KZS1 22 - LAWA A BOO SONBORE

¹ Davida tɔ́n pɛ: «Dɛnaa Lawa a kion nə ke kánaa. Izirayeli a *wúlu bɔ ǹ bǎã n ka kɛ nɛ, *wúlu màn tã ǹ wɔ lɛa.»

Davida n Lawa a kion dɔ yɔrɔ boe

² Gùli mɛn tumaa bɛ giã-n Izirayeli gána nɛ, Davida lɛdia mà ǹ nə ǹ tumaa sɔkɔn. Á minin bɔ ǹ bii kɔlɔ-bɔlin lɛa mà ǹ kɔlɔ toopaa bɔ Lawa a kion dɔ ǹ wɔ lɛa.

³ Davida fɔlɔ gigiã yɔrɔ bɔ, màn mɛn bɛ́ toɛ ǹ nə ǹ zɛnaa kiɛnlɛ-a ǹ goon kiɛn lɛa ka koɛ̃ɛnɛn nɛ, zan gigiã nɛ, ǹ nə́ ǹ ba boe la ǹ tá zoɛ̃ wa,

⁴ ka *sɛdrə gɔn nɛ, lɛ ná a ba la wa, a giala Sidɔn minin laanka Tiiri minin man nə́ goã, ǹ nə́ daa ka bɛa sɛdrə gɔn lɛ nɛ mɔnaa nɛ.

⁵ Davida na á goã pii: «Maa nɛgiĩ Salomɔn lɛ á tɔn nɛ ten lɛa, a tɔn sii dɔ̃ wa. Dɛnaa a kion ke die n doe, a tɔ doamaa nɛ a bɔ gána tumaa nɛ a golebaa laanka a siĩnbaa taman yii. Man die a mànan yɔrɔ boe ma ǹ koa nɛ.» Bɛ lɛ nɛ, Davida laan bɛ̀ a n giɛ̃, á sii gigiã yɔrɔ bɔ.

⁶ A ná a nɛ Salomɔn bíi á pɛ nɛ mà a kion dɔ Dɛnaa Lawa, Izirayeli a Lawa wɔ lɛa.

⁷ Davida kɛ pɛ Salomɔn nɛ: – A na á goã ma dinmaa foo ne máa ma Dɛnaa Lawa, maa Lawa tɔ kion dɔ.

⁸ Sɛnɛ, Dɛnaa boo da ma nɛ á pɛ: «Ń mà gigiã kaa, ń zia dadaran baa. N ba re masɛ tɔ kion doe wa, a giala ń mà gigiã kaa tán la ma yɔrɔ-a.

⁹ Á ke, nɛgiĩ á re yii n la, bɛ lɛ n die goɛ̃ là nyantoro min lɛa. Ma á re là nyantoro diɛ a bii ka zɔ́ɔn mɛnɛn tumaa bɛ́ a lɛnpɛnɛ. A tɔ n die goɛ̃ Salomɔn. Man die là nyantoro ka yii nyɛɛ koe Izirayeli la a yiikoonaabaa tumaa gɔ́ɔ̃ nɛ.

¹⁰ A din ni die ma tɔ kion doe. A n die goɛ̃ maa nɛbaa nɛ, ma dɔ n die goɛ̃ a díibaa nɛ, man die a kiibaa gòã we tán Izirayeli yǎa duduu.»

¹¹ Kanna kəni, Dɛnaa Lawa giã n li maa nɛ, n boo la n Dɛnaa, n Lawa kion kɛ dɔ ka bǐɛ̃ nɛ, ka a din ni ke á pɛ n wɔ paǹ li lɔn.

¹² Lawa nə n yiri fulu, a sii-doɛ̃ kɔ n la, màn mɛn bɛ toɛ n kɔ Dɛnaa Lawa a dí-pɛn kɛn lɛ, bɛ̀ á n koa Izirayeli mìi la á pàã kɔ n la.

¹³ N wɔ á re bǐɛ̃ koe bɛ̀ n kɔ dí-pɛn kɛn lɛ ka landa boon kɛn nɛ Dɛnaa nə́ n kɔ Muizu la Izirayeli wɔ lɛa. Toa n goã kaka n foo tã, nyɛ́ɛ nyan nə n kũ wa, n nyan nə n foo ziziɛ̃ wa.

¹⁴ Dɛnaa Lawa a kion lɛ wɔ paǹ li, má n doa má sana tɔnɔ duu sɔɔ (3 000) sɔkɔn ka wɔrɔ nɛ á la tɔnɔ duu pɔsɔɔ (30 000) nɛ. Má zan da kɔn la ka fɔlɔ nɛ-a ná a ba boe la a tá n zoɛ̃ wa. Má gɔn dɔ yɔrɔ bɔ ka kɔlɔ nɛ. Ń tá re boe la n màn da li doo.

¹⁵ N tá re dí-nyali gigiã yii ǹ nə n dɔ n lɛ, kɔlɔ-bɔlin ni, kion-dɔlen ne, ka gɔn sɛlɛlin ni, ka dí doɛ̃-wɔle dadara kɔsɔn nɛ, ǹ nə́ dí tumaa nyɛɛ doɛ̃,

¹⁶ Sana nɛ, wɔrɔ nɛ, zan nɛ ka fɔlɔ nɛ dan ná a ba la wa. Yoo n dí nya, Dɛnaa Lawa giã n li!

¹⁷ Davida pɛ Izirayeli a kiãn tumaa nɛ mà ǹ da n dɔ a nɛgiĩ Salomɔn lɛ:

¹⁸ «Dɛnaa Lawa, kaa Lawa bie kũ ka ka nɛ wa? A na á là nyantoro kɔ ka la paǹ tumaa li. Á bɛa gána lɛ a giãman wole kɛn wɔ ma gɔn. Pelo maǹ Dɛnaa Lawa a pàã giulun ka a zaman wɔ nɛ.

¹⁹ Kanna kəni, ka ga Dɛnaa Lawa, kaa Lawa li, ka ka foo laanka ka pàã tumaa nɛ. Ka yoo ka Dɛnaa Lawa a kion lɛ dɔ ń giɛ ǹ tá woe ka Dɛnaa Lawa a *lɛ kɔ kɔn la ǹ goo laanka wúlu bɔ ǹ mànan kɛn nɛ Lawa wɔ lɛa, kion kɛ nɛ ǹ nə́ dɔ Dɛnaa Lawa tɔ la.»