KZS1 21 - LAWA A BOO SONBORE

Davida n Izirayeli a zaman nimii

¹ Bɛ kio, *Sɛtaan yoo Izirayeli gialaa, á Davida zulu á da minin nimii ganaa.

² Davida pɛ Zoabu ni ka zaman nyɛɛnaandɛnan nɛ: «Ka wo Izirayeli minin nimi, a kũ Bɛɛr-Sebaa ganaa a wo Dan yaa, ka da a binyəə kɔ ma la ma boo la ma ǹ lɛ dɔ̃.»

³ Zoabu tɔ́n pɛ nɛ: «Dɛnaa Lawa die a na a zaman lɛ mɔnaa gunyin paabiɛ. Dɛnaa maa kii, ǹ tumaa bie n din wɔ lɛa ǹ nə́ dí nyɛɛ ǹ nɛ wa ya? A n siɛ lɔn n tá zoɛ̃ bɛ li. Wàa na á baa n tá siɛ̃ diɛ Izirayeli mìi ni.»

⁴ Sɛnɛ kii a boo lɛ pàã baa Zoabu ganaa. Zoabu zii saa, á kɔ Izirayeli tumaa lɛ-á tɔ́n wusoo á daa Zeruzalɛmu.

⁵ Zoabu daa zaman nimii lɛ a minbuiin lɛ pɛ Davida nɛ. Izirayeli tumaa na á goã giĩ pùru goon ka duu paabiɛ (1 100 000) ǹ tumaa n boe la ǹ gɔya wɛ̃ ǹ wo zia baa. Zudaa dɔ n giĩ duu biɛsiipɔsɔbaa (470 000) ǹ mɛnɛn bɛ́ boe la ǹ gɔya wɛ̃ ǹ wo zia baa.

⁶ Ǹ *Levii tɔrɔn laanka Bɛnzamɛn tɔrɔn nimi kunun ǹ ni wa a giala kii a boo lɛ kɔɔ̃n kɔ Zoabu ganaa duduu wa.

Dɛnaa Lawa n piɛ̃ busu diɛ Izirayeli

⁷ Bɛ́ sii bɔnɛɛ baa Lawa yii li, á dɔlɔ bɔ Izirayeli ganaa.

⁸ Davida tɔ́n pɛ Lawa nɛ: «Sii baraa gole n ke ma zɛnaa. Kanna kəni biɛ̃kɔ n kiɛ̃ ń dí-nyali a siɛ̃ la, a giala maa zɛnaa ǹ sii n ka gàãnaa wɔ bɛ́ lɔn.»

⁹ Dɛnaa Lawa boo da Davida a yiri kɔmala wole Gaadi ni, á pɛ nɛ:

¹⁰ – Wo pɛ Davida ni mà Dɛnaa mà kɛnɛn: «Man sii sɔɔ nyɛɛ n nɛ. Goon bɔ, ma bɛ da n mìi ni.»

¹¹ Gaadi woo Davida li, á pɛ nɛ mà Dɛnaa Lawa n kɛ pii: «N din nə n yii dùũ bɔ:

¹² Lɛ̀ sɔɔ boó hinlaa zɔ́ɔn nə da kɔ n lɛ ka zia nɛ muĩ sɔɔ; ǹ tá re boe n la, ǹ tá re n zia nɛ gigiã dii, hinlaa Lawa a gɔya sa ka piɛ̃ busu n die we gána lɛ nɛ lɛawaa sɔɔ. Lona di à dí-a wole á re basaã koe Izirayeli gána lɛ paǹ tumaa nɛ. Kanna kəni, min mɛn ma dia, n din ga n boo binyəə kɔ ma la ma wo pɛ nɛ.»

¹³ Davida pɛ Gaadi ni: «Foo ziziɛ̃ gole n ma ganaa. Bɛ̀ má goã Dɛnaa Lawa din gɔn gɔrɔ, bɛ ásoɛ ma ganaa, a giala a makara doɛ̃ á gole parsiini, sɛnɛ ma nyan goã minbuiin nɛ gɔn wa!»

¹⁴ Dɛnaa Lawa tɔ́n piɛ̃ busu dia Izirayeli, á Izirayeli min duu pɔsɔba (70 000) dɛ.

¹⁵ Lawa lon a dia dí-a wole goon dia Zeruzalɛmu yui. A bɛ́ a gialaa yui ǹ mɛn waáraa, Dɛnaa Lawa ga, koe kɛ ná a foo ziziɛ̃ á la yii ni, á pɛ lon a dia dia wole Zeruzalɛmu-yuli lɛ nɛ: «Á tɛ kɔ! N gɔn susu kanna» A da yaa bɛ̀ Dɛnaa Lawa lon a dia dí-a wole lɛ-n golee ne Ornan a *belee duwəə ǹ bǎã li, ke Zebuzu tɔrɔn lɛa.

