Kiin1 13 - LAWA A BOO SONBORE

Lawa a boo gii-dalin goon nə boo diɛ Betɛli a wúlu bɔ ǹ bǎã ganaa

¹ Sɛnɛ, Dɛnaa Lawa boo da ka a boo gii-dali goon ne, á n toa Zudaa gána nɛ á woo Betɛli. A bɛ́ doe Betɛli, bɛ̀ Zeroboamu n da yon giĩ kɔɔ̃n tiɛ̃ *wúlu bɔ ǹ bǎã nɛ.

² Dɛnaa Lawa boo da ka a boo gii-dali lɛ-n doo, á n toa wúlu bɔ ǹ bǎã lɛ ganaa ka paraa nɛ: – Wúlu bɔ ǹ bǎã! Wúlu bɔ ǹ bǎã! Dɛnaa Lawa n kɛ pii: «Á ke, nɛginin goon tá re yii Davida a sumu-n, a tɔ n die goɛ̃ Zoziasi. Bɛa Zoziasi lɛ tá re wúlu bɔ ǹ bǎã kɛa wúlu-bɔlen dii la, wúlu-bɔlen mɛnɛn lɛn bɛ́ da yon gìĩ kɔɔ̃n tiɛ̃ la. Zoziasi tá re minbuiin nɛ wen tiɛ̃ la.»

³ Lawa a boo gii-dali lɛ nə n gɔn waa ǹ nɛ á pɛ: «Wúlu bɔ ǹ bǎã lɛ á die n talɛ kɔn, siĩ nyɔɔ mɛn bɛ́ re goɛ̃ a lalan, bɛ á die kiɛ tán. Ka tá re doɛ̃ bɛ li sonbore, mà Dɛnaa Lawa na á boo da.»

⁴ Kii Zeroboamu lɛ bɛ́ á Lawa a boo gii-dali lɛ ma boo diɛ ka paraa nɛ, Betɛli kiwi a wúlu bɔ ǹ bǎã lɛ ganaa, á n gɔn saa á dia lon wúlu bɔ ǹ bǎã lɛ lalan á paraa: «Ka giĩ kɛ kũ.» Sɛnɛ a n gɔn mɛn lɛ nyaa Lawa a boo gii-dali lɛ ganaa, bɛa gɔn lɛ gã, a ba boe la a tá wusii mɔrɛ a din ganaa doo wa.

⁵ A din biikoo goon lɛ nɛ, wúlu bɔ ǹ bǎã lɛ talakɔn. Siĩ nyɔɔ mɛn goã a lalan bɛ́ kaa tán, ka Dɛnaa Lawa goã a ná a boo gii-dali lɛ da a pɛ ganaa lɔn.

⁶ Kii Zeroboamu lɛ tɔ́n pɛ Lawa a boo gii-dali lɛ nɛ mà a bǐɛ̃ kɔ a na a Lawa, Dɛnaa Lawa lɛ gòã kũ asɛ a lɛa, màn mɛn bɛ́ toɛ a foo basã, asɛ gɔn lɛ boo la a n mɔrɔ asɛ ganaa doɛ̃. Lawa a boo gii-dali lɛ Dɛnaa Lawa gòã kũ, a foo basã, kii lɛ gɔn lɛ tɔ́n boo la, á n mɔrɔ a ganaa doɛ̃, a ná a lɛlɛ ǹ bǎã saa.

⁷ Bɛ kio, kii lɛ pɛ Lawa a boo gii-dali lɛ nɛ: «N ta piɛ kun ka masɛ nɛ, n màn bii. Ma á die bǐɛ̃ biɛ n la ka màn nɛ.»

⁸ Sɛnɛ, Lawa a boo gii-dali lɛ pɛ kii lɛ nɛ: – Haalɛ ta n din nə n gɔn màn talɛɛ koe masɛ la, ma a re woe n piɛ wa. Ma a re màn-bii laanka mu we ma lɛ-n bǎã kɛ-n wa.

⁹ A giala, Dɛnaa Lawa na á pɛ ma nɛ: «N baran toa n màn kɔn bii wa, n baran toa n mu mi wa, bɛ̀ n woomaa bɔ ka zii mɛn nɛ, n bɔyaamaa baran toa n kɔ bɛ lɛ wa.»

