Kiin2 21 - LAWA A BOO SONBORE

Zudaa gána a kii Manaasee

¹ Manaasee bɛ́ kii biɛ, bɛ̀ a lɛ̀ fulupaa nɛ. A na á kiibaa zɛnaa lɛ̀ posoorowensooro Zeruzalɛmu kiwi. Ǹ dan tɔ n Efusibaa.

² Sii mɛn bɛ́ baraa Dɛnaa Lawa yii li, á bɛ zɛnaa. Dɛnaa Lawa goã á tɔrɔn mɛnɛn lɛn loo á ǹ bɔ Izirayeli nɛnyaanan nyɛɛnɛ, ǹ nə́ giã ǹ bǎã nɛ, Manaasee na á goã koe bɛn sii bɔbɔnɛɛn kɛn lɛ.

³ Ǹ di Ezekiasi goã á wúlu bɔ ǹ bǎãn mɛnɛn papaã, asɛ wusoo á bɛn dɔ. Á wúlu bɔ ǹ bǎãn furəə dì *Baali wɔ lɛa. Á bìbì doa, dì Aseeraa nyín lɛa, ka Izirayeli gána a kii Akaabu goã á zɛnaa lɔn. Manaasee kaa tán lon gɔ̀nɔn ganaa ǹ mànan kɛn tumaa giulun á ǹ guguru kɔ.

⁴ Á *wúlu bɔ ǹ bǎã kɔsɔn dɔ Dɛnaa Lawa a kion. Bɛa kion kɛ lɛ nɛ, Dɛnaa Lawa goã á boo da a wɔ paǹ li á pɛ: «Man die n tɔ toɛ Zeruzalɛmu kiwi.»

⁵ Manaasee wúlu bɔ ǹ bǎã kɔsɔn dɔ Dɛnaa Lawa a kion a sumu gɔ́ɔ̃ paa kɛ nɛ, lon gɔ̀nɔn ganaa ǹ mànan tumaa wɔ lɛa.

⁶ A ná a nɛgiĩ baa wúlu màn-tiɛ̃ lɛa. Á boobaa ǹ dí nya, á kɔ́lɔn-baa ǹ siin zɛnaa, wɔ kũ ǹ siin ni ka nyín bíi ǹ dí ni. Siin mɛnɛn bɛ́ baraa Dɛnaa Lawa yii li, Manaasee na á bɛn lɛn dinin zɛnaa á la yii ni, á Dɛnaa Lawa foo yoo.

⁷ A goã á Aseeraa nyín mɛn zɛnaa, á bɛ da kion kɛ nɛ, Dɛnaa Lawa goã á ná a boo da Davida laanka a nɛgiĩ Salomɔn nɛ mà asɛ n die n din tɔ toɛ kion kɛ nɛ duduu Zeruzalɛmu kiwi, asɛ kiwi mɛn lɛ yii gɔgɔɔ̃ Izirayeli tɔrɔn bǎãn tumaa bii.

⁸ Ka bɛ dɔ nɛ, mà asɛ ba re Izirayeli minin lɛn kiɛ binbirin bɔ ganaa, ǹ wɔlɔ n lui ni tán kɛ ganaa asɛ kɔ ǹ digolon la wa. Mà asɛ gɔn waa ǹ boon mɛnɛn tumaa pɛ ǹ nɛ, mà yǎa ǹ nə n yiri koɛ bɛn lɛn li, ǹ nə ǹ tamaa, ka dí-pɛn kɛn tumaa nɛ asɛ a dí-nyali Muizu kɔ ǹ la.

⁹ Sɛnɛ, ǹ nə n too kɔ wa. Dɛnaa Lawa goã, á tɔrɔn mɛnɛn bɔ̀n baa, á ǹ bɔ Izirayeli minin lɛn nyɛɛnɛ, Manaasee Izirayeli minin lɛn kaa sii baraa zɛnaa ganaa á la bɛn dinin manɛ.

¹⁰ Dɛnaa Lawa a dí-nyalin kɛn a boo gii diɛ, á bɛn kaa a pɛ ganaa kɛnɛn:

¹¹ – Zudaa gána a kii Manaasee sii bɔbɔnɛɛn zɛnaa. Á sii baraa zɛnaa á la Amɔɔrɔ tɔrɔn sii baraan kɛn tumaa nɛ, ǹ nə́ zɛnaa a nyɛɛnɛ lɛlɛ. Á Zudaa minin dɔn kaa sii baraa zɛnaa ganaa ka ǹ dìn ni,

¹² bɛ lɛ taman yii ni, Izirayeli a Lawa, Dɛnaa Lawa n kɛ pii: «Á ke, masɛ n die koe boe Zeruzalɛmu laanka Zudaa ganaa, a boo bɛ́ re kiɛ min woo min too ne, ǹ dɛnaa gɔ̀nɔn tá re n sii la.

