Kiin2 24 - LAWA A BOO SONBORE

¹ Zoakiimu a biikoo li, *Baabilonii gána a kii Nebukadenezɔɔrɔ soo á woo ziabaa kɔn ka Zoakiimu ni. Zoakiimu ná a wɔ da Nebukadenezɔɔrɔ wɔ gɔ́ɔ̃ nɛ lɛ̀ sɔɔ. Bɛ kio, Zoakiimu nə́ n bɔlɔ bɔyaa, á n gòãn dii Nebukadenezɔɔrɔ ganaa.

² Dɛnaa Lawa tɔ́n Kalde minin dia Zoakiimu gialaa, basaã-kɔlen lɛa, ka Siirii minin wɔn nɛ, ka Moabu minin laanka Amɔn tɔrɔn wɔn nɛ, mà ǹ wo Zudaa gána gialaa. A na á ǹ dia woe Zudaa gána lɛ gialaa, màn mɛn bɛ́ toɛ, ǹ na a bɔ̀n baa a kɔnpɛ ka boo kɛ nɛ, Dɛnaa Lawa goã a ná a dí-nyalin, a boo gii-dalin kɛn kaa a pɛ ganaa.

³ Dɛnaa Lawa din na á toa bɛa sii kɛ lɛ Zudaa gána yɛ. Dɛnaa Lawa lɛ na á goã giɛ li a Zudaa minin lɛn wɔlɔ lui a din-a, Manaasee a sii baraan kɛn tumaa taman yii,

⁴ a goã á zɛ̀rɛbaãnaan mà mɛn kaa á Zeruzalɛmu kiwi gɔ́ɔ̃ pã nɛ, bɛ lɛ dɔ taman yii ni. A giala Dɛnaa Lawa lɛ kɔ á bɛ toa-n wa.

⁵ Zoakiimu sii gialakunun mɛnɛn zɛnaa, a sii mɛn yii zɛnaa, bɛn tá kiɛ̃ nɛ sɛ́wɔ kɛ nɛ boo diɛ Zudaa kiin wɔ gɔn la.

⁶ Zoakiimu gã. A nɛgiĩ Zoakini na á kiibaa zɛnaa a bǎã nɛ.

⁷ Ezipti gána a kii lɛ wusoo á soo á n bɔ a gána-n doo wa. A giala, a saa Ezipti a lɛ̀giala gɔn la tà kɛ ganaa, a wo Efrati tà yaa, màn mɛn yii bɛ́ a wɔ lɛa, Baabilonii gána a kii goã á bɛ yii si la.

Zudaa gána a kii Zoakini

⁸ Zoakini bɛ́ kii biɛ, bɛ̀ a lɛ̀ fulukiwisi ni. Á kiibaa zɛnaa mui sɔɔ Zeruzalɛmu kiwi. Ǹ dan tɔ n Newusetaa, Zeruzalɛmu kiwi min Ɛlnaatan a nɛlɔ nɛ.

⁹ Sii mɛn bɛ́ baraa Dɛnaa Lawa yii li, á bɛ zɛnaa ka ǹ di wɔ bɛ́ lɔn ka te.

¹⁰ Bɛa biikoo lɛ li, Baabilonii gána a kii Nebukadenezɔɔrɔ a dí-nyalin nə́ woo Zeruzalɛmu kiwi gialaa, ǹ ná a lɛnpɛnɛ.

¹¹ Baabilonii gána a kii Nebukadenezɔɔrɔ dinmaa tɔ́n daa kiwi lɛ gialaa, bɛ̀ á zɛnɛɛ, bɛ̀ a dí-nyalin lɛn man a gialaa kiwi lɛ kuĩ.

¹² Zudaa gána a kii Zoakini tɔ́n soo, kun ka ǹ dan nɛ, a dí-nyalin ni, a kiodɛnan nɛ, a sɔraasin goledɛnan nɛ, ǹ nə́ woo n da Baabilonii gána a kii lɛ lɛ. Baabiloniin kii Nebukadenezɔɔrɔ a kiibaa lɛ̀ kiwisibaa ǹ wɔ, á Zoakini baa kòso nɛ lɛa.

¹³ Ka Dɛnaa Lawa goã á pɛ lɔn, Baabilonii gána a kii lɛ Dɛnaa Lawa a kion lɛ a mànan yii goa ka kii a kion mànan nɛ. Izirayeli gána a kii Salomɔn goã, á sana mànan mɛnɛn zɛnaa Lawa a kion wɔ lɛa, á bɛ yii yɔyɔrɛ.

¹⁴ Baabilonii gána a kii lɛ Zeruzalɛmu kiwi min tumaa goa, kii kiodɛnan tumaa nɛ, pàãman tumaa nɛ, á woo ǹ ne bɛ̀rɛbaa ǹ bǎã nɛ. A wo ka min mɛnɛn nɛ, ǹ tumaa a kaa kun min duu fù (10 000), ka da-sɛlɛlin laanka fuũn ni. A na á n zɔ̃ á goã gána lɛ a doobaan dininsɔɔ̃nɔn li.

¹⁵ Nebukadenezɔɔrɔ kii Zoakini saa Zeruzalɛmu kiwi, á woo-n bɛ̀rɛbaa ǹ bǎã nɛ, Baabilonii gána nɛ, ka a náa nɛ, ka a lɔn nɛ, a sɔraasi goledɛnan nɛ, ka gána lɛ a nyɛɛnaandɛnan nɛ.

¹⁶ Zia-baali foo tãnaan kaa kun na á goã min duu sɔbaa (7 000). Da sɛlɛlin laanka fuũn kaa kun na á goã min duu goon (1 000). Sɔraasi kɔsɔn dɔn nə́ goã kunun ǹ ni. Baabilonii gána a kii lɛ woo ka ǹ tumaa nɛ bɛ̀rɛbaa ǹ bǎã nɛ, a gána nɛ.

¹⁷ Matania mɛn nə́ ke Zoakini lɛ dikoɛ lɛa, Baabilonii gána a kii lɛ bɛ koa kii lɛa Zoakini bǎã nɛ. A na á Matania lɛ tɔ bɔyaa á baa Sedekiasi lɛa.

Zudaa gána a kii Sedekiasi

¹⁸ Sedekiasi bɛ́ kii biɛ, bɛ̀ a lɛ̀ fuəwengoon ne, a na á kiibaa zɛnaa lɛ̀ fulugoon Zeruzalɛmu kiwi. Ǹ dan tɔ n Hamutaali, Libnaa kiwi min Yirmeya a nɛlɔ nɛ.

¹⁹ Sii mɛn bɛ́ baraa Dɛnaa Lawa yii li, a na á bɛ zɛnaa ka Zoakiimu bɛ́ lɔn ka te.

²⁰ Bɛa sii kɛ lɛ na á Zeruzalɛmu laanka Zudaa tɔrɔn yɛ, a giala Dɛnaa Lawa foo na á yoo ǹ li, á ǹ wɔlɔ lui a din ganaa. Bɛ kio, Sedekiasi nə́ n gòãn dii Baabilonii a kii lɛ ganaa.