Kiin1 10 - LAWA A BOO SONBORE

Saabaa gána a kii lɔ n woe n yii koe Salomɔn ganaa

¹ Lɔ mɛn bɛ́ Saabaa gána a kii lɛa, bɛ ma mà Lawa barka nɛ, mà Salomɔn tɔ soo. Bɛ lɛ nɛ, á tɔ́n daa ga a giala-a ka boo giməən ne.

² A na á daa Zeruzalɛmu ka zaman gole ne a kio. Nyɔɔmaan nə́ goã kun ni, nyɔɔ gìĩ kɔɔ̃n nə́ ǹ dɔ̀ɔ̃ nɛ, ka sana didi laanka kɔlɔ giɔ̀mɔ kaka-a nɛ. A bɛ́ á dɔ Salomɔn li, màn mɛn din tumaa goã a gɔ́ɔ̃ nɛ, á bɛ yii pɛ nɛ.

³ Salomɔn ná a nɔ̀n-diɛn lɛn tumaa a lɛ-sii kɔ la. Nɔ̀n-diɛ lɛ kɔn kaka kɔ kii lɛ ganaa, á fɔ̃ a lɛ sii li wa.

⁴ Saabaa gána a kii lɔ lɛ Salomɔn a sii-doɛ̃ gole lɛ dɔ̃. Salomɔn kion mɛn dɔ á bɛ dɔ yɛ.

⁵ Salomɔn goã màn mɛn bii a tabala la, a dí-nyalin nə goã wɛɛ maa, a kion dí-nyalin nə goã dí nyɛɛ lɔn, ǹ goã mɔnaan mɛnɛn we, min mɛnɛn nə goã Salomɔn a màn-bii koe la, Salomɔn goã wúlu mànan mɛnɛn tiɛ̃ Dɛnaa Lawa a kion kɛ nɛ, kii lɔ lɛ bɛ́ á bɛn yɛ, á n kaãbaa ǹ ganaa parsiini.

⁶ Á tɔ́n pɛ kii Salomɔn lɛ nɛ: «Ma goã n toɛ maa gána nɛ, má n màn mɛn miɛ n da ǹ boon laanka n sii-doɛ̃ lɛ wɔ paǹ li, taãn nɛ.

⁷ Sɛnɛ ma goã bɛa boon kɛn lɛn sii taãn lɛa wa, yǎa maa daa ke má tɔ́n yɛ sɔ̀ɔ̃nɛ. Á ke, ǹ goã ǹ ná a talɛɛ din pɛ ma-n wa. Ma goã màn mɛn miɛ n wɔ paǹ li, n màndɛnaabaa lɛ laanka n sii-doɛ̃ lɛ la bɛ nɛ.

⁸ N minin wɔ na á bǐɛ̃ kɔ, n dí-nyalin dɔn wɔ na á bǐɛ̃ kɔ, ǹsɛn mɛnɛn bɛ́ boe la ǹ giã n yɔrɔ-a biikoo yii li, ǹ nə n too kɔ n sii dɔ ǹ boo ganaa.

⁹ Barka á Lawa, Dɛnaa Lawa lɛ ganaa, kɛ lɛ á bǐɛ̃ kɔ n ganaa, á n da Izirayeli a kiibaa la. A giala Izirayeli sii n kɔɔ̃n Dɛnaa Lawa ganaa duduu, bɛ lɛ na á toa á n koa kii lɛa mà n minin sii yɔrɔ bɔ, n sii pepere nya ǹ nɛ.»

¹⁰ Á bǐɛ̃ baa kii Salomɔn lɛ la ka sana tɔnɔ sɔɔ ka talɛɛ nɛ, ka nyɔɔ gìĩ kɔɔ̃n gigiã laanka kɔlɔ giɔ̀mɔ kaka-an nɛ. Saabaa gána a kii lɔ lɛ nyɔɔ gìĩ kɔɔ̃n gigiã mɛn kɔ Salomɔn la, a bin bɛ miã yɛ duduu doo wa.

¹¹ Ǹ goã ǹ nə́ sana goa ka Iraamu a mu la ǹ goon mɛnɛn nɛ Ofiiri kiwi, ǹ nə́ gɔn giɔ̀mɔ kaka goa nɛ, ka kɔlɔ giɔ̀mɔ kaka-an nɛ.

¹² Bɛa gɔn giɔ̀mɔ kaka kɛ lɛ nɛ, kii lɛ baa karasa lɛa Dɛnaa Lawa a kion lɛ laanka kii kion lɛ ganaa. Á kɔnkoɛɛ̃nɛn dɔn laanka tùtun zɛnaa nɛ, á ǹ kɔ a kɔlɔn la. Bɛa gɔn giɔ̀mɔ kaka lɛ miã tɔn daa wa, a da kaa pelo lɛ, ǹ miã bin tɔn yɛ wa.

Salomɔn a pàã laanka a naforo

¹³ Màn mɛn din tumaa sii Saabaa gána a kii lɔ lɛ kũ, á bɛn yii nyankɔ, Salomɔn ná a yii kɔ la. Salomɔn bɔ a din ni á bǐɛ̃ baa ǹ mànan mɛnɛn kɔ la, bɛn ba a-n wa. Bɛ kio á n bɔyaa á woo a gána nɛ, a laanka a dí-nyalin ni.

