Kiin1 7 - LAWA A BOO SONBORE

Kii kion lɛ a doe

¹ Salomɔn lɛ̀ fulusɔɔ bɔ a dinmaa dɔ a kion doe la, á tɔ́n na a yii dɔ á nya.

² Kion mɛn bɛ́ ǹ tá bíi "Liban daã kion" Salomɔn goã á bɛ dɔ. A gùrù sasa na á goã mɛtərə posooro a gùrù kunu na á goã mɛtərə fuəwensooro, a wo lon na á goã mɛtərə fulusooro. Ǹ goã ǹ nə́ dɔ bìbìn mɛnɛn la, kɔn nyanlɛ li zii sii, bɛn man nə́ goã da kaka gɔn lɛa, ka bɛ dɔ nɛ, mɛnɛn mɛnɛn nə goã bìbìn lɛn la, bɛn dɔn man nə goã a din da kaka gɔn lɛ lɛa.

³ Kion lɛ goã bìbìn mɛnɛn la, bɛn man pusiweensooro, maǹ nə́ goã kɔn nyanlɛ li fùlu sosooro.

⁴ Fenɛtərən man nə́ goã kɔn nyanlɛ li zii sɔɔ kion lɛ paǹ gogoonmaa ganaa. Fenɛtərə lɛ a gogoonmaa yɔrɔ na á goã dia nɛ, ǹ miã kɔsɔ la.

⁵ Kiɛnlɛn lɛn tumaa laanka gɔnɔn mɛnɛn lɛn bɛ́ ǹ kuĩ gole ne, bɛn man gùrù sii zɛnɛ kɔnlɛ lɛa. Ǹ yɔrɔ na á goã dia-n kɔnla bǎã sɔɔ nɛ.

⁶ Bɛ kio, Salomɔn kion nɛ kɔn dɔ, ǹ nə́ bii mà bìbìn kion. A gùrù sasa na á goã mɛtərə fuəwensooro a gùrù kunun na á goã mɛtərə fulusooro. Bɛ n dàã lɛa, bìbìn ná a nɛ, kion lɛ a wɔ ǹ bǎã nɛ.

⁷ Salomɔn kion nɛ kɔn dɔ dɔ, ǹ nə́ bíi mà "kii kion", a tɔ kɔsɔ dɔ n "kiri wɔ ǹ kion", a giala, walan lɛ nɛ, Salomɔn goã kiri kuri. Ǹ nə́ goã ǹ nə́ da kaka gɔn naa bɛa kion lɛ gɔ̀nɔn ganaa, á saa a tán ganaa á woo a pele yaa.

⁸ Salomɔn goã kion mɛn nɛ, bɛ na á goã sumu kɔsɔ nɛ, a goã sumu goon ne ka kion kɛ lɛ nɛ ǹ nə́ bíi "kii kion" wa. Sɛnɛ a dɔ ǹ gɔn na á goã goon ka "kii kion" lɛ wɔ nɛ. Salomɔn goã á *Faarahɔn a nɛlɔ mɛn saa lɔ lɛa, á kion dɔ á kɔ la. Bɛa kion lɛ a dɔ ǹ gɔn na á goã goon ka "kii kion" lɛ nɛ.

⁹ Bɛa kionən kɛn lɛn tumaa, ǹ nə́ ǹ dɔ, maǹ nə́ kɔlɔ gɔgɔɔ̃ sɔnbɔraa nɛ, ǹ nə́ ǹ dɔ nɛ. Ǹ bɛ́ kɔlɔ sɛlɛ ǹ doa lɔn, maǹ nə́ bɛa kɔlɔn lɛn dɔn sɛlɛ miɛ̃. Maǹ nə́ ǹ kanaa wàã laanka ǹ gɔ́ɔ̃ wàã kuru ka kàka nɛ. Maǹ nə́ kionən lɛn dɔ ka bɛa kɔlɔn lɛn nɛ, a saa ǹ giala wɔ ganaa tán yǎa ǹ mɛnɛn kaa ǹ bǎã-n lon. Maǹ nə́ sumu gole lɛ a kungɔnɔn dɔ ka bɛa kɔlɔn lɛn nɛ.

