Kiin2 8 - LAWA A BOO SONBORE

Izirayelin kii n Sunɛmun lɔ a sii yɔrɔ boe

¹ Yiliizee goã á Sunɛmu lɔ mɛn lɛ a nɛ yii kaa, bɛ kio, Yiliizee boo da ka bɛ nɛ á pɛ nɛ: «Yoo, n bɛ̀ re boe bǎã mɛn a gùli kɔ la, n wo walan, n din laanka n kion minin ni. A giala, Dɛnaa Lawa bòo da bɔ ganaa. Bɛa bòo lɛ á die boe Izirayeli gána lɛ nɛ, a dɔ lɛ̀ sɔbaa dinin.»

² Lawa a min lɛ boo mɛn pɛ lɔ lɛ nɛ, lɔ lɛ bɛ zɛnaa. Á yoo á kiɛ̃ a lɛ-a, a din laanka a kion minin ni, á woo lɛ̀ sɔbaa gùli kɔ Filisiti minin gána nɛ.

³ Lɛ̀ sɔbaa lɛ lɛ bɛ́ á pã, lɔ lɛ nə́ n toa Filisiti minin gána lɛ nɛ, á daa piɛ. Á woo kii nyankɔ, a kion laanka a wurun sii taman yii.

⁴ Kii lɛ na á goã a gialaa boo diɛ ka Geazi ni, Lawa a min Yiliizee a dí-nyali ke. Kii lɛ na á goã pii ni: «Yiliizee sii dadara mɛn tumaa zɛnaa, bɛ laakalaa ma nɛ!»

⁵ Yiliizee goã á gere lɛ yii kaa lɔn, Geazi na á goã a gialaa bɛ lɛ yɔrɔ pii kii lɛ nɛ. A toa bɛa boo lɛ diɛ, Yiliizee goã á lɔ mɛn lɛ a nɛ yii kaa, bɛa lɔ lɛ daa kii lɛ nyankɔ, a kion laanka a wurun sii taman yii. Geazi nə́ n toa: «Maa dɛnaagiĩ kii ganaa, lɔ lɛ á ke, a nɛginin lɛ dɔ á ke, Yiliizee nə ǹ mɛn lɛ yii kaa.»

⁶ Yǎa kii lɛ tɔn nɔ̀n da lɔ lɛ la. Lɔ lɛ bɔ ka boo lɛ nɛ á pɛ nɛ. Bɛ kio, kii lɛ lɔ lɛ a sii wɔ nyɛɛnaandɛnaa goon gɔn, á pɛ nɛ: «Màn mɛn tumaa bɛ́ lɔ lɛ wɔ lɛa, toa bɛ wusoo a dɔ a ganaa. Lɔ lɛ soo á n bɔ gána lɛ nɛ ǹ mɛn pinaa, a saa bɛa pinaa kɛ lɛ ganaa a da kaa pelo lɛ, lɔ lɛ a wurun nə là mɛn yii wɔ, á toa bɛ lɛ yii dɔ a ganaa.»

Yiliizee laanka Azayeli

⁷ Ǹ kɔn pinaa, Yiliizee woo Damaasi kiwi. Siirii gána a kii Bɛn-Adaadi goã lon wa. Ǹ ná a boo da a yii ni, ǹ nə́ pɛ nɛ: «Lawa a min lɛ daa yǎa kànaa.»

⁸ Kii lɛ tɔ́n pɛ Azayeli ni: – Bǐɛ̃baa ǹ màn saa n gɔn, n wo bɔ Lawa a min lɛ li. N die n nə n doa a ganaa a nɔ̀n da Dɛnaa Lawa la kɛnɛn: «Ma á die n boe busu kɛ nɛ ma la?»

⁹ Azayeli dɔ woo bɔ Yiliizee li. A bɛ́ woe, màn mɛn yii á ke a siĩnbaa miã ná a banban Damaasi kiwi wa, a na á woo ka bɛ nɛ a gɔn, bǐɛ̃baa ǹ màn lɛa. Bɛa mànan lɛn man kɔnpii ka nyɔɔmaa pusi a guĩ ni. Azayeli bɛ́ á dɔ, á golee Yiliizee yɔrɔ-a á pɛ: – N nɛgiĩ Bɛn-Adaadi lɛ, Siirii gána a kii lɛa, bɛ na á masɛ dia die pii n ni: «Mà asɛ á die n boe busu kɛ nɛ asɛ la?»

¹⁰ Yiliizee ná a lɛ si: «Dɛnaa Lawa nyaa ma nɛ, mà kii lɛ a die n boe a busu lɛ-n wa, sɛnɛ, woo, n pɛ nɛ mà á die kaka koe.»

¹¹ Lawa a min lɛ nə́ n yiin doa Azayeli la, á ga a ganaa á belebɔ nɛ, bɛ kio á n daa wuu la.

¹² Azayeli nə́ n toa mà wàa na á baa asɛ a dɛnaagiĩ tá wuu pii? Yiliizee ná a lɛ si kɛnɛn: «A giala, n bɛ́ re dí baraa mɛn nyɛɛ Izirayeli minin lɛn ganaa, ma á bɛ doɛ̃. Izirayeli minin kiwin mɛnɛn bɛ́, kungɔn nə́ ǹ ganaa, n tá re tɛ diɛ bɛn ganaa. N tá re ǹ nɛ tenən dii ka gɔya sa nɛ, n nə ǹ nɛnyaan bɔnboɛɛnɛn yɔyɔrɛ, n nə ǹ lɔ nɔ̀nɔ-an nɔ̀ wɔsɔ.»

