KZS1 15 - LAWA A BOO SONBORE

Davida n woe ka lɛ kɔ kɔn la ǹ goo lɛ nɛ Zeruzalɛmu

¹ Davida kionən dɔ "Davida a kiwi" a din wɔn lɛa. Á bǎã bɔ á koa Lawa a goo kɛ wɔ lɛa, á zìã mɔnaa kion dɔ a nɛ.

² Á tɔn pɛ kəni: Bɛ̀ Lawa a goo lɛ tá n guĩ, a n die goɛ̃ *Levii tɔrɔn dininsɔɔ̃nɔn manɛ, a giala mà Dɛnaa Lawa na á ǹ bɔ mà ǹ Dɛnaa Lawa a goo lɛ gũ, ǹ na a dí nya biikoo tumaa li.

³ Bǎã mɛn nə n bɔ á n koa Dɛnaa Lawa a goo lɛ wɔ lɛa, Davida Izirayeli tumaa sɔkɔn Zeruzalɛmu, màn mɛn bɛ́ toɛ ǹ wo goo lɛ-n walan.

⁴ Á Aarɔn a nɛgiĩn sɔkɔn ka Levii tɔrɔn nɛ.

⁵ Keyati wɔn: Kiã Uriyeli ka ǹ dɔɔ̃nɔn nɛ, min paabiɛ ka fuə (120).

⁶ Merari a nɛgiĩn wɔ: Kiã Asayia ka ǹ dɔɔ̃nɔn nɛ, min biɛpaa ka fuə (220).

⁷ Gɛrsɔn a nɛgiĩn wɔ: Kiã Yoɛli ka ǹ dɔɔ̃nɔn nɛ, min paabiɛ ka Pɔsɔɔ (130).

⁸ Elisafana a nɛgiĩn wɔ: Kiã Semayia ka ǹ dɔɔ̃nɔn nɛ, min biɛpaa (200).

⁹ Ebrɔn a nɛgiĩn wɔ: Kiã Eliyeli ka ǹ dɔɔ̃nɔn nɛ, min pɔkiwisi (80).

¹⁰ Uziili a nɛngiĩn wɔ: Kiã Aminaadaabuu ka ǹ dɔɔ̃nɔn nɛ, min paabiɛ ka fulupaa (112).

¹¹ Davida lɛ dia Lawa a wúlu-bɔle Sadɔki laanka Abiataara la ka Levii tɔrɔn kɛn nɛ: Uriyeli, Asayia, Yoɛli, Semayia, Eliyeli ka Aminaadaabuu ni.

¹² Á pɛ ǹ nɛ: Ka n Levii Tɔrɔn lɛn sɔmɔ minin kiãn lɛa, ka ka dinin yoreen kɔ, ka ka dɔɔ̃nɔn nɛ. Ma bǎã mɛn bɔ má koa Dɛnaa Lawa, Izirayeli a Lawa a goo kɛ wɔ lɛa, ka saa ka wo-n walan.

¹³ A giala, bibinaa nɛ, bɛ̀ ka banban, Dɛnaa Lawa wɔ dɛ, a giala mà wɔ kɔ a dí-pɛn lɛ wa.

¹⁴ Lawa a wúlu-bɔlen ne ka Levii tɔrɔn nə́ tɔ́n nə n dinin yoreen kɔ, ǹ nə́ tɔ́n Dɛnaa Lawa, Izirayeli a Lawa a goo lɛ saa ǹ nə́ dii ni.

¹⁵ Levii tɔrɔn lɛn nə́ Lawa a goo lɛ gũ ǹ kɔrɔn bàbàlan ganaa, ka Muizu pɛ lɔn Dɛnaa Lawa a da ǹ boo lɛa.

LOE-lɔlin

¹⁶ Davida pɛ Levii tɔrɔn kiãn manɛ maǹ nə́ ǹ dɔɔ̃n loe-lɔlin kɛn kaa ǹ dí lɛ la, ka tùtun ni, kɔnkoɛ̃ɛn nɛ ka gɔn pere dɛ ǹ mànan nɛ, ǹ nə́ n pàã bɔ li a wuu bɔ taãn-taãnɛ, a n nyɛnyɛɛ giala pii.

