KZS2 11 - LAWA A BOO SONBORE

Roboamu a nya ǹ dín

¹ Roboamu bɛ́ á dɔ Zeruzalɛmu, á sɔraasi duu paabiɛ ka pɔkiwisi (180 000) sɔkɔn min kakan lɛa, ǹ foo n tã, Zudaa ka Bɛnzamɛn tɔrɔn bii. A n li a wo zia baa Izirayeli minin lɛn ganaa màn mɛn bɛ toɛ a wusoo a da ǹ nɛ a din a pàã giulun.

² Sɛnɛ, Dɛnaa Lawa boo da Lawa a boo gii-dali Semayia nɛ á pɛ nɛ:

³ – Wo boo da Salomɔn a nɛgiĩ Roboamu ni Zudaa ǹ kii lɛa, Izirayeli minin kɛn nɛ, ǹ mɛnɛn bɛ́ Zudaa ka Bɛnzamɛn gána nɛ, n pɛ ǹ nɛ:

⁴ «Masɛ Dɛnaa Lawa n pii ka nɛ máa ka baran wo zia baa ka dɔɔ̃nɔn lɛn ganaa wa. Didie nə n bɔyaa a wo piɛ. A giala, sii mɛn nə n zɛnaa, ma din ni má a lɛ kɔ.» Ǹ nə́ n too kɔ Dɛnaa Lawa a boo ganaa kəni, ǹ wo Zeroboamu gialaa doo wa.

Roboamu kungɔn dɔ á Zudaa kiwi gigiã lɛnpɛnɛ nɛ

⁵ Roboamu wusoo á daa giã Zeruzalɛmu. Á kungɔnɔn dɔ á Zudaa kiwi gigiã lɛnpɛnɛ nɛ:

⁶ Bɛtlehɛmu ni, Etamu ni, Tekoa nɛ,

⁷ Bɛti-Suuru ni, Sokoo ne, Adulaamu ni,

⁸ Gaati ni, Maresaa nɛ, Ziifu ni,

⁹ Adorayimu ni, Lakiisi ni, Azekaa nɛ,

¹⁰ Soreya nɛ, Ayalɔn nɛ, ka Ebrɔn nɛ. Bɛa kiwi kakan kɛn lɛn tamaa nɛ sɔnbɔraa nɛ, maǹ Zudaa ka Bɛnzamɛn gána nɛ.

¹¹ Roboamu màn da a kiwi tamaa wolen pàã li. Á gánadɛnan koa ǹ nɛ, màn-bii dɔ nɛ, nyɔɔ nɛ, ka duvɛ̃ nɛ.

¹² Bɛa kiwin kɛn lɛn gogoonmaa nɛ, goóro dadaran tan, ka sɛmiɛ̃n nɛ. Bɛa kiwi kakan kɛn lɛn taman yii, Zudaa laanka Bɛnzamɛn gána goã Roboamu wɔ lɛa.

Zudaa gána pàã yɛ

¹³ Lawa a wúlu-bɔlen laanka *Levii tɔrɔn nə́ bɔ Izirayeli gána paǹ tumaa ganaa ǹ nə́ daa n kaa kun ka Roboamu ni.

¹⁴ Levii tɔrɔn nə́ n la bɔ ǹ tánan ganaa kiwin kɛn lɛkoro-a ka ǹ gɔn mànan nɛ, ǹ nə́ daa Zudaa ka Zeruzalɛmu. A giala, Zeroboamu laanka a nɛnyaanan man nə́ ǹ kurəə Dɛnaa Lawa a wúlu-bɔlebaa ǹ dí nyɛɛ ganaa.

¹⁵ Zeroboamu ná a din dùũ wúlu-bɔlen bɔ, dìn wúlu bɔ á lɛa, butumu laanka dii nɛn kɔnboen lɛa, a din nə ǹ mɛnɛn zɛnaa.

¹⁶ Izirayeli tɔrɔn tumaa bii, minin mɛnɛn bɛ́ giɛ Dɛnaa Lawa, Izirayeli a Lawa li, ka ǹ foo tumaa nɛ, bɛn dɔn nə́ wúlu mànan kɔ Dɛnaa Lawa, ǹ digolon Lawa la Zeruzalɛmu.

¹⁷ Ǹ nə́ màn da Zudaa gána pàã li. Ka bɛ nɛ, ǹ nə́ pàã wɔ Salomɔn a nɛgiĩ Roboamu ni. Bɛa belebɔ na á goã lɛ̀ sɔɔ. A giala, lɛ̀ sɔɔ gɔ́ɔ̃ nɛ, Izirayeli tɔrɔn lɛn giã ǹ gɔn na á goã ka Davida laanka Salomɔn a waáraa bɛ́ lɔn.

Roboamu a kion minin

¹⁸ Roboamu na á kɔn wɔ ka Mahalati ni. Ǹ di Yerimɔti n Davida a nɛ lɛa. Ǹ dan Abiayili n Zesee a nɔ̀ɔn lɛa, Eliabu a nɛlɔ lɛa.

¹⁹ Mahalati na a nɛgiĩn yɛ la: Yewusu ni, Semaria nɛ ka Zahamu ni.

²⁰ Bɛ kio, Roboamu kɔn wɔ ka Abusalɔn a nɛlɔ Maakaa nɛ. A na á nɛgiĩn yɛ la: Abiya nɛ, Atayii ni, Zizaa nɛ ka Selomɔti ni.

²¹ Roboamu na á Maakaa, Abusalɔn a nɛlɔ kɛ narɛ á la a lɔn manɛ ka a lɔ gialakunun kɛn tumaa nɛ. A lɔ baaraa n fulukiwisi, ka kɔsɔn kɛn dɔn nɛ pɔsɔrɔ, nɛgiĩ fuəwenkiwisi ka nɛlɔ pɔsɔrɔ nɛ.

²² Roboamu goledɛnaabaa kɔ Maakaa a nɛgiĩ Abiya la a kion. Á baa ǹ dɔɔ̃nɔn lɛn kiã lɛa, a giala, mà a n zoɛ̃ li mà a bɔ kii lɛa.

²³ Roboamu sii dɔ̃ a na a nɛgiĩ gialakunun kɛn pɛsɛ̃ bǎã tumaa nɛ, kiwin mɛnɛn bɛ́ kungɔn nə́ ǹ lɛnpɛnɛ, Zudaa laanka Bɛnzamɛn gána nɛ. Á màn-bii gigiã kɔ ǹ la, á lɔ gigiã dɔ wɔ á kɔ ǹ la.