KZS1 10 - LAWA A BOO SONBORE

Davida a pàã Sayulu a gɛ̀

¹ Filisiti minin nə́ yoo ka zia nɛ Izirayeli minin ganaa. Izirayeli minin lɛn nə́ n gòã da baa nɛ ǹ nyɛɛnɛ. Sɛnɛ, Filisiti minin lɛn nə́ ǹ dɛ ǹ nə́ ǹ kaa tán Gilboa kele la.

² Filisiti minin lɛn nə́ Sayulu laanka a nɛgiĩn da ǹ yii ni. Ǹ ná a nɛgiĩn lɛn tumaa dɛ: Zonaatan nɛ, Abinaadaabu ni, ka Malkisuwa nɛ.

³ Zia lɛ a guguru yɔrɔ na á n dia Sayulu la. Min mɛnɛn bɛ́ sa zuĩ, bɛn nə́ Sayulu yɛ, a nyín soo.

⁴ Sayulu tɔ́n pɛ a ziabaa ǹ mànan-gũli ni mà a na a gɔya woɛ̃ a kii ni a na asɛ fɔ̃ nɛ, ń giɛ bɛa Lawa doɛ̃baã wolen kɛn baran da asɛ fɔ̃, ǹ sàn kɔ ka asɛ-n wa. Sɛnɛ a ziabaa ǹ mànan-gũli lɛ nə́ n piã, a giala nyɛ́ɛ goã a ganaa taãn-taãnɛ. Sayulu tɔ́n a din a gɔya saa, á da a din ganaa.

⁵ Sayulu a ziabaa ǹ mànan-gũli lɛ bɛ́ á yɛ mà Sayulu gã, a dɔ ná a gɔya da a din a á gã kɔnlɛ ka Sayulu ni.

⁶ Sayulu gã kɔnlɛ ka a nɛgiĩ sɔɔ kɛ nɛ ka a kion minin tumaa nɛ a din biikoo goon lɛ nɛ.

⁷ Izirayeli minin mɛnɛn nə goã giã-n nyankɔrɔ lɛ kɛ nɛ, bɛn bɛ́ ǹ nə́ yɛ mà Filisiti minin nə́ boo Izirayeli minin la, ǹ nə́ Sayulu laanka a nɛgiĩ sɔɔ dɛ, ǹ nə́ nɔmaa ǹ nə́ baa si ǹ nə́ ǹ kiwin toa walan. Bɛ kio, Filisiti minin lɛn nə́ dɔ, ǹ nə́ giã ǹ kiwin lɛn nɛ.

⁸ Bɛa lɛawaa, min mɛnɛn nə́ gã, Filisiti minin lɛn nə́ daa mà man die bɛn mànan wɛɛ, ǹ nə́ tɔ́n Sayulu laanka a nɛgiĩ sɔɔ lɛ yɛ tán ǹ nə́ gã Gilboa kele la.

⁹ Ǹ nə́ Sayulu a mànan waa ǹ nə́ bɔ a ganaa, ǹ ná a mìi kuru ǹ nə́ woo ne kɔnlɛ ka a ziabaa ǹ mànan nɛ. Ǹ nə́ Filisiti minin gána lɛ a bǎãn tumaa kɔ kɔn ǹ nə́ ǹ gɔ̀lɔ̀baa boo diɛ ǹ dìn manɛ, ka ǹ zaman nɛ.

¹⁰ N ná a ziabaa ǹ mànan lɛn kaa ǹ dì kion, ǹ ná a mìi kɛ dɛrɛ lon, dì Daagɔn kɛ a kion.

¹¹ Filisiti minin lɛn nə sii mɛn tumaa zɛnaa Sayulu ni, bɛ kaa Zaabɛsi kiwi minin tumaa too ne Galaati gána nɛ.

¹² Giĩ mɛnɛn tumaa bɛ́ doa boe bɛn nə́ tɔ́n woo Sawulu laanka a nɛgiĩn lɛn geren goa ǹ nə́ daa ǹ nɛ Zaabɛsi. Ǹ nə́ ǹ wen bĩ tán Zaabɛsi kiwi a Terebɛnti da kɛ giulun. Bɛ kio, ǹ nə́ n lɛ sɔɔ lɛawaa sɔbaa

^13-14 Sayulu lɛ na á gã, a giala a na á bɔlɔgoonbaãdɛnaa baa Dɛnaa Lawa wɔ paǹ li. A na a kɔ Dɛnaa Lawa a dí-pɛn lɛ ka a yɔrɔ-n wa. Á goã dinin á kanbaa Lawa la á woo gere nyin bii á nɔ̀n da la. Bɛ lɛ nɛ Dɛnaa Lawa toa á gã, a ná a kiibaa lɛ saa á kɔ Zesee a nɛgiĩ Davida la.