Kiin2 7 - LAWA A BOO SONBORE

¹ Yiliizee nə́ n toa: «N too kɔ Dɛnaa Lawa a boo ganaa! Dɛnaa Lawa mà biɛ̃ kɛnɛn yirəə, *wùsu sonbore kilo fulupaa tá re n siɛ̃ wɔrɔ gogoon, *ɔrzi kilo fuəwensii tá re n siɛ̃ wɔrɔ gogoon Samarii pii ni.»

² Kii a dí-nyali mɛn bɛ́ mɔrɛɛ nɛ a ganaa, bɛ Yiliizee lɛ si: «Ta Dɛnaa Lawa din na á lon a dɔǹɔn lɛ bũ, kɛa boe la a n zɛnaa doɛ̃ wa.» Yiliizee nə́ n toa: «N tá re yii ka n yii ni, sɛnɛ, n ba re bii wa.»

Busulən man woe Siirii minin giã ǹ bǎã nɛ

³ Gɔ̀nɔn ki busu babaraadɛnaa min sii kɔn goã kiwi lɛ a kiɛnlɛ-a, bɛn nə́ pɛ kɔn nɛ: «Wɔsɛn nə giã kànaa wɔ n yii da gɛ̀ la? Wàa na á baa?

⁴ Bɛ̀ wɔ́ pɛ, mà wɔ wo kiwi gɔ́ɔ̃ nɛ, bòo lɛ bɛ́ a nɛ, wɔ n die giɛ̃ walan. Bɛ̀ wɔ́ golee kànaa dɔ nɛ, a din gɛ̀ lɛ nɛ. Ka daa wɔ kiɛ̃ wɔ wo Siirii minin giã ǹ bǎã nɛ, bɛ̀ ǹ nə́ wɔ yii toa koo, wɔ goã le, bɛ̀ ǹ nə́ wɔ dɛ, wɔ gã le!»

⁵ Ǹ nə́ tɔ́n yoo wasamiɛ̃n tutu, ǹ nə́ woo Siirii minin giã ǹ bǎã lɛ nɛ, ǹ nə́ woo yǎa a lɛ ganaa, sɛnɛ min goon din goã a tan wa!

⁶ Dɛnaa na á goã á zɛnaa, Siirii minin nə́ màn wuu kɔn ma, ka n pɛ mà sɔraasi damata na a gialaa die ka sùin laanka ziabaa ǹ wotoron ne. Siirii minin lɛn nə́ tɔ́n pɛ kɔn nɛ: «Izirayeli gána a kii lɛ ná á Ɛti minin kiin laanka Ezipti minin kiin saa paa ganaa, mà ǹ da ziabaa wɔ ganaa.»

⁷ Siirii minin lɛn nə́ tɔ́n yoo wasamiɛ̃n tutu, ǹ nə́ baa si, ǹ nə́ ǹ mɔnaa kionən toa walan, ka ǹ sùin laanka ǹ dundunun ni. Ǹ nə́ ǹ giã ǹ bǎã lɛ toa walan a din lɛ yii lɛa, ǹ nə́ baa si ǹ nyin kio.

⁸ Gɔ̀nɔn ki busu babaraadɛnan lɛn bɛ́ ǹ nə́ dɔ giã ǹ bǎã lɛ lɛ ganaa, ǹ nə́ kaa mɔnaa kion goon ne, ǹ nə́ màn bii, ǹ nə́ màn mi. Bɛ kio, ǹ nə́ n daa wɔrɔ laanka sana la, ka mɔnaan nɛ, bɛa mɔnaa kion lɛ gɔ́ɔ̃ nɛ, ǹ nə́ woo ǹ duru. Ǹ nə́ wusoo ǹ nə́ daa kaa mɔnaa kion lɛ a kɔsɔ dɔ nɛ, màn mɛn yii goã a gɔ́ɔ̃ nɛ, ǹ nə́ ǹ daa a yii la ǹ nə́ woo ǹ duru.

Busulən lɛn man gòon yiɛ kii ganaa

⁹ Bɛ kio, ǹ nə́ pɛ kɔn nɛ kɛnɛn: «Wɔsɛn bɛ́ a gialaa sii mɛn zɛnɛɛ, a kɔnbɔ ka zɛnaa-n wa. Pelo a lɛawaa kɛ n boo kɔɔ̃n pɛ pinaa lɛa. Bɛ̀ wɔsɛn nə́ n lɛ tã, wɔ n yii da mà yǎa lɛ̀ wɛɛ, dɔlɔ tá re wɔ kuĩ. Ka daa wɔ wo kiwi lɛ nɛ, wɔ wo a boo da kii a piɛ.»

