Kiin1 12 - LAWA A BOO SONBORE

Izirayeli gána a kiibaa a talakɔn

¹ Roboamu woo Sisɛmu kiwi, a giala walan lɛ nɛ, Izirayeli minin tumaa goã ǹ nə́ daa koa kii lɛa.

² Bɛa biikoo lɛ li, bɛ̀ Naabaati a nɛgiĩ Zeroboamu tá tɔn Ezipti gána nɛ. A na á goã á baa si kii Salomɔn nyɛɛnɛ, á woo giã Ezipti gána lɛ nɛ.

³ Ǹ nə́ minin dia woe lɛ diɛ Zeroboamu la, á daa kun ka Izirayeli a zaman lɛ tumaa nɛ. Ǹ nə́ pɛ Roboamu-n kɛnɛn:

⁴ N di guĩ guguru da wɔ mìi ni. N di a minin nɔmaa ǹ dí ke, ka a guĩ guguru kɛ nɛ á da wɔsɛn mìi ni, bɛn goa n bɔ wɔ mìi ni. Bɛa biikoo li wɔ á re dí nyɛɛ n nɛ.

⁵ Roboamu pɛ ǹ nɛ: «Ka woo bɔrɔ, lɛawaa sɔɔ, ka n bɔyaa ka da ma li. Zaman lɛ woo.»

⁶ Min golen mɛnɛn nə goã dí nyɛɛ kun ka ǹ di Salomɔn nɛ, bɛ̀ a yii bɛ́ tɔn koo, kii Roboamu lɛ kɔn yɛ ka bɛn nɛ, á nɔ̀n da ǹ la: «Wàa yiri ni ka tá koe zaman kɛa lɛ si wɔ paǹ li?»

⁷ Ǹ nə́ pɛ Roboamun nɛ: «Pelo, bɛ̀ ń nə n din baa zaman kɛ lɛ a dí-nyali lɛa, bɛ̀ ń tá dí nyɛɛ ǹ nɛ, bɛ̀ n tá ǹ lɛ sii, bɔlɔ bǐɛ̃ pii ǹ ni, ǹ tá re goɛ̃ n dí-nyalin lɛa miɛ̃ duduu.»

⁸ Sɛnɛ min golen lɛn nə yiri mɛn kɔ Roboamu la, á bɛ toa walan. Min tenən mɛnɛn nə goã dí nyɛɛ nɛ a din miã lɛn lɛa, ǹ nə́ yoo tán kun, á kɔn yɛ ka bɛn dɔn nɛ.

⁹ Á nɔ̀n da ǹ la nɛ: «Wàa yiri ni ka dɔn tá koe, wɔ zaman kɛ lɛ si ni, zaman mɛn lɛ pɛ ma nɛ mà maa díi guĩ guguru mɛn da ǹ mìi ni, mà ma bɛ saa ma bɔ ǹsɛn la.»

¹⁰ Min tenən mɛnɛn lɛn bɛ́ Roboamu miã lɛn lɛa, bɛn ná a lɛ si ǹ nə́ pɛ: «Zaman mɛn lɛ pɛ n nɛ mà n di guĩ guguru da ǹsɛn mìi ni, mà n saa n bɔ ǹsɛn la, a pɛ ǹ nɛ kɛnɛn: Ma gòon nyɔɔn tá gole á la maa díi bonbon ne.

¹¹ Táa maa díi na á guĩ guguru da ka mìi ni, kanna, masɛ n die màn diɛ kaa guĩ lɛ li. Táa maa díi na á ka duwəə ka sɛ̌n nɛ, masɛ n die ka duwii ka sɔsɔrɔ kiɛdɛnan nɛ.»

¹² Lɛawaa sɔɔ bɛ kio, Zeroboamu laanka zaman lɛ tumaa daa Roboamu li, ka kii lɛ goã á pɛ ǹ nɛ lɔn mà ǹ nə bɔyaa ǹ da asɛ li, lɛawaa sɔɔ gɔ́ɔ̃ nɛ.

