KZS1 14 - LAWA A BOO SONBORE

Davida a tá Zeruzalɛmu

¹ Tiiri gána a kii Iramu dí-pɛlen dia Davida li, ka *sɛdrə gɔn nɛ kɔnlɛ ka kion-dɔlen laanka gɔn dí-nyalin ni, màn mɛn bɛ́ toɛ ǹ kii kion dɔ ǹ kɔ Davida lɛ la.

² Davida dɔ̃ kəni, mà Dɛnaa Lawa din na á ná asɛ koa Izirayeli gána a kii lɛa, mà asɛ a kiibaa lɛ n pàã yii woe nyɛɛnɛ, Lawa a zaman Izirayeli minin lɛn taman yii.

³ Davida wusoo á lɔn kɔsɔn goa Zeruzalɛmu kiwi, á nɛgiĩn laanka nɛlɔn yɛ doo.

⁴ A nɛgiĩn mɛnɛn yɛ Zeruzalɛmu, bɛn tɔn man ka kɛn nɛ: Samuwa nɛ, Sobabu ni, Natan nɛ, Salomɔn nɛ,

⁵ Ibara nɛ, Elisuwa nɛ, Elpelɛti ni,

⁶ Noga nɛ, Nefɛgi ni, Yafiya nɛ,

⁷ Elisama nɛ, Beyeliyada nɛ, ka Elifelɛti ni.

Davida boo Filisiti minin la

⁸ Filisiti minin ná a boo ma mà ǹ nə́ nyɔɔ lɔ Davida ganaa ǹ nə́ koa kii lɛa Izirayeli gána kuturu mìi la. Filisiti minin lɛn tumaa tɔ́n yoo ǹ nə́ woo ga Davida li. Davida ná a boo ma, á soo ǹ yɔrɔ-a.

⁹ Filisiti minin lɛn nə́ daa ǹ nə́ dɔ, ǹ nə́ Refrayimu tɔrɔn nyankɔrɔ lɛ kɛ si ǹ nə́ n kɔ lɛ.

¹⁰ Davida nɔ̀n da Lawa la kɛnɛn: «Ma doamaa nɛ, ma wo Filisitin lɛn gialaa? N tá re ǹ we ma gɔn?» Dɛnaa Lawa ná a lɛ si: «Wo ǹ gialaa, ma á re ǹ we n gɔn.»

¹¹ Filisiti minin lɛn nə́ woo Baali-Perasimu, bɛa bǎã lɛ-n walan, Davida boo ǹ laa. Bɛ kio, Davida pɛ: «Lawa toa ma gɔn nə́ bǎã bɔ maa zɔ̀ɔn bii ka mu a bǎã-toɛ̃ a soo ǹ bǎã bɛ́ lɔn.» Bɛ lɛ n ke ǹ nə́ bɛa bǎã lɛ bíi mà Baali-Perasimu, bɛ giala mà «bǎã-bɔlin kiã.»

¹² Bɛa bǎã kɛ lɛ nɛ, Filisiti minin lɛn nə́ ǹ dìn kaa. Davida pɛ mà ǹ nə ǹ goa ǹ nə ǹ tã.

¹³ Filisitin lɛn nə wusoo ǹ nə́ daa ka a paabaa ǹ wɔ nɛ, Refrayimu nyankɔrɔ lɛ kɛ nɛ.

¹⁴ Davida tɔn wusoo doo á nɔ̀n da Lawa la, Lawa ná a lɛ si kɛnɛn: «N baran ǹ kio loo wa, wo n pɛnɛ sɔsɔɔ ǹ ganaa, n tá re dirii ǹ la dan kɛn yɔrɔ-a.

¹⁵ Bɛ̀ ń bìn diɛ ma dan lɛn mìi ni ǹ mɛn waáraa ka gòã wuu n boe, soo bɛa waáraa kəni n nə ǹ zia baa, a giala masɛ Lawa á re soe n nyɛɛnɛ ma Filisiti minin zia nɛn lɛn dɛ.»

¹⁶ Davida zɛnaa ka Lawa bɛ́ á pɛ-n lɔn, ǹ nə́ boo Filisitin zia nɛn lɛn la, a saa Gabawɔ̃ a da Gezɛɛrɛ yaa.

¹⁷ Davida tɔ nə́ n daa gána din tumaa la, Dɛnaa zɛnaa gána tumaa nyɛ́ɛ baa Davida nɛ.