¹³ Azayeli nə́ n toa: «Masɛ n wàa lɛa, kɛ miã a zɛnaa ǹ pàã tɔn boo la a yɛ ma lon?» Yiliizee ná a lɛ si: «Dɛnaa Lawa na á pɛ ma nɛ, mà n tá re kii biɛ Siirii gána mìi la.»

¹⁴ Bɛ kio, Azayeli kiɛ̃ á n bɔ Yiliizee li, á wusoo á woo a dɛnaagiĩ li, a dɛnaagiĩ lɛ pɛ nɛ: «Yiliizee lɛ na á wàa boo da n nɛ?» A ná a lɛ si: «N tá re liɛ a giala yii li.»

¹⁵ Bɛa lɛawaa, Azayeli kɔmalɛ saa, á sã mu li, á ná a lɛ bɔ á kɔ kii lɛ yɔrɔ lɛ, kii lɛ gã. Azayeli giã a bǎã nɛ pàã la.

Zudaa gána a kii Zoraamu

¹⁶ Akaabu a nɛgiĩ Zoramu lɛ, Izirayeli gána a kii lɛa, bɛa kiibaa lɛ̀ soorobaa ǹ wɔ, Zozafati a nɛgiĩ Zoraamu kii baa Zudaa gána mìi la.

¹⁷ A bɛ́ kii lɛ biɛ, bɛ̀ a lɛ̀ pɔsɔɔ ka paa nɛ, a na á kiibaa zɛnaa lɛ̀ kiwisi Zeruzalɛmu kiwi.

¹⁸ Akaabu a nɛlɔ na á goã a lɔ lɛa, bɛ lɛ nɛ, a dɔ Izirayeli gána a kiin lɛn tɔ wɔ ǹ gɔn saa ka Akaabu a kion minin wɔ bɛ́ lɔn. Sii mɛn bɛ́ baraa Dɛnaa Lawa yii li, a na á bɛ zɛnaa.

¹⁹ Sɛnɛ, Dɛnaa Lawa a dí-nyali Davida lɛ taman yii, Dɛnaa Lawa lɛ kɔ, á Zudaa gána bɔ̀n baa wa, a giala a na á goã á pɛ Davida lɛ nɛ mà a tɔrɔ tá re goɛ̃ kiibaa lɛ la miɛ̃ duduu.

²⁰ Zoraamu a biikoo li, Edɔn gána nə́ ǹ gòãn dii Zudaa gána a pàã ganaa, á n din gɔn tɔ kii koa.

²¹ Bɛ lɛ nɛ, Zoraamu tɔ́n woo Sayiri ka a ziabaa ǹ wotoron tumaa nɛ. Zoraamu yoo tèlò-n, Edɔn minin mɛnɛn nə goã ǹ ná a lɛnpɛnɛ, á yoo bɛn gialaa, ka ziabaa ǹ wotoro mìilandɛnan nɛ. Zaman lɛ nə́ n gòã da baa nɛ, ǹ nə́ woo ǹ mɔnaa kionən ne.

²² A laanka bɛ yii ni, Edɔn gána lɛ gòãn man nə́ goã dii ni Zudaa gána a pàã lɛ ganaa, á daa kaa pelo lɛ. Libnaa kiwi dɔ goã á ǹ goã dii bɛa biikoo lɛ li.

²³ Zoraamu sii gialakunun mɛnɛn zɛnaa, a màn mɛn yii tumaa zɛnaa, bɛ yii tá kiɛ̃ nɛ sɛ́wɔ kɛ nɛ boo diɛ Zudaa kiin wɔ gɔn la.

²⁴ Zoraamu gã. Ǹ goã ǹ nə́ ǹ din bĩ yala mɛn nɛ, ǹ ná a dɔ bĩ walan "Davida a kiwi". A nɛgiĩ Ahaazia na á kii baa a bǎã nɛ.

Zudaa gána a kii Ahaazia

²⁵ Akaabu a nɛgiĩ Zoramu lɛ, Izirayeli gána a kii lɛa, bɛa kiibaa lɛ̀ fulupaabaa ǹ wɔ, Zoraamu a nɛgiĩ Ahaazia Zudaa gána a kii baa.

²⁶ Ahaazia bɛ́ kii lɛ biɛ, bɛ̀ a lɛ̀ fuəwenpaa nɛ. A na á lɛ̀ goon kiibaa zɛnaa Zeruzalɛmu kiwi. Ǹ dan tɔ n Ataalii, Izirayeli gána a kii Omrii a nɛlɔ nɛ.

²⁷ Ahaazia na á Akaabu a kion minin tɔ wɔ ǹ gɔn saa. Sii mɛn bɛ́ baraa Dɛnaa Lawa yii li, Ahaazia na á bɛ zɛnaa, ka Akaabu a kion minin wɔ bɛ́ lɔn, a giala a na á goã Akaabu n daãgiĩ lɛa.

²⁸ Ahaazia lɛ laanka Akaabu a nɛgiĩ Zoramu woo ziabaa kɔn ka Siirii gána a kii Azayeli ni, Ramɔti kiwi, Galaati gána nɛ. Siirii minin lɛn gɔn nə́ Zoramu kũ, á busu da a ganaa.

²⁹ Siirii minin lɛn gɔn nə Zoramu kũ a paǹan mɛnɛn ganaa Ramaa kiwi, bɛ̀ a bɛ́ zia lɛ biɛ kɔn ka Siirii gána a kii Azayeli lɛ nɛ, Zoramu lɛ nə́ n bɔyaa, á daa dagòã da bɛn ganaa Zizereyɛli kiwi. Zoraamu a nɛgiĩ Ahaazia lɛ, Zudaa gána a kii lɛa, bɛ daa n yii kɔ Akaabu a nɛgiĩ Zoramu lɛ ganaa Zizereyɛli, a busu lɛ taman yii.