Korɛnti1 12 - LAWA A BOO SONBORE

Yiri Fu a bǐɛ̃baa ǹ mànan

¹ Yiri Fu a bǐɛ̃baa ǹ mànan wɔ paǹ li, ma dɔɔ̃nɔn lɛn, ma ba li máa ka yii goã tì ǹ sii gɔ́ɔ̃-n wa.

² Ka á doɛ̃ mà ka bɛ́ ká goã min kooron lɛa, ka n ká goã baa sii ka mìi gialaa dì lɛ tere-an ganaa.

³ Bɛ lɛ nɛ, ma á pii ka nɛ foaãnɛ: Min kɔ́n ba boe la a goã Lawa a Yiri Fu pàã giulun, a boo baraa dɔ da Yezu ganaa wa. Min kɔ́n dɔ a boe la a pɛ mà Yezu n Dɛnaa lɛa, bɛ̀ Yiri Fu ná a ba kun ni wa.

⁴ Bǐɛ̃baa ǹ mànan lɛn tá totoro, sɛnɛ, a din Yiri Fu goon nə ǹ koe.

⁵ Nya ǹ dín tá totoro, sɛnɛ, maǹ nə ǹ nyɛɛ Dɛnaa goon ne.

⁶ Dí nya ǹ gɔnɔn tá totoro, sɛnɛ, a din Lawa goon ne pàã koe wɔ tumaa la, wɔ á sii tumaa zɛnɛɛ nɛ.

⁷ Didie n bǐɛ̃baa ǹ màn lɛ yii, boe Yiri Fu ni, min tumaa a bǐɛ̃ kɔ a lɛa.

⁸ Yiri Fu lɛ n boo da ka sii-doɛ̃-n koe min la, a boo da ka màn doɛ̃-n kɔ min kɔsɔ la.

⁹ A din Yiri Fu lɛ n goleemali koe min la, a din dɔ n busu nya ǹ pàã koe min kɔsɔ la.

¹⁰ A n kaãbaa ǹ sii zɛnaa koe min la, a Lawa a boo gii dalibaa kɔ min kɔsɔ la. A n yiri koe min tɛn la, a boo la a yiri baraa bɔkɔnlɛ dɔ̃ ka Lawa a Yiri Fu ni. A n bɔlɔ soree pɛ koe min tɛn dɔ la, a bɔlɔ soree lɛ a bɔyaa doɛ̃ kɔ min kɔsɔ dɔ la.

¹¹ Sɛnɛ, a din Yiri Fu goon kɛ lɛ n bɛ tumaa zɛnɛɛ, a n bɛa bǐɛ̃ kɛ lɛ gii didie ne a din foo dùũ li.

Gù totoron, gɔ̀nɔn goonbaa boo

¹² Taãn nɛ, *Krita n ka gɔ̀nɔn goon bɛ́ lɔn, gù gigiã ná a ganaa. Sɛnɛ, gù lɛ laanka a gigiãbaa nɛ, a n gɔ̀nɔn goon lɛa.

¹³ A giala, *batɛmu na á n da wɔ tumaa ganaa ka Yiri Fu goon ne. Bɛ na á toa wɔ́ tɔ́n gɔ̀nɔn goon baa, ta Zuifu ni, ta Grɛki ni, ta bɛ̀rɛ nɛ, ta tá ma din gɔn wìi a lɛa wole ne. Wɔ tumaa-n wɔ́ wɔa wɔ gii yɛ a din Yiri Fu goon kɛ lɛ nɛ.

¹⁴ Gɔ̀nɔn lɛ lɛ á piɛ̃ ka gù goon ne wa, yǎa gù gigiã.

¹⁵ Bɛ̀ gòã na á pɛ mà asɛ bɛ́ a bie gɔn lɛa wa, mà asɛ a kun ka gɔ̀nɔn nɛ wa, bɛ á toɛ a ná a gɔ̀nɔn lɛa wa? Haayii!

¹⁶ Bɛ̀ too pɛ mà asɛ bɛ́ a bie yii lɛa wa, mà asɛ a kun ka gɔ̀nɔn nɛ wa, bɛ á boe gɔ̀nɔnbaa nɛ? Haayii!

