KZS2 10 - LAWA A BOO SONBORE

Zudaa a kiin ( 10—36 ) Kii Roboamu a kakaarɛ kɔ zaman ganaa

¹ Roboamu woo Sisɛmu. Walan lɛ nɛ Izirayeli minin lɛn nə́ daa, ǹ tá re koɛ kii lɛa.

² Nebaati a nɛgiĩ Zeroboamu na á goã á baa si á woo Ezipti gána nɛ; màn mɛn bɛ́ toɛ a la kii Salomɔn la. A bɛ́ á ma mà Roboamu woo Sisɛmu, á n toa Ezipti á daa.

³ Ǹ nə́ ǹ dia woe bíi. Bɛ lɛ nɛ, Zeroboamu laanka Izirayeli tumaa daa Roboamu li ǹ nə́ boo da nɛ, ǹ nə́ pɛ:

⁴ «N dí guĩ guguru da wɔ mìi ni. Sisia, bɛ̀rɛbaa ǹ dí ke, bɛ̀ nsɛ bɔyaa ń baa puusə wɔ ganaa, wɔ á die n bɔlɔ sii.»

⁵ Roboamu nə́ ǹ lɛ si á pɛ ǹ nɛ: «Pelo lɛawaa sɔɔ ka wusoo ka da ma li.» Zaman lɛ woo.

⁶ Min golen mɛnɛn nə goã dí nyɛɛ ǹ di Salomɔn giulun bɛ̀ a yii bɛ́ tɔn koo, kii Roboamu nɔ̀n da bɛn la ka doroo ne á pɛ: «Ka n yiri waa koe ma la, ma die ma zaman kɛ lɛ si ni?»

⁷ Min golen lɛn ná a lɛ si: «Bɛ̀ n sonborebaa zɛnaa zaman lɛ nɛ, n nə́ ǹ dùũ sii zɛnaa, n nə́ ǹ lɛ si ka boo kɔɔ̃n nɛ, maǹ die goɛ̃ n dina dí-nyalin lɛa duduu.»

⁸ Sɛnɛ, Roboamu min golen lɛn doroo si wa. Nɛ tenən mɛnɛn bɛ́ ǹ nə́ yoo tán kũ ka a din ni, ǹ nə́ dí nyɛɛ nɛ, á woo nɔ̀n da bɛn la.

⁹ Á pɛ ǹ nɛ: «Minin nə́ nɔ̀n da ma la, mà guĩ guguru ke ma di da ǹsɛn mìi ni, mà ma a puusə kɔ ǹsɛn ganaa. Kasɛn, ka n wàa yiri koe ma la ma ǹ lɛ si ni?»

¹⁰ Nɛ tenən lɛn nə́ pɛ nɛ: – Minin kɛn man nə n panparan diɛ, mà ń di nə́ ǹsɛn kũ bɛ̀rɛn wɔ baa nɛ. Maǹ nɔ̀n diɛ n la mà guĩ guguru ke ǹsɛn mìi ni, mà n na a puusə kɔ. A bɛ́ miɛ̃, ǹ lɛ si kɛnɛn: «Ma gòon nyɔɔn tá gole á la ma di bunbun ni.

¹¹ Ma di na á guĩ guguru da ka mìi ni? Masɛ n die màn diɛ a gugurubaa li doo! Ma di na á ka doroo ka sɛ̌n nɛ? Masɛ n die ka doree ka sɔsɔrɔ kiɛdɛnan nɛ!»

¹² A lɛawaa sɔɔbaa ǹ wɔ pinaa, Zeroboamu laanka zaman lɛ tumaa woo Roboamu li, ka kii lɛ goã á pɛ ǹ nɛ lɔn mà ǹ wusoo ǹ da kànaa ka lɛawaa sɔɔ.

¹³ Kii lɛ nə n too kɔ min golen doroo lɛ-a wa, á zaman lɛ si ka foo ne,

¹⁴ á kɔ nɛ tenən lɛn da ǹ boon lɛ, á pɛ: «Ma di na á guĩ guguru da ka mìi ni? Masɛ n die màn diɛ a gugurubaa li doo! Ma di na á ka doroo ka sɛ̌n nɛ? Masɛ n die ka doree ka sɔsɔrɔ kiɛdɛnan nɛ!»

¹⁵ Kii lɛ nə n too kɔ zaman lɛ lon wa. Dɛnaa Lawa din na á daa ka bɛ nɛ, màn mɛn bɛ́ toɛ a boo lɛ pã, a ǹ mɛn lɛ wɔ Siiloo min Ayia lɛ-n mà a pɛ Nebaati a nɛgiĩ Zeroboamu ni.

Izirayeli gána a na kɔn

¹⁶ Izirayeli minin lɛn bɛ ǹ nə́ yɛ mà kii lɛ ba n too koe ǹsɛn lon wa, ǹ na a lɛ si ǹ nə́ pɛ: «Wɔa sii kɔn ba Davida wɔ li wa! Wɔa sii kɔn ba kun Zesee a nɛgiĩ kɛ wɔ n wa! Izirayeli minin, ka wɔ n ta piɛ! Nsɛ Davida a nɛgiĩ, ga n gána walan sisia kəni!» Yǎa Izirayeli minin nə kiɛ̃ ǹ wo piɛ.

¹⁷ Izirayeli minin mɛnɛn bɛ́ giã-n Zudaa gána nɛ, bɛn dininsɔɔ̃nɔn man nə Roboamu dɔ̃ ǹ kii lɛa.

¹⁸ Goledɛnaa mɛn nə ke pàã dí mìi la, a tɔ n Adoramu, Roboamu bɛ dia Izirayeli minin lɛn li. Sɛnɛ, ǹ nə́ kɔlɔ kaã bɔ a ganaa, á gã. Roboamu boo la á dii a wotoro la, á baa si, á woo Zeruzalɛmu.

¹⁹ Bɛ lɛ nɛ, Izirayeli minin nə́ n piã ka Davida a kion minin ni a da pelo yaa.