¹³ Sɛnɛ yiri mɛn bɛ́ min golen lɛn nə́ goã ǹ nə́ kɔ kii lɛ la, á bɛ toa walan á zaman lɛ lɛ si ka boo basaã nɛ.

¹⁴ Min tenən lɛn nə yiri mɛn kɔ la, a na á boo da ka zaman lɛ nɛ, á kɔnpɛ ka bɛ nɛ: «Maa díi guĩ guguru da ka mìi ni, masɛ n die màn diɛ bɛa guĩ lɛ li, maa díi na á ka duwəə ka sɛ̌n nɛ, masɛ n die ka duwii ka sɔsɔrɔ kiɛdɛnan nɛ.»

¹⁵ Kii lɛ nə n too kɔ zaman lɛ lon wa. Dɛnaa Lawa din na á daa ka bɛ nɛ, màn mɛn bɛ́ toɛ a boo lɛ pã, a ǹ mɛn lɛ wɔ Siiloo min Ayia lɛ-n mà a pɛ Nebaati a nɛgiĩ Zeroboamu ni.

Gána lɛ a na kɔn

¹⁶ Izirayeli minin tumaa yɛ mà kii lɛ nə n too kɔ ǹsɛn lon wa. Zaman lɛ tɔ́n kii lɛ lɛ si kɛnɛn: «Wɔa wàa n kiɛ kun ka Davida nɛ? Wɔa sii kɔn ba kɔn wɔlɔ li ka Zesee a nɛgiĩ kɛ-n wa. Izirayeli minin, ka daa wɔ n ta piɛ! Kanna, Davida, n kion a sii yɔrɔ bɔ.» Bɛ kio, Izirayeli minin nə́ kiɛ̃ ǹ nə́ woo piɛ.

¹⁷ Sɛnɛ Izirayeli minin mɛnɛn nə goã giã-n Zudaa gána nɛ, Roboamu giã bɛn mìi la.

¹⁸ Adoramu mɛn bɛ́ pàã dí mìi la, kii Roboamu lɛ bɛ dia Izirayeli nɛnyaanan lɛn li, sɛnɛ Izirayeli minin lɛn tumaa dɛdɛ ka kɔlɔn nɛ, á gã. Kii Roboamu nə́ n nanaa á boo la á dii a wotoro la, á baa si á woo Zeruzalɛmu.

¹⁹ A kũ bɛa biikoo lɛ ganaa, a da kaa pelo lɛ, Izirayeli minin nə́ n gòãn dii Davida a kion minin ganaa.

²⁰ Izirayeli minin lɛn tumaa ma lɔn, mà Zeroboamu nə́ n bɔyaa, ǹ nə́ zaman paã, ǹ nə́ lɛ dia la ǹ nə́ koa kii lɛa Izirayeli minin tumaa mìi la. Zudaa tɔrɔn dininsɔɔ̃nɔn man nə kɔ Davida a kion minin lɛ.

²¹ Roboamu bɛ́ á dɔ Zeruzalɛmu, á Zudaa tɔrɔn laanka Bɛnzamɛn tɔrɔn sɔraasi pipiã duu paabiɛ ka pɔkiwisi (180 000) bii á ǹ kaa kun, mà ǹ zia baa Izirayeli minin ganaa, màn mɛn bɛ́ toɛ, gána lɛ dɔ Salomɔn a nɛgiĩ Roboamu lɛ din ganaa.