¹⁰ Maǹ nə́ kionən lɛn giala wɔ ka kɔlɔ dadara sonboren ne, ǹ tɛnɛn man mɛtərə sooro, gialakunun man mɛtərə sii.

¹¹ Bɛa kion giala wɔ lɛ la, ǹ nə́ kɔlɔ-sɛlɛ kɔsɔn koa la, ka da kaka gɔn dɔ nɛ.

¹² Kungɔn mɛn bɛ́ pɛnɛɛ nɛ sumu gole lɛ ganaa, maǹ nə́ goã ǹ nə́ bɛ dɔ ka kɔlɔ sɛlɛɛ laanka da kaka gɔn nɛ. Bɛ̀ kɔlɔ sɛlɛɛ lɛ a koa dɔ sɔɔ, maǹ da kaka gɔn we a biin ni. Maǹ nə́ goã ǹ nə́ Dɛnaa Lawa a kion lɛ a sumu laanka a dàã dɔ dɔ miɛ̃.

Dí mɛn nə n wɔ Iraamu gɔn

^13-14 Kii Salomɔn minin dia woe giɛ dí-nyali goon li Tiiri kiwi, a tɔ n Iraamu. Lɔ giɔɔrɔ goon a nɛ nɛ, Nɛfutalii tɔrɔ n ka bɛa lɔ lɛ nɛ. Iraamu ǹ di n Tiiri min lɛa. Iraamu na á goã zan dí nyɛɛ, yiri goã a lon taãn-taãnɛ a gɔn kaa zan dí tɔrɔ tumaa nɛ. Á daa kii Salomɔn li á ná a zan dí tumaa nya.

Lawa a kion a zan bìbìn

¹⁵ Iraamu zan bìbì màn paa bɔ Lawa a kion lɛ a dàã a kiɛnlɛ nyɛɛn wɔn lɛa. Gogoonmaa a wo lon nə mɛtərə manangɔrɔ, gogoonmaa a luriibaa n mɛtərə sɔrɔ.

¹⁶ Iraamu màn màn paa kɔn zɛnaa ka zan nɛ, bɛa mànan lɛn doamaa nɛ, ǹ nə n kaa bìbìn lɛn mìi-n lon nyaǹ lɛa. Bɛa mànan lɛn gogoonmaa a wo lon nə mɛtərə paa ka talɛɛ.

¹⁷ Mànan mɛnɛn bɛ́ bìbìn lɛn mìi-n lon nyaǹ lɛa, Iraamu wusoo doo á mànan là kekerekaã tɛmɛ lɛa, á biɛ doron doron nyín zɛnaa doedoe-n kɔn lɛ ka zɔrɔka bɛ́ lɔn, á ǹ kaa n gogoonmaa ganaa sɔsɔbaa.

¹⁸ Iraamu grenadie da nɛ nyínin zɛnaa nyaǹ lɛa á ǹ zii bɔ, tɛmɛn lɛn gogoonmaa ganaa bǎã paa, á ná a lɛnpɛnɛ nɛ. Mànan mɛnɛn nə n kaa bìbìn lɛn mìi-n lon nyaǹ lɛa, tɛmɛ wɔrɛɛn lɛn doamaa nɛ, ǹ nə n kɔ bɛn gogoonmaa lɛ.

¹⁹ Mànan mɛnɛn nə goã Lawa a kion a dàã lɛ a bìbìn mìi-n lon nyaǹ lɛa, bɛn sɛn man nə́ goã boe ne da buũ li, ǹ wo lon na á goã mɛtərə paa.

²⁰ Mànan mɛnɛn nə ǹ kaa bìbì màn paa lɛ mìi-n lon nyaǹ lɛa, maǹ nə́ bɛ gogoonmaa wɔrɔ a nɔ̀ bɔ ǹ bǎã ganaa tɛmɛ lɛ lalan, ka grenadie da nɛ nyín biɛpaa (200) nɛ, ǹ ná a lɛ dɛ nɛ.

