KZS1 18 - LAWA A BOO SONBORE

Davida a gɔ̀lɔ̀baa

¹ Bɛ kio Davida boo Filisiti minin la, á sìi da ǹ ganaa. Á Gaati laanka a lɛkoro lɛ a kiwin si Filisiti minin la.

² Á boo Moabu minin la, ǹ nə́ n baa a dí-nyalin lɛa, ǹ nə́ boboe we ne.

³ Davida boo Kova n kii Adadezɛɛrɛ la bɛ̀ á ke á woo giã ka pàã nɛ Efrati tà kɛ la.

⁴ Davida ziabaa ǹ wotoro duu goon (1 000) si la, sùi da-baali duu sɔbaa (7 000) nɛ. Zia-baalin mɛnɛn bɛ́ tɔ woe ǹ goã nɛ, á bɛa duu fuə (20 000) kũ. Davida ziabaa ǹ wotoro sùin lɛn paabiɛ (100) koa a din wɔ lɛa, á gialakun kɛ tumaa pere kukuru.

⁵ Aaramu minin nə́ bɔ Damaasi ǹ nə́ daa n dɔ Kovan kii Adadezɛɛrɛ lɛ, sɛnɛ Davida min duu fuəwenpaa (22 000) kũ Aaramu minin lɛn bii.

⁶ Á tɔn gánadɛnan koa Damaasi, Aaramu gána nɛ. Aaramu minin lɛn nə́ n baa Davida a dí-nyalin lɛa ǹ nə́ boboe da ǹ mìi ni. Davida bɛ woe zia biɛ bǎã mɛn tumaa nɛ, Dɛnaa Lawa n gɔ̀lɔ̀baa koe la.

⁷ Adadezɛɛrɛ a dí-nyalin bɛ́ sana goóron mɛnɛn guĩ Davida bɛn goa á woo ǹ ne Zeruzalɛmu.

⁸ Adadezɛɛrɛ a kiwi Tibati ke ka Kunu ni, Davida zan gigiã goã ǹ nɛ. Salomɔn baa zan doo kaaraa lɛa ǹ nə́ bíi "yìsi mu", bìbìn ni ka zan tasan nɛ.

⁹ Amaatin kii Tuu ma mà Davida Kova n kii Adadezɛɛrɛ a zia-baalin tumaa kũ.

¹⁰ A ná a nɛgiĩ Hadoramu dia mà a wo fòo da kii Davida nɛ a ná a laakala a giala mà á woo zia baa Adadezɛɛrɛ ganaa á boo la, a giala Adadezɛɛrɛ lɛ n Tuu a zia baa kɔn wole lɛa. Á màn tɔrɔ tumaa kɔ la: Sana lɛa, wɔrɔ nɛ ka zan nɛ.

¹¹ Bɛa mànan kɛn lɛn dɔn, kii Davida nə́ ǹ kɔ Dɛnaa Lawa la kũ ka wɔrɔ laanka sana mɛn bɛ á ǹ si tɔrɔ kɔsɔn la: Edɔmu minin ni, Moabu minin ni, Amɔn tɔrɔn nɛ, Filisiti minin ni ka Amalɛki minin ni.

¹² Seruya a nɛ Abisayii Edɔmu minin dɛ min duu fulukiwisi (18 000) Yìsi Nyankɔrɔ lɛ kɛ nɛ.

¹³ Á gánadɛnan koa Edɔmu gána nɛ. Edɔmu minin lɛn nə́ Davida a dí-nyalin baa. Davida bɛ woe bǎã mɛn din tumaa nɛ Dɛnaa Lawa n gɔ̀lɔ̀baa koe la.

Davida a dí-nyali dadaran

¹⁴ Davida giã Izirayeli minin lɛn tumaa mìi la. A na á goã a zaman lɛ tumaa a sii yɔrɔ boe ka peperebaa nɛ, a bɔ kɔnlɛ we wa.

¹⁵ Seruza a nɛgiĩ Zoabu na á goã sɔraasin mìi la. Ayiluudu a nɛgiĩ Zozafati na á goã sɛ́wɔn-tamaali lɛa.

¹⁶ Ayituvu a nɛgiĩ Sadɔki laanka Abiataara a nɛ Abimelɛki n wúlu-bɔlen lɛa, Sabesaa n sɛ́wɔ-kiɛ̃li lɛa.

¹⁷ Zozadaa a nɛgiĩ Benaya n Kerɛtin laanka Palɛtin mìi la. Sɛnɛ Davida din a nɛnyaanan kɛn man mìilandɛnan lɛa mɔrɛɛ nɛ a ganaa.