da ǹ nɛ á pɛ: «Ká n la bɔ ma ganaa, masɛ Dɛnaa Lawa. Á bǐɛ̃ kɔ. Masɛ dɔ nə n la boe ka-a Sisaaki gɔn.»

⁶ Izirayeli kiãn laanka kii nə n dinin gisĩ, ǹ nə́ pɛ: «Sonbore a Dɛnaa Lawa lon!»

⁷ Dɛnaa Lawa bɛ́ á bɛ yɛ, á boo da ka Semayia nɛ, á pɛ: «Ǹ nə́ n dinin gisĩ ma yɔrɔ-a. Ma a re ǹ bɔ̀n biɛ wa. Kànaa ka boɛɛn má á re ǹ sii ma ǹ kaa. Sisaaki a re maa foo-yoo ke sawɛɛ Zeruzalɛmu la doo wa.

⁸ Sɛnɛ ǹ tá re a dí-nyalin biɛ. Ǹ tá re doɛ̃ bɛa biikoo li kəni, bɔ ǹ biə mɛn bɛ́ dí nya masɛ-n nɛ ka dí nya gána kɔsɔn kiin ni.»

⁹ Eziptin kii Sisaaki yoo Zeruzalɛmu gialaa. Á Lawa a kion gɔn màn tumaa goa ka kii kion kɛ wɔn nɛ, haalɛ goóron kɛn sana lɛa Salomɔn nə ǹ da a zɛnaa ganaa.

¹⁰ Bɛ lɛ nɛ, kii Roboamu zan tã goóron zɛnaa á ǹ kaa ǹ bǎã nɛ, á ǹ sii wɔ sɔraasin goledɛnan kɛn gɔn, ǹ mɛnɛn bɛ́ kii kion lɛa kiɛnlɛn lɛduĩ.

¹¹ Kii a wo Lawa a kion gogoonmaa yii, kiɛnlɛn-lɛduə̃lin man goóron lɛn guĩ bɛ̀ ǹ wusoo ǹ da ǹ kaa kion.

¹² Roboamu nə́ n din gisĩ. Bɛ lɛ taman yii, Dɛnaa Lawa a foo-yoo lɛ nə́ n lɛ goa, a na a bɔ̀n baa lenlen wa. A da yaa dɔ́n màn sonboren tá tɔn yii Zudaa gána nɛ.

Roboamu a gɛ̀

¹³ Roboamu a pàã gòã wɔ tán Zeruzalɛmu. Roboamu bɛ́ kii biɛ, bɛ̀ a lɛ̀ pusi ka goon ne. Á pàã yɛ parsiini. A lɛ̀ fulusɔbaa n kiibaa la Zeruzalɛmu, Dɛnaa Lawa kiwi mɛn lɛ bɔ Izirayeli tɔrɔn tumaa bii á ná a din tɔ da la. Ǹ dan nɛ ka Naama nɛ, Amɔn tɔrɔ nɛ.

¹⁴ Roboamu sii baraa gigiã zɛnaa, a giala a ga Dɛnaa Lawa li ka a foo tumaa-n wa.

¹⁵ Roboamu a sii tumaa, a kũ a bibinaa ganaa a wo a giala nyɔmiɛ̃ yaa, ǹ tá kiɛ̃ nɛ "Lawa a boo gii-dali Semayia ka sii-dɔ̃li Idoo a siin sɛ́wɔ nɛ". Roboamu laanka Zeroboamu goã kɔn ka zia-n biikoo yii tumaa li.

¹⁶ Roboamu bɛ́ á gã á woo ǹ digolon li, maǹ nə bĩ ǹ di "Davida a kiwi". A nɛgiĩ Abiya ná a bǎã saa kii dankan la.