KZS1 19 - LAWA A BOO SONBORE

Sìi mɛn nə n da Davida a dí-nyalin ganaa

¹ Bɛ kio Amɔn minin kii Nakasi gã. A nɛ ná a bǎã saa, kii lɛa.

² Davida tɔn pɛ: «Man die Nakasi a nɛgiĩ Anuuni kɛ kuĩ ka minbuiinbaa nɛ, a giala ǹ di ma kũ ka minbuiinbaa nɛ.» Davida minin dia ǹ nə́ woo ǹ dí a gɛ̀ fòo da nɛ. Davida a dia dí-a wolen lɛn nə́ woo Amɔn tɔrɔn gána nɛ Anuuni li, ǹ nə́ woo ǹ di a gɛ̀ fòo da nɛ.

³ Sɛnɛ Amɔn minin kiãn nə pɛ Anuuni ni: «Ma n taasɛ ma Davida na á da zín kɔ n di kɛ la, ka minin kɛn dia a da n fòo diɛ kɛ nɛ? Ǹ bie ǹ nə́ daa ga gána lɛ a n nə́ die lɔlɛkɔn wa? Durii a ga wolen man ke ǹ nə́ daa n li!»

⁴ Anuuni Davida a dia dí-a wolen lɛn kũ kəni, á ǹ lɛtoro ka kɔɔ̃, á ǹ mɔnaan kuru ǹ binbin ni, ǹ gisin lalan á ǹ kaa.

⁵ Sii mɛn nə n zɛnaa dia dí-a wolen lɛn manɛ, minin nə́ woo a boo da Davida nɛ, á minin dia ǹ nə́ woo n da ǹ lɛ, a giala mà sìi gole na á goã ǹ ganaa. Kii maà ǹ pɛ ǹ nɛ mà ǹ giã Zerikoo yǎa ǹ lɛtoro ka piɛ̃ ǹ tɔn die.

Davida zia mɛn baa Amɔn tɔrɔn laanka Aaramu minin ganaa

⁶ Amɔn tɔrɔn lɛn nə́ dɔ̃ mà ǹsɛn nə́ n tìĩ bɔ Davida nyin ni. Bɛ lɛ nɛ, Anuuni laanka Amɔn nɛn nə́ wɔrɔ we duu goon (1 000) bɔ ǹ nə́ dia Aaramu minin la, kɛn tà màn paa lɛa, ka Aaramu minin mɛnɛn bɛ́ Maakaa ka Kava, màn mɛn bɛ́ toɛ ǹ ziabaa ǹ wotoron laanka sùi da baa-a wolen dia ǹ la.

⁷ Ǹ nə́ ziabaa ǹ wotoro duu pɔsɔɔwenpaa (32 000) yɛ, ka Maakaa ǹ kii laanka a zaman nɛ, ǹ nə́ daa bɛn doa tàn Madaba yɔrɔ-a, Amɔn tɔrɔn nə́ n sɔkɔn ǹ nə́ soo ǹ kiwin kiɛnlɛ-a zia taman yii.

⁸ Davida bɛ ma, á Zoabu laanka a zia-baalin tumaa dia.

⁹ Amɔn tɔrɔn nə́ soo ǹ nə́ n tele kɔn li ǹ *kiwi a kiɛnlɛ-a. Kii mɛnɛn nə da n dɔ lɛ bɛn manə n gɔrɔn don, paǹ kɔsɔ li.

¹⁰ Zoabu yɛ mà asɛ laanka a zia-baalin lɛn doama nɛ ǹ nə yɔrɔ da nyɛɛnaandɛnan la ka kionaandɛnan nɛ. Á tɔ́n min kakan bɔ Izirayeli minin lɛn bii á n koa nyɛɛnɛ Siiri minin lɛn yɔrɔ-a.

¹¹ Á tɔ́n zia-baalin lɛkunun kɛn kɔ ǹ diɛ̃giĩ Abisayii la, ǹ nə́ sagɔn bɔ ǹ nə́ ndoa Amɔn tɔrɔn yɔrɔ-a.

¹² Á tɔ́n pɛ: «Bɛ̀ Aaramu minin lɛn pàã la ma nɛ, n tá re die maa gu ganaa. Bɛ̀ Amɔn nɛn lɛn pàã la n dɔ nɛ, ma dɔ á re die n dɔ a gu ganaa.

¹³ Toa n goã kaka, wɔ n dinin nyaa kaka, wɔa zaman kɛ a lɛa ka woa Lawa kiwin kɛn nɛ! Sii mɛn bɛ́ siĩn Dɛnaa Lawa yii li, Dɛnaa Lawa din bɛ zɛnaa!»

¹⁴ Zoabu laanka a zia nɛn bɛ́ n zoɛ̃ woe zia biɛ Aaramu minin lɛn ganaa, ǹ nə́ kaa baa nɛ a nyɛɛnɛ.

¹⁵ Amɔn nɛn bɛ́ ǹ nə́ Aaramu minin yɛ baa si lɔn gɔrɔ, ǹ dɔn nə́ kaa baa nɛ Zoabu ǹ diɛ̃giĩ Abisayii nyɛɛnɛ. Ǹ nə́ kaa kiwi lɛ nɛ, Zoabu nə́ n bɔyaa á woo Zeruzalɛmu.

¹⁶ Aaramu minin lɛn nə́ yɛ, mà ǹ nə́ boo ǹsɛn la Izirayeli yɔrɔ-a. Ǹ nə́ dí-pɛlin dia ǹ nə́ woo Aaramu minin kɛn bíi Efrati tà kio, Adadezɛɛrɛ a sɔraasi Sobaki nə ǹ mìi la.

¹⁷ Ǹ ná a boo da Davida nɛ. Á Izirayeli tumaa sɔkɔn, ǹ nə́ Zurdɛ̃ tà kuru, ǹ nə́ dɔ Aaramu minin lɛn li. A ná a sagɔn tele ǹ yɔrɔ-a, ǹ nə́ yoo ka zia baa nɛ.

¹⁸ Aaramu minin lɛn nə́ baa si Izirayeli nyɛɛnɛ. Davida Aaramu minin zia wotoro dabaa wole duu sɔbaa (7 000) dɛ kɔnlɛ ka zia nɛ duu pusi (40 000) ni, tɔ we ka ǹ gòã nɛ bɛ̀ ǹ wo zia la. Á Sofaki, sɔraasin goledɛnaa kɛ dɔ dɛ.

¹⁹ Adadezɛɛrɛ a dí-nyalin nə́ yɛ mà ǹ nə́ boo ǹsɛn la Izirayeli yɔrɔ-a. Ǹ nə́ ga yii-nyɛɛ li Davida li, ǹ nə́ dí nyɛɛ nɛ. Aaramu minin nə lɛ kɔ doo ǹ nə́ daa Amɔn nɛn gu ganaa wa.