KZS2 1 - LAWA A BOO SONBORE

Salomɔn a kiibaa

¹ Davida a nɛgiĩ Salomɔn gòã wɔ tán a kiibaa gɔ́ɔ̃ nɛ. Dɛnaa Lawa, a Lawa na á goã kun ni a ná a tɔ saa lon parsiini.

Salomɔn a sii-doɛ̃

² Salomɔn boo da Izirayeli tumaa nɛ, zia nɛ duu goon (1 000) nyɛɛnaandɛnan nɛ ka zia nɛ paabiɛ nyɛɛnaandɛnan nɛ, kiri-kurulin ni, Izirayeli a mìilandɛnaa tumaa nɛ ka kɛdɛnan nɛ.

³ Salomɔn woo Gabawɔ̃ a *wúlu bɔ ǹ bǎã nɛ, kun ka zaman kuturu ni, a giala, kɔn yɛ ka Lawa nɛ ǹ mɔnaa kion lɛ n walan, bɛa mɔnaa kion kɛ lɛ Lawa a dí-nyali Muizu goã á zɛnaa diə gole ne.

⁴ Lawa a goo kɛ wɔ paǹ li, Davida saa á bɔ Kiriyati-Yarimu á daa nɛ Zeruzalɛmu. A bǎã mɛn zɛnaa mɔnaa kion lɛa á da bɛ nɛ.

⁵ Uuri a nɛ Besaaleli ke, Uuru a nɔ̀ɔn lɛa, bɛ goã á zan wúlu bɔ ǹ bǎã mɛn zɛnaa, Davida bɛ koa kɔn yɛ ka Lawa nɛ ǹ mɔnaa kion kɛ yɔrɔ-a. Salomɔn laanka zaman lɛ tumaa n giɛ Lawa li walan.

⁶ Wúlu bɔ ǹ bǎã mɛn bɛ zan lɛa, Salomɔn woo walan Dɛnaa Lawa yɔrɔ-a, kɔn yɛ ka Lawa nɛ ǹ mɔnaa kion lɛ yɔrɔ-a, á tɔɔ duu goon kɔ *wúlu màn lɛa.

⁷ Tèlò-n, Lawa nə n din nyaa Salomɔn nɛ á pɛ nɛ: «N bɛ́ màn mɛn li, a nyankɔ ma la, ma á re koe n la.»

⁸ Salomɔn ná a lɛ si á pɛ: «Ń bǐɛ̃ zɛnaa ma di Davida nɛ á la yii ni, ń ma baa kii lɛa a kio.

⁹ Kanna kəni Dɛnaa Lawa, n lɛ kɔ maa díi Davida la ka sii mɛn nɛ, bɛ zɛnaa. A giala n din nə n ma koa kii lɛa zaman kɛ mìi la gigiã ka tán a nyɔɔsɔ̃ bɛ́ lɔn.

¹⁰ Ma nə n nyankoe, sii-doɛ̃ laanka doɛ̃ kɔ ma la, màn mɛn bɛ toɛ ma boo la ma zaman kɛ nyɛɛnaan bɔ. Bɛ̀ bɛ́ bie wa, die n boe la a n zaman kɛ nyɛɛnaan bɔ, bɛa zaman gole ke?»

¹¹ Lawa Salomɔn lɛ si kɛnɛn: «N nɔ̀n da ka gɔn màn gigiã laanka gugurubaa-n wa. N nɔ̀n da ka n zɔ́ɔn gɛ̀-n wa, n nɔ̀n da ka nyin sasa-n wa. Sɛnɛ ma nə́ n nɔ̀n da ka sii-doɛ̃ nɛ ka doɛ̃ nɛ màn mɛn bɛ toɛ, man koa kii lɛa maa zaman mɛn lɛ mìi la, n boo la n na a nyɛɛnaan bɔ. Bɛ lɛ bɛ nɛ n tá giɛ li,

¹² n tá re bɛa sii-doɛ̃ ka bɛa doɛ̃ lɛ yii. Ma á re gɔn màn dadaran koe n la ka gugurubaa gigiã nɛ ma da la. N tá re yii a la kii kɔsɔn kɛn tumaa nɛ. Ǹ mɛnɛn nə goã n nyɛɛnɛ ka ǹ mɛnɛn bɛ́ re die n kio.»

¹³ Salomɔn tɔn kiɛ̃ á n bɔ Gabawɔ̃ a wúlu bɔ ǹ bǎã kɛ nɛ, kɔn yɛ ka Lawa nɛ ǹ mɔnaa kion kɛ nɛ. Á wusoo á daa Zeruzalɛmu, á giã Izirayeli kuturu mìi la.

Salomɔn pàã ka a gɔn mànan

¹⁴ Salomɔn ziabaa ǹ wotoro laanka sùi da baa-a wolen sɔkɔn. A ziabaa ǹ wotoro n duugoonbiɛsii (1 400) ka sùi da baa-a wole duu fulupaa nɛ (12 000). Á ǹ tɛnɛn koa a din li Zeruzalɛmu. Ǹ kiwin mɛnɛn yɔrɔ bɔ ziabaa ǹ wotoron lɛn koa taman yii, á lɛkunun dia walan.

¹⁵ Kii lɛ pàã nɛ, wɔrɔ laanka sana mɔnaa Zeruzalɛmu ka kɔlɔ bɛ lɔn, *sɛdrə da mɔnaa ka *Sefelaa a nyankɔrɔ lɛ kɛa sikomɔɔrɔ dan bɛ́ lɔn.

¹⁶ Sùin mɛnɛn nə goã Salomɔn lon maǹ nə́ goã boe ǹ ne Ezipti ka Kue gána nɛ. A pii-kɔlen man nə́ goã ǹ pii walan.

¹⁷ Ziabaa ǹ wotoro goon a bɔ Ezipti a daa n kɔnpii wɔrɔ we biɛsɔrɔ (600) nɛ, sui goon wɔ n kɔnpii wɔrɔ we paabiɛ ka posooro (150) ne. Bɛa pii-kɔlin lɛn tá die-n dɔn Ɛti tɔrɔn kɛn kiin wɔ lɛa ka Siirii gána-n kiin ni.

Salomɔn nə Dɛnaa Lawa a kion dɔ yɔrɔ boe

¹⁸ Salomɔn pɛ mà ǹ Lawa a kion dɔ Lawa tɔ bɔ ǹ wɔ lɛa ka kii kion ne asɛ din wɔ lɛa.