Kiin2 5 - LAWA A BOO SONBORE

Naaman a busu nya

¹ Siirii gána a kii a sɔraasin goledɛnaa n ka Naaman nɛ. Barka goã a sii ni kii lɛ gɔn parsiini. Kii lɛ goã sàn koe ka a sii-n wa. A giala, Naaman lɛ din ni, Dɛnaa Lawa goã á gɔ̀lɔ̀baa kɔ Siirii minin la a gɔn. Sɛnɛ, Naaman lɛ, bɛa zia-baali sonbore kɛ lɛ, gɔ̀nɔn ki busu babaraa na á goã a ganaa.

² Siirii minin lɛn nə́ goã ǹ nə́ woo zia kɔn la, ǹ nə́ ǹ zɔ́ɔn mànan kokoo. Ǹ nə́ goã ǹ nə́ nɛlɔ boɛɛn goon kũ Izirayeli gána nɛ, ǹ nə́ daa nɛ. Bɛa nɛlɔ lɛ nə́ n baa Naaman a lɔ a dí-nyali lɛa.

³ Ǹ kɔn pinaa, nɛlɔ lɛ pɛ a dɛnaalɔ lɛ-n kɛnɛn: «Á ke, bɛ̀ maa dɛnaagiĩ lɛ n boe la ke a wo Lawa a boo gii-dali kɛ li Samarii kiwi, a na a gɔ̀nɔn ki busu babaraa kɛ nyɛɛ a bɔ a ganaa.»

⁴ Naaman tɔ́n woo a boo da kii-n kɛnɛn: «Á ke, nɛlɔ ten mɛn lɛ á ke boe Izirayeli gána nɛ, bɛ ná á pɛ mà kɛnɛn ka kɛnɛn.»

⁵ Siirii gána a kii lɛ Naaman lɛ si: «Yoo n zii saa n woo! Ma á die sɛ́wɔ koe Izirayeli gána a kii lɛ la.» Naaman dɔ yoo á woo. A bɛ́ woe, á wɔrɔ laanka sana kaa a lon, wɔrɔ kilo biɛsɔɔ (300), sana kilo pɔsɔrɔ. Naaman nyaǹ bɔ ǹ mɔnaa fù dɔ kaa a lon.

⁶ Naaman woo sɛ́wɔ lɛ kɔ Izirayeli gána a kii la. Sɛ́wɔ lɛ a boo na á goã pii kɛnɛn: «Sɛ́wɔ kɛ bɛ́ re doe n li, a dɔ̃ goon lɛa, mà ma-n má maa dí-nyali Naaman dia n li, màn mɛn bɛ́ toɛ, n na a gɔ̀nɔn ki busu babaraa kɛ nya ǹ bɔ a ganaa.»

⁷ Kii lɛ bɛ́ á sɛ́wɔ lɛ pɛ á nya, a ná a mɔnaan tɔtoɛ̃ foo ziziɛ̃ gɔn á pɛ: «Siirii gána a kii lɛ din bɛ́ yui min diɛ masɛ li mà ma a gɔ̀nɔn ki busu babaraa nya ma bɔ a ganaa, Lawa n ka masɛ nɛ, boe nyin nya laanka nyin kɔ la? Ka yɛ ka dɔ̃, mà a n giɛ ma lɛ li.»

⁸ Lawa a min Yiliizee bɛ́ á ma, mà Izirayeli gána a kii ná a mɔnaan tɔtoɛ̃, á minin dia woe pii ni kɛnɛn: «Wàa na á baa n nə n mɔnaan tɔtoɛ̃? Naaman lɛ kiɛ̃ a da masɛ li, á re doɛ̃ mà Lawa a boo gii-dali tá Izirayeli gána nɛ.»

⁹ Bɛ kio, Naaman daa ka a sùin ni, ka a wotoro ne, á golee Yiliizee a kiɛnlɛ-a.

¹⁰ Yiliizee tɔ́n min dia woe pii ni: «Wo n yii sã Zurdɛ̃ tà mu li, gunyin sɔbaa, n busu lɛ á die nyɛɛ lenlen, n *yoreen kɔ.»

¹¹ Naaman foo yoo, á kiɛ̃ ka a din ni, bɛ̀ á n pii: «Man má goã taasɛ, nɔ̀n diɛ ba a-n wa, máa Yiliizee lɛ n die soe a n bɔ a kion, a da golee bii-a a na a Lawa, Dɛnaa Lawa lɛ nyankɔ, a n gɔn dɔ talaa busu bǎã lɛ ganaa, a sii saa a bɔ gɔ̀nɔn ki busu babaraadɛnaa la.

¹² Damaasi kiwi a tàn kɛn, Abanaa laanka Parpari, bɛn ba soɛ Izirayeli gána a tàn tumaa-n wa? Man maa boe la man zoo walan doɛ̃ ma kaka kɔ wa?» Bɛ kio, á n bɔyaa á woo a foo n yoo ne.

¹³ Sɛnɛ Naaman a dí-nyalin nə́ n zɔ̃, ǹ nə́ dɔ, ǹ nə́ n toa a ganaa kɛnɛn: «Díi, bɛ̀ Lawa a boo gii-dali lɛ na á pɛ n nɛ mà n sii zɛnaa sii mɛn nə́ ke a zɛnaa n kaka, a bɛ́ maa bɛ̀ n ba bɛ zɛnɛɛ wa? Sanparɛ a bɛ́ mà n nə n zoo kooro mà n tá re yoreen koe.»

¹⁴ Naaman tɔ́n kiɛ̃ á woo Zurdɛ̃ tà lɛ lɛ-a, á n yii sã Zurdɛ̃ tà mu lɛ li gunyin sɔbaa, ka Lawa a min lɛ goã á da lɔn. Naaman yoreen kɔ, a gɔ̀nɔn nə́ n baa ka nɛnyaan boɛɛn gɔ̀nɔn nɛ.