¹³ Man die Samarii kiwi tele ǹ biɛ kɛ laanka Akaabu a kion minin tele ǹ màn kɛ diɛ Zeruzalɛmu kiwi li. Man die Zeruzalɛmu tuturi ka ǹ bɛ́ tasa tuturi lɔn, ǹ saa ǹ na a lɛ kuməə tán.

¹⁴ Zaman gialakun ke maa wɔ lɛa man die n gɔn boe bɛn ganaa. Man die ǹ we ǹ zɔ́ɔn gɔn. Ǹ tá re ǹ zɔ́ɔn tumaa a dù biɛ, ǹ nə ǹ zia màn dɔ baa.

¹⁵ A giala sii mɛn bɛ́ baraa masɛ yii li, maǹ nə́ bɛ zɛnaa. Ka bɛ dɔ nɛ, a kũ ka digolon soo a bɔ Ezipti gána-n pinaa kɛ ganaa, a da dɔ pelo ganaa, ǹ wɔ ma lon lɛ da wa.»

¹⁶ Manaasee zɛrɛbaãnaa gigiã dɔ mà kaa tán, yǎa Zeruzalɛmu gɔ́ɔ̃ yii pã ka mà nɛ. Bɛ̀ á yoo bɛ la, sii mɛn bɛ́ baraa Dɛnaa Lawa yii li, a na á Zudaa minin lɛn kaa bɛa zɛnaa ganaa.

¹⁷ Manaasee sii gialakunun mɛnɛn zɛnaa, a sii mɛn tumaa zɛnaa, a sii baraa mɛn zɛnaa, bɛ tá kiɛ̃-n sɛ́wɔ kɛ nɛ boo diɛ Zudaa kiin wɔ gɔn la.

¹⁸ Manaasee gã, ǹ ná a gere bĩ tán a kii kion dù gɔrɔ-n, Uzaa a dù gɔrɔ ke. A nɛgiĩ Amɔn na á kii baa a bǎã nɛ.

Zudaa gána a kii Amɔn

¹⁹ Amɔn bɛ́ kii biɛ, bɛ̀ a lɛ̀ fuəwenpaa nɛ. A na á kiibaa zɛnaa lɛ̀ paa Zeruzalɛmu kiwi. Ǹ dan tɔ n Mesulemɛti. Zoatibaa kiwi min Arusi a nɛlɔ nɛ.

²⁰ Sii mɛn bɛ́ baraa Dɛnaa Lawa yii li, Amɔn na á bɛ zɛnaa, ka ǹ di Manaasee bɛ́ lɔn.

²¹ Ǹ di goã tɔ wɔ ǹ gɔn mɛn la, a dɔ bɛ saa ka te. Ǹ di goã á dìn mɛnɛn guguru kɔ, a dɔ kaa tán bɛn giulun, á ǹ guguru kɔ.

²² Á ǹ din Lawa, Dɛnaa Lawa lɛ toa walan. A kɔ Dɛnaa Lawa a zii lɛ wa.

²³ Kii Amɔn lɛ a dí-nyalin nə́ ga a bɔ a daa ǹ gɔn li, ǹ nə́ dɛ a piɛ, a kii kion.

²⁴ Sɛnɛ min mɛnɛn tumaa kii lɛ bɔ ǹ nə́ daa, gána lɛ a minin nə́ bɛn yii dɛ, ǹ nə́ tɔ́n na a nɛgiĩ Zoziasi koa a bǎã-n kii lɛa.

²⁵ Amɔn sii gialakunun mɛnɛn zɛnaa, a màn mɛn zɛnaa, bɛ tá kiɛ̃ nɛ sɛ́wɔ kɛ nɛ boo diɛ Zudaa kiin wɔ gɔn la.

²⁶ Ǹ ná a gere bĩ a yala-n, Uzaa a dù gɔrɔ kɛ nɛ. A nɛgiĩ Zoziasi na á kii baa a bǎã nɛ.