¹⁴ Lɛ̀ tunaa nɛ Salomɔn bɛ́ sana mɛn yii, a gugurubaa tá doe kilo duu fuə (20 000).

¹⁵ Sana lɛ mɛn bɛ́ boe zii tɔ wolen li, pii-kɔlen ne, lɛ̀nyɛɛn gánan kiin tumaa nɛ, gána lɛ a sii yɔrɔ-bɔlen ne, nyín giɔ̀mɔ lɛa, bɛn ba a-n wa.

¹⁶ Kii Salomɔn goóro dadara biɛpaa (200) zɛnaa, sana nə́ ǹ la. A na á sana kilo sɔrɔ kaa goóro lɛ a gogoonmaa la.

¹⁷ Á góoro bɔnboɛɛn biɛsɔɔ (300) zɛnaa, sana nə́ ǹ la, a na á sana kilo goon ka talɛɛ kaa goóro lɛ a gogoonmaa la. Kii lɛ goóron lɛn kaa kion kɛ nɛ ǹ nə́ bíi "Liban daã kion".

¹⁸ Kii lɛ kii dankan gole zɛnaa ka don a díi sɔ nɛ, á sana yoreen yoreen kaa la.

¹⁹ Kòrò sɔrɔ na á goã bɛa dankan lɛ a dii ǹ bǎã ganaa, a dɔ̀ɔ̃ tiləə ǹ bǎã na á goã kərii ni. Gùrùn man nə́ goã dankan lɛ paǹ yii ganaa. Yàra nyín paa na á goã gùrùn lɛn genli.

²⁰ Yàra fulupaa na á goã dii ǹ bǎã lɛ a kòròn lɛn ganaa a paran li. Ǹ bin bɛ miã zɛnaa gána kɔn nɛ wa.

²¹ Kii Salomɔn a màn mi ǹ mànan tumaa na á goã sana lɛa. Mànan mɛnɛn tumaa goã "Liban daã kion" kɛ nɛ, ǹ yii na á goã sana yoreen yoreen lɛa. Ǹ kɔn goã wɔrɔ lɛa wa, a giala Salomɔn a wasa nɛ, wɔrɔ goã màn kɔn lɛa ǹ gɔn wa.

²² Bǎã sɔsɔɔ mu baa ǹ goon dɔn nə́ goã Salomɔn lon, ǹ nə́ ǹ diɛ baa-a kun ka Iraamu wɔn nɛ. Lɛ̀ sɔsɔɔ gɔ́ɔ̃ nɛ, maǹ nə́ n bɔyɛɛ ka bǎã sɔsɔɔ mu baa ǹ goon lɛn nɛ, sana nə́ ǹ nɛ, ka wɔrɔ nɛ, ka don a díi sɔ nɛ, ka káran laanka kokolo tɔrɔn kɔnɔn nɛ.

²³ Salomɔn a pàãmabaa la kanaa a kiin tumaa wɔ nɛ, a sii-doɛ̃ dɔ́ la ǹ wɔ nɛ.

²⁴ Lawa sii-doɛ̃ mɛn kɔ Salomɔn la, kanaa kuturu na á goã giɛ li mà ǹsɛn nə Salomɔn yɛ, ǹ nə n too kɔ bɛ ganaa.

²⁵ Didie na á goã woe ka a bǐɛ̃baa ǹ màn nɛ: Wɔrɔ mànan laanka sana mànan manɛ, mɔnaan manɛ, ziabaa ǹ mànan manɛ, nyɔɔ gìĩ kɔɔ̃nɔn manɛ, sùin laanka dundun sùin manɛ, bɛ na á goã n zɛnɛɛ miɛ̃ lɛ̀ woo lɛ̀.

²⁶ Salomɔn zia da ǹ wotoron kaa kɔn li, ka dii sùi la wolen ne. Zia da ǹ wotoron lɛn man nə́ goã duu goon biɛsii (1 400), dii sùi la wolen man nə́ goã duu fulupaa (12 000). Á ǹ tɛnɛn koa, zia da ǹ wotoron koa ǹ kiwin ni, á ǹ tɛnɛn toa a din li, Zeruzalɛmu kiwi.

²⁷ Kii lɛ toa wɔrɔ mɔnaa Zeruzalɛmu ka kɔlɔ bɛ́ lɔn, á toa *sɛdrə dan dɔn nə́ mɔnaa ka *Sefelaa a nyankɔrɔ lɛ kɛa sikomɔɔrɔ dan bɛ́ lɔn.

²⁸ Sùin mɛnɛn nə goã Salomɔn lon, maǹ nə́ goã boe ǹ ne Ezipti ka Kue gána nɛ. A pii-kɔlen lɛn man nə́ goã ǹ pii walan.

²⁹ Zia da ǹ wotoro goon lɛ, n pii Ezipti gána nɛ, wɔrɔ biɛsɔrɔ (600) nɛ, sùi goon nə wɔrɔ paabiɛ ka posooro (150). Ɛti tɔrɔn kiin tumaa laanka Siirii gána kiin tumaa na á goã zia da ǹ wotoron lɛn laanka sùin lɛn pii bɛa pii-kɔlen lɛn lon a din wɔrɔ lɛ goon lɛ ganaa.