¹⁷ Bɛ̀ gɔ̀nɔn tumaa n yii lɛa, wɔ ǹ die boo miɛ lɔn? Bɛ̀ gɔ̀nɔn tumaa n too lɛa, wɔ ǹ die màn gìĩ miɛ lɔn?

¹⁸ Sɛnɛ, Lawa na á gù gogoon tumaa da gɔ̀nɔn ganaa a din dùũ li.

¹⁹ Bɛ̀ a tumaa a kaa-kun nə gù goon lɛa, gɔ̀nɔn lɛ lɛ-piɛ̃ n goɛ̃ maa?

²⁰ Bɛ lɛ nɛ gù gigiã tan, sɛnɛ, gɔ̀nɔn goon ne.

²¹ Yii á boe la a pɛ gɔn nɛ mà asɛ laadoo ba-a wa? Haayii! Mìi á boe la a pɛ gòãn manɛ mà asɛ laadoo ba ǹ ganaa wa?

²² Ta gù mɛn nə pàã wɛɛnaa lɛa gɔ̀nɔn ganaa, a dɔ là tan.

²³ Wɔ bɛ́ wɔ a zín we gùn mɛnɛn nɛ taãn wa, wɔ n bɛn kuĩ doɛ̃ á la gialakunun kɛn manɛ, ǹ mɛnɛn bɛ́ ǹ boo diɛ a kɔɔ̃n ma, wɔ n bɛn tamaɛ taãn-taãnɛ.

²⁴ Gùn lɛn mɛnɛn boo diɛ bɛ́ kɔɔ̃nɛ, bɛn laadoo ba bɛa tamaa kɛ miã ganaa miɛ̃ wa. Sɛnɛ, Lawa na á gɔ̀nɔn zɛnaa, zín bɛ́ nyaabaa nɛ gùn mɛnɛn ganaa, á zín wɔ bɛn lɛn nɛ.

²⁵ A na á zɛnaa miɛ̃, màn mɛn bɛ́ toɛ, toɛ̃-kɔn baran yɛ gɔ̀nɔn lɛ-n wa, sɛnɛ, gùn lɛn tumaa yiri goã kɔn li.

²⁶ Bɛ̀ gù goon tá nɔmaa nɛ, gù lɛ din tumaa na á nɔmaa lɛ gii kɔn. Bɛ̀ gugurubaa tá gù goon li, gù lɛ din tumaa na a nyɛnyɛɛ gii kɔn.

²⁷ A da yaa ka tumaa n Krita gɔ̀nɔn lɛa, kaa didie dɔ na a gù kɔ́n lɛa.

²⁸ A n miɛ̃, Lawa tɔ́n siin kɛn koa a sɔmɔ-n: bibinaa nɛ, dia dí-a wolen manɛ, a paabaa ǹ wɔ, Lawa a boo gii-dalin manɛ, a sɔɔbaa ǹ wɔ, minin-daraalin manɛ. Bɛ kio, kaãbaa ǹ sii-zɛnaalin manɛ. Bɛ kio doo, busu-nyalin manɛ, ka dɔ minin lɛ wolen ne, ka sii nyɛɛnaan-bɔlen ne, ka bɔlɔ soree pɛlen ne.

²⁹ Wɔ tumaa n Yezu a dia dí-a wolen lɛa? Wɔ tumaa n Lawa a boo gii-dalin lɛa? Wɔ tumaa n minin-daraalin lɛa? Wɔ tumaa n kaãbaa ǹ siin zɛnɛɛ?

³⁰ Busu-nya ǹ pàã tá wɔ tumaa gɔn? Wɔ tumaa á bɔlɔ soree pii? Wɔ tumaa á bɔlɔ soree bɔyɛɛ doɛ̃? Haayii! Wɔ tumaa ba bɛ kɔ́n lɛa wa.

³¹ Yiri Fu a bǐɛ̃baa ǹ mànan mɛnɛn bɛ́ soɛ, ka ga bɛn li. Sɛnɛ, zii mɛn bɛ́ siĩni á la yii ni, man die bɛ nyɛɛ ka-n kanna.