¹⁵ Naaman wusoo á daa Lawa a min Yiliizee li, kun ka a kiodɛnan tumaa nɛ. Naaman wɔ á woo golee Yiliizee nyɛɛnɛ, á pɛ: «Kanna, ma á doɛ̃, máa kanaa bǎã yii ni, Lawa banban bǎã kɔn nɛ, Izirayeli gána kio wa. Bǐɛ̃ kɔ sisia, n maa bǐɛ̃ baa ǹ màn si.»

¹⁶ Sɛnɛ, Yiliizee ná a lɛ si: «Dɛnaa Lawa Yiikoonaa mɛn lɛ bɛ́ má n dí nyɛɛ nɛ, bɛ lɛ tɔ taman yii, ma ba re lɛ koe ma màn kɔn si wa.» Naaman nə́ n laa a ganaa mà a lɛ kɔ sɛnɛ á n piã.

¹⁷ Naaman tɔ́n nə n toa: «N bɛ́ n nə́ n piã, zii sɛ kɔ, ǹ tán tii kɔ ma la, dundun-sùi màn paa a guĩ yii li. A giala, ma ba re wúlu mànan tiɛ̃ doo lawa kɔsɔn-a wa, ma ba re wúlu boe doo lawa kɔsɔn-a wa, bɛ̀ á n bɔ Dɛnaa Lawa nɛ.

¹⁸ Sɛnɛ, sii goon nə ke, Dɛnaa Lawa die a bɛa sã toa ma nɛ: Bɛ̀ maa kii lɛ tá we dì Riimɔn kɛa kion, a tá a guguru koe, a nə n doɛ masɛ nyàa ganaa, masɛ dɔ n kiɛ tán dì Riimɔn a kion lɛ nɛ. Ma bɛ́ re bɛa kaa tán kɛ lɛ we dì Riimɔn lɛ a kion, Dɛnaa Lawa die a sabara baa a bɛa sii lɛ a sã toa ma nɛ.»

¹⁹ Yiliizee Naaman lɛ si á pɛ: «Dɔ n bǐɛ̃ nɛ.» Naaman bɛ́ á woo, a wɔlɔ lui Yiliizee ganaa,

²⁰ Geazi lɛ, Lawa a min Yiliizee a dí-nyali lɛa, bɛ́ taasɛ kɛnɛn: «Maa dɛnaagiĩ bɛ́ á Siirii min Naaman kɛ lɛ toa walan nanaa, a giala, a da ka bǐɛ̃baa ǹ mànan mɛnɛn nɛ, maa dɛnaagiĩ nə́ n piã ǹ nɛ. Dɛnaa Lawa Yiikoonaa lɛ tɔ taman yii, masɛ n die koe a kio lɛ, ma wo màn si la.»

²¹ Geazi a yoo n ka bɛ nɛ, á bɔ á timəə Naaman kio. Naaman bɛ́ á Geazi yɛ a kio baa sii die, á gisĩ fufuu á n bɔ a wotoro la, á woo n da lɛ á pɛ: «Bǐɛ̃ nɛ?»

²² Geazi ná a lɛ si: «Bǐɛ̃ nɛ! Maa dɛnaagiĩ na á ma dia die pii n ni mà Lawa a boo gii-dalin lɛn zaman lɛa kun, mà bɛn min ten paa bɔ Efrayimu kele yii ni, ǹ nə́ daa dɔ asɛ li sisia. Mà n bǐɛ̃ kɔ n wɔrɔ kilo pɔsɔɔ laanka nyaǹ bɔ ǹ mɔnaa màn paa kɔ, asɛ kɔ ǹ la.»

²³ Naaman nə́ n toa: «Wɔrɔ kilo pɔsɔrɔ si koɛ.» Naaman nə́ n laa a ganaa, á wɔrɔ kilo pɔsɔrɔ lɛ laanka nyaǹ bɔ ǹ mɔnaa paa lɛ kaa boroo màn paa nɛ, á ǹ kɔ a dí-nyali min paa la mà ǹ gũ Geazi nyɛɛnɛ.

²⁴ Geazi bɛ́ á dɔ Ofɛli, á boroon lɛn si á ǹ bɔ ǹ gɔn, á woo ǹ kaa a kion, á n gɔn bɔ giĩ min paa lɛ ganaa ǹ nə́ woo.

²⁵ Geazi dinmaa kiɛ̃ á daa golee a dɛnaagiĩ li. Yiliizee tɔ́n nɔ̀n da la: «Geazi, ma n boe maa?» Geazi ná a lɛ si: «Ma wo bǎã kɔn nɛ wa.»

²⁶ Sɛnɛ Yiliizee nə́ n toa a ganaa: «Giĩ goon bɛ́ gisĩ fufuu n boe a wotoro la, die n diɛ n lɛ, masɛ n ma bɛ yɛ sii nyaa-n wa? Wɔrɔ yɛ n biikoo n ka kɛ nɛ ń nə́ boe la ń nə́ mɔnaan pii ni, *olivie dan nɛ, *rezɛ̃ dan nɛ, sèren laanka diin ni, bɛ̀rɛgiĩn laanka bɛ̀rɛlɔn nɛ?

²⁷ Sɛnɛ, Naaman a gɔ̀nɔn ki busu babaraa lɛ n die n din kuĩ denden n laanka n tɔrɔn nɛ, yǎa miɛ̃ duduu.» Bɛ kio, Geazi kiɛ̃ á n bɔ Yiliizee li. Geazi goã gɔ̀nɔn ki busu babaraa dɛnaa lɛa, á kũ á fu kɔ ka koara nɛ.