²¹ Iraamu bìbì màn paa lɛ kaa ǹ giala la lon, Lawa a kion a dàã genli. Bìbì lɛ mɛn bɛ́ dia-n woe gusin la, á bɛ bíi mà Yaakini "Lawa n pàã koe", ǹ mɛn bɛ́ dia-n woe gɔsɛ la á bɛ bíi mà Boazi "pàã n Lawa lon".

²² Mànan mɛnɛn nə goã bìbìn lɛn mìi-n lon nyaǹ lɛa, bɛn man nə́ goã boe ne da buu li. Bìbìn lɛn dí mìi nə́ n tã doɛ̃.

Zan doo golee

²³ Iraamu fɔlɔ yo á bɔ doo kaaraa lɛa ǹ nə́ bíi "yìsi mu gole". Doo lɛ na á goã buurii ni, a lɛ a yaasaabaa n mɛtərə sooro, a là a wo lon nə mɛtərə paa ka talɛɛ a luuriibaa n mɛtərə fulusooro.

²⁴ Tɔnɔn nyaǹan man nə́ goã doo kaaraa lɛ lɛ kìri da ǹ bǎã giulun ganaa tɛtɛmɛ, ǹ ná a lɛ dɛ. Mɛtərə talɛɛ gogoonmaa a tɔn na á goã fù. Tɔnɔn nyaǹan lɛn man nə́ goã kɔn nyanlɛ li zii paa. Maǹ nə́ ń zɛnaa kun ka doo lɛ nɛ, ǹ nə́ n baa goon.

²⁵ Doo kaaraa lɛ giala na á goã, dii nyín fulupaa dɔ̀ɔ̃ nɛ. Dii lɛ a sɔɔ yɔrɔ na á goã dia-n gɔsɛ a lɛ̀gɔn la, a sɔɔ yɔrɔ na á goã dia-n lɛ̀nyɛɛn li, a sɔɔ yɔrɔ na á goã dia-n gusin a lɛ̀gɔn la, a sɔɔ dɔ yɔrɔ na á goã dia-n lɛ̀giala li. Doo kaaraa lɛ na á goã dii nyínin lɛn dɔ̀ɔ̃ nɛ, ǹ giala n nə́ we-n kɔn nɛ.

²⁶ Doo lɛ gɔ̀nɔn a pəməbaa na á goã ka gɔn tìsì a pəməbaa bɛ́ lɔn. A lɛ kiri na á goã golongolon ka da buũ wɔ bɛ́ lɔn lɔɔlɔɔ ka kaaran bɛ́ lɔn. Doo lɛ yii goon tá doe litiri duu pɔkiwisi (80 000) kɛ miã.

Zan wotoron

²⁷ Bɛ kio Iraamu wotoro fù zɛnaa ka zan nɛ. Wotoro lɛ gogoonmaa a sasabaa n mɛtərə paa, a kununbaa n mɛtərə paa, a wo lon nə mɛtərə goon ka talɛɛ.

²⁸ Bɛa wotoron lɛn zɛnaa ǹ gɔn nə goã lɔn bɛ á ke: Maǹ nə́ zan zɛnaa pəpəmə, zan bàlàn la kekerekaã gɔ́ɔ̃ nɛ, ǹ nə́ ǹ zɛnaa nɛ.

²⁹ Bɛa zan pəpəmə kɛn lɛn, zan bàlà la kekerekaãn lɛn gɔ́ɔ̃ nɛ, yàra nyínin man nə́ goã ǹ la, ka dii gɔ̀lɔ̀ nyínin laanka lon màn yiikoonaa nyínin ni. Zan bàlà la kekerekaãn mɛnɛn bɛ́ yàra nyínin lɛn laanka dii gɔ̀lɔ̀ nyínin lɛn lalan ka ǹ giulun ni, nyaǹ goã bɛn dɔn la.

