Korɛnti1 10 - LAWA A BOO SONBORE

Dan da dì wɔ gɔn la boo

¹ Ma dɔɔ̃nɔn lɛn, wɔ digolon nə́ goã tɔ we kun ka Muizu ni. Sii mɛn nə n zɛnaa ǹ nɛ, ma ba li ka yii goã ti bɛ gɔ́ɔ̃-n wa. Labara goã kuə̃ ne ǹ tumaa la, ǹ nə́ yìsi mu gole dɔ kuru ka ǹ gòã-n kun.

² Ǹ tumaa a goã labara giulun kɛ nɛ, ka ǹ yìsi mu kurii kɛ na á ǹ baa tɔrɔ goon lɛa ka Muizu ni.

³ Màn-bii mɛn bɔ Lawa li, ǹ tumaa na á goã bɛ bii kun,

⁴ mu mɛn dɔ bɔ Lawa li, ǹ tumaa bɛ dɔ mi kun. A giala, kɔlɔ na á bɔ Lawa li, a nə́ ǹ diɛ zii, ǹ nə́ mu mii a nɛ. Bɛa kɔlɔ kɛ lɛ, *Krita nɛ.

⁵ A laanka bɛ nɛ, ǹ gigiã goã ǹ bii, ǹ nə́ ǹ ba Lawa foo sii minin lɛa wa. Bɛ lɛ na á toa, ǹ nə́ goã boe bɛ̀ ǹ kaa don gɔ́ɔ̃ nɛ ǹ gã.

⁶ Bɛa siin kɛn man nə́ n zɛnaa sii a kɔnboen lɛa wɔsɛn nɛ, ń giɛ, sii baraa zɛnaa lɛgɔ́ɔ̃ baran wɔ kũ, ka a bɛ́ á ǹsɛn kũ lɔn wa.

⁷ Ka dɔn baran dì guguru kɔlen baa, ka ǹ dɔn min tɛnɛn bɛ́ ǹ nə́ zɛnaa lɔn wa. Lawa a sɛ́wɔ n bɛ lɛ pii kɛnɛn: «Zaman lɛ kaa tán, ǹ nə́ màn bii ǹ nə́ màn mi, ǹ nə́ yoo ǹ nə́ dì lɛ a bɛ̀ baa.»

⁸ Wɔ nyan nə n dinin kɔ din kũ doɛ̃baã siin la, ka ǹ dɔn min tɛnɛn bɛ́ ǹ nə́ zɛnaa lɔn wa. Ǹ min duu fuəwensɔɔ (23 000) na á gã pinin goon bɛ lɛ gɔ́ɔ̃ nɛ.

⁹ Wɔ nyan toa wɔ n da Dɛnaa gɔ́ɔ̃ li, ka ǹ dɔn min tɛnɛn bɛ́ ǹ nə́ zɛnaa lɔn wa. Bɛ lɛ nɛ, miɛ̃ nə́ ǹ tumaa yaga ǹ nə́ gã.

¹⁰ Wɔ nyan gungunun si dɔn, ka ǹ dɔn min tɛnɛn bɛ́ ǹ nə́ gungunun si lɔn wa. Bɛ lɛ a lɛa nɛ, lon a dia dí-a wole mɛn bɛ́ gɛ̀ dii, bɛ nə́ ǹ tumaa dɛ ǹ nə́ gã.

¹¹ Bɛa siin kɛn man nə́ n zɛnaa ǹ nɛ sii a kɔnboen lɛa. Maǹ nə́ tɔ́n nə ǹ kiɛ̃ sɛ́wɔ nɛ, mà ǹ wɔ dɔn biikoo giala-nyɔmɔɔ minin kɛn doroo ǹ siin baa.

¹² Bɛa yɔrɔ kɛ lɛ la kəni, min mɛn bɛ́ taasɛ mà asɛ n golee-n lon, bɛ nə n doa a nyan toa a bɔ a mɛnaa wa.

¹³ Ka damagɔ́ɔ̃li ǹ siin mɛnɛn yɛ, bɛn man nə́ n zɛnaa minbuiinin man miɛ̃ lɛlɛndun. Lawa n bɔlɔgoondɛnaa lɛa. A re toɛ damagɔ́ɔ̃li la ka pàã yii-n wa. A din tá re pàã koe ka la, ka boo la ka damagɔ́ɔ̃li lɛ si ka ganaa, ka tɔn pàã yɛ ka soo a nɛ.

Din kaa kun ka Sɛtaan nɛ banban boo

¹⁴ Bɛ lɛ taman yii, maa giaáran lɛn, ka baa si ka n bɔ dì guguru kɔ li.

¹⁵ Ka bɛ́ boo giala-malen lɛa, bɛ lɛ-n ma á boo diɛ ka-n miɛ̃. Ma bɛ́ boo mɛn diɛ, ka dinin nə bɛ gɔsɛ ka ga a ganaa.

¹⁶ Ka ga a ganaa: Wɔ bɛ́ mi ǹ màn barkadɛnaa mɛn mii, wɔ n barka diɛ Lawa nɛ, bɛa wɔ kiɛ kun ka Krita mà kɛ-n ma? Wɔ bɛ́ buuru barkadɛnaa mɛn tatalɛ kɔn bɛ̀ wɔ sɔ̃, bɛa wɔ kiɛ kun ka Krita gɔ̀nɔn nɛ wa?

