Kiin1 15 - LAWA A BOO SONBORE

Zudaa gána a kii Abiyamu

¹ Nebaati a nɛgiĩ, Zeroboamu a kiibaa a lɛ̀ fulukiwisi-baa ǹ wɔ, Abiyamu kii baa Zudaa gána mìi la.

² A na á kiibaa zɛnaa lɛ̀ sɔɔ Zeruzalɛmu. Ǹ dan tɔ na á goã Maakaa, Abusalɔn a nɛlɔ nɛ.

³ Abiyamu ǹ di goã á sii baraan mɛnɛn zɛnaa a nyɛɛnɛ, a dɔ́ bɛn miãn zɛnaa. A na a Lawa, Dɛnaa Lawa lɛ narɛ ka a foo din tumaa nɛ, ka ǹ digolo Davida wɔ bɛ́ lɔn wa.

⁴ Sɛnɛ Davida lɛ taman yii, Abiyamu a Lawa, Dɛnaa Lawa lɛ nɛginin kɔ la, mà bɛ̀ a banban wa, mà bɛ die a na a kíɛ̃-saali baa Zeruzalɛmu, màn mɛn bɛ́ toɛ Zeruzalɛmu kiwi lɛ goã.

⁵ Dɛnaa Lawa na á bɛ zɛnaa, a giala, sii mɛn bɛ́ pepere a yɔrɔ-a Davida na á goã bɛ zɛnɛɛ. Davida a yiikoonaabaa tumaa gɔ́ɔ̃ nɛ, Dɛnaa Lawa goã dí-pɛn mɛnɛn koe la, a goã n piɛ̃ ka bɛ kɔn nɛ wa. Bɛ̀ á n bɔ Ɛti tɔrɔ, Urii a sii kɛ nɛ.

⁶ Roboamu a yiikoonaabaa tumaa gɔ́ɔ̃ nɛ, a na á goã zia la kɔn ka Zeroboamu-n miɛ̃.

⁷ Abiyamu sii gialakunun mɛnɛn zɛnaa, a màn mɛn din tumaa zɛnaa, bɛ yii tá kiɛ̃-n sɛ́wɔ kɛ nɛ boo diɛ Zudaa kiin wɔ gɔn la. Abiyamu dɔ goã zia la kɔn ka Zeroboamu ni.

⁸ Abiyamu gã ǹ ná a gere bĩ "Davida a kiwi". A nɛgiĩ Azaa na á kii baa a bǎã nɛ.

Zudaa gána a kii Azaa

⁹ Izirayeli gána a kii, Zeroboamu a kiibaa a lɛ̀ fuəbaa ǹ wɔ, Azaa Zudaa gána a kii baa.

¹⁰ A na á kiibaa zɛnaa lɛ̀ pusiwengoon, Zeruzalɛmu. Ǹ dan gole tɔ na á goã Maakaa, Abusalɔn a nɛlɔ nɛ.

¹¹ Sii mɛn bɛ́ peperee Dɛnaa Lawa yɔrɔ-a, Azaa na á bɛ zɛnaa ka ǹ digolo Davida zɛnaa lɔn.

¹² Azaa wo dìn la ǹ kɔrɔbaa-zɛnaalin loo á ǹ bɔ gána lɛ nɛ. Dìn mɛnɛn tumaa bɛ́ Azaa lɛ digolon nə́ ǹ zɛnaa, á bɛn yii papaã.

¹³ Á ǹ dan gole Maakaa a kii a lɔbaa din si la, a giala a na á goã á dì kooro Aseeraa kɛ nyín zɛnaa. Azaa na á dì lɛ ziziɛ̃ á tɛ da a ganaa Sedrɔn nyankɔrɔ lɛ kɛ nɛ.

¹⁴ A laanɛ Azaa dì wúlu bɔ ǹ bǎãn kɛn papaã wa, a na á goã Dɛnaa Lawa narɛ ka a foo din tumaa nɛ, a yiikoonaabaa tumaa gɔ́ɔ̃ nɛ.

¹⁵ Ǹ di goã á mànan mɛnɛn kɔ Lawa la, ka Azaa din dɔ nə ǹ mɛnɛn kɔ la, sana nɛ, wɔrɔ nɛ, ka màn kɔsɔn nɛ, Azaa woo ka bɛn nɛ Dɛnaa Lawa a kion.

¹⁶ Zia na á goã Izirayeli gána a kii Bayesaa laanka Azaa bii ni miɛ̃, ǹ yiikoonaabaa tumaa gɔ́ɔ̃ nɛ.

¹⁷ Izirayeli gána a kii Bayesaa woo kɔ Zudaa gána lɛ ka zia nɛ. Á kungɔn dɔ Ramaa kiwi ganaa, màn mɛn bɛ́ toɛ a zii tã Zudaa gána a kii Azaa ganaa.

¹⁸ Ǹ sana gialakun mɛn laanka wɔrɔ gialakun mɛn tumaa toa Lawa guguru kɔ ǹ kion laanka kii a kion ne, Azaa tɔ́n bɛn goã. Kii Azaa lɛ bɛ́ á ǹ goa, á ná a dí-nyalin dia mà ǹ wo kɔ Siirii gána a kii Bɛn-Adaadi la giã-n Damaasi kiwi. Bɛn-Adaadi lɛ n Toabirimɔn a nɛgiĩ lɛa, Ezion a nɔ̀ɔn nɛ. Azaa bɛ́ a dí-nyalin lɛn diɛ, a na á bɔlɔ kɛ pɛ ǹ nɛ:

¹⁹ «Lɛ-kɔ tá masɛ laanka n din Bɛn-Adaadi bii ni, ka lɛ-kɔ goã ma di laanka n di bii lɔn. Wɔrɔ laanka sana á ke ma á bǐɛ̃ biɛ n la nɛ. Woo, n laanka Izirayeli gána a kii Bayesaa a lɛ-kɔ ke, n bɛ ziziɛ̃ màn mɛn bɛ́ toɛ, a baran da ma gialaa ka zia-n wa.»