¹⁷ Levii tɔrɔn lɛn nə min mɛnɛn kaa ǹ dí lɛ la: Zowɛli a nɛgiĩ Heman nɛ ka n dɔɔ̃n Berekia a nɛgiĩ Asaafu ni, Kuukayia a nɛgiĩ Etan nɛ ǹ dɔɔ̃nɔn Merari tɔrɔn bii,

¹⁸ ǹ bɛ́ ǹ dɔɔ̃nɔn mɛnɛn kɔsɔn mìi la, tii ni ǹ ganaa bɛn man ka kɛn nɛ: Zakarii, Bɛn, Yaziyeli, Semiramɔti, Yeyieli, Uni, Eliabu, Benaya, Maseya, Matitia, Elifilehu, ka Mikineya nɛ, Obɛdi-Edɔmu ka Yeyieli ni, kiɛnlɛn-lɛduə᷉lin lɛa.

¹⁹ LOE-lɔlin lɛn bii, zan gɔn pere dɛ ǹ mànan man Heman, Asaafu ka Etan gɔn ǹ nə́ dii.

²⁰ Zakarii ni, Aziyeli ni, Semiramɔti ni, Yeyieli ni, Uni ni, Eliabu ni, Maseya nɛ, ka Benaya nɛ, tùtu lɛ-bɔlen man bɛn gɔn.

²¹ Matitia nɛ, Elifilehu ni, Mikeneya nɛ, Obɛdi-Edɔmu ni, Yeyieli ka Azaazia nɛ, bɛn man loe nyɛɛnaan boe tùtu nə́ ǹ gɔn.

²² Guĩ yɔrɔ-bɔle na á goã ka Kenaniya nɛ, Levii tɔrɔn kiã lɛa, a giala mà á ta a yɔrɔ doɛ̃.

²³ Berekia ka Elikana man nə́ goã kiɛnlɛn lɛduəlin lɛa goo lɛ li.

²⁴ Lawa a wúlu-bɔlen Sebaniya, Zozafa, Netaneyeli, Amasayi, Zakarii, Benaya ka Eliezɛɛrɛ, bɛn man bɛn pii Lawa a goo lɛ yɔrɔ-a. Obɛdi-Edɔmu ka Yehiya man nə́ goã kiɛnlɛn lɛduəlin lɛa goo lɛ li.

Lɛ kɔ kɔn la ǹ goo lɛ a dɔ Zeruzalɛmu

²⁵ Foo kɔɔ̃nbaa gɔ́ɔ̃ nɛ, Davida nɛ, Izirayeli a min golen ne, ka sɔraasin goledɛnaan nɛ, ǹ nə́ woo Dɛnaa Lawa a *lɛ kɔ kɔn la ǹ goo lɛ saa yǎa Obɛdi-Edɔmu a piɛ.

²⁶ Lawa na á n dɔ *Levii tɔrɔn lɛ, ǹ nə́ Dɛnaa Lawa a lɛ kɔ kɔn la ǹ goo lɛ gũ. Ǹ nə́ dii gɔ̀lɔ̀ sɔbaa ka sère gɔ̀lɔ̀ sɔbaa dɛ *wúlu màn lɛa.

²⁷ Davida tuntun mɔnaa gole wɔ kɔnlɛ ka Levii tɔrɔn mɛnɛn bɛ́ goo lɛ guĩ, loe-lɔlin ni ka Kenaniya guĩ-gũlin goledɛnaa kɛ dɔ nɛ. Davida Lawa a wúlu-bɔlen mɔnaa yii nɔnɔɔ wɔ doo.

²⁸ Izirayeli din tumaa n woe ka Dɛnaa Lawa a lɛ kɔ kɔn la ǹ goo lɛ nɛ, gɔn dɛ wuu li, bɛnɛn wuu ni, gɔn pere dɛ ǹ mànan nɛ tùtun ni, kɔnkoɛ̃ɛnɛn nɛ.

²⁹ Dɛnaa Lawa a lɛ kɔ kɔn la ǹ goo lɛ bɛ́ á dɔ "Davida a kiwi", Sooli a nɛlɔ Mikaali nə n yii kɔ fenɛtərə ni, a yii kii Davida yɛ parɛ a n bɛ biɛ, a tìĩ bɔ a nyin ni ka a foo tumaa nɛ.