¹⁷ Buuru goon bɛ́ na a tan; wɔ tumaa n kaa-n kun gɔ̀nɔn goon toto lɛa. A giala, wɔ tumaa gii na a din buuru goon kɛ lɛ nɛ.

¹⁸ Ka ga Izirayeli nɛnyaanan kɛn ganaa: Ǹ bɛ́ wúlu mɛn boe wúlu bɔ Lawa ganaa ǹ bǎã nɛ, min mɛnɛn bɛ́ bɛa màn kɛ bii, bɛn man kaa-n kun ka Lawa nɛ.

¹⁹ Man giɛ li ma pɛ mà wàa? Mà là tá dì wúlu siĩ lɛ laanka dì lɛ din ganaa?

²⁰ Haayii! Sɛnɛ, man pii ka nɛ, máa min kooron bɛ́ wúlu boe ka mànan mɛnɛn nɛ, máa maǹ nə ǹ koe yiri baraan la, ǹ bie ǹ koe Lawa la wa. Ma ba li máa ka goã kun ka yiri baraan nɛ wa.

²¹ Ka a boe la ka màn mi ka Dɛnaa a paan nɛ, ka wusoo ka màn mi yiri baraan paan nɛ wa. Ka a boe la ka màn bii Dɛnaa a kùnu ni, ka wusoo ka màn bii yiri baraan dɔn kùnu-n wa.

²² Hinlaa, wɔ n zoɛ̃ wáa wɔ ga Dɛnaa lɛ li? Ka ǹ taasɛ mà wɔ pàã la Dɛnaa wɔ nɛ?

Sii tumaa zɛnaa Lawa tɔ golebaa a lɛa

²³ Min tɛnɛn man pii: «Ǹ nə́ lɛ kɔ wɔ la ka màn tumaa nɛ.» Hiĩ, sɛnɛ, màn tumaa ba siĩn wa. «Ǹ nə́ lɛ kɔ wɔ la ka màn tumaa nɛ.» Sɛnɛ, màn tumaa là ba ka dɔɔ̃n kɔsɔn kɛn ganaa wa.

²⁴ Min kɔ́n nyan toa a ga a dinsɔɔ̃ a bǐɛ̃ kɔ li wa, sɛnɛ, a ga ǹ miãn kɔsɔn dɔn wɔ li.

²⁵ Ǹ bɛ́ màn mɛn tumaa siɛ̃ pii ni, ka bii. Ka nyan nɔ̀n da ka dinin gɔ́ɔ̃gɔ́ɔ̃ ǹ taasiɛ a lɛa wa.

²⁶ A giala, a n kiɛ̃ nɛ: «Tán nɛ, ka màn mɛn tumaa bɛ́ la, bɛ din tumaa n Dɛnaa wɔ lɛa.»

²⁷ Bɛ̀ goleemali baãnaa ka bíi màn-bii ganaa, bɛ̀ ká lɛ kɔ ká woo, bɛ̀ á màn mɛn kɔ ka la, ka bɛ bii, ka dinin gɔ́ɔ̃ nyan ka da nɔ̀n-diɛ ganaa wa.

²⁸ Sɛnɛ, bɛ̀ min pɛ ka nɛ mà wúlu bɔ ǹ siĩ ni, a pɛman wole lɛ laanka a gɔ́ɔ̃gɔ́ɔ̃ ǹ taasiɛ a lɛa, ka nyan sɔ̃ wa.

²⁹ Ma bie boo diɛ ka dinin gɔ́ɔ̃ a taasiɛ kɛ wɔ gɔn la wa, sɛnɛ, min mɛn boo lɛ pɛ ka nɛ, man bɛ wɔ ganaa. Sɛnɛ, die n die nɔ̀n diɛ ma la, mà wàa na á baa? Min kɔsɔ foo a zɛ̀rɛ á boe la, a ma kurəə ma din gɔn wìi a lɛa sii-zɛnaa ganaa?

³⁰ Bɛ̀ ma màn mɛn bii, má barka da Lawa nɛ a lɛa, a n siɛ lɔn ma wusoo ma ma din zɛ̀rɛ baa bɛa màn-bii kɛ lɛ a lɛa?

³¹ Bɛ lɛ nɛ, ta ka n màn bii, ta ka ǹ màn mii, ta ka n sii mɛn zɛnɛɛ, ka a tumaa zɛnaa Lawa tɔ golebaa a lɛa.

³² Ka giã doɛ̃, ta Zuifun manɛ, ta Grɛkin manɛ, ta Lawa a sɔmɔn manɛ, ka nyan kɔ́n da kanaa ǹ minin baa wa.

³³ Ka zɛnaa ka masɛ bɛ́ lɔn: ma nə n doɛ, máa ma min tumaa foo kɔɔ̃n kɔ ka sii tumaa nɛ. Ma bie giɛ li mà ma din laadoon nə bǐɛ̃ kɔ wa, sɛnɛ, man giɛ min tumaa a bǐɛ̃ kɔ li, ń giɛ ǹ tá kirisibiɛ.