Korɛnti2 5 - LAWA A BOO SONBORE

¹ Sonbore, wɔ á doɛ̃ wáa kion ke wɔ tá a nɛ, wɔ gɔ̀nɔn kɛ nɛ. A n ka mɔnaa kion kooro bɛ́ lɔn, a n die ziziɛ̃. Sɛnɛ, kion kɔsɔ tan wɔa wɔ lɛa Lawa dɔ. A n giã ǹ bǎã lɛa lon yǎa duduu. Min gɔn bie á bɛ zɛnaa wa.

² Wɔ ǹ ginii we kanna, a giala, wɔ ǹ li wɔ wo wɔa Lawa a piɛ kion kɛ nɛ.

³ Bɛ̀ bɛa kion kɛ bie wɔ lon wa, bɛ̀ wɔ gɔ̀nɔn kooro n die goɛ̃.

⁴ Hiĩ, ta wɔ́ belebɔ wɔa kion kɛ-n lɔn, wɔ ǹ ginii we, wɔ ǹ nɔmaa la. A bie ka wɔ n zoɛ̃ li, wɔ n na wɔ n bɔ kɔn ka wɔ gɔ̀nɔn kɛ-n wa, sɛnɛ, wɔ yiri ná a ganaa, wáa wɔ wusoo wɔ Lawa a piɛ gɔ̀nɔn kɛ yɛ, ń giɛ, ǹ mɛn bɛ́ á gã, bɛ wusoo a yiikoonaabaa yɛ.

⁵ Lawa din na á wɔ zɛnaa bɛa bɔyaa miɛ̃ kɛ lɛ taman yii, á Yiri Fu kɔ wɔ la, a biɛ̃ ǹ bǐɛ̃baa ǹ màn bibinaa lɛa.

⁶ Bɛ lɛ nɛ, ma foo a tã lɛawaa tumaa li. Man doɛ̃, máa bɛ̀ ma á tɔn ka ma gɔ̀nɔn kɛ nɛ, ma wɔlɔ n tɔn sɔsɔɔ maa kion kɛ ganaa Dɛnaa li.

⁷ Wɔ ǹ tɔ we ka goleemali barka nɛ, sɛnɛ, yii a yɛ ná a bie wa.

⁸ Má pã ka foo tãbaa nɛ, bɛ̀ man soe man bɔ gɔ̀nɔn kɛ nɛ, ma wo giã Dɛnaa li, bɛ n kɔɔ̃n ma ganaa.

⁹ Sɛnɛ, ta ma tá ma gɔ̀nɔn kɛ nɛ, ta ma ba a-n wa, man giɛ li, máa ma a din foo sii zɛnaa màn tumaa nyɛɛnɛ.

¹⁰ A giala, wɔ tumaa doamaa nɛ, wɔ golee *Krita a kiri kuru ǹ bǎã kɛ yɔrɔ-a. A n die kiri we wɔ ganaa, a didie saraa a kɔnpɛ ka a nyaǹ dí ni kanaa, ta a bǐɛ̃ nɛ, ta a baraa nɛ.

Din kaa-kun ka Lawa-n Krita pàã ganaa boo

¹¹ Ma bɛ́ nyɛ́ɛ baa Dɛnaa-n giala doɛ̃, bɛ lɛ-n ma á n doɛ máa minbuiin tumaa dɔ̃. Lawa á ma doɛ̃ ka peren-peren. Ma á taasɛ máa ka dɔn dinin gɔ́ɔ̃ nɛ, ka á masɛ doɛ̃ miɛ̃ peren-peren.

¹² Ma bie ma dinmaa diɛ nyɛɛn wa, sɛnɛ, man zoɛ̃ máa ka foo goã kɔɔ̃n ka maa sii ni; bɛ̀ á n baa miɛ̃, min mɛnɛn bɛ́ n dinin laakalɛɛ ka kanaa siin ni, ǹ nə́ ǹ ba gɔ́ɔ̃gɔ́ɔ̃ ǹ siin lɛa wa, ka á re bɛn boo-binyəə koe ǹ la doɛ̃.

¹³ Bɛ̀ man mìi webaã sii zɛnɛɛ, bɛ ǹ ma din bii ni ka Lawa nɛ. Sɛnɛ, ma bɛ́ sii mɛn zɛnɛɛ kasɛn nɛ, mìi webaã sii bie wa.

¹⁴ A giala, Krita a minin-narɛɛ la ma nɛ, masɛ mɛn bɛ́ má waa la, máa min goon na á gã min tumaa a lɛa, bɛ n nyɛɛ mà min tumaa na á gã.

¹⁵ A na á gã min tumaa a lɛa, ń giɛ min mɛnɛn yii bɛ́ koo, bɛn baran ǹ yiikoonaabaa zɛnaa ǹ dinin lɛa doo wa, sɛnɛ, min mɛn bɛ́ á gã a yii kaa ǹ lɛa, ǹ zɛnaa bɛa lɛa.

¹⁶ Bɛ lɛ nɛ, ma bie min kɔ́n doɛ̃ doo minbuiinbaa ǹ yɔrɔ kɛ la wa. Haalɛ ta má Krita dɔ̃ minbuiinbaa ǹ yɔrɔ la lɛlɛ, kanna, ma bie doɛ̃ bɛa yɔrɔ kɛ la doo wa.

¹⁷ Bɛ̀ min golee Krita li, ǹ dɛnaa na á màn dii baa: a màn zizibaa nya, á ke, a n màn dii lɛa.

¹⁸ Bɛa sii kɛ tumaa n boe Lawa li, asɛ mɛn bɛ́ á wɔ kaa kun ka a din ni Krita pàã ganaa, á dí kɔ wɔ la, mà wɔ wɔ miãn kɔsɔn dɔn kaa kun ka asɛ nɛ.

¹⁹ A giala, Lawa n min tumaa kiɛ kun ka a din ni Krita pàã ganaa. A ba giɛ minbuiinin sã ǹ siin kɛn ganaa wa. A din na á minin kaa kun ka a din ni ǹ boo kɛ kɔ wɔsɛn la, mà wɔ pɛ.

²⁰ Man boo kɛ diɛ ka nɛ Krita bǎã nɛ, ka n pɛ mà Lawa dinmaa lɛ lɛ n boe ka bíi ka masɛ lɛ nɛ: Man ka gòã kuĩ ka Krita tɔ nɛ, ka lɛ kɔ ka n dinin kaa kun ka Lawa nɛ.

²¹ Sii baraa kɔ́n goã Krita li wa, sɛnɛ, Lawa na á wɔa sii baraan guĩ da a din lɛ mìi ni, ń giɛ, wɔ á min peperen biɛ asɛ din yɔrɔ-a Krita pàã ganaa.