Korɛnti1 16 - LAWA A BOO SONBORE

Dɔmalɛ ǹ màn boo

¹ Ka bɛ́ dɔmalɛ ǹ màn mɛn boboe Zeruzalɛmu a Lawa a sɔmɔ minin lɛa, bɛa boon man ke ma á re diɛ ka nɛ. Má a yɔrɔ nyaa Galaasin Lawa a sɔmɔ minin ni lɔn, ka dɔn nə kɔ lɛ ka zɛnaa miɛ̃ sɔnbɔraanɛ.

² Didie tumaa bɛ́ wɔrɔ mɛn yii, a kɔnpɛ ka a din pàã yii ni, dimaasi gogoon tumaa li, á boe la a bɛ koa a din li, bɛ̀ ma baa die. Ka zɛnaa miɛ̃, màn mɛn bɛ́ toɛ, ka nyan nə n yii da maa daa la ka tɔn bobo wa.

³ Bɛ̀ ma din daa ǹ mɛn waáraa, ka min mɛnɛn bɔ, ma á re bɛn diɛ, ka sɛ́wɔn nɛ ǹ gɔn, ǹ wo kaa dɔmalɛ ǹ màn lɛ koa Zeruzalɛmu.

⁴ Bɛ̀ á kɔnboe ma dinmaa wo kunun ǹ ni, ǹ tá re zii tɔ we kun ka ma nɛ.

Pooli a zii tɔ wɔ yɔrɔ bɔ ǹ gɔn

⁵ Ma á re woe boe ka Masedoanɛ gána nɛ, ma tɔn da ka li. Sonbore, ma á re bɛa gána kɛ wɔsɛ kɔn.

⁶ Kɔntan, ma á re laanpaan yii ka li, kɔntan dinin ma bɔ̀nɔn tumu zɛnaa ka li. Màn mɛn bɛ́ toɛ, ma bɛ́ zoɛ̃ máa ma wo bǎã mɛn tumaa nɛ, ka n dɔ ma lɛ ka bɛa zii tɔ sii ni.

⁷ Ma bie zoɛ̃ li máa ma da bɔ ka li ma kiɛ̃ wa, a tá ma yiri-n máa ma á re biikoo kɔ́n doe ka li, bɛ̀ Dɛnaa lɛ kɔ.

⁸ Sɛnɛ kanna, ma á re goɛ̃ Efɛɛzi kiwi, yǎa *Pantikɔti pinaa doe.

⁹ A giala, a laan maa zɔ́ɔn tá mɔnaa nɛ, bɛa biikoo kɛ lɛ lɛ n koo, maa dí a yɔrɔ yɛ ganaa walan.

¹⁰ Bɛ̀ Timote daa ka li, ka toa ka kũ doɛ̃ taãnɛ, a giala, a n Dɛnaa a dí nyɛɛ ka masɛ dɔ bɛ́ lɔn.

¹¹ Min kɔ́n nyan toa a n yii wɔ la wa. Ka toa ka n dɔ lɛ, a wusoo a da ma li ka là nyantoro ne. A giala, ma nə n yii diɛ la kun ka wɔ dɔɔ̃nɔn nɛ.

¹² Má wɔ dɔɔ̃n Apolɔɔsi nyankɔ taãn-taãnɛ, máa a da bɔ ka li kun ka wɔ dɔɔ̃nɔn lɛn nɛ. Sɛnɛ, a lɛ kɔ daa ganaa sisia wa. Bɛ̀ á biikoo yɛ, á re die boe ka li.

Dí giala-nyɔmɔɔn laanka fòo-diɛn

¹³ Ka n yii dɔraa, ka goã doa-n sɔnbɔraa nɛ goleemali gɔ́ɔ̃ nɛ. Ka toa ka goã min kakan lɛa, ka foo n tã.

¹⁴ Ka sii tumaa zɛnaa ka kɔn-narɛɛ nɛ.

¹⁵ Dí goon nə ke doo, ma dɔɔ̃nɔn lɛn: Ka á doɛ̃ mà Tefanaasi laanka a kion minin man nə́ golee Lawa li bibinaanɛ Grɛki gána nɛ. A kũ bɛ lɛ ganaa, ǹ nə́ n dinin kɔ, ǹ nə́ dí nyɛɛ Lawa a sɔmɔ minin manɛ.

¹⁶ Bɛa min sonboren kɛn miãn laanka min mɛnɛn bɛ́ dí nyɛɛ kunun ǹ ni, ǹ nə́ ǹ nɔmaa gii kɔn, ka n doa ka bɛn lɛ si.

¹⁷ Ma foo á kɔɔ̃nɛ Tefanaasi a lɛa, ka Fortunatusu ni, ka Akayikusu ni, ǹ da ma li kɛ taman yii. Ǹ nə́ ma dɔ̀ɔ̃ pii ka dòo.

¹⁸ A giala, ma foo basã ǹ sii gɔ́ɔ̃ nɛ, ka ǹ bɛ́ ǹ nə́ ka dɔn foo basã lɔn. Bɛa minin kɛn miãn tá kɔnboe ka ǹ tɔ bǐɛ̃ pɛ.

¹⁹ Azii a Lawa a sɔmɔ minin tá fòo diɛ ka nɛ. Akilaasi laanka Prisili ni, ka minin mɛnɛn bɛ́ n soe kɔn Lawa a sɔmɔ lɛa ǹ kion, bɛn dɔn tá fòo diɛ ka nɛ Dɛnaa wɔ gɔ́ɔ̃ nɛ.

²⁰ Wɔ dɔɔ̃nɔn mɛnɛn tumaa bɛ́ kànaa, ǹ tá fòo diɛ ka nɛ. Ka dinin nə tɔrɔbaa ǹ fòo da kɔn nɛ sɔnbɔraa nɛ.

²¹ Ma din Pooli n má boo lɛ a kɛ kiɛ̃ ka ma gɔn nɛ: Ka fòo.

²² Bɛ̀ Dɛnaa a kɔɔ̃n min mɛn ganaa wa, koe bɔ ǹ dɛnaa ganaa! Maranata! – bɛ giala mà «Wɔa Dɛnaa, daa!»

²³ Dɛnaa Yezu a bǐɛ̃ die a goã ka li.

²⁴ Man ka tumaa narɛ Yezu *Krita wɔbaa gɔ́ɔ̃ nɛ.