²² Sɛnɛ Lawa boo da ka a boo gii-dali Semayia nɛ á pɛ:

²³ – Salomɔn a nɛgiĩ Roboamu lɛ Zudaa gána a kii lɛa, a pɛ nɛ ka Zudaa tɔrɔn nɛ, ka Bɛnzamɛn tɔrɔn laanka zaman gialakun lɛ nɛ,

²⁴ mà Dɛnaa Lawa n kɛ pii: «Ka doamaa bie ka wo zia baa ka dɔɔ̃n Izirayeli minin lɛn ganaa wa. Didie nə n bɔyaa a wo piɛ, a giala, masɛ din ni má sii kɛ lɛ zɛnaa. Ǹ dɔn nə́ Dɛnaa Lawa bɔlɔ si ǹ nə́ n bɔyaa ka Dɛnaa Lawa pɛ ǹ nɛ lɔn.»

Zeroboamu a sii baraa

²⁵ Zeroboamu kungɔn dɔ Sisɛmu kiwi ganaa, Efrayimu kele yii ni, á giã walan. Bɛ kio, á soo walan, á woo kungɔn dɔ Penuweli kiwi ganaa.

²⁶ Zeroboamu taasɛ a din gɔ́ɔ̃ nɛ mà sii kɛ bɛ́ gòã mɛn ganaa, mà kiibaa lɛ á boe la a wusoo a dɔ Davida a minin ganaa.

²⁷ Mà bɛ̀ zaman kɛ goã woe wúlu boe Lawa a kion miɛ̃, Zeruzalɛmu, mà ǹ dɛnaagiĩ Roboamu lɛ, Zudaa gána a kii lɛa, mà bɛ sii tá re wusii a wɔ ǹ foo ne, mà asɛ mɛn nə́ ke, mà ǹ tá re asɛ dii.

²⁸ Kii Zeroboamu nɔ̀n da min tɛnɛn la ka yiri ni, á diin nɛ nyín paa zɛnaa ka sana nɛ, á pɛ zaman lɛ nɛ: «Kaa wo Zeruzalɛmu lɛ la yii ni, Izirayeli minin lɛn, kaa dìn lɛn nə́ ke, kɛn lɛn man nə́ ka waa Ezipti gána nɛ ǹ nə́ soo ka nɛ.»

²⁹ Á diin nɛ nyín sanadɛnaa lɛ a goon koa Betɛli kiwi, á goon kɛ dɔ koa Dan kiwi.

³⁰ Bɛ lɛ na á sii baraa baa. A giala zaman lɛ na á kaa diin nɛ nyín lɛ goon nyɛɛnɛ, yǎa Dan kiwi.

³¹ Zeroboamu wúlu bɔ ǹ kionən dɔdɔ tentenen mìi ni. Á minin bɔ zaman lɛ bii miɛ̃, á ǹ baa wúlu-bɔlen lɛa, ǹ nə́ ǹ ba *Levii tɔrɔn dɔn lɛa wa.

³² Mui mɛn bɛ́ lɛ̀ a mui a kiwisi baa ǹ wɔ lɛa, Zeroboamu zɔ́n goon zɛnaa bɛ li, a lɛawaa fulusoorobaa ǹ wɔ pinaa. Á bɛ baa zɔ́n lɛa ka ǹ bɛ́ nɛn bɛ̀ ǹ zɛnaa Zudaa gána-n lɔn. Zeroboamu woo *wúlu bɔ ǹ bǎã nɛ. A na á zɛnaa miɛ̃ Betɛli dɔ nɛ, a diin nɛ nyínin mɛnɛn lɛn zɛnaa, á wúlu bɔ ǹ ganaa. A wúlu bɔ ǹ bǎãn mɛnɛn dɔ, á bɛn wúlu-bɔlen bɔ á ǹ koa Betɛli.

³³ A goã á wúlu bɔ ǹ bǎã mɛn dɔ Betɛli, á woo walan lɛ̀ a mui kiwisibaa ǹ wɔ a lɛawaa fulusooro. Bɛa lɛawaa lɛ nɛ, á bɔ a mìi gialaa miɛ̃. A na á baa zɔ́n lɛa Izirayeli minin wɔ lɛa, á woo wúlu bɔ walan á màn giĩ kɔɔ̃n tã.