¹⁰ Gɔ̀nɔn ki busu babaraadɛnan lɛn nə́ daa, ǹ nə́ lɛ dia kiwi lɛ a kiɛnlɛ-lɛduə̃lin la, ǹ nə́ pɛ ǹ nɛ: «Wɔsɛn man wɔ́ woo Siirii minin giã ǹ bǎã nɛ. Min ba a-n wa, min a bìn diɛ ba boe wa. Sùin laanka dundunun dininsɔɔ̃nɔn man ke ǹ nə́ goã doa nɛ, mɔnaa kionən dɔn man ke ǹ nə́ ǹ toa walan bii-a ǹ lɛ yii lɛa.»

¹¹ Kiɛnlɛ-lɛduə̃lin lɛn nə́ lɛ dia kiwi gɔ́ɔ̃ nɛ, ǹ nə́ woo a boo da kii a piɛ.

¹² Kii lɛ tɔ́n yoo tèlò basa li, á pɛ a dí-nyalin manɛ: – Siirii minin lɛn nə sii mɛn lɛ bɔ ǹ nə́ die ne wɔsɛn ganaa, man die bɛ pii ka nɛ: Siirii minin lɛn bɛ́ doɛ̃ mà bòo tá wɔsɛn gialaa, maǹ nə́ yoo ǹ nə́ ǹ bɔ ǹ giã ǹ bǎã lɛ nɛ, ǹ nə́ woo ǹ duru don gɔ́ɔ̃ nɛ, bɛ̀ ǹ tá taasɛ: «Minin kɛn wɔsɛn nə́ ǹ lɛnpɛnɛ, ǹ tá re soe ǹ nə bɔ kiwi lɛ nɛ, wɔ á re ǹ kuĩ ǹ yii n koo, wɔ wusoo wo kaa ǹ kiwi dɔ gɔ́ɔ̃ nɛ.»

¹³ Dí-nyalin lɛn min goon nə́ boo saa á pɛ: «Sùi gialakun mɛn bɛ́ tɔn a tan ǹ yii n koo kiwi lɛ nɛ, ǹ dɔn man die bɔ̀n biɛ ka kiwi lɛa zaman gialakunun kɛ bɛ́ lɔn die bɔ̀n biɛ. Wɔsɛn man die bɛa sùin kɛn lɛn sooro kuĩ wɔ minin dia ǹ nɛ nyɛɛnɛ, wɔ ga a ganaa!»

¹⁴ Ǹ nə́ tɔ́n sùin lɛn kũ, ka ziabaa ǹ wotoro màn paa nɛ, kii lɛ minin dia ǹ nɛ Siirii sɔraasin lɛn basa la. A bɛ́ ǹ diɛ, a ná á pɛ ǹ nɛ mà ǹ wo ga!

¹⁵ Ǹ nə́ woo Siirii minin lɛn basa la, yǎa ǹ nə́ dɔ Zurdɛ̃ tà li. Á ke, Siirii minin lɛn nə goã ǹ nə́ kɔ zii mɛn lɛ bɛ̀ ǹ bɛ́ baa si, dia dí-a wolen lɛn nə́ mɔnaan laanka ǹ mànan gigiã yɛ kaa-n tán bǎã yii ni. Ǹ nə́ wusoo ǹ nə́ daa a boo da kii lɛ nɛ.

Yiliizee a da ǹ boo n kiɛ lɛ

¹⁶ Bɛ kio, zaman lɛ tɔ́n soo, ǹ nə́ woo Siirii minin mànan kokoo ǹ giã ǹ bǎã lɛ nɛ. Wùsu sonbore kilo fulupaa boo la á yɛ wɔrɔ gogoon, ɔrzi kilo fuəwensii dɔ boo la á yɛ wɔrɔ gogoon, ka Dɛnaa Lawa goã á pɛ lɔn.

¹⁷ Min mɛn goã mɔrɛɛ-n kii lɛ-a, kii lɛ kiwi lɛ a kiɛnlɛ lɛduə̃ sii wɔ bɛ gɔn. Sɛnɛ, zaman lɛ tɔtɔrɔ la tán ǹ gòã giulun, kiɛnlɛ lɛ lɛ-a, á gã ka Lawa a min lɛ goã a ná a boo da lɔn, bɛ̀ kii lɛ á ke á woo a li.

¹⁸ Sonbore ne, Lawa a min lɛ na á pɛ kii lɛ nɛ mà ɔrzi kilo fuəwensii tá re n siɛ̃ wɔrɔ gogoon, mà wùsu sonbore kilo tá re n siɛ̃ wɔrɔ gogoon, biɛ̃ kɛnɛn yirəə Samarii *kiwi a kiɛnlɛ-a.

¹⁹ Dí-nyali lɛ na á goã á pɛ Lawa a min lɛ nɛ mà ta Dɛnaa Lawa n lon a dɔǹɔn lɛ buĩ, mà kɛ ba boe la a n zɛnaa wa. Yǎa Yiliizee dɔ tɔn a lɛ si mà a tá re yii ka a yii ni, sɛnɛ, mà a na a ba re bii wa.

²⁰ A na á n zɛnaa dí-nyali lɛ-n miɛ̃ sonbore. Zaman lɛ tɔtɔrɔ la tán kiɛnlɛ-a, á gã.