³⁰ Wotoro lɛ gogoonmaa gòã na á goã sii, maǹ nə́ ǹ zɛnaa ka zan nɛ. Bàlàn mɛnɛn bɛ́ gòãn lɛn kuĩ ǹ doɛ kɔn, bɛn dɔn man zan lɛa. Ǹ nə́ mànan zɛnaa bɛn nə́ pàã koe gòã sii lɛ la. Maǹ nə́ fɔlɔ yo ǹ nə́ bɛa mànan lɛn zɛnaa nɛ wotoro tɔ́n lɛ giulun ganaa, nyaǹ bɛ́ a ba a bǎã mɛn ganaa wa.

³¹ Wotoro gogoonmaa la, màn lɛ koo-a buurii tá la. A lɛ a goleebaa dɔ santimɛtərə pɔsɔbaa ka sooro, a wo lon nə santimɛtərə posooro. Doo giala da ǹ bǎã nɛ. Iraamu màn nyínin zɛnaa ǹ la. A giala ke tán bɛ gùrù n sii pepere, zɛnɛɛ-n kɔn lɛ. A bie buurii wa.

³² Wotoro gòã sii lɛ na á goã zan bàlà kekerekaãn lɛn giulun. Bàlàn mɛnɛn bɛ́ gòãn lɛn kuĩ ǹ doɛ kɔn, bɛn man doa-n wotoro lɛ ganaa. Wotoro gòã lɛ gogoonmaa a wo lon nə santimɛtərə pɔsɔbaa.

³³ Maǹ nə́ goã ǹ nə́ gòãn lɛn zɛnaa ka zia da ǹ wotoro wɔn bɛ́ lɔn. Bàlàn mɛnɛn bɛ́ gòãn lɛn kuĩ ǹ doɛ kɔn, bɛn nɛ, ka ǹ zantin ni, ǹ yiriyonɔn nɛ, ǹ moyoon ne, maǹ nə́ zan yo ǹ nə́ bɛ yii zɛnaa nɛ.

³⁴ Mànan mɛnɛn nə goã wotoron lɛn kara sii gogoonmaa ganaa, pàã koe a gòãn lɛn la, bɛn man nə́ goã damiɛ̃ nɛ wotoro lɛ ganaa.

³⁵ Gagana goã wotoro lɛ gogoonmaa mìi-n lon, a buuriibaa dɔ santimɛtərə posooro. Wotoron lɛn lon wɔlɔ-a, kũ ǹ bǎãn dɔn nə goã ǹ tan, ǹ nə́ ǹ yii zɛnaa kun ka wotoro lɛ nɛ.

³⁶ Gagana mɛn bɛ́ wotoron lɛn mìi-n lon, Iraamu lon màn yiikoonaan nyínin zɛnaa la, ka yàra nyínin laanka sèwo da nɛ nyínin ni. Á nyaǹ kaa la á ná a lɛnpɛnɛ nɛ.

³⁷ Iraamu na á wotoro fù lɛ zɛnaa yɔrɔ kɛ lɛ tɔrɔ la: wotoron lɛn tumaa a zɛnaa ǹ fɔlɔ n goon, ǹ tumaa na á kɔnpɛ ǹ nə́ bɔ kɔn li.

³⁸ Iraamu doo kaaraa fù zɛnaa ka zan nɛ. Doo kaaraa lɛ gogoonmaa yii tá doe litiri duu goon ka biɛsɔrɔ (1 600) kɛ miã, a yaasqabaa n mɛtərə paa. A na á bɛa doo kaaraan lɛn zɛnaa wotoro fù lɛ gogoonmaa wɔ lɛa.

³⁹ Bɛ kio Iraamu wotoro lɛ a sooro kaa Lawa a kion lɛ gɔ́ɔ̃ nɛ, gusin, á ná a sooro dɔ kaa gɔsɛ. Lawa a kion lɛ a wàã mɛn bɛ́ dia-n gusin la, a na á doo kaaraa lɛ sɛ da tán walan, dia-n woe lɛ̀giala gisi ganaa.