¹⁰ Bɛ lɛ nɛ, a bɛ́ n bɔyɛɛ, á zii kɔsɔ saa, a goã á kɔ zii mɛn lɛ á daa Betɛli, a n bɔyaa ka bɛ-n wa.

Lawa a boo gii-dali lɛ n Lawa bɔlɔ tii

¹¹ Bɛa biikoo lɛ li giĩ zizi goon goã giã-n Betɛli Lawa a boo gii-dali ni. Lawa a boo gii-dali lɛ goã á sii mɛn tumaa zɛnaa Betɛli bɛa pinaa kɛ lɛ nɛ, giĩ zizi lɛ a nɛnyaanan nə́ daa bɛn laakalaa nɛ. Lawa a boo gii-dali lɛ goã á boon mɛnɛn dɔn da kii lɛ nɛ, ǹ nə́ bɛn dɔn laakalaa ǹ díi lɛ nɛ.

¹² Ǹ díi lɛ nɔ̀n da ǹ la: «A na á kɔ zii mɛn lɛ á woo? Lawa a boo gii-dali lɛ boe Zudaa, a zii mɛn saa, ǹ nə́ bɛ nyaa nɛ.»

¹³ Á tɔ́n pɛ a nɛnyaanan lɛn manɛ mà ǹ kɛkɛrɛ da dundun la, ǹ kɔ asɛ la! Ǹ dɔn nə́ kɛkɛrɛ da dundun la, ǹ nə́ kɔ la á dii la.

¹⁴ Á yoo á Lawa a boo gii-dali lɛ kio loo á woo dɔ a ganaa giã-n tán Terebɛnti da goon giulun. Á nɔ̀n da la: «Lawa a boo gii-dali mɛn bɔ Zudaa, bɛ n ka n din ni yaa?» Á ná a lɛ si mà asɛ din ni.

¹⁵ Giĩ zizi lɛ pɛ nɛ mà a n ta kun ka asɛ-n piɛ, a màn bii.

¹⁶ Lawa a boo gii-dali lɛ ná a lɛ si kɛnɛn: – Ma a boe la man lɛ goa wa. Ma a boe la ma wo kunun n ni wa. Ma a re màn bii kunun n ni wa, ma a re mu dɔ mii kunun n ni bǎã kɛ-n wa.

¹⁷ A giala, Dɛnaa Lawa na á boo kɛ pɛ ma nɛ: «N baran toa n màn kɔn bii wa, n baran toa n mu mi bɛa bǎã kɛ lɛ-n wa, bɛ̀ n woomaa bɔ ka zii mɛn nɛ, n bɔyaamaa baran toa n kɔ bɛ lɛ wa.»

¹⁸ Giĩ zizi lɛ tɔ́n pɛ nɛ: «Masɛ dɔ n Lawa a boo gii-dali lɛa, ka n dɔ bɛ́ lɔn. Dɛnaa Lawa lon a dia dí-a wole goon dia die pii ma nɛ mà man lɛ goa, n nə n ta kun ka masɛ-n piɛ, n die n màn bii, n mu mi.» Sɛnɛ giĩ zizi Lawa a boo gii-dali lɛ na á goã á soɛ bɔ nɛ.

¹⁹ Lawa a boo gii-dali lɛ nə́ n bɔyaa kun ni, á màn bii a kion, á mu mi.

Yàra Lawa a boo gii-dali lɛ kũ

²⁰ A ǹ toa giã-n tán màn bii ǹ mɛn wàaraa, Dɛnaa Lawa boo da ka giĩ zizi Lawa a boo gii-dali lɛ nɛ, ǹ mɛn lɛ Lawa a boo gii-dali lɛ lɛ goa á daa nɛ.

²¹ Lawa a boo gii-dali mɛn lɛ bɔ Zudaa, giĩ zizi Lawa a boo gii-dali lɛ tɔ́n pɛ bɛ nɛ ka paraa nɛ: – Dɛnaa Lawa n kɛ pii: «Ń Dɛnaa Lawa bɔlɔ tii. N Lawa, Dɛnaa Lawa lɛ goã á n gɔn waa n nɛ ka sii mɛn nɛ, n bɛ si wa.

