KZS1 13 - LAWA A BOO SONBORE

Davida n zoɛ̃ li a da ka lɛ kɔ kɔn la ǹ goo lɛ nɛ Zeruzalɛmu

¹ Davida kɔn yɛ ka sɔraasi duu goon (1 000) mìilandɛnan laanka sɔraasi paabiɛ mìilandɛnan nɛ, kɔnlɛ ka min yii guguru-a gialakunun kɛn nɛ.

² Bɛ kio, Izirayeli minin lɛn tumaa bɛ́ soe-n kɔn, Davida pɛ ǹ nɛ: «Bɛ̀ ka ga a ganaa sii sonbore lɛa, bɛ̀ wɔa Lawa, Dɛnaa Lawa dɔ lɛ kɔ a ganaa, wɔ dɔɔ̃nɔn mɛnɛn nə goã Izirayeli gána paǹ yii ni, ka daa wɔ n nanaa, wɔ minin dia ǹ wo boo da bɛn nɛ. Ǹ boo da ka Lawa a wúlu-bolen dɔn laanka *Levii tɔrɔn kɛn nɛ giã-n kiwi dadaran laanka lɛkoro lɛ-a bǎãn nɛ. Wɔ n die lɛ diɛ wɔ dɔɔ̃nɔn lɛn la ǹ da n kaa kun ka wɔ nɛ.

³ Wɔ n die wusii wɔ da ka wɔa Lawa a goo lɛ-n wɔ li, a giala, Sayulu a biikoo li, wɔ *lɛ kɔ kɔn la ǹ goo lɛ saa wa.»

⁴ Zaman tumaa lɛ kɔ sii lɛ a zɛnaa miɛ̃ ganaa, a giala sii lɛ goã taãn lɛa zaman lɛ tumaa yɔrɔ-a.

⁵ Davida tɔ́n Izirayeli minin tumaa sɔkɔn, a saa Ezipti a lɛ̀giala gɔn la tà kɛ ganaa yǎa Lebo-Amaati, gɔsɛ a lɛ̀gɔn la, màn mɛn bɛ́ toɛ ǹ wo Lawa a goo lɛ saa Kiriati-Yarimu ǹ da nɛ.

⁶ Davida woo kun ka Izirayeli zaman lɛ tumaa nɛ Baala, Kiriati-Yarimu kiwi kɛ nɛ, Zudaa gána nɛ, màn mɛn bɛ́ toɛ ǹ Lawa a goo lɛ saa walan ǹ da nɛ, Dɛnaa Lawa mɛn bɛ́ lon màn yiikoonaa nyínin lɛn biin ni, bɛa goo kɛ lɛ a tɔ ń la.

⁷ Lawa a goo lɛ na á goã Abinaadaabu a kion. Ǹ nə́ Lawa a goo lɛ saa walan ǹ nə́ da wotoro dii la. Uzaa laanka Ayoo na á goã wotoro lɛ tele diɛ zii la.

⁸ Davida laanka Izirayeli kuturu na á goã bɛ̀ biɛ ka ǹ we tumaa nɛ Lawa yɔrɔ-a, ka loen ne, tùtu tɔrɔ tumaa laanka kɔnkoɛ̃ɛnɛn nɛ, maàn nɛ, gɔn pere dɛ ǹ mànan nɛ, ka bɛnɛn nɛ.

⁹ Ǹ bɛ́ ǹ nə́ dɔ Kiidɔn a bǎã fùlu kɛ nɛ, Uzaa nə́ n gɔn dia mà a n goo lɛ kuĩ, a giala diin lɛn man nə́ baa re boe daɛ.

¹⁰ Dɛnaa Lawa foo yoo kurukuru Uzaa li, á dɔlɔ bɔ a ganaa a giala mà a ná á n gɔn da goo lɛ ganaa. Uzaa gã walan lɛ nɛ, Dɛnaa Lawa yɔrɔ-a.

¹¹ Davida foo busu, a giala Dɛnaa Lawa na á yoo Uzaa gialaa. Haalɛ tɔn pelo, maǹ tɔn bɛa bǎã lɛ bíi mà «yoo Uzaa gialaa ǹ bǎã.»

¹² Bɛa pinaa kɛ lɛ nɛ, Davida nyɛ́ɛ baa Lawa nɛ, á pɛ: «Man siɛ lɔn ma da ka Lawa a goo lɛ nɛ ma din li?»

¹³ Bɛ lɛ nɛ, Davida da ka goo lɛ nɛ a din li "Davida a kiwi" lɛ-n wa. Sɛnɛ, a ná á ǹ dia nɛ Gaati min Obɛdi-Edɔmu kɛa kion.

¹⁴ Lawa a goo lɛ mui sɔɔ zɛnaa Obɛdi-Edɔmu a piɛ, a kion. Dɛnaa Lawa barka da Obɛdi-Edɔmu a sumu ganaa, ka màn mɛn tumaa bɛ́ a wɔ lɛa.