Zan mànan lɛn tɔ

^40-45 Iraamu tàanan dɔn zɛnaa, ka lasanan laanka mà pɛsɛ̃ ǹ tàanan nɛ. Iraamu doamaa bɛ́ nɛ a dí mɛn nya kii Salomɔn nɛ, Dɛnaa a kion lɛ ganaa, á bɛ yii mìi tã. A mànan mɛnɛn zɛnaa bɛn nə́ ke: Bìbì paa kɛ nɛ, mànan mɛnɛn bɛ́ bìbìn lɛn mìi-n lon nyaǹ lɛa, bɛn màn pooreen kɛn manɛ, ka màn la kekerekaãn kɛn nɛ, màn pooreen lɛn kɔmalɛ ǹ wɔn lɛa. Grenadie da nɛ nyín biɛsii (400) kɛ nɛ, ǹ nə́ nyaǹ mànan kɛn lɛ dɛ nɛ, bìbìn lɛn mìi ni. Wotoro fù kɛ nɛ, Tan fù kɛ nɛ, doo kaaraa kɛ nɛ, dii gɔ̀lɔ̀ fùlupaa kɛ nɛ, doo kaaraa lɛ giala n diɛ nɛ ǹ la. Tàanan kɛn manɛ, ka lasanan kɛn laanka mà pɛsɛ̃ ǹ mànan kɛn nɛ. Bɛa mànan kɛn lɛn tumaa Iraamu nə́ ǹ zɛnaa á ǹ kɔ kii Salomɔn la, Dɛnaa Lawa a kion lɛ wɔn lɛa, ǹ tumaa n zan lɛa zɔnɛɛ nɛ.

⁴⁶ Zurdɛ̃ tà lɛ-a bǎã nɛ, Sukɔti kiwi laanka Saretan kiwi bii ni, kii lɛ nə́ ǹ kaa bɛa mànan kɛn lɛn tumaa boe ganaa gì dɔnɔn nɛ.

⁴⁷ Salomɔn bɛa mànan lɛn zɛnaa, sɛnɛ ǹ gigiãbaa taman yii ǹ zan lɛa gugurubaa zɔɔ̃ wa.

Sana mànan

⁴⁸ Mànan mɛnɛn tumaa doamaa bɛ́ nɛ, ǹ nə ǹ kaa Lawa a kion lɛ nɛ, Salomɔn bɛn dɔn zɛnaa: Màn gìĩ kɔɔ̃n tã ǹ bǎã kɛ nɛ sana lɛa, tabala kɛ nɛ sana lɛa, ǹ tá Lawa gɔ ǹ buuru diɛ la.

⁴⁹ Bólon da ǹ bǎã kɛ nɛ, sana yoreen yoreen lɛa. Maǹ nə́ ǹ kaa bǎã sonbore sonbore lɛ nyɛɛnɛ, a sooro n gusin li, a sooro dɔ n gɔsɛ li. Nyaǹan kɛn manɛ, ka da buũ bɛ́ lɔn sana lɛa, bólonən kɛn manɛ sana lɛa, bólon tɛ zɛnaa ǹ banbaalan kɛn manɛ sana lɛa.

⁵⁰ Tanan kɛn manɛ, sana gɔyan kɛn manɛ, mà pɛsɛ̃ ǹ mànan kɛn manɛ, kaaranan kɛn manɛ, da yon gìĩ kɔɔ̃n tã ǹ mànan kɛn nɛ. Ǹ tumaa n sana yoreen yoreen lɛa. Kiɛnlɛn mɛnɛn bɛ́ woe niɛ̃ bǎã sonbore sonbore lɛ gɔ́ɔ̃ nɛ, kiɛnlɛn lɛn mɛnɛn dɔn bɛ́ die kion gɔ́ɔ̃ gole lɛ-a, ǹ bɛ́ tàanan mɛnɛn la, bɛn man sana lɛa.

⁵¹ Kii Salomɔn goã á dí mɛn yii nya Dɛnaa Lawa a kion lɛ ganaa, bɛ yii mìi tã sɔnbɔraanɛ. Ǹ di Davida goã á mànan mɛnɛn kɔ Lawa la, á bɛn goa á daa ǹ kaa Dɛnaa Lawa a kion mànan li. A mànan mɛnɛn lɛn goa á daa ǹ nɛ, sana tan, wɔrɔ tan ka dí nya ǹ mànan nɛ.