Korɛnti1 1 - LAWA A BOO SONBORE

¹ Masɛ Pooli, Lawa lɛ kɔ á ma bíi, mà ma Yezu *Krita a dia dí-a wole baa. Ma laanka ma dɔɔ̃n Sɔstɛnɛ n fòo diɛ ka nɛ.

² Kasɛn lɛn man Lawa a sɔmɔ lɛa Korɛnti kiwi. Lawa na á ka bɔ, á ka kaa ka gɔrɔn Yezu Krita pàã ganaa, mà ka goã a din a minin lɛa. Wɔ n sɛ́wɔ kɛ diɛ ka laanka Lawa-nyankɔlen tumaa la, ǹ mɛnɛn bɛ́ bǎã tumaa nɛ ǹ nə́ Yezu Krita bíi Dɛnaa, ka wɔsɛn bɛ́ lɔn.

³ Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la.

Ka bǐɛ̃n mɛnɛn yɛ Krita li

⁴ Lawa sii bǐɛ̃ mɛn zɛnaa ka nɛ Yezu Krita pàã ganaa, ma á bɛa barka diɛ-n baraabaraa kaa lɛa.

⁵ Sonbore, a din lɛ pàã ganaa Lawa ka gɔ taãn-taãnɛ, ka yɔrɔ din tumaa nɛ. Á boo-doɛ̃ laanka sii-doɛ̃ tumaa kɔ ka la.

⁶ Ka siérebaa ǹ boo mɛn ma Krita wɔ paǹ li, bɛ giã ka nɛ, á pàã yɛ.

⁷ Yiri Fu a bǐɛ̃baa ǹ mànan kɛn kɔ́n nyaabaa ka li wa. Bɛ lɛ na á toa, ka tá n yii diɛ ka foo-doa nɛ, wɔa Dɛnaa Yezu Krita a da a din nyaa kɛ la.

⁸ A din dɔ n die pàã koe ka la sɔnbɔraanɛ, yǎa giala-nyɔmiɛ biikoo li, ka goã zɛ̀rɛ baãnaan lɛa wɔa Dɛnaa Yezu Krita a kiri-kurii pinaa.

⁹ Lawa a wusii a boo diɛ kio wa, a din Lawa kɛ lɛ na á ka bíi, mà ka goã doa-n kɔn ka a Nɛgiĩ Yezu Krita, wɔa Dɛnaa kɛ nɛ.

Lawa a sɔmɔ minin tatala kɔn

¹⁰ Ma dɔɔ̃nɔn lɛn, man ka nyankoe, ka wɔa Dɛnaa Yezu Krita tɔ nɛ, máa ka kɔn ma, ka nyan toa tatala kɔn yɛ ka bii wa. Ka toa ka goã doa-n kɔn ka taasiɛ goon ne, ka yiri goon ne.

¹¹ Taãn nɛ, ma dɔɔ̃nɔn lɛn, Klowee a kion minin man nə́ pɛ ma nɛ, mà kɔn liere-kɔn tá ka bii.

¹² Ma bɛ́ màn mɛn pii ka nɛ á ke: Kaa didie tumaa n boo totoro diɛ. Ke mà asɛ n Pooli wɔ lɛa, ke mà asɛ n Apolɔɔsi wɔ lɛa, kɔsɔ dɔ mà asɛ n Piɛrɛ wɔ lɛa, kɔsɔ dɔ doo mà Krita wɔ-n ka asɛ nɛ.

¹³ Ka yiri-n mà Krita lɛ n tatalɛɛ-n kɔn gigiã? Pooli na á gã dere ǹ gɔn ganaa kaa lɛa? Hinlaa maǹ nə́ *batɛmu da ka ganaa ka Pooli tɔ nɛ?

¹⁴ Bɛ̀ á n bɔ Kripuusu ni, ka Gayusu ni, masɛ batɛmu da ka kɔ́n ganaa wa. Ma á bɛa barka diɛ Lawa nɛ.

¹⁵ A bɛ miɛ̃, ka kɔ́n ba boe la ka pɛ, mà maǹ nə́ batɛmu da asɛ ganaa ka masɛ tɔ-n wa.

¹⁶ Áh, sonbore ne, má batɛmu da Tefanaasi a kion minin dɔn ganaa. Bɛ̀ á n bɔ bɛ nɛ, ma yiri ba a nɛ, máa má batɛmu da kaa min kɔsɔ ganaa doo wa.

¹⁷ Krita masɛ dia batɛmu diɛ wa. Sɛnɛ, a na á ma dia Boo Tii Kɔɔ̃n kɛ pii minin manɛ. Ma bie má pɛ ka ma din a yiridɛnaabaa boon ne, n ma yaa barka boe Krita a gã gɔn ganaa kɛ-n wa.

Dere ǹ gɔn bɛ́ boo mɛn giala pii

¹⁸ Sonbore, min mɛnɛn bɛ́ papaɛ̃, Krita a gã dere ǹ gɔn ganaa boo kɛ n gàãnaabaa lɛa bɛn yii li. Sɛnɛ, wɔsɛn mɛnɛn bɛ́ kirisibaa ǹ zii la, a n Lawa a pàãyiidɛnaabaa lɛa wɔsɛn yii li.

