Zɔbu 7 - LAWA A BOO SONBORE

Zɔbu na a busii pii Lawa nɛ

¹ Minbuiin nɛ a sii ba a din gɔn wa. Kanaa lɛ á kaka á la yii ni. Minbuiin nɛ na a nɛ ka sɔraasi bɛ́ lɔn. A n ka dí-nyali bɛ́ lɔn.

² A n ka bɛ̀rɛ bɛ́ lɔn, giɛ wúlu li mà asɛ nə n susu li. A n ka dí-nyali bɛ́ lɔn, n yii diɛ a saraa la.

³ A din goon ne, maa saraa n ka mui gigiã a là-paparɛɛ nɛ, ma màn mɛn yɛ nɔmaa nɛ tèlò damata gɔ́ɔ̃ nɛ.

⁴ Bɛ̀ má waa tán, man nɔ̀n diɛ ma din la: man die yui biĩ, biĩ-n lɛ̀ á wɛɛ? Taasiɛ kɛ n ma gialaa miɛ̃, yǎa lɛ̀ wɛɛ.

⁵ Ma gɔ̀nɔn tumaa nyuun kɔ, a tumaa koo baa. Ma gɔ̀nɔn nə n dii, a n nyiǹ boe.

⁶ Maa lɛawaan lɛn man woe belebele, ka kɔ̀rɔ-tãli a dooraa bɛ́ lɔn. Maǹ die nyɛɛ, foo-doa banban doo wa.

⁷ Dɛnaa, n yiri koa li n dɔ̃ mà maa yiikoonaabaa lɛ n ka piɛ̃ kooro bɛ́ lɔn. Masɛ bie re yii-nyɛɛ yii doo wa.

⁸ Min yii á re ma yii doo wa. N tá re giɛ, sɛnɛ n ba re ma yii wa.

Zɔbu mà Lawa na asɛ toa kiĩni

⁹ Labara n sasawɛɛ a papaã. Min mɛn dɔ bɛ́ woe geren piɛ, a n miɛ̃, a bie woe á n bɔyɛɛ wa.

¹⁰ A wusii a da piɛ doo wa, a piɛ minin dinin yiri n boe ne.

Zɔbu foo a busu Lawa li boo

¹¹ Bɛ lɛ n ke, ma a re n lɛ tiɛ̃ wa. Man maa foo busu ǹ boo diɛ. Man gini maa foo busii taman yii.

¹² Wàa na á baa, n tá ma lɛduĩ kɛnɛn, ka mu li ǹ màn babaraa n ma nɛ?

¹³ Man taasɛ, máa bɛ̀ má waa tán, ma foo á re wɛɛ, ma foo á re basɛ̃.

¹⁴ Bɛa biikoo lɛ din ni, n tá nyɛ́ɛ diɛ ma ganaa ka narɛɛn nɛ, n nə́ nyɛ́ɛ diɛ ma ganaa ka sii-nyaan nɛ.

¹⁵ Bɔlɔ da biɛ-n din sii n ma ganaa. Gɛ̀ á soɛ ma ganaa, á la ma we kooron kɛn manɛ!

¹⁶ A din ma gɔ̀nɔn bɔ. Ma bɛ́ ma bie re liɛ doo wa, n gɔn bɔ ma ganaa, maa tá kanaa là banban.

¹⁷ Minbuiin nɛ n wàa lɛa, n tɔn na a sii baa sii gole lɛa? A n wàa lɛa, n tɔn nə n parsii bɔ li kɛnɛn?

¹⁸ Lɛawaa gogoonmaa, n yii n la gongon biikoo tumaa li, n ná a sii gɔsiɛ.

¹⁹ N yii n die goɛ̃ ma la kɛnɛn yǎa biĩ? N tá re toɛ man lɛn sɛ̀ din mui le?

²⁰ N din nə giɛ minbuiin nɛ a sii ganaa. Bɛ̀ má sii baraa zɛnaa, man má wàa la n la? Wàa na á baa ń ma koa n yɔrɔ-a, n tá ma piɛ̃? Maa sii mɛn nə guĩ lɛa n ganaa?

²¹ N ba boe la n maa sii baraa toa ma-n wa? N ba boe la n kiɛ̃ maa sã la wa? A giala, kànaa ka boɛɛn nɛ, ma á re wɛɛ tán tii li. N tá re giɛ ma li, sɛnɛ ma a re goɛ̃ ma tan wa.»