²⁰ Bɛn-Adaadi lɛ lɛ kɔ kii Azaa a boo lɛ ganaa. Á ná a sɔraasin nyɛɛnaadɛnan dia woe Izirayeli gána a kiwin gialaa. Ǹ nə́ Iyɔn kiwi kũ, Dan kiwi ni, Abeli-Bɛti-Maakaa kiwi ni, Kinerɛti bǎã tumaa nɛ, ka Nɛfutalii gána kuturu ni.

²¹ Bayesaa bɛa boo lɛ ma lɔn gɔrɔ, a bɛ́ kungɔn mɛn doe Ramaa kiwi ganaa, á bɛa doe lɛ da á woo Tirsaa kiwi.

²² Bɛ kio kii Azaa tɔ́n lɛ dia Zudaa gána minin tumaa la, a min lɛ bɔ á da wa. Bayesaa goã kungɔn doe Ramaa kiwi ganaa ka kɔlɔn laanka gɔnɔn mɛnɛn nɛ, ǹ nə́ woo ǹ goa Raamaa ǹ nə́ daa ǹ nɛ. Kii Azaa bɛa kɔlɔn lɛn laanka bɛa gɔnɔn lɛn goã á kungɔn dɔ nɛ, Misipaa kiwi ganaa, ka Gebaa kiwi kɛ nɛ, Bɛnzamɛn tɔrɔn tán la.

²³ Azaa sii gialakunun mɛnɛn tumaa zɛnaa, a tɔ bɔ ǹ siin mɛnɛn tumaa zɛnaa, a màn mɛn yii zɛnaa, a kiwin mɛnɛn koa, bɛ yii tá kiɛ̃ nɛ sɛ́wɔ kɛ nɛ, boo diɛ Zudaa kiin wɔ paǹ li. Sɛnɛ, gòã busii na á Azaa kũ, a zizimaa.

²⁴ A bɛ́ á gã, ǹ nə ǹ digolon bĩ maa, ǹ ná a dɔ bĩ walan, ǹ digolo "Davida a kiwi". A nɛgiĩ Zozafati na á kii baa a bǎã nɛ.

Izirayeli gána a kii Naadaabu

²⁵ Zudaa gána a kii Azaa a kiibaa lɛ̀ paabaa ǹ wɔ, Zeroboamu a nɛgiĩ Naadaabu kii baa Izirayeli gána mìi la. A na á kiibaa zɛnaa lɛ̀ paa Izirayeli gána mìi la.

²⁶ Sii mɛn bɛ́ baraa Dɛnaa Lawa yii li, Naadaabu bɛ zɛnaa. A na á kɔ ǹ di a nya ǹ dín lɛ. Ǹ di goã á Izirayeli minin kaa sii baraa-n lɔn, a dɔ́ zɛnaa miɛ̃.

²⁷ Isakaara tɔrɔ, Ayia a nɛgiĩ Bayesaa ga Naadaabu bɔ a daa ǹ gɔn li. Naadaabu laanka Izirayeli minin tumaa bɛ́ ǹ nə́ goã Filisiti minin kiwi Guibetɔn kɛ gialaa, ǹ nə́ die kuĩ, bɛa biikoo lɛ nɛ, Bayesaa gɔn dɔ Naadaabu ganaa á dɛ.

²⁸ Zudaa gána a kii Azaa a kiibaa a lɛ̀ sɔɔbaa ǹ wɔ nɛ, Bayesaa Naadaabu dɛ, á giã a bǎã-n kiibaa la.

²⁹ A bɛ́ á kii baa lɔn gɔrɔ, á Zeroboamu a kion minin tumaa dɛ. A Zeroboamu a min kɔn yii toa ko o wa. A na á n zɛnaa á kɔnpɛ ka Dɛnaa Lawa a boo kɛ nɛ, a goã a ná a dí-nyali, Siiloo min Ayia da ǹ mɛn lɛ a pɛ ganaa,

³⁰ Zeroboamu a sii baraan wɔ paǹ li. Zeroboamu goã á sii baraa mɛnɛn lɛn zɛnaa ka kɛn lɛn nɛ á Izirayeli minin kaa ǹ zɛnaa ganaa, á wɔ Izirayeli a Lawa, Dɛnaa Lawa lon ne.

³¹ Naadaabu sii gialakunun mɛnɛn zɛnaa, a màn mɛn yii zɛnaa, bɛ tá kiɛ̃-n sɛ́wɔ kɛ nɛ, boo diɛ Izirayeli kiin wɔ paǹ li.

³² Zia na á goã Azaa laanka Izirayeli gána a kii Bayesaa bii ni, ǹ yiikoonaabaa tumaa gɔ́ɔ̃ nɛ.

Izirayeli gána a kii Bayesaa

³³ Zudaa gána a kii Azaa a kiibaa lɛ̀ sɔɔbaa ǹ wɔ, Ayia a nɛgiĩ Bayesaa kii baa Izirayeli gána kuturu mìi la, lɛ̀ fuəwensii Tirsaa kiwi.

³⁴ Sii mɛn bɛ́ baraa Dɛnaa Lawa yii li, á bɛ zɛnaa, á kɔ Zeroboamu a nya ǹ dín lɛ. Zeroboamu goã á Izirayeli minin kaa sii baraa-n lɔn, a dɔ́ zɛnaa miɛ̃.