¹⁹ Ka boo taãn nɛ, ǹ nə́ kiɛ̃ Lawa a sɛ́wɔ nɛ: «Masɛ Lawa á re yiridɛnan yiri ziziɛ̃, ma á re màn-dɔ̃len màn-doɛ̃ nyɛɛ.»

²⁰ Ka bɛ nɛ, Lawa nyaa ǹ nɛ, mà kanaa a sii-doɛ̃ siin kɛn lɛn dinin man gàãnaabaa lɛa. Sii-dɔ̃lin man pii mà wàa? Sɛ́wɔ-dɔ̃len man pii mà wàa? Boo doɛ̃ wole dadaran kɛn dɔn man pii mà wàa?

²¹ Sonbore, kanaa minin nə boo la, ka ǹ dinin sii-doɛ̃ kɛ barka nɛ, ǹ nə́ Lawa a sii-doɛ̃ kɛ giala ma wa. Wɔ bɛ́ dí mɛn pii ka nɛ Yezu a gɛ̀ wɔ gɔn la, a n gàãnaabaa lɛa kanaa minin yii li, a da yaa Lawa golee la, mà min mɛnɛn bɛ́ golee bɛa gàãnaabaa ǹ dí kɛ lɛ li, mà á re bɛn kirisibiɛ.

²² Zuifun man giɛ mà kaãbaa ǹ siin nə ǹ zɛnaa, ǹsɛn nə tɔn golee li. Grɛkin man giɛ sii-doɛ̃ siin li.

²³ Sɛnɛ, Krita mɛn bɛ́ ǹ nə́ dere gɔn ganaa, wɔsɛn man bɛ boo diɛ. Bɛ n sii kaka lɛa Zuifun ganaa, a n gàãnaabaa lɛa tɔrɔ kɔsɔn yii li.

²⁴ Sɛnɛ, Lawa min mɛnɛn bɔ, ta Zuifu ni, ta tɔrɔ kɔsɔ nɛ, Krita lɛ n Lawa a pàãyiidɛnaabaa lɛa, ka a sii-doɛ̃ nɛ bɛn yii li.

²⁵ Bɛ lɛ taman yii, Lawa a sii mɛn bɛ́ gàãnaabaa lɛa minbuiinin yii li, bɛ n sii-doɛ̃ lɛa, á la minbuiinin sii-doɛ̃ nɛ. Minbuiinin bɛ́ giɛ Lawa a sii mɛn ganaa pàãwɛɛnaabaa ǹ sii lɛa, bɛ pàã á gole á la minbuiinin pàãdɛnaabaa nɛ.

Lawa min mɛn bɔ

²⁶ Ka n yiri koa li, ma dɔɔ̃nɔn lɛn, kasɛn mɛnɛn bɛ́ Lawa ka bíi á ka bɔ, ka n dinin dɔ̃. Kaa sii-dɔ̃lin ba tɛ minbuiinin yɔrɔ-a wa, kaa pàãdɛnaa dɔ a tɛ wa, kaa bɔ sumu bǐɛ̃n nɛ wole dɔ a tɛ wa.

²⁷ Sɛnɛ, min mɛnɛn bɛ́ gàãnaan lɛa kanaa minin yɔrɔ-a, Lawa na á bɛn lɛn bɔ, á sìi diɛ kanaa a sii-dɔ̃lin ganaa nɛ; min mɛnɛn bɛ́ pàãwɛɛnaan lɛa, Lawa na á bɛn lɛn bɔ, á sìi diɛ kanaa a pàãdɛnan ganaa nɛ.

²⁸ Minin tan, kanaa minin nə́ giɛ ǹ ganaa màn kooron lɛa. Ǹ ba n yiri koɛ ǹ li wa, ǹ ba màn kɔ́n lɛa ǹ yii li wa. Lawa na á bɛn lɛn bɔ. Sii mɛn bɛ́ kanaa minin nə́ giɛ a ganaa sii taãn lɛa, a là nə́ ǹ ganaa, Lawa n bɛ ziziɛ̃ ka bɛa minin kɛn lɛn nɛ.

²⁹ A na á baa miɛ̃, màn mɛn bɛ́ toɛ, minbuiin nɛ kɔ́n baran boo la, a n din koa Lawa yɔrɔ-a doo wa.

³⁰ Sɛnɛ, Lawa na á wɔ bíi, á wɔ kaa kun ka Yezu Krita nɛ. A din na á n baa sii-doɛ̃ lɛa, peperebaa nɛ, *yoreenbaa lɛa ka kirisibaa nɛ, wɔ nɛ.

³¹ Bɛ lɛ a lɛa nɛ, ǹ nə́ kiɛ̃ Lawa a sɛ́wɔ nɛ: «Bɛ̀ min mɛn tá zoɛ̃ mà a n din koa, a n din koa ka Dɛnaa a sii-zɛnaa nɛ.»