²² Dɛnaa Lawa bɛ́ á goã á pɛ n nɛ mà n baran toa n màn bii bǎã mɛn lɛ-n wa, mà n baran toa n mu dɔ mi a-n wa, n nə n lɛ goa n woo màn bii walan, ń mu mi a nɛ. Bɛ lɛ tɔ ganaa, n tá re giɛ̃. Sɛnɛ, ǹ nə ǹ digolon bĩ yala mɛn nɛ, n gere ba re n bĩ walan wa.»

²³ Ǹ bɛ́ ǹ nə́ màn bii, ǹ nə́ màn mi ǹ nə́ nya ǹ mɛn wàaraa, giĩ zizi lɛ Lawa a boo gii-dali mɛn lɛ goa á daa nɛ, á kɛkɛrɛ da bɛa dundun la,

²⁴ á kɔ la á woo. A bɛ́ woe, á kaa yàra lɛ zii la, yàra lɛ gòon da a ganaa á dɛ. A gere goã nyɔmaa-n tán zii la, dundun lɛ laanka yàra lɛ goã golee ne a paran li.

²⁵ Min mɛnɛn bɛ́ kiɛ̃, bɛn nə́ gere lɛ yɛ nyɔmaa-n tán zii lɛ la, yàra lɛ ná a genli. Giĩ zizi Lawa a boo gii-dali lɛ goã kiwi mɛn nɛ, ǹ nə́ woo a boo da walan.

²⁶ Giĩ zizi Lawa a boo gii-dali mɛn lɛ goã a ná a lɛ goa, bɛ́ boo lɛ ma, á tɔ́n pɛ: «Lawa a boo gii-dali mɛn lɛ á ke boe Zudaa, á Dɛnaa Lawa bɔlɔ tii bɛ lɛ nɛ! Dɛnaa Lawa na á yàra da a ganaa á kũ á gã, bɛ na á n zɛnaa á kɔnpɛ ka boo kɛ nɛ Dɛnaa Lawa goã á da nɛ.»

²⁷ Bɛ kio, á pɛ a nɛgiĩn manɛ: «Ka kɛkɛrɛ da dundun la ka kɔ ma la!» Ǹ dɔn nə́ kɛkɛrɛ lɛ da dundun lɛ la, ǹ nə́ kɔ la,

²⁸ á woo. Á woo gere lɛ yǎa nyɔmaa-n tán zii lɛ la, dundun lɛ laanka yàra lɛ n tɔn golee ne a genli. Yàra lɛ nə n lɛ da gere lɛ-a wa, a dundun lɛ dɔ kũ wa.

²⁹ Giĩ zizi Lawa a boo gii-dali lɛ Lawa a boo gii-dali lɛ gere saa á da dundun la, á n bɔyaa á woo a kiwi, mà a n die a gɛ̀ koɛ a na a gere bĩ.

³⁰ A na á bĩ a din a sumu minin bĩ ǹ yala-n, ǹ ná a gɛ̀ koa, bɛ̀ ǹ tá wuu pii li: «Ma dɔɔ̃ngiĩ bɔ̀n wooo, kebe!»

³¹ A bɛ́ á bĩ á nya, á pɛ a nɛgiĩn manɛ: «Bɛ̀ masɛ banban wa, ka Lawa a boo gii-dali lɛ bĩ yala mɛn nɛ, ka ma dɔ bĩ walan.

³² A giala, Dɛnaa Lawa boo mɛn wɔ a lɛ-n á da ka paraa nɛ, Betɛli kiwi a wúlu bɔ ǹ bǎã laanka Samarii kiwin a wúlu bɔ ǹ kionən kɛn wɔ paǹ li, bɛ lɛ tá re piɛ̃.»

³³ A laanka bɛ tumaa nɛ, Zeroboamu na a tɔ wɔ ǹ gɔn baraa lɛ kaa wa. A na á goã tɔn minin boe zaman lɛ bii miɛ̃, ǹ wúlu bɔ ǹ bǎãn lɛn wúlu-bɔlen lɛa. Bɛ̀ wúlu lɛ a bɔ sii tá min mɛn ganaa, Zeroboamu nə ǹ dɛnaa biɛ wúlu bɔ ǹ bǎãn lɛn wúlu-bɔle lɛa.

³⁴ Bɛa tɔ wɔ ǹ gɔn kɛ lɛ Zeroboamu a kion minin yii kaa sii baraa nɛ. Bɛ lɛ na á toa ǹ nə́ ǹ bɔ̀n baa ǹ nə́ papaã ǹ nə́ n bɔ kanaa.