¹⁶ Davida nə́ n yii saa lon, á Dɛnaa Lawa a lon a dia dí-a wole lɛ yɛ golee ne lon laanka tán bii ni, a gɔya sa kooromaa nɛ a gɔn, á bɔyaa á dia Zeruzalɛmu la. Davida laanka min golen nə́ tɔ́n kaa tán ǹ lɛ la, boro n koe ne ǹ lɛ.

¹⁷ Davida pɛ Lawa nɛ: «Ma din ni má pɛ máa ǹ zaman lɛ nimi. Má din ni má sii baraa zɛnaa, ma din ni ma baraa zɛnaa. Maa zaman a minin kɛn, bɛn nə sii kɔn zɛnaa baraa wa. Dɛnaa maa Lawa, toa dɔlɔ lɛ goã ma din mìi ni ka maa kion minin ni. Sɛnɛ bǐɛ̃ kɔ n nyan koe kɛ da n zaman mìi-n wa!»

Davida n wúlu bɔ ǹ bǎã doe Lawa wɔ lɛa

¹⁸ Dɛnaa a Lon a dia dí-a wole lɛ pɛ Gaadi ni mà a boo da Davida nɛ mà a wo wúlubɔ ǹ bǎã dɔ Dɛnaa wɔ lɛa, Ornan a belee duwəə ǹ bǎã li, ke Zebuzu tɔrɔ lɛa.

¹⁹ Davida dii, á kɔnpɛ ka boo kɛ nɛ Gaadi pɛ nɛ ka Dɛnaa Lawa tɔ nɛ.

²⁰ Ornan nə́ n bɔyaa á lon a dia dí-a wole lɛ yɛ, a nɛgiĩ sii kɛn ǹ nə́ goã kun ni, bɛn nə n duru. Ornan nə belee duwii.

²¹ Davida daa Ornan li, Ornan ga yǎa á Davida yɛ. Á soo á n bɔ belee duwə ǹ bǎã lɛ nɛ, á kaa tana lɛ la Davida yɔrɔ-a.

²² Davida pɛ Ornan nɛ. «N belee duwəə ǹ bǎã kɛ kɔ ma la ma wúlubɔ ǹ bǎã dɔ a nɛ Dɛnaa Lawa wɔ lɛa. A bɛ́ kɔnboe ka wɔrɔ lɛ mɛn nɛ, a kɔ ma la bɛ ganaa, màn mɛn bɛ́ toɛ koe kɛ nə n lɛ kũ sɔsɔɔ zaman ganaa.»

²³ Ornan pɛ Davida nɛ. «A si n din wɔ lɛa dɛnaa maa kii. Bɛ̀ sii mɛn kɔɔ̃n kɔ n ganaa n bɛ zɛnaa. Á ke, ga, man diin kɛn koe n la, *wúlu màn tiɛ̃ wɔ lɛa, wotoro kɛ nɛ, tɛ koa ǹ gɔn lɛa, belee ne, Lawa gɔ ǹ màn lɛa, man a tumaa koe.»

²⁴ Kii Davida pɛ Ornan nɛ: «Haayii! Man li ma pii a giɔ̀mɔ taãn ganaa ka wɔrɔ nɛ. Ma a re màn sii nsɛ wɔ lɛa ma kɔ Dɛnaa Lawa la, wúlu màn tiɛ̃ lɛa mán ma màn kɔn bɔ a ganaa wa!»

²⁵ Davida tɔ́n sana kilo sɔrɔ kɔ Ornan la bǎã lɛ giɔ̀mɔ lɛa.

²⁶ Davida Dɛnaa Lawa a *wúlu bɔ ǹ bǎã lɛ dɔ á wúlu màn tiɛ̃ laanka zɔ́ɔ da Lawa nɛ ǹ wúlu mànan kɔ. Á Dɛnaa Lawa nyankɔ, Dɛnaa Lawa ná a lɛ si ka tɛ nɛ á bɔ lon á gisĩ wúlu bɔ ǹ bǎã lɛ la.

²⁷ Dɛnaa Lawa tɔ́n pɛ lon a dia dí-a wole ne mà a na a gɔya sa lɛ wɔ a kii ni.

²⁸ Bɛa waáraa Davida bɛ́ á yɛ mà Dɛnaa Lawa ná a lɛ si Zebuzu tɔrɔ Ornan a belee duwəə ǹ bǎã kɛ nɛ, a n wúlu màn koe walan papaa.

²⁹ Bɛa biikoo li, Muizu Dɛnaa Lawa a mɔnaa kion mɛn zɛnaa diə gole ne ka wúlu bɔ ǹ bǎã kɛ nɛ, bɛ̀ bɛn tá Gabawɔ̃ a wúlu bɔ ǹ bǎã kɛ nɛ.

³⁰ Sɛnɛ, Davida á boe la á woe Lawa yɔrɔ-a walan wa, a giala Dɛnaa a lon a dia dí-a wole a gɔya sa lɛ na á nyɛ́ɛ gole da a ganaa.